ಯುವಕರಲ್ಲಿ ಹೃದ್ರೋಗ ಸಮಸ್ಯೆ ಹೆಚ್ಚಿಸುತ್ತಿದೆ ಕೊರೊನಾ..! ಸೋಂಕಿನಿಂದ ಗುಣಮುಖರಾದ್ರೂ ಡೇಂಜರ್..!

: ಕೋವಿಡ್‌ ಸೋಂಕಿನಿಂದ ಚೇತರಿಸಿಕೊಂಡ ಯುವಕರಲ್ಲಿ ರಕ್ತ ಹೆಪ್ಪುಗಟ್ಟುವಿಕೆಯಿಂದಾಗಿ ಹೃದ್ರೋಗ ಸಮಸ್ಯೆ ಹೆಚ್ಚು ಕಾಣಿಸುತ್ತಿದೆ. ಕೆಲವರಿಗೆ ಹೃದಯಾಘಾತವೂ ಸಂಭವಿಸಿದೆ ಎಂಬ ವಿಚಾರ ಅಧ್ಯಯನದಿಂದ ಬೆಳಕಿಗೆ ಬಂದಿದೆ. ಕೋವಿಡ್ ಸೋಂಕಿನಿಂದ ಗುಣಮುಖರಾದ 31 ಮಂದಿಗೆ ನಾಲ್ಕು ವಾರಗಳೊಳಗೆ ಹೃದಯಾಘಾತವಾಗಿ ಜಯದೇವ ಆಸ್ಪತ್ರೆಯಲ್ಲಿ ಚಿಕಿತ್ಸೆಗೆ ದಾಖಲಾಗಿದ್ದಾರೆ. ಈ ವಿಚಾರವನ್ನು ಜಯದೇವ ಇನ್‌ಸ್ಟಿಟ್ಯೂಟ್‌ ಆಫ್‌ ಕಾರ್ಡಿಯೋ ವಾಸ್ಕುಲರ್‌ ಸೈನ್ಸ್‌ ಅಂಡ್‌ ರೀಸರ್ಚ್‌ನ ವೈದ್ಯರು ತಮ್ಮ ಅಧ್ಯಯನದಲ್ಲಿ ದಾಖಲಿಸಿದ್ದಾರೆ. ಚಿಕಿತ್ಸೆಗೆ ದಾಖಲಾದ 31 ರೋಗಿಗಳ ಪೈಕಿ ಆರು ರೋಗಿಗಳಿಗೆ ಆಂಜಿಯೋಪ್ಲಾಸ್ಟಿ ಮತ್ತು ಮೂವರಿಗೆ ಬೈಪಾಸ್‌ ಶಸ್ತ್ರಚಿಕಿತ್ಸೆ ನಡೆಸಲಾಗಿದೆ ಎಂದು ಸಂಸ್ಥೆಯ ನಿರ್ದೇಶಕ ಸಿ. ಎನ್‌. ಮಂಜುನಾಥ್‌ ತಿಳಿಸಿದ್ದಾರೆ. ಕೋವಿಡ್‌ ಸೋಂಕಿನಿಂದ ಚೇತರಿಸಿಕೊಂಡ ಪ್ರಕರಣಗಳಲ್ಲಿ ತೀವ್ರವಾಗಿರುವ ಕೊರೊನರಿ ಸಿಂಡ್ರೋಮ್‌ 1-3 ತಿಂಗಳವರೆಗೆ ಇರುತ್ತದೆ ಎಂದೂ ಅವರು ಮಾಹಿತಿ ನೀಡಿದ್ದಾರೆ. ಕೋವಿಡ್‌ನಿಂದ ಗುಣಮುಖರಾಗಿ 21 ರಿಂದ 108 ದಿನಗಳ ನಡುವೆ ಸಮಸ್ಯೆ ಉಲ್ಬಣಗೊಳ್ಳುವ ಸಾಧ್ಯತೆ ಇದೆ ಎನ್ನುತ್ತದೆ ಅಧ್ಯಯನ..! ಜೂನ್ 1 ರಿಂದ ಜೂನ್ 30ರ ನಡುವೆ ಕಾರ್ಡಿಯಾಲಜಿ ವಿಭಾಗದ ಮುಖ್ಯಸ್ಥ ಡಾ. ರಾಹುಲ್‌ ಪಾಟೀಲ್ ನೇತೃತ್ವದ ತಂಡ ಈ ಅಧ್ಯಯನ ನಡೆಸಿತ್ತು. ಕಾರಣ ಮತ್ತು ಪರಿಹಾರ: ಯುವಕರ ದೇಹ ಚಿಕಿತ್ಸೆಗೆ ಸ್ಪಂದಿಸಲು ಹೆಚ್ಚು ಪ್ರಮಾಣದ ಸ್ಟಿರಾಯ್ಡ್‌ ಹಾಗೂ ಔಷಧ ನೀಡಲಾಗುತ್ತದೆ. ಹೀಗಾಗಿ, ದೇಹದಲ್ಲಿ ಡಿ-ಡೈಮರ್‌ ಮತ್ತು ಎಚ್‌ಸಿಆರ್‌ಪಿ ಪ್ರಮಾಣ ಹೆಚ್ಚಾಗಿ ರಕ್ತ ಹೆಪ್ಪುಗಟ್ಟುತ್ತದೆ. ಇದಕ್ಕೆ ದೇಹದಲ್ಲಿ ಊರಿಯೂತ ವಾತಾವರಣ ಸೃಷ್ಟಿಯಾಗುವುದು ಎಂದು ಕರೆಯುತ್ತೇವೆ. ಇತರೆ ಅಂಗಗಳಲ್ಲೂ ರಕ್ತ ಹೆಪ್ಪುಗಟ್ಟಬಹುದು. ಆದರೆ, ಹೃದಯದ ರಕ್ತನಾಳಗಳಲ್ಲೇ ಇದು ಹೆಚ್ಚು ಕಂಡು ಬರುತ್ತದೆ. ಸೂಕ್ತ ಸಂದರ್ಭದಲ್ಲಿ ವೈದ್ಯರ ಸಲಹೆ ಮೇರೆಗೆ ಬ್ಲಡ್‌ ಥಿನ್ನರ್‌ ಔಷಧ ಬಳಸುವುದು ಸೂಕ್ತ. ಕೋವಿಡ್‌ ನಂತರ ಮೂರು ತಿಂಗಳವರೆಗೂ ವೈದ್ಯರ ಸಲಹೆ ಪಡೆಯುತ್ತಿರಬೇಕು ಎಂದು ಹೃದ್ರೋಗ ತಜ್ಞ ಡಾ. ಮಹಾಂತೇಶ್‌ ಆರ್‌. ಚರಂತಿಮಠ ಹೇಳಿದ್ದಾರೆ. ಯಾವ ವಯಸ್ಸು, ಎಲ್ಲಿಯವರು?: 31 ರೋಗಿಗಳಲ್ಲಿ 9 ಮಹಿಳೆಯರು, ಇಬ್ಬರ ವಯಸ್ಸು 30ಕ್ಕಿಂತ ಕಡಿಮೆ, 31-45ರವರು 14 ಜನ, ಉಳಿದವರು 46 ವರ್ಷ ಮೇಲ್ಪಟ್ಟವರು. 18 ಮಂದಿ ಬೆಂಗಳೂರು ನಗರ, 8 ಮಂದಿ ಗ್ರಾಮಾಂತರ ಜಿಲ್ಲೆಯವರು. ಉಳಿದವರು ಇತರ ಜಿಲ್ಲೆಯವರು. ಅನ್ಯ ಕಾಯಿಲೆ ಇತ್ತೇ?: 12 ಮಂದಿ ಮಧುಮೇಹ, 9 ಜನರಿಗೆ ರಕ್ತದೊತ್ತಡ ಇತ್ತು. 7 ಮಂದಿ ಧೂಮಪಾನಿಗಳು, 6 ಮಂದಿಗೆ ಕೊಲೆಸ್ಟ್ರಾಲ್ ಸಮಸ್ಯೆ, ನಾಲ್ವರಿಗೆ ಈ ಹಿಂದೆ ರಕ್ತಕೊರತೆ ಹಿನ್ನೆಲೆಯಲ್ಲಿ ಹೃದಯ ಕಾಯಿಲೆ ಇತ್ತು. 'ಕೋವಿಡ್‌ ಮೊದಲ ಅಲೆಗಿಂತ ಎರಡನೇ ಅಲೆಯಲ್ಲಿ ಹೆಚ್ಚು ಔಷಧ ಬಳಸಿದ ಹಿನ್ನೆಲೆಯಲ್ಲಿ ಕೋವಿಡ್‌ ನಂತರ ಅಪಧಮನಿಗಳಲ್ಲಿ ಹೆಚ್ಚು ಉರಿಯೂತ ಕಂಡು ಬಂದು ಹೃದಯಾಘಾತ ಸಂಭವಿಸಿದ ಪ್ರಕರಣಗಳು ಬೆಳಕಿಗೆ ಬರುತ್ತಿವೆ' ಎಂದು ಜಯದೇವ ಆಸ್ಪತ್ರೆ ಮುಖ್ಯಸ್ಥ ಡಾ. ಸಿ. ಎನ್‌. ಮಂಜುನಾಥ್‌ ತಿಳಿಸಿದ್ದಾರೆ.