'ಓಮಿನಿ'ಯಲ್ಲಿ ಬರೋಕೆ ರೆಡಿಯಾದ 'ಪಾರು' ಧಾರಾವಾಹಿ ನಟ ಸಿದ್ದು ಮೂಲಿಮನಿ

'ಪಾರು' ಧಾರಾವಾಹಿ ನಟ ನಾಯಕನಾಗಿ‌ ನಟಿಸಿರುವ ಚಿತ್ರ 'ಓಮಿನಿ'. ಇತ್ತೀಚೆಗೆ ಈ ಚಿತ್ರಕ್ಕಾಗಿ ಪ್ರಮೋದ್ ಮರವಂತೆ ಬರೆದಿರುವ " ಪ್ರಾಬ್ಲಂ ಲವ್ ದೊಡ್ಡ ಪ್ರಾಬ್ಲಾಂ" ಎಂಬ ಹಾಡಿನ ಚಿತ್ರೀಕರಣ ಇತ್ತೀಚೆಗೆ ಇನ್ನೋವೇಟಿವ್ ಫಿಲಂ ಸಿಟಿಯಲ್ಲಿ ನಡೆದಿದೆ. ಸಿದ್ದು ಮೂಲಿಮನಿ-ಪೂಜಾ ಜನಾರ್ದನ್ ಅಭಿನಯಿಸಿರುವ ಈ ಹಾಡಿಗೆ ಗೀತಾ ಸೈ ನೃತ್ಯ ನಿರ್ದೇಶನ ಮಾಡಿದ್ದಾರೆ. ಶಶಾಂಕ್ ಶೇಷಗಿರಿ ಈ ಹಾಡು ಹಾಡಿದ್ದಾರೆ. ಈ ಹಾಡಿನ ಚಿತ್ರೀಕರಣದೊಂದಿಗೆ 'ಓಮಿನಿ' ಚಿತ್ರದ ಚಿತ್ರೀಕರಣ ಮುಕ್ತಾಯವಾಗಿದೆ. ಚಿತ್ರದ ಎಲ್ಲಾ ಚಟುವಟಿಕೆಗಳು ಬಹುತೇಕ ಪೂರ್ಣವಾಗಿದ್ದು, ಸದ್ಯದಲ್ಲೇ ಆಡಿಯೋ ರಿಲೀಸ್ ಆಗಲಿದೆ. ಈ ಹಿಂದೆ 'ಗ್ಯಾಪ್‌ನಲ್ಲೊಂದು ಸಿನಿಮಾ' ಚಿತ್ರ ನಿರ್ದೇಶಿಸಿದ್ದ, ಮಂಜು ಹೆದ್ದೂರು ಈ ಚಿತ್ರವನ್ನು ನಿರ್ದೇಶಿಸಿದ್ದಾರೆ. ಕಥೆ, ಚಿತ್ರಕಥೆ ಹಾಗೂ ಸಂಭಾಷಣೆನ್ನು ಮಂಜು ಅವರೆ ಬರೆದಿದ್ದಾರೆ. "ನಮ್ಮ ಚಿತ್ರದಲ್ಲಿ ವ್ಯಾನ್ ಪ್ರಮುಖ ಪಾತ್ರ ವಹಿಸಿದೆ. ಹಾಗಾಗಿ 'ಓಮಿನಿ' ಎಂದು ಹೆಸರಿಡಲಾಗಿದೆ. ಲ್ಯಾಟಿನ್ ಭಾಷೆಯಲ್ಲಿ 'ಓಮಿನಿ' ಅಂದರೆ ಎಲ್ಲವನ್ನೂ ಒಳಗೊಂಡಿದೆ ಎಂಬ ಅರ್ಥ ಬರುತ್ತದೆ ಹಾಗಾಗಿ ಇವೆರಡನ್ನೂ ಗಮನದಲ್ಲಿಟ್ಟುಕೊಂಡು ನಮ್ಮ ಚಿತ್ರಕ್ಕೆ ಓಮಿನಿ ಎಂದು ಹೆಸರಿಡಲಾಗಿದೆ" ಎಂದು ತಿಳಿಸಿದ್ದಾರೆ. ಕಾಮಿಡಿ, ಸಸ್ಪೆನ್ಸ್ ಥ್ರಿಲ್ಲರ್ ಕಥಾಹಂದರ ಹೊಂದಿರುವ 'ಓಮಿನಿ' ಗೆ ಅರ್ಜುನ್ ರಾಮು ಸಂಗೀತ ನೀಡಿದ್ದಾರೆ. ಡಾ. ವಿ.ನಾಗೇಂದ್ರ ಪ್ರಸಾದ್, ಬಹದ್ದೂರ್ ಚೇತನ್ ಕುಮಾರ್, ಪ್ರಮೋದ್ ಮರವಂತೆ ಹಾಗೂ ಮಂಜು ಹೆದ್ದೂರು ಈ ಚಿತ್ರದ ಹಾಡುಗಳನ್ನು ಬರೆದಿದ್ದಾರೆ. ಸಂಚಿತ್ ಹೆಗಡೆ, ಶಶಾಂಕ್ ಶೇಷಗಿರಿ, ಸುಪ್ರಿಯಾ ರಾಮ್, ಸಿದ್ದಾರ್ಥ ಬೆಳ್ಮಣ್ ಈ ಗೀತೆಗಳನ್ನು ಹಾಡಿದ್ದಾರೆ. ಎಂ.ಬಿ.ಅಳಿಕಟ್ಟಿ ಛಾಯಾಗ್ರಹಣ, ವಿನಯ್ ಕುಮಾರ್ ಕೂರ್ಗ್ ಸಂಕಲನ ಹಾಗೂ ಮದನ್ ಹರಿಣಿ, ಗೀತಾ ಸೈ, ರಾಜಕಿಶೋರ್ ಅವರ ನೃತ್ಯ ನಿರ್ದೇಶನ ಈ ಚಿತ್ರಕ್ಕಿದೆ. ಅಶ್ವಿನ್ ಚಂದ್ರಶೇಖರ್, ಭರತ್ ಬೋಪಣ್ಣ, ಆಕಾಂಕ್ಷಾ ಪಟಮಕ್ಕಿ, ಮಂಜು ಹೆದ್ದೂರು, ಮೋಹನ್ ಜುನೇಜ, ಪ್ರಕಾಶ್ ತುಮ್ಮಿನಾಡು, ನಾಗೇಶ್ ಮಯ್ಯ, ಯಮುನಾ ಶ್ರೀನಿಧಿ ಮುಂತಾದವರು ಈ ಚಿತ್ರದದಲ್ಲಿ ನಟಿಸಿದ್ದಾರೆ.