ಮಹಾರಾಷ್ಟ್ರದ ಮಾಜಿ ಗೃಹ ಸಚಿವ ಅನಿಲ್‌ ದೇಶ್‌ಮುಖ್‌ ನ.6ರವರೆಗೆ ಇ.ಡಿ ವಶಕ್ಕೆ!
ಮಹಾರಾಷ್ಟ್ರದ ಮಾಜಿ ಗೃಹ ಸಚಿವ ಅನಿಲ್‌ ದೇಶ್‌ಮುಖ್‌ ಅವರನ್ನು ಜಾರಿ ನಿರ್ದೇಶನಾಲಯ (ಇ.ಡಿ) ಮಂಗಳವಾರ ನಸುಕಿನಲ್ಲಿ ಬಂಧಿಸಿದೆ. ಹೆಚ್ಚಿನ ವಿಚಾರಣೆಗಾಗಿ ಅವರನ್ನು ನ.6ವರೆಗೆ ಇ.ಡಿ ವಶಕ್ಕೆ ಒಪ್ಪಿಸಿ ಸ್ಥಳೀಯ ನ್ಯಾಯಾಲಯ ಆದೇಶ ನೀಡಿದೆ.
Admin
0
6
ಮುಂಬಯಿ: ಪೊಲೀಸರ ಮೂಲಕ ಹಣ ವಸೂಲಿ ಆರೋಪ ಹೊತ್ತಿರುವ ಮಹಾರಾಷ್ಟ್ರದ ಮಾಜಿ ಗೃಹ ಸಚಿವ ಅವರನ್ನು ಜಾರಿ ನಿರ್ದೇಶನಾಲಯ (ಇ.ಡಿ) ಮಂಗಳವಾರ ನಸುಕಿನಲ್ಲಿ ಬಂಧಿಸಿದೆ. ಹೆಚ್ಚಿನ ವಿಚಾರಣೆಗಾಗಿ ಅವರನ್ನು ನ.6ವರೆಗೆ ಇ.ಡಿ ವಶಕ್ಕೆ ಒಪ್ಪಿಸಿ ಸ್ಥಳೀಯ ನ್ಯಾಯಾಲಯ ಆದೇಶ ನೀಡಿದೆ.
ಹಲವು ಸಮನ್ಸ್‌ಗಳ ಬಳಿಕವೂ ದೇಶ್‌ಮುಖ್‌ ಇ.ಡಿ ವಿಚಾರಣೆಗೆ ಹಾಜರಾಗಿರಲಿಲ್ಲ. ಇ.ಡಿ ಸಮನ್ಸ್‌ ರದ್ದುಗೊಳಿಸುವಂತೆ ಕೋರಿ ದೇಶ್‌ಮುಖ್‌ ಸಲ್ಲಿಸಿದ್ದ ಅರ್ಜಿಯನ್ನು ಮುಂಬಯಿ ಹೈಕೋರ್ಟ್‌ ಕಳೆದ ಶುಕ್ರವಾರ ವಜಾ ಮಾಡಿತ್ತಲ್ಲದೇ, ದೇಶ್‌ಮುಖ್‌ ವಿರುದ್ಧದ ಆರೋಪಗಳ ಕುರಿತು ತನಿಖೆ ನಡೆಸುವಂತೆ ಸಿಬಿಐಗೆ ಆದೇಶಿಸಿತ್ತು. ಬೇರೆ ದಾರಿ ಇಲ್ಲದೆ ಎನ್‌ಸಿಪಿ ಹಿರಿಯ ಮುಖಂಡ ಅಂತಿಮವಾಗಿ ಸೋಮವಾರ ವಿಚಾರಣೆಗೆ ಹಾಜರಾಗಿದ್ದರು. ಸುದೀರ್ಘ 12 ಗಂಟೆ ಕಾಲ ವಿಚಾರಣೆ ಬಳಿಕ ಇ.ಡಿ. ಅಧಿಕಾರಿಗಳು ದೇಶ್‌ಮುಖ್‌ ಅವರನ್ನು ಬಂಧಿಸಿದರು. ಹಣ ಅಕ್ರಮ ವರ್ಗಾವಣೆ ಕಾಯಿದೆ (ಪಿಎಂಎಲ್‌ಎ) ಅಡಿಯಲ್ಲಿ ಪ್ರಕರಣ ದಾಖಲಿಸಲಾಗಿದೆ.
ಉದ್ಯಮಿ ಮುಕೇಶ್‌ ಅಂಬಾನಿ ನಿವಾಸದ ಎದುರು ಸ್ಫೋಟಕ ತುಂಬಿದ ವಾಹನ ಪತ್ತೆಯಾದ ಪ್ರಕರಣದ ತನಿಖೆ ವಿಳಂಬದ ಹಿನ್ನೆಲೆಯಲ್ಲಿ ಮುಂಬಯಿ ಪೊಲೀಸ್‌ ಆಯುಕ್ತ ಪರಂ ಬೀರ್‌ ಸಿಂಗ್‌ ಅವರನ್ನು ಎತ್ತಂಗಡಿ ಮಾಡಲಾಗಿತ್ತು. ಅದರ ಮರುದಿನವೇ ಸಿಂಗ್‌ ಅವರು, ''ಅಂಬಾನಿ ನಿವಾಸದ ಎದುರು ಸ್ಫೋಟ ಇಟ್ಟಿರುವ ಆರೋಪ ಎದುರಿಸುತ್ತಿರುವ ಪೊಲೀಸ್‌ ಅಧಿಕಾರಿ ಸಚಿನ್‌ ವಾಜೆ ಮೂಲಕ ಗೃಹ ಸಚಿವ ದೇಶ್‌ಮುಖ್‌ ಅವರು ಸುಲಿಗೆಗೆ ಇಳಿದಿದ್ದಾರೆ. ಹೋಟೆಲ್‌, ಬಾರ್‌ ಮಾಲೀಕರಿಂದ ಪ್ರತಿ ತಿಂಗಳು ತಮಗೆ 100 ಕೋಟಿ ರೂ. ವಸೂಲಿ ಮಾಡಿಕೊಡುವಂತೆ ಗುರಿ ನಿಗದಿಪಡಿಸಿದ್ದಾರೆ,'' ಎಂದು ಆರೋಪಿಸಿದ್ದರು. ಇದು ತೀವ್ರ ರಾಜಕೀಯ ವಿವಾದ ಎಬ್ಬಿಸಿತ್ತು. ಅಂತಿಮವಾಗಿ ಕಳೆದ ಏ.5ರಂದು ದೇಶ್‌ಮುಖ್‌ ಸಚಿವ ಸ್ಥಾನಕ್ಕೆ ರಾಜೀನಾಮೆ ನೀಡಿದ್ದರು.
ಇ.ಡಿ ವಿಚಾರಣೆಗೆ ಹಾಜರಾಗುವ ಮುನ್ನ ವಿಡಿಯೊ ಸಂದೇಶದ ಮೂಲಕ ಅನಿಲ್‌ ದೇಶ್‌ಮುಖ್‌ ಅವರು ತಮ್ಮ ವಿರುದ್ಧದ ಎಲ್ಲಾಆರೋಪಗಳನ್ನೂ ತಳ್ಳಿಹಾಕಿದ್ದರು. ''ನನ್ನ ವಿರುದ್ಧ ಆರೋಪ ಮಾಡಿದ ಪೊಲೀಸ್‌ ಅಧಿಕಾರಿ ಈಗ ಎಲ್ಲಿದ್ದಾರೆ? ಅವರ ವಿರುದ್ಧ ಪೊಲೀಸ್‌ ಅಧಿಕಾರಿಗಳೇ ದೂರು ನೀಡುತ್ತಿದ್ದಾರೆ,'' ಎಂದೂ ಹೇಳಿದ್ದರು.
ಅನಾರೋಗ್ಯದ ಕಾರಣ ಒಪ್ಪದ ಕೋರ್ಟ್‌: ಮಂಗಳವಾರ ಅನಿಲ್‌ ದೇಶ್‌ಮುಖ್‌ ಅವರನ್ನು ಬಂಧಿಸಿ, ಆರೋಗ್ಯ ತಪಾಸಣೆ ನಡೆಸಿದ ಬಳಿಕ ಹೆಚ್ಚುವರಿ ಸೆಷೆನ್ಸ್‌ ನ್ಯಾಯಾಧೀಶ ಬಿ.ಪಿ.ಜಾಧವ್‌ ಎದುರು ಹಾಜರುಪಡಿಸಲಾಯಿತು. ''ದೇಶ್‌ಮುಖ್‌ ಅವರ ಭುಜಗಳಲ್ಲಿ ಸಮಸ್ಯೆ ಕಾಣಿಸಿಕೊಂಡಿದೆ. ಅಲ್ಲದೇ ಅವರು ಹೃದ್ರೋಗ, ಅಧಿಕ ರಕ್ತದೊತ್ತಡದ ಸಮಸ್ಯೆ ಎದುರಿಸುತ್ತಿದ್ದಾರೆ. ಜತೆಗೆ 71 ವರ್ಷದ ಅವರು ಹಿರಿಯ ನಾಗರಿಕರ ಕೂಡ. ಇದೆಲ್ಲವನ್ನೂ ಜಾಮೀನು ಮಂಜೂರು ಮಾಡಬೇಕು,'' ಎಂದು ದೇಶ್‌ಮುಖ್‌ ಪರ ವಕೀಲರು ವಾದಿಸಿದರು. ಕೋರ್ಟ್‌ ಅದನ್ನು ಪರಿಗಣಿಸದೇ ಇ.ಡಿ ವಶಕ್ಕೆ ಒಪ್ಪಿಸಿತು.
ವಿದೇಶಕ್ಕೆ ಪರಂ ಬೀರ್‌ ಸಿಂಗ್‌?
ದೇಶ್‌ಮುಖ್‌ ಪ್ರಕರಣದ ಕೇಂದ್ರಬಿಂದುವಾಗಿರುವ ಹಿರಿಯ ಪೊಲೀಸ್‌ ಅಧಿಕಾರಿ ಪರಂ ಬೀರ್‌ ಸಿಂಗ್‌ ವಿದೇಶಕ್ಕೆ ಪರಾರಿಯಾಗಿದ್ದಾರೆ ಎಂದು ಹೇಳಲಾಗುತ್ತಿದೆ. ''ಕೇಂದ್ರ ಸರಕಾರದ ನೆರವಿನಿಂದ ಸಿಂಗ್‌ ವಿದೇಶಕ್ಕೆ ತೆರಳಿದ್ದಾರೆ,'' ಎಂದು ಶಿವಸೇನೆ ಆರೋಪಿಸಿದ್ದರೆ, ''ಸಿಂಗ್‌ ವಿದೇಶಕ್ಕೆ ಪಲಾಯನಗೈಯ್ಯಲು ಮಹಾರಾಷ್ಟ್ರದ ಮೈತ್ರಿಕೂಟ ಸರಕಾರವೇ ನೆರವು ನೀಡಿದೆ,'' ಎಂದು ಬಿಜೆಪಿ ಪ್ರತ್ಯಾರೋಪ ಮಾಡಿದೆ. ಈ ನಡುವೆ, ಮುಕೇಶ್‌ ಅಂಬಾನಿ ಪ್ರಕರಣದಲ್ಲಿ ಬಂಧಿತರಾಗಿರುವ ಪೊಲೀಸ್‌ ಅಧಿಕಾರಿ ಸಚಿನ್‌ ವಾಜೆ ಅವರಿಗೆ ನ್ಯಾಯಾಲಯ ಮಂಗಳವಾರ ಜಾಮೀನು ನಿರಾಕರಿಸಿದೆ. ''ಪರಂ ಬೀರ್‌ ಸಿಂಗ್‌ ಮತ್ತು ಸಚಿನ್‌ ವಾಜೆ ಇಬ್ಬರೂ ಮುಂಬಯಿಯ ಘನತೆಯನ್ನು ಮಣ್ಣುಪಾಲು ಮಾಡಿ ಮಹಾನಗರಕ್ಕೆ ಕಳಂಕ ತಂದಿದ್ದಾರೆ,'' ಎಂದು ಕೋರ್ಟ್‌ ಅಸಮಾಧಾನ ಹೊರಹಾಕಿತು.
