ಹೊಸದಿಲ್ಲಿ: ಮಾಹಿತಿ ತಂತ್ರಜ್ಞಾನ ಕಾಯಿದೆಯ ವಿವಾದಿತ ಸೆಕ್ಷನ್‌ '66ಎ' ಅನ್ನು ಆರು ವರ್ಷಗಳ ಹಿಂದೆಯೇ ರದ್ದುಗೊಳಿಸಿದ್ದರೂ, ಪೊಲೀಸರು ಈಗಲೂ ಜನರ ವಿರುದ್ಧ ಈ ಸೆಕ್ಷನ್‌ ಅಡಿಯಲ್ಲಿ ಪ್ರಕರಣ ದಾಖಲಿಸುತ್ತಿರುವುದರ ಬಗ್ಗೆ ಸುಪ್ರೀಂ ಕೋರ್ಟ್‌ ತೀವ್ರ ಅಚ್ಚರಿ ವ್ಯಕ್ತಪಡಿಸಿದೆ. ಈ ಬಗ್ಗೆ ಕೇಂದ್ರ ಸರಕಾರಕ್ಕೆ ನೋಟಿಸ್‌ ಸಹ ಜಾರಿ ಮಾಡಿದೆ. ಸಾಮಾಜಿಕ ಜಾಲತಾಣದಲ್ಲಿ ಶಾಂತಿಕದಡುವ, ಸೌಹಾರ್ದತೆಗೆ ಧಕ್ಕೆ ತರುವ, ದ್ವೇಷ ಹರಡುವಂತಹ ಸಂದೇಶಗಳ ಹಂಚಿಕೆ, ರವಾನೆಯನ್ನು ಶಿಕ್ಷಾರ್ಹ ಅಪರಾಧವೆಂದು ಘೋಷಿಸುವ ಹಾಗೂ ಅಂತಹ ವ್ಯಕ್ತಿಗಳ ಬಂಧನಕ್ಕೆ ಅವಕಾಶ ನೀಡುವ ಸೆಕ್ಷನ್‌ 66ಎ ಅನ್ನು 2015ರಲ್ಲೇ ಸುಪ್ರೀಂ ಕೋರ್ಟ್‌ ರದ್ದುಗೊಳಿಸಿತ್ತು. ಈ ಸೆಕ್ಷನ್‌ ಅಭಿವ್ಯಕ್ತಿ ಸ್ವಾತಂತ್ರ್ಯಕ್ಕೆ ಧಕ್ಕೆ ಎಂದು ಸುಪ್ರೀಂ ಕೋರ್ಟ್‌ ತೀರ್ಪಿನಲ್ಲಿ ಹೇಳಿತ್ತು.

''ಸುಪ್ರೀಂ ಕೋರ್ಟ್‌ ತೀರ್ಪಿನ ಬಳಿಕವೂ ಇದೇ ಸೆಕ್ಷನ್‌ ಅನ್ವಯ ಪ್ರಕರಣ ದಾಖಲಿಸುತ್ತಿರುವುದು ಆಶ್ಚರ್ಯ ಮೂಡಿಸಿದೆ ಮತ್ತು ಆಘಾತ ಉಂಟುಮಾಡಿದೆ. ನಿಜಕ್ಕೂ ಇದು ಕಳವಳಕಾರಿ ಸಂಗತಿ,'' ಎಂದು ನ್ಯಾಯಮೂರ್ತಿಗಳಾದ ಆರ್‌.ಎಫ್‌. ನಾರಿಮನ್‌, ಜೆ.ಎಂ. ಜೋಸೆಫ್‌ ಮತ್ತು ಬಿ.ಆರ್‌. ಗವಾಯ್‌ ನೇತೃತ್ವದ ಪೀಠವು ಹೇಳಿತು. "ಮಾಹಿತಿ ತಂತ್ರಜ್ಞಾನ ಕಾಯಿದೆ ಪ್ರತಿಯಲ್ಲಿ ಸೆಕ್ಷನ್‌ 66ಎ ರದ್ದಾಗಿದೆ ಎಂದು ಅಡಿ ಟಿಪ್ಪಣಿಯಲ್ಲಿ ನಮೂದಿಸಲಾಗಿದೆ. ಅದನ್ನು ಗಮನಿಸದ ಪೊಲೀಸ್‌ ಅಧಿಕಾರಿಗಳು ಪ್ರಕರಣ ದಾಖಲಿಸುತ್ತಿದ್ದಾರೆ,'' ಎಂದು ಒಪ್ಪಿಕೊಂಡ ಅಟಾರ್ನಿ ಜನರಲ್‌ ಕೆ.ಕೆ. ವೇಣುಗೋಪಾಲ್‌, ''ಭವಿಷ್ಯದಲ್ಲಿ ಹೀಗೆ ಆಗುವುದನ್ನು ತಡೆಯಲು ಸೆಕ್ಷನ್‌ 66ಎ ಮುಂದೆಯೇ ಆವರಣದಲ್ಲಿ ಈ ಸೆಕ್ಷನ್‌ ರದ್ದಾಗಿದೆ ಎಂಬುದನ್ನು ನಮೂದಿಸಬಹುದು,'' ಎಂದು ಅಭಿಪ್ರಾಯಪಟ್ಟರು. ಈಗಲೂ ಪೊಲೀಸರು ಅನೂರ್ಜಿತಗೊಂಡ ಸೆಕ್ಷನ್‌ ಅಡಿಯಲ್ಲಿ ಕೇಸ್‌ ದಾಖಲಿಸುತ್ತಿರುವ ಬಗ್ಗೆ 'ಪೀಪಲ್ಸ್‌ ಯೂನಿಯನ್‌ ಫಾರ್‌ ಸಿವಿಲ್‌ ಲಿಬರ್ಟೀಸ್‌' ಎಂಬ ಸಂಸ್ಥೆಯು ಸುಪ್ರೀಂ ಕೋರ್ಟ್‌ಗೆ ಪಿಐಎಲ್‌ ಸಲ್ಲಿಸಿತ್ತು. ಅರ್ಜಿಯ ವಿಚಾರಣೆ ಕೈಗೆತ್ತಿಕೊಂಡ ನ್ಯಾಯಪೀಠವು ಕೇಂದ್ರಕ್ಕೆ ನೋಟಿಸ್‌ ಜಾರಿ ಮಾಡಿ, ಎರಡು ವಾರದೊಳಗೆ ಉತ್ತರಿಸುವಂತೆ ಸೂಚಿಸಿದೆ. ಇದೇ ವೇಳೆ, ಈ ಸಂಬಂಧ ಅಗತ್ಯ ನಿರ್ದೇಶನಗಳನ್ನು ನೀಡುವುದಾಗಿ ನ್ಯಾಯಪೀಠ ಅರ್ಜಿದಾರರಿಗೆ ಭರವಸೆ ನೀಡಿದೆ. ನೂರಾರು ಪ್ರಕರಣಗಳು ಬಾಕಿ2015ರ ಮಾರ್ಚ್ 24ರಂದು ಸುಪ್ರೀಂ ಕೋರ್ಟ್‌ ಸೆಕ್ಷನ್‌ 60ಎ ರದ್ದುಪಡಿಸಿದ ಬಳಿಕವೂ 11 ರಾಜ್ಯಗಳಲ್ಲಿ 2021ರ ಮಾರ್ಚ್‌ವರೆಗೂ 745 ಪ್ರಕರಣಗಳನ್ನು ದಾಖಲಾಗಿವೆ. ವಿವಿಧ ಹಂತಗಳ ನ್ಯಾಯಾಲಯಗಳಲ್ಲಿ ವಿಚಾರಣೆ ಬಾಕಿ ಉಳಿದಿವೆ ಎಂದು ಅರ್ಜಿದಾರರು ನ್ಯಾಯಾಲಯಕ್ಕೆ ಮಾಹಿತಿ ನೀಡಿದರು. 'ಇಂಟರ್ನೆಟ್‌ ಫ್ರೀಡಂ ಪ್ರತಿಷ್ಠಾನ' ಸಂಗ್ರಹಿಸಿದ ಮಾಹಿತಿ ಪ್ರಕಾರ ಸೆಕ್ಷನ್‌ ರದ್ದುಗೊಳ್ಳುವ ಮುನ್ನ 1,307 ಪ್ರಕರಣಗಳು ದಾಖಲಾಗಿದ್ದವು. ಸುಪ್ರೀಂ ಕೋರ್ಟ್‌ ತೀರ್ಪು ನೀಡಿದ್ದರಿಂದ ಎಲ್ಲಾ ಪ್ರಕರಣಗಳು ರದ್ದುಗೊಳ್ಳಬೇಕಿತ್ತು. ಆದರೆ, ಇನ್ನೂ ಕೆಲವು ಈಗಲೂ ವಿಚಾರಣಾ ಹಂತದಲ್ಲಿ ಬಾಕಿ ಉಳಿದಿವೆ. ಅದರಲ್ಲೂ ಪ್ರಮುಖವಾಗಿ ಮಹಾರಾಷ್ಟ್ರದಲ್ಲಿ 381, ಜಾರ್ಖಂಡ್‌ನಲ್ಲಿ 295, ಉತ್ತರ ಪ್ರದೇಶದಲ್ಲಿ 245 ಪ್ರಕರಣಗಳು ಸೇರಿವೆ ಎಂದು ಅರ್ಜಿದಾರರು ವಿವರಣೆ ನೀಡಿದರು.