ರಾಜ್ಯದ ವಾರ್ಷಿಕ ಸಾಲ ಯೋಜನೆ ಪ್ರಕಟ, ಒಟ್ಟು 4,96,371 ಕೋಟಿ ರೂ. ನಿಗದಿ

ಬೆಂಗಳೂರು: 2021-22ನೇ ಸಾಲಿನ ರಾಜ್ಯ ವಾರ್ಷಿಕ ಯೋಜನೆ ಪ್ರಕಟಿಸಲಾಗಿದ್ದು, ಈ ವರ್ಷ 4,96,371 ಕೋಟಿ ರೂ. ನಿಗದಿಪಡಿಸಲಾಗಿದೆ. ಕಳೆದ ವರ್ಷ 3,65,556 ಕೋಟಿ ರೂ. ನಿಗದಿಯಾಗಿತ್ತು. 2020-21ನೇ ಸಾಲಿಗೆ ಹೋಲಿಸಿದರೆ ಈ ವರ್ಷದ ಸಾಲದ ಪ್ರಮಾಣ ಶೇ. 35.78ರಷ್ಟು ಅಧಿಕವಾಗಿದೆ. ನಗರದಲ್ಲಿ ನಡೆದ ರಾಜ್ಯಮಟ್ಟದ ಬ್ಯಾಂಕರ್‌ಗಳ 153ನೇ ಸಭೆಯಲ್ಲಿ ರಾಜ್ಯ ಸರಕಾರದ ಮುಖ್ಯ ಕಾರ್ಯದರ್ಶಿ ಪಿ. ರವಿಕುಮಾರ್‌ ಅವರು ಸಾಲ ಯೋಜನೆ ಬಿಡುಗಡೆ ಮಾಡಿದರು. ಕೆನರಾ ಬ್ಯಾಂಕ್‌ನ ಕಾರ್ಯನಿರ್ವಾಹಕ ನಿರ್ದೇಶಕಿ ಮಣಿಮೇಖಲೈ ಸ್ವಾಗತಿಸಿದರು. ಅಭಿವೃದ್ಧಿ ಆಯುಕ್ತೆ ಹಾಗೂ ಹೆಚ್ಚುವರಿ ಮುಖ್ಯ ಕಾರ್ಯದರ್ಶಿ ವಂದಿತಾ ಶರ್ಮಾ, ಆರ್‌ಬಿಐನ ಪ್ರಾದೇಶಿಕ ನಿರ್ದೇಶಕ ಜೋಸ್‌ ಜೆ. ಕಟ್ಟೂರ್‌, ನಬಾರ್ಡ್‌ ಚೀಫ್‌ ಜನರಲ್‌ ಮ್ಯಾನೇಜರ್‌ ನೀರಜ್‌ಕುಮಾರ್‌ ವರ್ಮಾ ಮತ್ತಿತರರು ಸಭೆಯಲ್ಲಿ ಪಾಲ್ಗೊಂಡಿದ್ದರು. 2021-22ನೇ ಸಾಲಿಗೆ ನಿಗದಿಪಡಿಸಿರುವ ರಾಜ್ಯ ಬಗ್ಗೆ ಎಸ್‌ಎಲ್‌ಬಿಸಿ ಸಂಚಾಲಕ ಚಂದ್ರಶೇಖರರಾವ್‌ ಸಭೆಗೆ ಮಾಹಿತಿ ಒದಗಿಸಿದರು. ಒಟ್ಟು ಆದ್ಯತಾ ವಲಯಕ್ಕೆ 2,92.391.90 ಕೋಟಿ ರೂ. ಸಾಲ ಮೀಸಲಿಡಲಾಗಿದ್ದು, ಶೇ 14.24ರಷ್ಟು ಬೆಳವಣಿಗೆ ಗುರಿ ಹೊಂದಲಾಗಿದೆ. ಕಳೆದ ವರ್ಷ 2,55,940 ಕೋಟಿ ರೂ. ನಿಗದಿಪಡಿಸಲಾಗಿತ್ತು. ಒಟ್ಟು ಆದ್ಯತಾ ವಲಯ ಸಾಲದ ಪ್ರಮಾಣದಲ್ಲಿ ಶೇ 43.09ರಷ್ಟಾಗಿದೆ. ಕೃಷಿ ವಲಯಕ್ಕೆ 1,25,992.10 ಕೋಟಿ ರೂ. ಸಾಲ ನಿಗದಿಪಡಿಸಲಾಗಿದೆ. ಬೆಳೆ ಉತ್ಪಾದನೆ ವಲಯಕ್ಕೆ 71,923.31 ಕೋಟಿ ರೂ. ಮೀಸಲಿಡಲಾಗಿದೆ. ಹಾಗೆಯೇ, ಎಂಎಸ್‌ಎಂಇಗಳಿಗೆ 1,11,826.96 ಕೋಟಿ ರೂ. ಶಿಕ್ಷಣ ಸಾಲಕ್ಕೆ 5,969.86 ಕೋಟಿ ರೂ., ವಸತಿ ಸಾಲಕ್ಕೆ 30,164.89 ಕೋಟಿ ರೂ. ಹಾಗೂ ಇತರೆ ವಲಯಗಳಿಗೆ 9498.22 ಕೋಟಿ ರೂ. ನಿಗದಿಪಡಿಸಲಾಗಿದೆ.