ಸಂಕಷ್ಟದಲ್ಲಿದ್ದ ಅಭಿಮಾನಿಗಳಿಗೆ ಧನಸಹಾಯ ಮಾಡಿ ಉದಾರತೆ ಮೆರೆದ ಸೂರ್ಯ, ಕಾರ್ತಿ
ತಮ್ಮ ಅಭಿಮಾನಿಗಳ ಕಷ್ಟಕ್ಕೆ ಸ್ಪಂದಿಸಿ ತಮಿಳು ನಟ ಸೂರ್ಯ ಮತ್ತು ಕಾರ್ತಿ ಹಣಕಾಸಿನ ನೆರವು ನೀಡಿ ಉದಾರತೆ ಮೆರೆದಿದ್ದಾರೆ.
Admin
0
6
ನಟರನ್ನು ದೇವರಂತೆ ಪೂಜಿಸುವವರು ಅಭಿಮಾನಿಗಳು. ಸ್ಟಾರ್ ನಟರ ಹುಟ್ಟುಹಬ್ಬವನ್ನು ದೊಡ್ಡ ಹಬ್ಬದ ರೀತಿಯಲ್ಲಿ ಆಚರಿಸಿ ಸಂಭ್ರಮ ಪಡುವವರು ಅಭಿಮಾನಿಗಳು. ನಟರ ಸಿನಿಮಾ ತೆರೆಗೆ ಬರುತ್ತಿದೆ ಅಂದ್ರೆ ರಾತ್ರಿ ಪೂರ್ತಿ ನಿದ್ದೆ ಮಾಡದೇ, ಫಸ್ಟ್ ಡೇ ಫಸ್ಟ್ ಶೋ ಕಣ್ತುಂಬಿಕೊಂಡು ಶಿಳ್ಳೆ-ಚಪ್ಪಾಳೆ ಹೊಡೆಯುವವರು ಅಭಿಮಾನಿಗಳು. ಅಂತಹ ಅಭಿಮಾನಿಗಳು ಸಂಕಷ್ಟದಲ್ಲಿದ್ದಾಗ ನಟರೇ ಸಹಾಯ ಹಸ್ತ ಚಾಚಿದರೆ..?
ಹೌದು.. ಕೋವಿಡ್‌ನಂತಹ ಸಂಕಷ್ಟದ ಸಮಯದಲ್ಲಿ ಬಹಳಷ್ಟು ಜನರಿಗೆ ಅನೇಕ ತಾರೆಯರು ಸಹಾಯ ಮಾಡಿದ್ದಾರೆ. ಇದೀಗ ತಮ್ಮ ಅಭಿಮಾನಿಗಳ ಕಷ್ಟಕ್ಕೆ ಸ್ಪಂದಿಸಿ ತಮಿಳು ನಟ ಮತ್ತು ಹಣಕಾಸಿನ ನೆರವು ನೀಡಿ ಉದಾರತೆ ಮೆರೆದಿದ್ದಾರೆ.
ಮೂಲಗಳ ಪ್ರಕಾರ, ತಮ್ಮ ಫ್ಯಾನ್ ಕ್ಲಬ್ಸ್‌ನಲ್ಲಿ ಆರ್ಥಿಕ ಮುಗ್ಗಟ್ಟಿನಿಂದ ಪರದಾಡುತ್ತಿದ್ದ ಅಭಿಮಾನಿಗಳಿಗೆ ಸೂರ್ಯ ಮತ್ತು ಕಾರ್ತಿ ಧನಸಹಾಯ ಮಾಡಿದ್ದಾರೆ. ಸುಮಾರು 250 ಅಭಿಮಾನಿಗಳ ಬ್ಯಾಂಕ್ ಅಕೌಂಟ್‌ಗೆ ನಟ ಸೂರ್ಯ ತಲಾ 5000 ರೂಪಾಯಿ ಜಮೆ ಮಾಡಿದ್ದಾರೆ ಎಂದು ವರದಿಯಾಗಿದೆ.
ಇನ್ನೂ, ನಟ ಕಾರ್ತಿ ಕೂಡ ತಮ್ಮ ಫ್ಯಾನ್ ಕ್ಲಬ್‌ನ ಸುಮಾರು 150 ಅಭಿಮಾನಿಗಳ ಬ್ಯಾಂಕ್ ಅಕೌಂಟ್‌ಗೆ ತಲಾ 5000 ರೂಪಾಯಿ ವರ್ಗಾವಣೆ ಮಾಡಿದ್ದಾರೆ ಎನ್ನಲಾಗಿದೆ. ಕಷ್ಟದಲ್ಲಿದ್ದ ಅಭಿಮಾನಿಗಳಿಗೆ ಸಹಾಯ ಮಾಡಿ ಮಾನವೀಯತೆ ಮೆರೆದಿರುವ ಸೂರ್ಯ ಮತ್ತು ಕಾರ್ತಿ ನಡೆಗೆ ವ್ಯಾಪಕ ಮೆಚ್ಚುಗೆ ಪಾತ್ರವಾಗಿದೆ. ಸೂರ್ಯ ಮತ್ತು ಕಾರ್ತಿಗೆ ಅಭಿಮಾನಿಗಳು ತುಂಬು ಹೃದಯದ ಧನ್ಯವಾದಗಳನ್ನು ತಿಳಿಸಿದ್ದಾರೆ.
