ಸ್ವಗ್ರಾಮ ಕೊಡಿಗೆಹಳ್ಳಿಯಲ್ಲಿ ನಡೆಯಲಿದೆ ನಿರ್ಮಾಪಕ ರಾಮು ಅಂತ್ಯಕ್ರಿಯೆ
ಹುಟ್ಟೂರು ಕೊಡಿಗೆಹಳ್ಳಿಯಲ್ಲಿ ರಾಮು ಅವರ ಅಂತ್ಯಕ್ರಿಯೆ ನೆರವೇರಿಸಲು ಸರ್ಕಾರದ ಅನುಮತಿ ಪಡೆಯಲಾಗಿದೆ. ಕೋವಿಡ್ ನಿಯಮಾವಳಿ ಅನುಸಾರ ತುಮಕೂರಿನ ಕೊಡಿಗೆಹಳ್ಳಿಯಲ್ಲಿ ಅಂತ್ಯ ಸಂಸ್ಕಾರ ನಡೆಯಲಿದೆ.
Admin
0
6
ಕನ್ನಡ ಚಿತ್ರರಂಗದಲ್ಲಿ 'ಕೋಟಿ' ನಿರ್ಮಾಪಕ ಅಂತಲೇ ಜನಪ್ರಿಯತೆ ಪಡೆದಿದ್ದ ಮಹಾಮಾರಿ ಕೊರೊನಾ ವೈರಸ್‌ಗೆ ಬಲಿಯಾಗಿದ್ದಾರೆ. ಕೊರೊನಾ ವೈರಸ್ ಸೋಂಕಿಗೆ ಒಳಗಾಗಿದ್ದ ನಿರ್ಮಾಪಕ ರಾಮು ಎಂ.ಎಸ್.ರಾಮಯ್ಯ ಆಸ್ಪತ್ರೆಗೆ ದಾಖಲಾಗಿ, ಚಿಕಿತ್ಸೆ ಪಡೆಯುತ್ತಿದ್ದರು. ತೀವ್ರ ಉಸಿರಾಟದ ಸಮಸ್ಯೆಯಿಂದ ಬಳಲುತ್ತಿದ್ದ ರಾಮು ನಿನ್ನೆ (ಏಪ್ರಿಲ್ 26) ಸಂಜೆ ಕೊನೆಯುಸಿರೆಳೆದರು.
ಸ್ವಗ್ರಾಮದತ್ತ ರಾಮು ಪಾರ್ಥೀವ ಶರೀರ
ಕೊರೊನಾ ವೈರಸ್ ಸೋಂಕಿನಿಂದ ನಿಧನ ಹೊಂದಿದ ನಿರ್ಮಾಪಕ ರಾಮುರವರ ಪಾರ್ಥೀವ ಶರೀರವನ್ನು ತುಮಕೂರು ಜಿಲ್ಲೆಯ ಕುಣಿಗಲ್ ತಾಲೂಕಿನ ಕೊಡಿಗೆಹಳ್ಳಿಗೆ ಕೊಂಡೊಯ್ಯಲಾಗುತ್ತಿದೆ. ರಾಮುರವರ ಸ್ವಗ್ರಾಮ ಕೊಡಿಗೆಹಳ್ಳಿಯಲ್ಲಿ ಅಂತ್ಯಕ್ರಿಯೆ ನಡೆಸಲು ಸಕಲ ಸಿದ್ಧತೆ ಮಾಡಿಕೊಳ್ಳಲಾಗಿದೆ. ಹುಟ್ಟೂರು ಕೊಡಿಗೆಹಳ್ಳಿಯಲ್ಲಿ ರಾಮು ಅವರ ಅಂತ್ಯಕ್ರಿಯೆ ನೆರವೇರಿಸಲು ಸರ್ಕಾರದ ಅನುಮತಿ ಪಡೆಯಲಾಗಿದೆ. ಕೋವಿಡ್ ನಿಯಮಾವಳಿ ಅನುಸಾರ ರಾಮು ಕುಟುಂಬಸ್ಥರು ಅಂತ್ಯಕ್ರಿಯೆ ನೆರವೇರಿಸಲಿದ್ದಾರೆ.
ದುಃಖ ಹೇಳತೀರದು
ಪ್ರೀತಿಯ ಪತಿ ರಾಮುರನ್ನು ಕಳೆದುಕೊಂಡಿರುವ ಮಾಲಾಶ್ರೀ ದುಃಖತಪ್ತರಾಗಿದ್ದಾರೆ. ರಾಮುರನ್ನ ಮಾಲಾಶ್ರೀ ಪ್ರೀತಿಸಿ ಮದುವೆಯಾಗಿದ್ದರು. ಮಾಲಾಶ್ರೀ ಅಭಿನಯದ ಹಲವು ಚಿತ್ರಗಳಿಗೆ ಪತಿ ರಾಮು ಬಂಡವಾಳ ಹಾಕಿದ್ದರು. ಏಳು-ಬೀಳುಗಳ ನಡುವೆಯೂ ಮಾಲಾಶ್ರೀಗೆ ರಾಮು ಬೆನ್ನೆಲುಬಾಗಿ ನಿಂತಿದ್ದರು. ಪತಿಯನ್ನು ಕಳೆದುಕೊಂಡ ಮಾಲಾಶ್ರೀಯ ದುಃಖ ಹೇಳತೀರದು.
35ಕ್ಕೂ ಹೆಚ್ಚು ಚಿತ್ರಗಳನ್ನು ನಿರ್ಮಾಣ ಮಾಡಿದ್ದ ರಾಮು
'ರಾಮು ಎಂಟರ್‌ಪ್ರೈಸಸ್' ಮೂಲಕ 'ಗೋಲಿಬಾರ್', 'ಲಾಕಪ್ ಡೆತ್', 'ಹಲೋ ಸಿಸ್ಟರ್', 'ಸರ್ಕಲ್ ಇನ್ಸ್‌ಪೆಕ್ಟರ್', 'ಸಿಂಹದ ಮರಿ', 'ಲೇಡಿ ಕಮಿಷನರ್', 'ಎಕೆ 47', 'ಚಾಮುಂಡಿ', 'ಭಾವ ಭಾಮೈದ', 'ಹಾಲಿವುಡ್', 'ಕಿಚ್ಚ', 'ಕಲಾಸಿಪಾಳ್ಯ', 'ದುರ್ಗಿ', 'ಮಲ್ಲ', 'ಆಟೋ ಶಂಕರ್' ಮುಂತಾದ ಹಲವು ಚಿತ್ರಗಳನ್ನು ರಾಮು ನಿರ್ಮಾಣ ಮಾಡಿದ್ದರು.
