ಕೊರೊನಾ ನಡುವೆಯೂ ಐಸಿಐಸಿಐ ಬ್ಯಾಂಕ್‌ ಲಾಭದಲ್ಲಿ ಬರೋಬ್ಬರಿ 260.5% ಏರಿಕೆ!

ಮುಂಬಯಿ: ಕೊರೊನಾ ಬಿಕ್ಕಟ್ಟಿನ ನಡುವೆಯೂ ಖಾಸಗಿ ರಂಗದ ಪ್ರಮುಖ ಐಸಿಐಸಿಐ ಬ್ಯಾಂಕ್‌ ಮಾರ್ಚ್‌ಗೆ ಅಂತ್ಯಗೊಂಡ ತ್ರೈಮಾಸಿಕದಲ್ಲಿ ಭರ್ಜರಿ 4,402.61 ಕೋಟಿ ರೂ. ಲಾಭ ಗಳಿಸಿದೆ. ಹಿಂದಿನ ವರ್ಷದ ಇದೇ ಅವಧಿಗೆ ಹೋಲಿಸಿದರೆ ಬ್ಯಾಂಕ್‌ ಲಾಭದಲ್ಲಿ ಅಚ್ಚರಿಯ ಶೇ. 260.5 ರಷ್ಟು ಹೆಚ್ಚಳವಾಗಿದೆ. ಕಳೆದ ವರ್ಷ ನಾಲ್ಕನೇ ತ್ರೈಮಾಸಿಕದಲ್ಲಿ ಸಂಸ್ಥೆ 1,221.4 ಕೋಟಿ ರೂ. ಲಾಭ ಗಳಿಸಿತ್ತು. ನಿವ್ವಳ ಬಡ್ಡಿ ಆದಾಯ ಶೇ.16.9ರಷ್ಟು ಏರಿಕೆಯಾಗಿದ್ದು 10,431.13 ಕೋಟಿ ರೂ. ತಲುಪಿದೆ. ಬ್ಯಾಂಕ್‌ ನೀಡಿರುವ ಸಾಲದ ಪ್ರಮಾಣದಲ್ಲಿಯೂ ಶೇ. 14ರಷ್ಟು ಏರಿಕೆಯಾಗಿದ್ದು 7.33 ಲಕ್ಷ ಕೋಟಿ ರೂ. ತಲುಪಿದೆ. ಇದರಲ್ಲಿ ಚಿಲ್ಲರೆ ಸಾಲದ ಪ್ರಮಾಣವೇ ಶೇ.67ರಷ್ಟಿದೆ. ಇನ್ನು ಬ್ಯಾಂಕ್‌ನಲ್ಲಿ ಇಡಲಾಗಿರುವ ಠೇವಣಿ ಹಣ 9.3 ಲಕ್ಷ ಕೋಟಿ ರೂ. ತಲುಪಿದ್ದು, ಶೇ. 21ರಷ್ಟು ಬೆಳವಣಿಗೆ ಕಂಡಿದೆ. ಮಾರ್ಚ್‌ ಅಂತ್ಯಕ್ಕೆ ಬ್ಯಾಂಕ್‌ 5,266 ಶಾಖೆಗಳು ಮತ್ತು 14,136 ಎಟಿಎಂಗಳ ನೆಟ್ವರ್ಕ್‌ ಹೊಂದಿದೆ. ಜತೆಗೆ ಎನ್‌ಪಿಎ (ಅನುತ್ಪಾದಕ ಆಸ್ತಿ - ನಾನ್‌ ಪರ್ಫಾರ್ಮಿಂಗ್‌ ಅಸೆಟ್‌) ಅನುಪಾತ ಶೇ. 1.26ರಿಂದ 1.14ಕ್ಕೆ ಇಳಿಕೆಯಾಗಿದೆ. ಇನ್ನು ಕೊರೊನಾ ಸಂಬಂಧಿತ ಬಿಕ್ಕಟ್ಟಿಗೆಂದೇ ಬ್ಯಾಂಕ್‌ ಒಟ್ಟು 7,475 ಕೋಟಿ ರೂ. ಮೀಸಲಿಟ್ಟಿದೆ. ಬ್ಯಾಂಕ್‌ನ ಬಡ್ಡಿಯೇತರ ಆದಾಯ ಶೇ.3.4ರಷ್ಟು ಕುಸಿದಿದ್ದು 4,111,35 ಕೋಟಿ ರೂ.ಗೆ ಇಳಿಕೆಯಾಗಿದೆ. ಶುಲ್ಕ ಆದಾಯ ಶೇ.6ರಷ್ಟು ಹೆಚ್ಚಾಗಿದ್ದು 3,815 ಕೋಟಿ ರೂ. ತಲುಪಿದೆ. ನಿಬಂಧನೆ ಪೂರ್ವ ಕಂಪನಿಯ ಲಾಭ ಶೇ.15.6ರಷ್ಟು ಏರಿಕೆಯಾಗಿದ್ದು 8,539.83 ಕೋಟಿ ರೂ. ತಲುಪಿದೆ. ತೆರಿಗೆ ಖರ್ಚುಗಳು ಇದೇ ವೇಳೆ 201.29 ಕೋಟಿ ರೂ.ನಿಂದ 1,253.75 ಕೋಟಿ ರೂ.ಗೆ ಹೆಚ್ಚಳವಾಗಿದೆ. ಇಡೀ ವರ್ಷವನ್ನು ಪರಿಗಣನೆಗೆ ತೆಗೆದುಕೊಂಡಾಗ ಬ್ಯಾಂಕ್‌ನ ಲಾಭ ಶೇ.104.2ರಷ್ಟು ಭಾರಿ ಏರಿಕೆ ಕಂಡಿದ್ದು 16,192.68 ಕೋಟಿ ರೂ. ಮುಟ್ಟಿದೆ. ಇದೇ ವೇಳೆ ಬ್ಯಾಂಕ್‌ ಪ್ರತಿ ಷೇರಿಗೆ 2 ರೂ. ಲಾಭಾಂಶ ಘೋಷಿಸಿದೆ.