'ಮುಖ ನೋಡಿಕೊಂಡು ಎಷ್ಟೋ ದಿನ ಆಯ್ತು. ತಲೆ ಬಾಚೋದೂ ಮರೆತು ಹೋಗುತ್ತೆ'- ನಟಿ ಮಯೂರಿ

ಪದ್ಮಾ ಶಿವಮೊಗ್ಗ ಕೊರೊನಾ ಕಾಲದಲ್ಲಿ ವಿವಾಹವಾದ ಸೆಲೆಬ್ರಿಟಿಗಳ ಪಟ್ಟಿ ದೊಡ್ಡದಿದೆ. ಈ ಪಟ್ಟಿಯಲ್ಲಿ ನಟಿ ಮಯೂರಿಯೂ ಒಬ್ಬರು. ಮದುವೆ, ಮಗು ಎಂದು ಫುಲ್‌ ಬ್ಯುಸಿ ಆಗಿರುವ ನಟಿ ತಮ್ಮ ಮೂರು ತಿಂಗಳ ಮಗನಿಗೆ 'ಆರವ್‌' ಎಂದು ನಾಮಕರಣ ಮಾಡಿದ್ದಾರೆ. ಜತೆಗೆ ಮುದ್ದಾದ ಮಗುವಿನ ಫೋಟೋ ಶೂಟ್‌ ಕೂಡ ಮಾಡಿಸಿದ್ದಾರೆ. 'ಆರವ್‌ ಶಿವನ ಇನ್ನೊಂದು ಹೆಸರು. ಶಾಂತ ಎಂಬ ಅರ್ಥ. ಅವನು ಸೋಮವಾರ ಹುಟ್ಟಿದ್ದಾನೆ. ಹಾಗಾಗಿ ಈ ಹೆಸರನ್ನು ಇಟ್ಟೆವು. ಆನ್‌ಲೈನ್‌ನಲ್ಲೇ ನಾಮಕರಣವನ್ನೂ ಪುರೋಹಿತರಿಂದ ಮಾಡಿಸಿದೆವು' ಎನ್ನುತ್ತಾರೆ ಮಯೂರಿ. ಮಗುವಾದ ಒಂದು ತಿಂಗಳಿಗೇ ಕೆಲಸ ಮಾಡಲು ಶುರು ಮಾಡಿದೆ ಎಂದಿರುವ ಮಯೂರಿ, 'ಮೊದಲು ತುಂಬಾ ಭಯ ಇತ್ತು. ಮನೆಯಲ್ಲಿ ಕೆಲಸಕ್ಕಾಗಿ ಐವರನ್ನು ಇಟ್ಟುಕೊಂಡಿದ್ದೆವು. ಮನೆ ಕೆಲಸಕ್ಕೆ, ಅಡುಗೆಗೆ, ಮಗುವಿಗೆ ಸ್ನಾನ ಮಾಡಿಸೋಕೆ, ನನ್ನ ಜತೆ ಇಡೀ ದಿನ ಇರೋಕೆ... ಹೀಗೆ. ಕೊರೊನಾ ಜಾಸ್ತಿ ಆಗುತ್ತಿದ್ದಂತೆ ಎಲ್ಲರನ್ನೂ ಬಿಡಿಸಬೇಕಾಯ್ತು. ನಾನು, ಅಮ್ಮ, ನನ್ನ ಪತಿ ಅರುಣ್‌ ಮೂವರೇ ಎಲ್ಲವನ್ನೂ ಮಾಡುತ್ತಿದ್ದೇವೆ. ಅಮ್ಮ ಬಾಣಂತಿ ಅಡುಗೆ ಮಾಡ್ತಾರೆ. ನಾನು ಮಗುವನ್ನು ನೋಡಿಕೊಳ್ತೀನಿ. ಅರುಣ್‌ ಬಟ್ಟೆ, ಪಾತ್ರೆ, ಕ್ಲೀನಿಂಗ್‌ ಕೆಲಸಗಳನ್ನು ಮಾಡ್ತಾರೆ. ಮಗುವಿಗೆ ಸ್ನಾನ ಎಲ್ಲವನ್ನೂ ನಾನೇ ಮಾಡಿಸುತ್ತಿದ್ದೇನೆ. ಆನ್‌ಲೈನ್‌ನಲ್ಲೇ ಪ್ರತಿಯೊಂದು ವಸ್ತುವನ್ನೂ ತರಿಸಿಕೊಳ್ತಿದ್ದೀವಿ. ಮಗುವಿಗೆ ಬೇಕಾದ್ದನ್ನು ನಾನು ಗರ್ಭಿಣಿ ಇದ್ದಾಗಲೇ ಎಲ್ಲವನ್ನೂ ತಂದಿಟ್ಟುಕೊಂಡಿದ್ದೆ. ಈಗ ಯಾವ ಕಾರಣಕ್ಕೂ ಹೊರಗೆ ಹೋಗ್ತಿಲ್ಲ. ಅಪರೂಪಕ್ಕೆ ತೀರಾ ಅನಿವಾರ್ಯ ಆದಾಗ ಅರುಣ್‌ ಹೋಗಿಬರ್ತಾರೆ' ಎಂದಿದ್ದಾರೆ. ಮಗುವಿನ ಮುಖ ನೋಡಿದರೆ ಮನಸ್ಸು ಅರಳುತ್ತೆ 'ಮಗ ನನ್ನನ್ನು ತುಂಬಾ ಎಂಗೇಜ್‌ ಮಾಡಿದ್ದಾನೆ. ಚಿಕ್ಕಮ್ಮನಾಗಿ ಅಕ್ಕನ ಮಗುವನ್ನು ನೋಡಿಕೊಂಡ ಅನುಭವಕ್ಕೂ ತಾಯಿಯಾಗಿ ಮಗುವನ್ನು ನೋಡಿಕೊಳ್ಳುವ ಅನುಭವಕ್ಕೂ ಬಹಳ ವ್ಯತ್ಯಾಸ ಇದೆ. ಮೊದಲೆಲ್ಲ ಪ್ರತಿದಿನ ನಾನು ಬೆಳಗ್ಗೆ ಎದ್ದ ತಕ್ಷಣ ನನ್ನ ಆರೈಕೆ ಮಾಡಿಕೊಳ್ತಿದ್ದೆ. ಮಾಯಿಶ್ಚರೈಸರ್‌ ಹಚ್ಚಿಕೊಳ್ಳದೆ ನನ್ನ ದಿನ ಪ್ರಾರಂಭ ಆಗುತ್ತಿರಲಿಲ್ಲ. ಈಗ ನನ್ನ ಮುಖ ನೋಡಿಕೊಂಡೇ ಎಷ್ಟೋ ದಿನ ಆಯ್ತು. ತಲೆ ಬಾಚೋದೂ ಮರೆತು ಹೋಗುತ್ತೆ. ಆದರೂ ಒಮ್ಮೆ ಮಗುವಿನ ಮುಖ ನೋಡಿದರೆ ಮನಸ್ಸು ಅರಳುತ್ತೆ' ಎಂದು ಸಂತಸದಿಂದ ಹೇಳಿದ್ದಾರೆ. ಮತ್ತೆ ನಟನೆಗೆ ಮರಳಲಿದ್ದಾರೆ ಮಯೂರಿ ಮಯೂರಿ ಮಗುವಿನ ಆರೈಕೆ ಜತೆ ಮತ್ತೆ ನಟನೆಯತ್ತ ಮರಳಲು ನಿರ್ಧರಿಸಿದ್ದಾರೆ. 'ಕೊರೊನಾ ಸಮಯದಲ್ಲಿ ಮದುವೆ, ಮಗು ಅಂತ ಆಗಿದ್ದು ಒಂದು ರೀತಿಯಲ್ಲಿಅನುಕೂಲ ಆಯ್ತು. ಈಗ ಸಿನಿಮಾ ಚಟುವಟಿಕೆ ನಡೆಯುತ್ತಿಲ್ಲವಾದ್ದರಿಂದ ಮನೆ, ಫ್ಯಾಮಿಲಿಗೆ ಸಮಯ ಕೊಡೋಕೆ ಆಯ್ತು. ಇವೆಲ್ಲಾ ಸರಿ ಹೋಗುವಷ್ಟರಲ್ಲಿ ನನ್ನ ಮಗ ಸ್ವಲ್ಪ ದೊಡ್ಡವನಾಗಿರ್ತಾನೆ. ಮತ್ತೆ ಶೂಟ್‌ಗೆ ಹೋಗಬಹುದು. ಕೊರೊನಾ ಭೀತಿ ನಡುವೆ ಮಗುವನ್ನು ನೋಡಿಕೊಳ್ಳೋದು ಸುಲಭವಲ್ಲ. ನಾವು ಇಡೀ ಕುಟುಂಬ ಹಲವು ತಿಂಗಳಿಂದ ಹೋಂ ಐಸೋಲೇಟ್‌ ಆಗಿದ್ದೇವೆ. ಹೊರಗೆಲ್ಲೂ ಹೋಗುತ್ತಿಲ್ಲ. ನನ್ನ ಪತಿ ಮನೆಯಿಂದಲೇ ಕೆಲಸ ಮಾಡುತ್ತಿರುವುದರಿಂದ ಸಹಕರಿಸ್ತಿದ್ದಾರೆ' ಎನ್ನುತ್ತಾರೆ ಮಯೂರಿ.