ಮಹಾರಾಷ್ಟ್ರದಲ್ಲಿ ಓಮಿಕ್ರಾನ್ ಸೋಂಕಿತ ರೋಗಿ ಹೃದಯಾಘಾತದಿಂದ ಸಾವು..!

: ಮಹಾರಾಷ್ಟ್ರದಲ್ಲಿ ಕೊರೊನಾ ವೈರಸ್ ರೂಪಾಂತರಿ ಸೋಂಕು ತಗುಲಿದ್ದ ವ್ಯಕ್ತಿಯೊಬ್ಬರು ಹೃದಯಾಘಾತದಿಂದ ಸಾವನ್ನಪ್ಪಿದ್ದಾರೆ. ಮೃತರಿಗೆ 52 ವರ್ಷ ವಯಸ್ಸಾಗಿತ್ತು. ಇಲ್ಲಿನ ಪಿಂಪ್ರಿ-ಚಿಂಚವಾಡ್‌ನಲ್ಲಿ ನೆಲೆಸಿದ್ದ ಓಮಿಕ್ರಾನ್ ಸೋಂಕಿತರು ಹೃದಯಾಘಾತಕ್ಕೆ ಬಲಿಯಾಗಿದ್ದು, ಈ ಸಾವನ್ನು ಓಮಿಕ್ರಾನ್ ಸೋಂಕಿನಿಂದ ಸಂಭವಿಸಿದ ಸಾವು ಎಂದು ಹೆಸರಿಸಲು ವೈದ್ಯರು ನಿರಾಕರಿಸಿದ್ದಾರೆ. ಅವರ ಸಾವಿಗೆ ಇನ್ನಿತರ ಆರೋಗ್ಯ ಸಮಸ್ಯೆಗಳೇ ಕಾರಣ ಎಂದು ವೈದ್ಯರು ವಿಶ್ಲೇಷಿಸಿದ್ದಾರೆ. ಮಹಾರಾಷ್ಟ್ರದಲ್ಲಿ ಜಿನೋಮಿಕ್ ಸೀಕ್ವೆನ್ಸಿಂಗ್‌ಗೆ ಒಳಪಡಿಸಿದ ಸೋಂಕಿನ ಮಾದರಿಗಳ ಪೈಕಿ ಶೇ. 37%ರಷ್ಟು ಮಾದರಿಗಳು ಓಮಿಕ್ರಾನ್ ಸೋಂಕನ್ನು ಖಚಿತಪಡಿಸಿದ್ದು, ರಾಜ್ಯದಲ್ಲಿ ಸಮದಾಯದೊಳಗೆ ಓಮಿಕ್ರಾನ ಹರಡುತ್ತಿರೋದನ್ನು ಖಚಿತಪಡಿಸಿದೆ. ಸದ್ಯ ಮಹಾರಾಷ್ಟ್ರದಲ್ಲಿ ಕಳೆದ 24 ಗಂಟೆಗಳಲ್ಲಿ 198 ಓಮಿಕ್ರಾನ್ ಸೋಂಕು ಪ್ರಕರಣಗಳು ಪತ್ತೆಯಾಗಿದ್ದು, ರಾಜ್ಯದಲ್ಲಿ ಈವರೆಗೂ 450 ಮಂದಿಗೆ ಓಮಿಕ್ರಾನ್ ತಗುಲಿದಂತಾಗಿದೆ. ಮಹಾರಾಷ್ಟ್ರದ ಪಿಂಪ್ರಿ-ಚಿಂಚವಾಡ್‌ನ ನಿವಾಸಿ ಡಿಸೆಂಬರ್ 28ರಂದು ಇಲ್ಲಿನ ಯಶವಂತರಾವ್ ಚೌಹಾಣ್ ಆಸ್ಪತ್ರೆಯಲ್ಲಿ ಮೃತಪಟ್ಟಿದ್ದು, ಮೃತರು ನೈಜೀರಿಯಾ ದೇಶಕ್ಕೆ ಹೋಗಿ ಬಂದ ಬಳಿಕ ಕೋವಿಡ್ ಸೋಂಕಿಗೆ ತುತ್ತಾಗಿದ್ದರು. ಆದ್ರೆ, ಇವರ ಸಾವನ್ನು ಓಮಿಕ್ರಾನ್‌ನಿಂದ ಸಂಭವಿಸಿದ ಸಾವು ಎಂದು ಸೇರ್ಪಡೆಗೊಳಿಸಲು ಆರೋಗ್ಯ ಇಲಾಖೆ ಅಧಿಕಾರಿಗಳು ನಿರಾಕರಿಸಿದ್ದಾರೆ. ಏಕೆಂದರೆ ಮೃತ ವ್ಯಕ್ತಿ ಕಳೆದ 13 ವರ್ಷಗಳಿಂದ ಮಧುಮೇಹದಿಂದ ಬಳಲುತ್ತಿದ್ದರು. ಹೀಗಾಗಿ, ಇವರ ಸಾವನ್ನು ಕೋವಿಡೇತರ ಕಾರಣಗಳಿಂದ ಸಂಭವಿಸಿದ ಸಾವು ಎಂದು ವರ್ಗೀಕರಣ ಮಾಡಲಾಗಿದೆ. ಈ ನಡುವೆ, ಮೃತರ ಸಾವಿನ ಬಳಿಕ ಅವರು ಓಮಿಕ್ರಾನ್‌ ಸೋಂಕಿತರಾಗಿದ್ದರು ಎಂದು ದೃಢಪಟ್ಟಿದೆ. ರಾಷ್ಟ್ರೀಯ ವೈರಾಣು ಸಂಸ್ಥೆ ಕೂಡಾ ಮೃತರಿಗೆ ಓಮಿಕ್ರಾನ ಸೋಂಕು ಇತ್ತು ಎಂದು ದೃಢಪಡಿಸಿದೆ. ಈ ನಡುವೆ, ಮುಂಬೈನ ಆರೋಗ್ಯ ಕ್ಷೇತ್ರದ ಪರಿಣಿತರು ಈ ಸಾವನ್ನು ಕೋವಿಡ್‌ನಿಂದ ಸಂಭವಿಸಿದ ಸಾವು ಎಂದು ಹೇಳಿದರೆ ಸೂಕ್ತ ಎಂದು ಅಭಿಪ್ರಾಯಪಟ್ಟಿದ್ದಾರೆ. ಏಕೆಂದರೆ, ಮೃತರಿಗೆ ಕೋವಿಡ್ ಇತ್ತು. ಹೀಗಾಗಿ, ಮೃತರು ಸಾವಿಗೀಡಾವುದರಲ್ಲಿ ಕೋವಿಡ್‌ನ ಪಾತ್ರ ಎಷ್ಟರ ಮಟ್ಟಿಗೆ ಇದೆ ಎಂಬುದರ ಬಗ್ಗೆ ಅಧ್ಯಯನ ನಡೆಯಬೇಕಿದೆ ಎಂದಿದ್ದಾರೆ. ಮಹಾರಾಷ್ಟ್ರದ ಕೋವಿಡ್ ಡೆತ್ ಪ್ಯಾನಲ್‌ನ ಸದಸ್ಯರಾದ ಡಾ. ಅವಿನಾಶ್ ಸುಪೆ ಅವರ ಪ್ರಕಾರ, ಓಮಿಕ್ರಾನ್ ಸೋಂಕು ಮೃತರ ಸಾವಿಗೆ ಎಷ್ಟರ ಮಟ್ಟಿಗೆ ಕಾರಣ ಆಗಿರಬಹುದು ಎಂಬುದರ ಕುರಿತು ಇನ್ನಷ್ಟೇ ವಿವರ ಸಿಗಬೇಕಿದೆ ಎಂದು ಅಭಿಪ್ರಾಯಪಟ್ಟಿದ್ದಾರೆ. ದೇಶದಲ್ಲಿ ಈವರೆಗೆ 1,200 ಓಮಿಕ್ರಾನ್ ಸೋಂಕು ಪ್ರಕರಣಗಳು ದೃಢಪಟ್ಟಿವೆ. ಆದ್ರೆ, ಈವರೆಗೂ ದೇಶದಲ್ಲಿ ಓಮಿಕ್ರಾನ್ ಸೋಂಕಿನಿಂದ ಯಾವುದೇ ಸಾವು ದೃಢಪಟ್ಟಿಲ್ಲ. ಆದ್ರೆ ಮುಂಬೈನಲ್ಲಿ ಸದ್ಯ ಹರಡುತ್ತಿರುವ ಕೋವಿಡ್ ರೂಪಾಂತರಿಗಳ ಪೈಕಿ ಶೇ. 37ರಷ್ಟು ಸೋಂಕಿತರಿಗೆ ಓಮಿಕ್ರಾನ್ ತಗುಲಿರೋದು ದೃಢಪಟ್ಟಿದೆ ಎಂದು ಇಲ್ಲಿನ ಹೆಚ್ಚುವರಿ ಮುನ್ಸಿಪಲ್ ಆಯುಕ್ತ ಸುರೇಶ್ ಕಕಾನಿ ಅವರು ಹೇಳಿದ್ದಾರೆ. ಸಮುದಾಯದಲ್ಲಿ ಹರಡಿದ 375 ಕೊರೊನಾ ಸೋಂಕು ಪ್ರಕರಣಗಳ ಪೈಕಿ 141 ಪ್ರಕರಣಗಳು ಓಮಿಕ್ರಾನ್ ಎಂದುದೃಢಪಟ್ಟಿವೆ. ಈ ಮೂಲಕ ಹೇಳೋದಾದ್ರೆ ಓಮಿಕ್ರಾನ್ ಸೋಂಕು ಸಮುದಾಯದಲ್ಲಿ ತೀವ್ರ ಸ್ವರೂಪದಲ್ಲಿ ಹರಡುತ್ತಿರೋದಕ್ಕೆ ಇದೇ ಸಾಕ್ಷ್ಯ ಒದಗಿಸಿದೆ. ಅದೂ ಕೂಡಾ ಯಾವುದೇ ಟ್ರಾವಲ್ ಹಿಸ್ಟರಿ ಇಲ್ಲದವರಲ್ಲೂ ಓಮಿಕ್ರಾನ್ ಕಂಡು ಬರುತ್ತಿದೆ. ಸದ್ಯ ಮುಂಬೈನಲ್ಲಿ ದೃಢಪಟ್ಟಿರುವ 141 ಓಮಿಕ್ರಾನ್ ಪ್ರಕರಣಗಳ ಪೈಕಿ ಅಂಧೇರಿ ವೆಸ್ಟ್, ವಿಲೇ ಪಾರ್ಲೆ ಹಾಗೂ ಜುಹೂನಲ್ಲೇ ಹೆಚ್ಚಿನ ಪ್ರಕರಣಗಳು ಪತ್ತೆಯಾಗಿವೆ. ಇನ್ನು ಮಹಾರಾಷ್ಟ್ರದ ಒಟ್ಟು 450 ಓಮಿಕ್ರಾನ್ ಪ್ರಕರಣಗಳ ಪೈಕಿ ಶೇ. 46ರಷ್ಟು ಸೋಂಕಿತರಿಗೆ ಯಾವುದೇ ಟ್ರಾವಲ್ ಹಿಸ್ಟರಿ ಇಲ್ಲ ಎಂದು ತಿಳಿದುಬಂದಿದೆ.