ಶಬರಿಮಲೆ ಪ್ರಸಾದಕ್ಕೆ ಹಲಾಲ್‌ ಬೆಲ್ಲ: ಸ್ಪಷ್ಟನೆ ಕೇಳಿದ ಕೇರಳ ಹೈಕೋರ್ಟ್‌
ಶಬರಿ ಮಲೆಯ ಪ್ರಧಾನ ಪ್ರಸಾದವಾದ ಅಪ್ಪ ಹಾಗೂ ಅರವಣ ಪಾಯಸಕ್ಕೆ ಬಳಸುವ ಕೆಲವು ಬೆಲ್ಲದ ಪ್ಯಾಕೆಟ್‌ಗಳಲ್ಲಿ ಮಾತ್ರ ಹಲಾಲ್‌ ಮುದ್ರೆ ಬಳಸಲಾಗಿದೆ ಎಂಬುದನ್ನು ದೇವಸ್ವಂ ಮಂಡಳಿ ನ್ಯಾಯಾಲಯಕ್ಕೆ ತಿಳಿಸಿದೆ.
Admin
0
8
(ಕೇರಳ): ಶಬರಿ ಮಲೆಯಲ್ಲಿ ಸಿದ್ಧವಾಗುವ ಅಪ್ಪ ಹಾಗೂ ಅರವಣ ಪಾಯಸ ಪ್ರಸಾದಕ್ಕಾಗಿ ಬಳಸುವ ಹಲಾಲ್‌ ಪ್ರಮಾಣೀಕೃತವಾಗಿರುವ ಬಗ್ಗೆ ಸಲ್ಲಿಸಿದ ಅರ್ಜಿಯ ವಿಚಾರಣೆ ಸಂದರ್ಭದಲ್ಲಿ ದೇವಸ್ವಂ ಮಂಡಳಿಯ ಸ್ಪಷ್ಟನೆಯನ್ನು ಕೇರಳ ಹೈಕೋರ್ಟ್‌ ಕೇಳಿದೆ.
ಕ್ರಿಯಾ ಸಮಿತಿ ಪ್ರಧಾನ ಸಂಚಾಲಕ ಎಸ್‌. ಜಿ. ಆರ್‌. ಕುಮಾರ್‌ ಸಲ್ಲಿಸಿದ ಅರ್ಜಿ ವಿಚಾರಣೆ ಸಂದರ್ಭ ಈ ಕುರಿತು ಸರಕಾರದ ನಿಲುವು ತಿಳಿಸುವಂತೆ ಹೈಕೋರ್ಟ್‌ ಕೇಳಿದೆ. ವಿಶೇಷ ಆಯುಕ್ತರು ಸಹ ವರದಿ ಸಲ್ಲಿಸಬೇಕು.
ಶಬರಿ ಮಲೆಯ ಪ್ರಧಾನ ಪ್ರಸಾದವಾದ ಅಪ್ಪ ಹಾಗೂ ಅರವಣ ಪಾಯಸಕ್ಕೆ ಬಳಸುವ ಕೆಲವು ಬೆಲ್ಲದ ಪ್ಯಾಕೆಟ್‌ಗಳಲ್ಲಿ ಮಾತ್ರ ಹಲಾಲ್‌ ಮುದ್ರೆ ಬಳಸಲಾಗಿದೆ ಎಂಬುದನ್ನು ದೇವಸ್ವಂ ಮಂಡಳಿ ನ್ಯಾಯಾಲಯಕ್ಕೆ ತಿಳಿಸಿದೆ. ಗುಣಮಟ್ಟದ ಬೆಲ್ಲ ಕೊಲ್ಲಿ ರಾಷ್ಟ್ರಗಳಿಗೆ ರಫ್ತಾಗುತ್ತಿರುವ ಕಾರಣ ಬೆಲ್ಲದ ಚೀಲಗಳ ಮೇಲೆ ಹಲಾಲ್‌ ಮುದ್ರೆ ಹಾಕಲಾಗಿದೆ ಎಂದು ದೇವಸ್ವಂ ಮಂಡಳಿಯ ಅಧಿಕೃತರು ತಿಳಿಸಿದ್ದಾರೆ.
ಶಬರಿ ಮಲೆಯಲ್ಲಿ ಅನ್ಯ ಧರ್ಮದವರ ಮುದ್ರೆ ಹೊಂದಿರುವ ಆಹಾರ ಪದಾರ್ಥಗಳನ್ನು ಬಳಸಬಾರದು ಎಂಬ ನಿಯಮವನ್ನು ದೇವಸ್ವಂ ಮಂಡಳಿ ಉಲ್ಲಂಘಿಸಿದೆ. ಅನಾದಿ ಕಾಲದಿಂದಲೂ ಅನುಸರಿಸುತ್ತಿದ್ದ ಧಾರ್ಮಿಕ ಸಂಪ್ರದಾಯಗಳು ಮತ್ತು ಆಚರಣೆಗಳ ಉಲ್ಲಂಘನೆಯಾಗಿದೆ ಎಂದು ಅರ್ಜಿಯಲ್ಲಿ ಆರೋಪಿಸಲಾಗಿದೆ.
ದೇವರಿಗೆ ಅರ್ಪಿಸುವ ನೈವೇದ್ಯವು ಶುದ್ಧ ಹಾಗೂ ಸಾತ್ವಿಕ ವಸ್ತುಗಳಿಂದ ಕೂಡಿರಬೇಕು. ಅಶುದ್ಧ ವಸ್ತುಗಳ ಬಳಕೆ ಇರಬಾರದು. ಆದರೆ ಇದಕ್ಕೆ ವಿರುದ್ಧವಾಗಿದೆ. ಖಾದ್ಯಕ್ಕೆ ಯೋಗ್ಯವಲ್ಲದ ಹಲಾಲ್‌ ಮುದ್ರೆಯ ಬೆಲ್ಲವನ್ನು ಕಡಿಮೆ ಬೆಲೆಗೆ ಪಡೆಯಲಾಗಿದೆ. ಇಂತಹ ತಿನ್ನಲಾಗದ ಬೆಲ್ಲದಿಂದ ಪ್ರಸಾದ ತಯಾರಿಸುವುದು ಗಂಭೀರ ಅಪರಾಧವಾಗಿದೆ. ಅಲ್ಲದೇ ಹರಾಜಿಗೆ ಹಾಕಿದ ತಿನ್ನಲು ಯೋಗ್ಯವಲ್ಲದ ಬೆಲ್ಲವನ್ನು ವಶಪಡಿಸಿಕೊಂಡು ನಾಶಪಡಿಸಬೇಕೆಂದು ಮನವಿಯಲ್ಲಿ ಒತ್ತಾಯಿಸಲಾಗಿದೆ.
ಆಹಾರ ಪದಾರ್ಥಗಳ ತಯಾರಿಕೆಯಲ್ಲಿ ಹಲಾಲ್‌ ಪ್ರಮಾಣೀಕರಿಸಲು ಉಗುಳುವ ಕುರಿತು ಮುಸ್ಲಿಂ ಸಮುದಾಯದ ಧಾರ್ಮಿಕ ವಿದ್ವಾಂಸರು ಸಾರ್ವಜನಿಕವಾಗಿ ಘೋಷಿಸುತ್ತಿದ್ದಾರೆ. ಹಿಂದೂ ದೇವಾಲಯದಲ್ಲಿ ಪ್ರಸಾದ ಸಿದ್ಧಪಡಿಸಲು ಆಹಾರ ಪದಾರ್ಥವಾಗಿ ಇಂತಹ ಹಲಾಲ್‌ ವಸ್ತುಗಳನ್ನು ಪಡೆದುಕೊಂಡಿರುವುದು ದುರದೃಷ್ಟ ಎಂದು ಮನವಿಯಲ್ಲಿ ಹೇಳಿದೆ.
ದೇವಾಲಯದ ಆಡಳಿತ ಮಂಡಳಿಯ ಕ್ರಮ ಕಾನೂನು ಬಾಹಿರ ಮತ್ತು ಹಿಂದೂ ಸಂಪ್ರದಾಯದ ಆಚರಣೆಗಳು ಮತ್ತು ಭಾರತದ ಸಂವಿಧಾನದ ಅಡಿಯಲ್ಲಿ ಖಾತರಿಪಡಿಸಲಾದ ಧಾರ್ಮಿಕ ಹಕ್ಕುಗಳ ಉಲ್ಲಂಘನೆಯಾಗಿದೆ ಎಂದು ವಾದಿಸಲಾಗಿದೆ.
ಈ ಮಧ್ಯೆ ಮಂಡಲ ಮಹೋತ್ಸವಕ್ಕಾಗಿ ಶಬರಿ ಮಲೆಯಲ್ಲಿ ದರ್ಶನ ಆರಂಭಗೊಂಡಿದ್ದು, ಈಗಾಗಲೇ ಸ್ಪಾಟ್‌ ಬುಕ್ಕಿಂಗ್‌ ಸೌಲಭ್ಯ ಆರಂಭಿಸಲಾಗಿದೆ. ವರ್ಚುಯಲ್‌ ಬುಕ್ಕಿಂಗ್‌ ಮಾಡಲು ಸಾಧ್ಯವಾಗದವರಿಗೆ ಈ ಬುಕ್ಕಿಂಗ್‌ ವ್ಯವಸ್ಥೆ ಮಾಡಲಾಗಿದೆ. ಈ ರೀತಿ 10 ಕೇಂದ್ರಗಳಲ್ಲಿ ಸ್ಪಾಟ್‌ ಬುಕ್ಕಿಂಗ್‌ ಇರಲಿದೆ. ಇದು ವರ್ಚುಯಲ್‌ ಕ್ಯೂಗೆ ಹೆಚ್ಚುವರಿಯಾಗಿದೆ.
ಸ್ಪಾಟ್‌ ಬುಕ್ಕಿಂಗ್‌ಗಾಗಿ ಆಧಾರ್‌ ಕಾರ್ಡ್‌, ಗುರುತಿನ ಚೀಟಿ, ಪಾಸ್‌ಪೋರ್ಟ್‌ ಬಳಸಬಹುದು. ಎರಡು ವ್ಯಾಕ್ಸಿನ್‌ ಅಥವಾ ಆರ್‌ಟಿಪಿಸಿಆರ್‌ ಟೆಸ್ಟ್‌ ಪ್ರಮಾಣ ಪತ್ರ ಹೊಂದಿರಬೇಕು. ಮೊದಲ ದಿನ ಶಬರಿ ಮಲೆಯಲ್ಲಿ 4,986 ಮಂದಿ ಮಾತ್ರ ದರ್ಶನ ಪಡೆದರು. ಭಾರೀ ಮಳೆಯಿಂದಾಗಿ ನಿಯಂತ್ರಣ ಹೇರಲಾಗಿತ್ತು.
