ರಿಕ್ಷಾ ಎಳೆಯುವ ವ್ಯಕ್ತಿಗೆ ಕೋಟಿ ರೂ. ಆಸ್ತಿ ದಾನ ಮಾಡಿದ ಒಡಿಶಾ ಮಹಿಳೆ!

ಭುವನೇಶ್ವರ: ನಿಷ್ಠೆ, ಪ್ರಾಮಾಣಿಕತೆ ಹಾಗೂ ಸೇವಾ ಮನೋಭಾವಕ್ಕೆ ಒಂದಲ್ಲ ಒಂದು ದಿನ ಪ್ರತಿಫಲ ಸಿಕ್ಕೇ ಸಿಗುತ್ತದೆ ಎಂಬುದಕ್ಕೆ ಒಡಿಶಾದಲ್ಲೊಂದು ನಿದರ್ಶನ ಸಿಕ್ಕಿದೆ. ಕಳೆದ 25 ವರ್ಷಗಳಿಂದ ಆಟೋ ಸೇವೆ ನೀಡಿದ ವ್ಯಕ್ತಿಗೆ ಒಡಿಶಾದ ಮಹಿಳೆಯೊಬ್ಬರು ಕೋಟ್ಯಂತರ ರೂ. ಬೆಲೆ ಬಾಳುವ ತಮ್ಮ ಆಸ್ತಿಯನ್ನು ದಾನ ಮಾಡಿದ್ದಾರೆ. ಆ ಮೂಲಕ ಪ್ರಾಮಾಣಿಕವಾಗಿ ಸೇವೆಗೈದ ವ್ಯಕ್ತಿಗೆ ಪ್ರಾಮಾಣಿಕವಾಗಿಯೇ ಋುಣಸಂದಾಯ ಮಾಡಿದ್ದಾರೆ. ಕಟಕ್‌ ನಿವಾಸಿಯಾದ ಮಿನಾತಿ ಪಟ್ನಾಯಕ್‌ ಎಂಬ ಮಹಿಳೆಯು ಬುಧ ಸಮಾಲ್‌ ಎಂಬ ಆಟೋ ಎಳೆಯುವ ವ್ಯಕ್ತಿಗೆ ತಮ್ಮ ಮೂರು ಅಂತಸ್ತಿನ ಮನೆ, ಚಿನ್ನದ ಆಭರಣಗಳನ್ನು ದಾನ ನೀಡಿದ್ದು, ಇವುಗಳ ಮೌಲ್ಯ ಒಂದು ಕೋಟಿ ರೂ.ಗಿಂತ ಹೆಚ್ಚು ಎಂದು ಅಂದಾಜಿಸಲಾಗಿದೆ. ಕಳೆದ ವರ್ಷ ಗಂಡ ಹಾಗೂ ಸ್ನಾತಕೋತ್ತರ ಪದವಿ ಓದುತ್ತಿದ್ದ ಮಗಳನ್ನು ಕಳೆದು ಕಳೆದುಕೊಂಡ 63 ವರ್ಷದ ಮಿನಾತಿ ಪಟ್ನಾಯಕ್‌ ಒಬ್ಬರೇ ಮನೆಯಲ್ಲಿ ವಾಸಿಸುತ್ತಿದ್ದಾರೆ. ಸಂಬಂಧಿಕರು ಆರ್ಥಿಕವಾಗಿ ಸ್ಥಿತಿವಂತರಾಗಿರುವುದರಿಂದ ಬಡವರಿಗೆ ಮಾಡಲು ನಿರ್ಧರಿಸಿದ ಅವರು, ಆಟೋ ಎಳೆಯುವವನಿಗೆ ನೀಡಲು ತೀರ್ಮಾನಿಸಿದ್ದಾರೆ. ಅದರಂತೆ, ವಿಲ್‌ ಸಹ ಮಾಡಿಸಿದ್ದಾರೆ. ''ಬುಧ ಸಮಾಲ್‌ 25 ವರ್ಷಗಳಿಂದ ನಮ್ಮ ಕುಟುಂಬಕ್ಕೆ ಆಟೋ ಸೇವೆ ನೀಡಿದ್ದಾನೆ. ನನ್ನ ಮಗಳು ಚಿಕ್ಕವಳಿದ್ದಾಗ ಆಕೆಯನ್ನು ಶಾಲೆಗೆ ಕರೆದುಕೊಂಡು ಹೋಗಿ, ಸುರಕ್ಷಿತವಾಗಿ ವಾಪಸ್‌ ಕರೆದುಕೊಂಡು ಬರುತ್ತಿದ್ದ. ಇದೇ ರೀತಿಗೆ ನಮಗೆ ಅವಶ್ಯಕತೆ ಇದ್ದಾಗಲೆಲ್ಲ ಆತ ಸಹಾಯ ಮಾಡಿದ್ದಾನೆ. ಕಳೆದ ವರ್ಷ ನನ್ನ ಪತಿ ತೀರಿಕೊಂಡ ಬಳಿಕ ನನ್ನ ಸಂಬಂಧಿಕರು ಯಾರೂ ಸಹಾಯಕ್ಕೆ ಬರಲಿಲ್ಲ. ಆಟೋ ಎಳೆಯುವವನೇ ನಮ್ಮ ನೆರವಿಗೆ ಬಂದಿದ್ದಾನೆ. ಹಾಗಾಗಿ ಆತನಿಗೆ ನನ್ನ ಆಸ್ತಿ ನೀಡುತ್ತಿದ್ದೇನೆ,'' ಎಂದು ಮಿನಾತಿ ಹೇಳಿದ್ದಾರೆ.