ಅಡಕೆಯನ್ನೇ ಮೀರಿಸಿದ ರೇಷ್ಮೆ ಧಾರಣೆ: ಬೆಳೆಗಾರರಲ್ಲಿ ಹುರುಪು ಮೂಡಿಸಿ ದರ ಹೆಚ್ಚಳ
ಚಿನ್ನದ ಬೆಲೆ ಪಡೆದುಕೊಂಡ ಅಡಕೆ ಧಾರಣೆಯು ಎಲ್ಲರ ಕಣ್ಣು ಕುಕ್ಕುವಂತೆ ಮಾಡಿದರೆ ವಿಶ್ವ ಪ್ರಸಿದ್ಧಿ ಗಳಿಸಿದ ಮೈಸೂರು ರೇಷ್ಮೆ ಗೂಡಿಗೆ ಉತ್ತಮ ಧಾರಣೆ ಬಂದಿರುವುದು ರೇಷ್ಮೆ ಬೆಳೆಗಾರರಲ್ಲಿ ಹುರುಪು ಮೂಡಿಸಿದೆ.
Admin
0
10
ಸಂತೋಷ್‌ ಕಾಚಿನಕಟ್ಟೆ
ಚಿನ್ನದ ಬೆಲೆ ಪಡೆದುಕೊಂಡ ಧಾರಣೆಯು ಎಲ್ಲರ ಕಣ್ಣು ಕುಕ್ಕುವಂತೆ ಮಾಡಿದರೆ ವಿಶ್ವ ಪ್ರಸಿದ್ಧಿ ಗಳಿಸಿದ ಮೈಸೂರು ರೇಷ್ಮೆ ಗೂಡಿಗೆ ಉತ್ತಮ ಧಾರಣೆ ಬಂದಿರುವುದು ರೇಷ್ಮೆ ಬೆಳೆಗಾರರಲ್ಲಿ ಹುರುಪು ಮೂಡಿಸಿದೆ.
ಮಾರುಕಟ್ಟೆಗಳಲ್ಲಿ ಗೂಡು ಖರೀದಿದಾರರು ಭಾರಿ ಸ್ಪರ್ಧೆಗೆ ಬಿದ್ದವರಂತೆ ಧಾರಣೆ ನಿಗದಿಸುತ್ತಿದ್ದು ರೈತರು ಕೈತುಂಬ ಹಣ ಪಡೆಯುವಂತಾಗಿದೆ. ಲಾಕ್‌ಡೌನ್‌ ಅವಧಿಯಲ್ಲಿ ಕೆ.ಜಿ.ಗೆ 250ರಿಂದ 350ರೂ. ಧಾರಣೆ ಇತ್ತು. ಆಗಸ್ಟ್‌ನಲ್ಲಿ ಏರಿಕೆ ಕಾಣಲಾರಂಭಿಸಿದ ಧಾರಣೆಯು ಈಗ 460ರಿಂದ 600 ರೂ.ಗೆ ಏರಿಕೆಯಾಗಿದೆ.
ರಾಮನಗರ ಮಾರುಕಟ್ಟೆಯಲ್ಲಿ ಮಂಗಳವಾರ ಮಿಶ್ರತಳಿ(ಸಿಬಿ) ಕೆ.ಜಿ.ಗೆ 330ರಿಂದ 491 ರೂ. ಮತ್ತು ದ್ವಿತಳಿ(ಬಿವಿ) ಕೆ.ಜಿ.ಗೆ 392ರಿಂದ 599 ರೂ. ಧಾರಣೆ ಪಡೆದುಕೊಂಡಿದೆ. ಮತ್ತೊಂದು ಕಡೆ ಬಿತ್ತನೆಗೂಡು ಕೆ.ಜಿ.ಗೆ 850ರಿಂದ 900 ರೂ. ಧಾರಣೆ ಪಡೆದುಕೊಂಡಿದೆ. ಧಾರಣೆಯಲ್ಲಿಅಷ್ಟೇ ಅಲ್ಲದೆ ರೇಷ್ಮೆಯ ವಾರ್ಷಿಕ ಆದಾಯ ಸಹ ಅಡಕೆಯನ್ನು ಮೀರಿಸಿದ್ದು, ಅಡಕೆ ಬೆಳೆಗಾರರು ರೇಷ್ಮೆಯಡೆಗೆ ತಿರುಗಿ ನೋಡುವಂತೆ ಮಾಡಿದೆ.
ಲಾಕ್‌ಡೌನ್‌ ಅವಧಿಯಲ್ಲಿ ರೇಷ್ಮೆ ಉತ್ಪನ್ನಗಳ ಉತ್ಪಾದನೆ ಸ್ಥಗಿತಗೊಂಡು ಗೂಡು ಬೇಡಿಕೆ ಕಳೆದುಕೊಂಡಿತ್ತು. ಮೊದಲ ಲಾಕ್‌ಡೌನ್‌ನಲ್ಲಿ ಮಾರುಕಟ್ಟೆ ಸಹ ಬಂದ್‌ ಅಗಿದ್ದರಿಂದ ಗೂಡು ಬೆಳೆದ ರೈತರು ತೀವ್ರ ಸಂಕಷ್ಟ ಎದುರಿಸಬೇಕಾಯಿತು. ಎರಡನೆಯ ಲಾಕ್‌ಡೌನ್‌ನಲ್ಲಿ ಮಾರುಕಟ್ಟೆ ತೆರೆದರೂ ಧಾರಣೆ ಕುಸಿತವಾಗಿತ್ತು. ಈಗ ಅದೆಲ್ಲವನ್ನು ಸರಿದೂಗಿಸುವಂತೆ ಉತ್ತಮ ಧಾರಣೆ ಬಂದಿದೆ. ಧಾರಣೆ ಇಲ್ಲವೆಂದು ರೇಷ್ಮೆ ಗೂಡು ಬೆಳೆಯುವುದನ್ನು ಬಿಟ್ಟು ಹೊಲವನ್ನು ಬೀಳುಬಿಟ್ಟಿದ್ದ ರೈತರು ಈಗ ಮತ್ತೆ ಬೆಳೆಯಲಾರಂಭಿಸಿದ್ದಾರೆ.
ಅಡಕೆಗಿಂತ ರೇಷ್ಮೆ ಲಾಭ
1ಎಕರೆ ರೇಷ್ಮೆಯಲ್ಲಿ ಒಂದು ಬೆಳೆಗೆ 180ರಿಂದ 200 ಕೆ.ಜಿ. ಗೂಡಿನಂತೆ ವರ್ಷಕ್ಕೆ 5ರಿಂದ 6 ಬೆಳೆಯಲ್ಲಿ ಸರಾಸರಿ 10 ಕ್ವಿಂಟಾಲ್‌ ಗೂಡು ಬೆಳೆಯಬಹುದು. ಈಗಿನ ಧಾರಣೆ ಕ್ವಿಂಟಾಲ್‌ಗೆ 50 ಸಾವಿರ ರೂ.ನಂತೆ ವರ್ಷಕ್ಕೆ 5 ಲಕ್ಷ ರೂ. ಅದಾಯ ಗಳಿಸಬಹುದು. ಮತ್ತೊಂದು ಕಡೆ ಅಡಕೆಯಲ್ಲಿ 1 ಎಕರೆಗೆ ವರ್ಷಕ್ಕೆ 8ರಿಂದ 10 ಕ್ವಿಂಟಾಲ್‌ ಬೆಳೆಯಬಹುದು. ಈಗಿನ ಧಾರಣೆಯಂತೆ 4.50ರಿಂದ 5 ಲಕ್ಷ ರೂ. ಆದಾಯ ಗಳಿಸಬಹುದು. ಬಿತ್ತನೆಗೂಡು ರೇಷ್ಮೆ ಬೆಳೆಯುವವರು ವರ್ಷಕ್ಕೆ ಕನಿಷ್ಠ 8ರಿಂದ 10 ಲಕ್ಷ ರೂ. ಆದಾಯ ಗಳಿಸುತ್ತಿದ್ದಾರೆ. ಅಡಕೆ ಆದಾಯಕ್ಕೆ ಏಳೆಂಟು ವರ್ಷ ಕಾಯಬೇಕು. ಆದರೆ, ರೇಷ್ಮೆಯಲ್ಲಿ ಸಸಿ ನೆಟ್ಟ 6 ತಿಂಗಳಿಂದಲೇ ಬೆಳೆ ತೆಗೆಯಬಹುದು.
ಬೇಡಿಕೆಗೆ ಕಾರಣ
ಚೀನಾದಿಂದ ರೇಷ್ಮೆ ಆಮದಿಗೆ ಕಡಿವಾಣ ಹಾಕಿದ ಬಳಿಕ ದೇಸಿ ರೇಷ್ಮೆಗೆ ಬೇಡಿಕೆ ಹೆಚ್ಚಾಗಿದೆ. ಮತ್ತೊಂದು ಕಡೆ ಲಾಕ್‌ಡೌನ್‌ನಲ್ಲಿ ಸ್ಥಗಿತಗೊಂಡಿದ್ದ ರೇಷ್ಮೆ ಉತ್ಪನ್ನಗಳ ಉತ್ಪಾದನೆ ಈಗ ಆರಂಭವಾಗಿದೆ. ವಿಶೇಷವೆಂದರೆ ರೇಷ್ಮೆ ಸುಗ್ಗಿ ಸಮಯದಲ್ಲೇ ಧಾರಣೆ ಏರಿಕೆಯಾಗಿದೆ. ಸಾಮಾನ್ಯವಾಗಿ ಜೂನ್‌ನಿಂದ ನವೆಂಬರ್‌ವರೆಗೆ ರೇಷ್ಮೆ ಆವಕ ಹೆಚ್ಚು. ಬೇಸಿಗೆಯಲ್ಲಿ ಆವಕ ಕಡಿಮೆಯಾಗಿ ಗೂಡಿಗೆ ಬೇಡಿಕೆ ಹೆಚ್ಚುತ್ತದೆ. ಆದರೆ, ಈ ಬಾರಿ ಸುಗ್ಗಿ ಸಮಯದಲ್ಲೇ ಬೇಡಿಕೆ ಏರಿಕೆಯಾಗಿರುವುದರಿಂದ ಬೇಸಿಗೆ ಹೊತ್ತಿಗೆ ಬೇಡಿಕೆ ಮತ್ತು ಧಾರಣೆ ಮತ್ತಷ್ಟು ಏರಿಕೆಯಾಗಬಹುದೆಂಬ ವಿಶ್ವಾಸ ರೈತರದ್ದು.
ಲಾಕ್‌ಡೌನ್‌ನಲ್ಲಿ ಕೈಯಲ್ಲಿ ಬೆಳೆ ಇದ್ದರೂ ಧಾರಣೆ ಸಿಗದೆ ಬೇಸರವಾಗಿತ್ತು. ಈಗ ಮಾರುಕಟ್ಟೆಯಲ್ಲಿ ಗೂಡಿಗೆ ಭಾರಿ ಬೇಡಿಕೆ ಮತ್ತು ಧಾರಣೆ ಬಂದಿರುವುದು ಸಂತಸ ಮೂಡಿಸಿದೆ. ಕಳೆದುಕೊಂಡಿದ್ದನ್ನು ಈಗಲಾದರೂ ಗಳಿಸಿಕೊಳ್ಳುವ ಸಮಾಧಾನ ಮೂಡಿದೆ.
-ಡಿ.ಆಂಜನೇಯ, ರೇಷ್ಮೆ ಬೆಳೆಗಾರರು, ಕೊರ್ಲಹಳ್ಳಿ.
ಕೇಂದ್ರ ಸರಕಾರವು ಚೀನಾ ರೇಷ್ಮೆ ಆಮದಿಗೆ ಕಡಿವಾಣ ಹಾಕಿದ ಬಳಿಕ ಮೈಸೂರು ರೇಷ್ಮೆಗೆ ಭಾರಿ ಬೇಡಿಕೆ ಸೃಷ್ಟಿಯಾಗಿದೆ. ಸಹಜವಾಗಿ ಮಾರುಕಟ್ಟೆಯಲ್ಲಿ ರೈತರಿಗೆ ಉತ್ತಮ ಧಾರಣೆ ಸಿಗುತ್ತಿದೆ. ಮಳೆಗಾಲದಲ್ಲೇ ಬೇಡಿಕೆ ಸೃಷ್ಟಿಯಾಗಿರುವುದರಿಂದ ಧಾರಣೆಯಲ್ಲಿಸ್ಥಿರತೆ ವಿಶ್ವಾಸ ಮೂಡಿಸಿದೆ.
-ಡಾ. ನಾರಾಯಣಗೌಡ, ರೇಷ್ಮೆ ಹಾಗೂ ಕ್ರೀಡಾ ಸಚಿವರು.
