'ಕೊರೊನಾ ಪಾಸಿಟಿವ್ ಬಂದ್ರೆ ಬೇಜಾರ್ ಆಗ್ಬೇಡಿ, ಭಯಪಡಬೇಡಿ, ಧೈರ್ಯವಾಗಿ ಎದುರಿಸಿ'- ಪುನೀತ್ ರಾಜ್ಕುಮಾರ್
ಕೊರೊನಾ ಮಹಾಮಾರಿ ದೇಶದ ಜನರಲ್ಲಿ ಮತ್ತೆ ಆತಂಕ್ಕೆ ದಾರಿ ಮಾಡಿಕೊಡುತ್ತಿದೆ. ದಿನನಿತ್ಯ ಪತ್ತೆಯಾಗುತ್ತಿರುವ ಹೊಸ ಪ್ರಕರಣಗಳು ತಲ್ಲಣ ಉಂಟು ಮಾಡುತ್ತಿವೆ. ಇಂಥ ಸಮಯದಲ್ಲಿ ನಟ ಪುನೀತ್ ರಾಜ್ಕುಮಾರ್ ಅವರು ಜನರಲ್ಲಿ ಧೈರ್ಯ ತುಂಬುವ ಕೆಲಸ ಮಾಡಿದ್ದಾರೆ.
Admin
0
49
ಈಗ ಎಲ್ಲೆಡೆ ಮತ್ತೆ ಮಹಾಮಾರಿ ಕೊರೊನಾ ಆರ್ಭಟ ಶುರುವಾಗಿದೆ. ದೇಶದಲ್ಲಿ ಪ್ರತಿನಿತ್ಯ ಹೊಸ ಪ್ರಕರಣಗಳ ಸಂಖ್ಯೆ 3 ಲಕ್ಷ ದಾಟಿದೆ. ಜನರಲ್ಲಿ ಈಗ ಆತಂಕ ಮನೆ ಮಾಡಿದೆ. ಇಂತಹ ಸಮಯದಲ್ಲಿ ಜನರಿಗೆ ಧೈರ್ಯ ತುಂಬುವ ಕೆಲಸ ಆಗಬೇಕು. ಇದೀಗ 'ಪವರ್ ಸ್ಟಾರ್' ಅಂಥದ್ದೊಂದು ಕೆಲಸ ಮಾಡಿದ್ದಾರೆ. 'ಕೊರೊನಾ ಪಾಸಿಟಿವ್ ಬಂದ್ರೆ ಬೇಜಾರ್ ಆಗ್ಬೇಡಿ, ಭಯಪಡಬೇಡಿ. ಧೈರ್ಯವಾಗಿ ಎದುರಿಸಿ. ಮಾಸ್ಕ್ ಧರಿಸೋದು ಮರಿಬೇಡಿ' ಎಂದು ಅಪ್ಪು ಮನವಿ ಮಾಡಿದ್ದಾರೆ.
ನಗರ ಪೊಲೀಸ್ ಇಲಾಖೆ ಟ್ವಿಟರ್‌ ಪೇಜ್‌ನಲ್ಲಿ ಪುನೀತ್ ರಾಜ್ಕುಮಾರ್ ಮಾತನಾಡಿರುವ ವಿಡಿಯೋ ಅಪ್‌ಲೋಡ್ ಆಗಿದೆ. ಆ ವಿಡಿಯೋದಲ್ಲಿ ಮಾತನಾಡಿರುವ ಅವರು, 'ಎಲ್ಲರಿಗೂ ನಮಸ್ಕಾರ, ಇವಾಗೇನು ಈ ಕೊರೊನಾ ಎರಡನೇ ಅಲೆ ಶುರುವಾಗಿದೆ, ಇದರ ವಿರುದ್ಧ ಎಲ್ಲರೂ ಒಗ್ಗಟ್ಟಾಗಿ ಕೆಲಸ ಮಾಡಬೇಕಿದೆ. ಮೊದಲನೆಯದಾಗಿ ವ್ಯಾಕ್ಸಿನೇಷನ್‌ ಶುರುವಾಗಿದೆ. ವ್ಯಾಕ್ಸಿನ್ ತುಂಬ ಸುರಕ್ಷಿತವಾಗಿದೆ. ನಾನು ಕೂಡ ಮೊದಲ ಹಂತದ ವ್ಯಾಕ್ಸಿನ್ ತೆಗೆದುಕೊಂಡಿದ್ದೇನೆ. ಹಾಗಾಗಿ, ಎಲ್ಲರೂ ಹೋಗಿ ವ್ಯಾಕ್ಸಿನ್ ತೆಗೆದುಕೊಳ್ಳಿ' ಎಂದು ಸಲಹೆ ನೀಡಿದ್ದಾರೆ.
'ಮಾಸ್ಕ್ ಬಳಸವುದನ್ನು ಮರೆಯಬೇಡಿ'ದಯವಿಟ್ಟು ಎಲ್ಲ ಕಡೆ ಮಾಸ್ಕ್‌ಗಳನ್ನು ಹಾಕಿಕೊಳ್ಳುವುದನ್ನು ಮರೆಯಬೇಡಿ. ಅದರಲ್ಲೂ ಮುಖ್ಯವಾಗಿ ಜನರ ಮಧ್ಯೆ ಇರುವಾಗ, ಕೆಲಸಗಳಿಗೆ ಹೋಗುವಾಗ ಮರೆಯದೇ ಮಾಸ್ಕ್ ಬಳಸಿ. ಈ ಹೊತ್ತಿನಲ್ಲಿ ಮಾಸ್ಕ್ ತುಂಬ ಮಹತ್ವದ್ದು. ಈಗ ಕೊರೊನಾ ಅಲೆ ಹೆಚ್ಚಾಗುತ್ತಿದ್ದು, ಆಕಸ್ಮಾತ್ ನಮಗೆ ಸೋಂಕು ತಗುಲಿದರೆ, ಭಯಪಡೋದು ಬೇಡ. ಧೈರ್ಯವಾಗಿರೋಣ. ಸಂಬಂಧಪಟ್ಟವರಿಗೆ ಕರೆ ಮಾಡಿ, ಆಸ್ಪತ್ರೆಗೆ ಹೋಗಬೇಕಾ? ಮನೆಯಲ್ಲೇ ಇರೋದಾ ಎಂದು ತಿಳಿದುಕೊಂಡು ಚಿಕಿತ್ಸೆ ಪಡೆಯೋಣ. ಮನೆಯಲ್ಲೇ ಕ್ವಾರಂಟೈನ್ ಆಗಿ, ನಮ್ಮ ಕೊರೊನಾ ವರದಿ ನೆಗೆಟಿವ್ ಆದಮೇಲೆ ಹೊರಗೆ ಬರೋಣ. ಅದರ ಜೊತೆಗೆ ಸರ್ಕಾರದ ರೂಲ್ಸ್‌ಗಳನ್ನು ನಾವು ಫಾಲೋ ಮಾಡೋಣ' ಎಂದು ಹೇಳಿದ್ದಾರೆ ಅವರು.
ಭಯ ಪಡಬೇಡಿ, ಕಾನ್ಫಿಡೆಂಟ್ ಆಗಿರಿ!'ಕೊರೊನಾ ಬಂದರೆ ಬೇಜಾರ್ ಮಾಡ್ಕೋಳ್ಳಬೇಡಿ. ಧೈರ್ಯವಾಗಿದ್ದು, ಬೇಕಾದ ವೈದ್ಯಕೀಯ ಚಿಕಿತ್ಸೆ ಪಡೆಯೋಣ. ಇದರಲ್ಲಿ ನಾಚಿಕೆ ಪಟ್ಟುಕೊಳ್ಳುವುದು, ಭಯ ಪಡುವುದು ಏನೂ ಇಲ್ಲ. ತುಂಬ ಕಾನ್ಫಿಡೆಂಟ್ ಆಗಿರಿ. ನಮ್ಮಮ್ಮ ಕೆಲಸಗಳನ್ನು ನಾವು ಮಾಡಲೇಬೇಕು. ಆದ್ದರಿಂದ ನಿಯಮಗಳನ್ನು ಫಾಲೋ ಮಾಡಿಕೊಂಡು ಕೆಲಸ ಮಾಡಿಕೊಳ್ಳೋಣ. ಇದೆಲ್ಲದರ ಜೊತೆಗೆ ಕೊರೊನಾ ವಾರಿಯರ್ಸ್‌ ಬಗ್ಗೆನೂ ಯೋಚನೆ ಮಾಡಬೇಕು. ಕೊರೊನಾ ಬಗ್ಗೆ ಯಾರೂ ಭಯಪಡಬೇಡಿ, ವ್ಯಾಕ್ಸಿನ್ ತೆಗೆದುಕೊಳ್ಳಿ, ಮಾಸ್ಕ್ ಮರೆಯದೇ ಬಳಸಿ' ಎಂದಿದ್ದಾರೆ ಪುನೀತ್ ರಾಜ್ಕುಮಾರ್.
