ಉಪೇಂದ್ರ ನಿರ್ದೇಶನದ ಹೊಸ ಸಿನಿಮಾ ಟೈಟಲ್ ಲೀಕ್! ಮತ್ತೆ ಪ್ರೇಕ್ಷಕರ ತಲೆಗೆ ಹುಳ ಬಿಡೋದು ಪಕ್ಕಾ
'ರಿಯಲ್ ಸ್ಟಾರ್' ಉಪೇಂದ್ರ ನಿರ್ದೇಶನದ ಸಿನಿಮಾಗಳು ಹೇಗಿರುತ್ತವೆ ಎಂದು ಬಿಡಿಸಿ ಹೇಳಬೇಕಿಲ್ಲ! ಅಷ್ಟೊಂದು ವಿಭಿನ್ನವಾಗಿ ಸಿನಿಮಾ ಮಾಡುವ ಕಲೆ ಅವರಿಗೆ ಸಿದ್ಧಿಸಿದೆ. ಸದ್ಯ ಅವರೀಗ ಪುನಃ ಡೈರೆಕ್ಟರ್ ಕ್ಯಾಪ್ ತೊಡಲು ಸಜ್ಜಾಗಿದ್ದಾರೆ.
Admin
0
4
'ರಿಯಲ್ ಸ್ಟಾರ್' ಅವರು ಆರಂಭದಲ್ಲಿ ನಿರ್ದೇಶಕರಾಗಿ ಬಂದವರು. ನಂತರ ಆನಂತರ ನಟರಾದರು. ಕೊನೆಗೆ ನಟನೆಯಲ್ಲೇ ಬ್ಯುಸಿ ಆದ ಅವರು ಆಗೊಮ್ಮೆ ಈಗೊಮ್ಮೆ ಒಂದು ಸಿನಿಮಾ ನಿರ್ದೇಶನ ಮಾಡ್ತಾರೆ. ಆರು ವರ್ಷಗಳ ಹಿಂದೆ ರಿಲೀಸ್ ಆದ 'ಉಪ್ಪಿ 2' ಬಳಿಕ ಉಪೇಂದ್ರ ನಿರ್ದೇಶನದಿಂದ ದೂರ ಉಳಿದಿದ್ದರು. ಇದೀಗ ಅವರು ಡೈರೆಕ್ಟರ್ ಕ್ಯಾಪ್ ತೊಡುವುದು ಪಕ್ಕಾ ಆಗಿದೆ. ಅಲ್ಲದೆ, ಸೆ.18ರ ಅವರ ಹುಟ್ಟುಹಬ್ಬದಂದು ಘೋಷಣೆ ಆಗಬೇಕಿದ್ದ ಹೊಸ ಸಿನಿಮಾದ ಟೈಟಲ್ ಈಗಾಗಲೇ ಲೀಕ್ ಆಗಿದೆ!
ಉಪ್ಪಿ ಹೊಸ ಸಿನಿಮಾ ಮೂರು ನಾಮ!! ಸದ್ಯ ಲೀಕ್ ಆಗಿರುವ ಫಸ್ಟ್ ಲುಕ್‌ನಲ್ಲಿ ಸಿನಿಮಾದ ಟೈಟಲ್ ಮೂರು ನಾಮದ ಸಿಂಬಲ್ ಹೊಂದಿದೆ. ಈ ಹಿಂದೆ ಸೂಪರ್ ಸಿನಿಮಾಗೂ ಅವರು ಚಿಹ್ನೆಯನ್ನೇ ಬಳಸಿದ್ದರು. ಅಲ್ಲದೆ, ಈ ನಾಮವನ್ನು ಬೇರೆ ಅರ್ಥದಲ್ಲೂ ನಾವು ಓದಿಕೊಳ್ಳಬಹುದು. I ಎಂದರೆ ನಾನು ಮತ್ತು U ಎಂದರೆ ನೀನು ಎಂಬರ್ಥವೂ ಸಿಗಲಿದೆ. ಒಟ್ಟಿನಲ್ಲಿ ಇದರ ಗುಟ್ಟೇನು ಎಂಬುದನ್ನು ಸ್ವತಃ ಉಪ್ಪಿಯೇ ಬಾಯಿಬಿಡಬೇಕು. ಸದ್ಯಕ್ಕಂತೂ ಸೋಶಿಯಲ್ ಮೀಡಿಯಾದಲ್ಲಿ ಈ ಟೈಟಲ್ ಫಸ್ಟ್ ಲುಕ್ ಪೋಸ್ಟರ್ ಸಖತ್ ಹವಾ ಕ್ರಿಯೆಟ್ ಮಾಡಿದೆ. ಅನೇಕರು ಅದನ್ನು ಹಂಚಿಕೊಂಡು, 'ಉಪ್ಪಿ ಈಸ್ ಬ್ಯಾಕ್' ಎನ್ನುತ್ತಿದ್ದಾರೆ.
ಇದು ಪ್ಯಾನ್ ಇಂಡಿಯಾ ಸಿನಿಮಾಸದ್ಯ ಈ ಟೈಟಲ್ ಫಸ್ಟ್ ಲುಕ್ ಪೋಸ್ಟರ್‌ನ ಮಾಹಿತಿ ಪ್ರಕಾರ, ಇದು ಪ್ಯಾನ್ ಇಂಡಿಯಾ ಸಿನಿಮಾ ಆಗಿದೆ. ಕನ್ನಡ, ತೆಲುಗು, ತಮಿಳು, ಹಿಂದಿ ಮತ್ತು ಮಲಯಾಳಂ ಭಾಷೆಯಲ್ಲೂ ಇದು ರಿಲೀಸ್ ಆಗಲಿದೆ. ವಿಶೇಷವೆಂದರೆ, ಇದರ ನಿರ್ಮಾಣವನ್ನು ಉಪ್ಪಿ ಫ್ಯಾಮಿಲಿಯೇ ಮಾಡಲಿದೆ. ಈ ಹಿಂದೆ ಬಂದ 'ಉಪ್ಪಿ 2'ಗೆ ಪ್ರಿಯಾಂಕಾ ಉಪೇಂದ್ರ ಅವರ ಬಂಡವಾಳ ಹೂಡಿದ್ದರು. ಇನ್ನು, ಈ ಸಿನಿಮಾಕ್ಕೆ ಕಥೆ, ಚಿತ್ರಕಥೆ, ಸಂಭಾಷಣೆ ಬರೆದು ನಿರ್ದೇಶನ ಮಾಡುವುದು ರಿಯಲ್ ಸ್ಟಾರ್ ಉಪೇಂದ್ರ. ಉಳಿದಂತೆ ಯಾರೆಲ್ಲ ಇದ್ದಾರೆ ಅನ್ನೋದು ನಂತರ ತಿಳಿಯಲಿದೆ. ಉಪೇಂದ್ರ ನಿರ್ದೇಶನದ ಒಂದಷ್ಟು ಸಿನಿಮಾಗಳಲ್ಲಿ ವ್ಯವಸ್ಥೆಯನ್ನು ಪ್ರಶ್ನೆ ಮಾಡುವಂತಹ ಅಂಶಗಳಿದ್ದವು. ಸದ್ಯ ಅವರು ಪ್ರಜಾಕೀಯದಲ್ಲಿ ಸಕ್ರಿಯರಾಗಿರುವುದರಿಂದ ಪ್ರಸ್ತುತ ರಾಜಕಾರಣದ ಬಗ್ಗೆ ಏನಾದರೂ ಕಥೆ ಇರಬಹುದಾ ಅನ್ನೋ ಡೌಟು ಕೂಡ ಹಲವರಲ್ಲಿದೆ.
ಅಂದಹಾಗೆ, ಉಪೇಂದ್ರ ಮೊದಲು ಡೈರೆಕ್ಟರ್ ಆಗಿದ್ದು 1992ರಲ್ಲಿ ತೆರೆಕಂಡ 'ತರ್ಲೆ ನನ್ಮಗ' ಸಿನಿಮಾದಿಂದ. ಆಗಿನ್ನೂ ಉಪ್ಪಿಗೆ 24 ವರ್ಷ. ಆನಂತರ 'ಶ್'ನಂತರ ಬ್ಲಾಕ್ ಬಸ್ಟರ್ ಸಿನಿಮಾ ಮಾಡಿದ್ರು. ನಂತರ 'ಓಂ' ಮೂಲಕ ಇಂಡಸ್ಟ್ರೀ ಹಿಟ್ ಸಿನಿಮಾ ಮಾಡಿದರು. ಆನಂತರ 1998ರಲ್ಲಿ 'ಎ' ಮತ್ತು 1999ರಲ್ಲಿ 'ಉಪೇಂದ್ರ' ಸಿನಿಮಾಗಳನ್ನು ನಿರ್ದೇಶನ ಮಾಡಿದರು. ಆ ಎರಡೂ ಸಿನಿಮಾಗಳಿಗೆ ಅವರೇ ಹೀರೋ ಆಗಿದ್ದರು. ಅಲ್ಲಿಂದ ಉಪ್ಪಿ ನಟನೆಯಲ್ಲೇ ಸಿಕ್ಕಾಪಟ್ಟೆ ಬ್ಯುಸಿ ಆದರು. ಕೊನೆಗೆ 2010ರಲ್ಲಿ 'ಸೂಪರ್' ಮತ್ತು 2015ರಲ್ಲಿ 'ಉಪ್ಪಿ 2' ಸಿನಿಮಾಗಳನ್ನು ನಿರ್ದೇಶನ ಮಾಡಿದರು. ಇದೀಗ ಈ ಸಿನಿಮಾಕ್ಕೆ ಚಾಲನೆ ನೀಡಿದ್ದಾರೆ. ಈ ಬಗ್ಗೆ ಅಧಿಕೃತವಾಗಿ ಉಪೇಂದ್ರ ಇನ್ನೂ ಮಾಹಿತಿ ನೀಡಿಲ್ಲ!
ಇನ್ನು ಕೆಲ ದಿನಗಳ ಹಿಂದಷ್ಟೇ, 'ನನ್ನ ನಿರ್ದೇಶನದ ಸಿನಿಮಾ ಯಾವಾಗ ಸೆಟ್ಟೇರುತ್ತೆ ಅಂತ ಈಗಲೇ ಹೇಳಲು ಸಾಧ್ಯವಿಲ್ಲ. ನಾನು ಆ್ಯಕ್ಟ್ ಮಾಡುತ್ತಿರುವ ಸಿನಿಮಾಗಳ ಚಿತ್ರೀಕರಣ ಮುಗಿಯಬೇಕು. ಅದಾದ ನಂತರವೇ ನಿರ್ದೇಶನ ಮಾಡೋಕೆ ಸಾಧ್ಯ. ಸಿನಿಮಾಗೆ ಕಥೆ, ಸ್ಕ್ರಿಪ್ಟ್‌ ಎಲ್ಲಾ ರೆಡಿ ಮಾಡಿಟ್ಟುಕೊಂಡಿದ್ದೇನೆ. ನನಗೇ ಥ್ರಿಲ್‌ ನೀಡುವಂಥ ಸಬ್ಜೆಕ್ಟ್ ಸಿಕ್ಕಿದೆ. ಇದುವರೆಗಿನ ನನ್ನ ಚಿತ್ರಗಳಿಗಿಂತ ಪೂರ್ಣವಾಗಿ ಬೇರೆ ಥರದ ಸಿನಿಮಾ ಇದಾಗಲಿದೆ. ಮುಂದಿನ ವರ್ಷ ನಿರ್ದೇಶನ ಮಾಡೋದು ಖಚಿತ' ಎಂದಿದ್ದರು ಉಪೇಂದ್ರ.
