ಈ ಕೋವಿಡ್ ರೋಗಿಗೆ ಮರವೇ ಮನೆ: ಕುಟುಂಬದಿಂದ ಪ್ರತ್ಯೇಕವಾಗಿರಲು ಮರದ ಮೇಲೆ ವಾಸಿಸುತ್ತಿರುವ ಯುವಕ!

ಹೈದರಾಬಾದ್: ಕೋವಿಡ್ ಹಾವಳಿ ಉಂಟುಮಾಡಿರುವ ಸಂಕಷ್ಟಗಳು ಒಂದೆರಡಲ್ಲ. ಪ್ರಸ್ತುತ ಹಳ್ಳಿ ಹಳ್ಳಿಗೂ ಸೋಂಕು ಹರಡಿಸಿರುವ ಎರಡನೆಯ ಅಲೆ, ರೋಗದ ಅನೇಕ ಸಮಸ್ಯೆಗಳನ್ನು ಸೃಷ್ಟಿಸಿದೆ. ಅದರಲ್ಲಿಯೂ ಹಳ್ಳಿಗಳಲ್ಲಿ ಪುಟ್ಟ ಮನೆಗಳಲ್ಲಿ ವಾಸಿಸುವ ಜನರಂತೂ ಐಸೋಲೇಷನ್‌ನಲ್ಲಿ ಇರುವುದು ಅಸಾಧ್ಯವೇ ಆಗಿದೆ. ಅನೇಕ ಕುಟುಂಬಗಳು ಅಡುಗೆ ಕೋಣೆ, ಸಣ್ಣ ರೂಮು, ಒಂದೇ ಶೌಚಾಲಯಗಳನ್ನು ಒಳಗೊಂಡ ಪುಟ್ಟ ಮನೆಯಲ್ಲಿರುತ್ತವೆ. ಕೋವಿಡ್ ಪಾಸಿಟಿವ್ ಉಂಟಾದ ರೋಗಿಗಳು ಇಲ್ಲಿ ಪ್ರತ್ಯೇಕವಾಗಿರಲು ಸಾಧ್ಯವಿಲ್ಲ. ಇದರಿಂದ ಮನೆಮಂದಿಯೆಲ್ಲ ಸೋಂಕಿಗೆ ಒಳಗಾಗುತ್ತಿದ್ದಾರೆ. ಆದರೆ ತೆಲಂಗಾಣದಲ್ಲಿ 18 ವರ್ಷದ ಯುವಕನೊಬ್ಬ ತನಗೆ ತಾನೇ 'ಕೋವಿಡ್ ಕೇಂದ್ರ'ವನ್ನು ನಿರ್ಮಿಸಿಕೊಂಡಿದ್ದಾನೆ! ಅಂದಹಾಗೆ ಇದು ಪೂರ್ವಜರ ಕಾಲದಿಂದಲೂ ಇರುವ ವ್ಯವಸ್ಥೆಯೇ. ಆದರೆ ಈಗಿನ ಕಾಲದಲ್ಲಿ ಇದು 'ಕೋವಿಡ್ ಕೇಂದ್ರ'ವೂ ಆಗಬಹುದು ಎನ್ನುವುದನ್ನು ಈತ ತೋರಿಸಿಕೊಟ್ಟಿದ್ದಾನೆ. ಸದ್ಯಕ್ಕೀಗ ಆತನಿಗೆ ಮರವೇ ಮನೆ. ಅದರಲ್ಲಿ ಬಿದಿರಿನ ದಬ್ಬೆಗಳನ್ನು ಕಟ್ಟಿ ನಿರ್ಮಿಸಿದ ತಡಿಕೆಯೇ ಹಾಸಿಗೆ. ನಾಲಗೊಂಡ ಜಿಲ್ಲೆಯ ಕುಗ್ರಾಮ, ಬುಡಕಟ್ಟು ಜನರು ಹೆಚ್ಚಾಗಿರುವ ಕೋತನಂದಿಕೊಂಡ ಗ್ರಾಮದ ಶಿವ ಎಂಬ ಯುವಕನಲ್ಲಿ ಮೇ 4ರಂದು ಕೋವಿಡ್ ಪಾಸಿಟಿವ್ ದೃಢಪಟ್ಟಿತ್ತು. ಮನೆಯಲ್ಲಿಯೇ ಇದ್ದು, ಪ್ರತ್ಯೇಕವಾಗಿ ಇರುವಂತೆ ಆತನಿಗೆ ಗ್ರಾಮದ ಸ್ವಯಂಸೇವಕರು ಸಲಹೆ ನೀಡಿದ್ದರು. ಆದರೆ ಆ ಕುಗ್ರಾಮದಲ್ಲಿ ಐಸೋಲೇಷನ್ ಕೇಂದ್ರವಿಲ್ಲ. ಮನೆಯೋ ತೀರಾ ಚಿಕ್ಕದು. ಕೊನೆಗೆ ತನ್ನ ಉಪಾಯ ಮಾಡಿದ ಶಿವ, ಗುಡಿಸಿಲಿನ ಪಕ್ಕದಲ್ಲಿಯೇ ಇದ್ದ ಮರದ ರೆಂಬೆಗಳನ್ನು ಕತ್ತರಿಸಿ ಬಿದಿರು ಹೊಡೆದು ಮಂಚವನ್ನೇ ತಯಾರಿಸಿದ. ಅಲ್ಲೀಗ ಆತ 11 ದಿನಗಳನ್ನು ಕಳೆದಿದ್ದಾನೆ. ಕೋತನಂದಿಕೊಂಡ ಗ್ರಾಮದಲ್ಲಿ ಸುಮಾರು 350 ಕುಟುಂಬಗಳಿವೆ. ಜಿಲ್ಲೆಯಲ್ಲಿನ ಅಡವಿದೇವುಲಪಲ್ಲಿ ಮಂಡಲದಲ್ಲಿರುವ ಬುಡಕಟ್ಟು ಪ್ರದೇಶಗಳಲ್ಲಿ ಇದೂ ಒಂದು. ಈ ಗ್ರಾಮಕ್ಕೆ ಸಮೀಪವಿರುವ ಪ್ರಾಥಮಿಕ ಆರೋಗ್ಯ ಕೇಂದ್ರವು 5 ಕಿಮೀ ದೂರದಲ್ಲಿದೆ. ಗಂಭೀರ ವೈದ್ಯಕೀಯ ಸಮಸ್ಯೆಗಳು ಎದುರಾದರೆ ಈ ಗ್ರಾಮಗಳ ಜನರು ಆಸ್ಪತ್ರೆಗಾಗಿ 30 ಕಿಮೀ ದೂರ ಪ್ರಯಾಣಿಸಬೇಕಿದೆ. 'ಇಲ್ಲಿ ಯಾವುದೇ ಐಸೋಲೇಷನ್ ಕೇಂದ್ರವಿಲ್ಲ. ಎರಡು ದಿನಗಳ ಹಿಂದೆ ಇಲ್ಲಿನ ಪರಿಶಿಷ್ಟ ಪಂಗಡದ ವಿದ್ಯಾರ್ಥಿ ನಿಲಯವನ್ನು ಐಸೋಲೇಷನ್ ಸೆಂಟರ್ ಆಗಿ ಪರಿವರ್ತಿಸಿದ್ದಾರೆ. ಅಲ್ಲಿಯವರೆಗೂ ನಮಗೆ ಏನೂ ಇರಲಿಲ್ಲ. ಇತರೆ ಗ್ರಾಮಗಳಲ್ಲಿ ಅಂತಹ ಕೇಂದ್ರ ಇದೆಯೇ ಇಲ್ಲವೇ ಎನ್ನುವುದು ನನಗೆ ತಿಳಿದಿಲ್ಲ' ಎಂದು ಶಿವ ಹೇಳಿರುವುದಾಗಿ 'ದಿ ಪ್ರಿಂಟ್' ವರದಿ ಮಾಡಿದೆ. ಶಿವನದು ನಾಲ್ಕು ಜನರ ಕುಟುಂಬ. ತನ್ನಿಂದ ತನ್ನ ಮನೆಯವರಿಗೂ ತೊಂದರೆಯಾಗಬಾರದು ಎಂದು ಮರದ ಮೇಲೆಯೇ ವಾಸಿಸಲು ಆತ ನಿರ್ಧರಿಸಿದ್ದಾನೆ. 'ಗ್ರಾಮದ ಸ್ವಯಂಸೇವಕರು ನಾನು ಪಾಸಿಟಿವ್‌ಗೆ ಒಳಗಾಗಿದ್ದರ ಬಗ್ಗೆ ಸರ್‌ಪಂಚ್‌ಗೆ ತಿಳಿಸಿದ್ದಾರೆಯೇ ಎನ್ನುವುದು ಗೊತ್ತಿಲ್ಲ. ಇದುವರೆಗೂ ನನಗೆ ಸಹಾಯ ಮಾಡಲು ಯಾರೂ ಮುಂದೆ ಬಂದಿಲ್ಲ. ಎಲ್ಲರೂ ವೈರಸ್ ಬಗ್ಗೆ ಹೆಸರಿದ್ದಾರೆ. ಅವರು ತಮ್ಮ ಮನೆಯಿಂದ ಹೊರಗೆ ಬರುತ್ತಿಲ್ಲ' ಎಂದು ಆತ ತಿಳಿಸಿದ್ದಾನೆ. ಮರದ ಮೇಲೆಯೇ ಹೆಚ್ಚಿನ ಸಮಯ ಕಳೆಯುವ ಆತ ಬಕೆಟ್‌ಗೆ ಹಗ್ಗ ಕಟ್ಟಿ ಮರದ ಮೇಲಿನಿಂದ ಇಳಿಬಿಟ್ಟಿದ್ದಾನೆ. ಊಟ ಸೇರಿದಂತೆ ಎಲ್ಲ ಅಗತ್ಯ ವಸ್ತುಗಳನ್ನು ಅದರ ಮೂಲಕ ಮೇಲಕ್ಕೆ ಕಳುಹಿಸಲಾಗುತ್ತದೆ. ಹೈದರಾಬಾದ್‌ನಲ್ಲಿ ಪದವಿ ಅಧ್ಯಯನ ಮಾಡುತ್ತಿರುವ ಶಿವ, ನಗರದಲ್ಲಿ ಕೋವಿಡ್ ಹೆಚ್ಚಾದ ಹಿನ್ನೆಲೆಯಲ್ಲಿ ತಿಂಗಳ ಹಿಂದೆ ತನ್ನ ಗ್ರಾಮಕ್ಕೆ ಮರಳಿದ್ದ. ಆದರೆ ಊರಿಗೆ ತೆರಳಿದ ಬಳಿಕ ಆತನಲ್ಲಿ ಕೋವಿಡ್ ಪಾಸಿಟಿವ್ ಪತ್ತೆಯಾಗಿದೆ. ಗ್ರಾಮದ ಇತರೆ ಕೋವಿಡ್ ರೋಗಿಗಳು ಊರಿನ ಹೊರಗೆ ತಾತ್ಕಾಲಿಕ ಗುಡಿಸಲುಗಳನ್ನು ನಿರ್ಮಿಸಿಕೊಂಡು ಅಲ್ಲಿ ಪ್ರತ್ಯೇಕವಾಗಿ ಇರುವ ಮೂಲಕ ಮನೆಯವರಿಂದ ದೂರ ಇರಲು ಪ್ರಯತ್ನಿಸುತ್ತಿದ್ದಾರೆ.