RRR Movie: ರಾಮ್ ಚರಣ್ & ಎನ್‌ಟಿಆರ್‌ಗೆ ಹೆಲ್ಮೆಟ್ ತೊಡಿಸಿದ ಟ್ರಾಫಿಕ್ ಪೊಲೀಸರು!

'ಆರ್‌ಆರ್‌ಆರ್‌' ಚಿತ್ರದ ಹೊಸ ಪೋಸ್ಟರ್‌ ಅನ್ನು ಮಂಗಳವಾರ (ಜೂ.29) ಚಿತ್ರತಂಡ ರಿಲೀಸ್ ಮಾಡಿತ್ತು. ನಟರಾದ ಮತ್ತು ಜೂ. ಎನ್‌ಟಿಆರ್ ಅವರು ಒಟ್ಟಿಗೆ ಬೈಕ್‌ನಲ್ಲಿ ಸಾಗುತ್ತಿರುವ ಈ ಪೋಸ್ಟರ್‌ ಅಭಿಮಾನಿಗಳಿಗೆ ದೊಡ್ಡ ಉಡುಗೊರೆಯಾಗಿತ್ತು. ಸೋಶಿಯಲ್ ಮೀಡಿಯಾದಲ್ಲೂ ಅದು ಸಾಕಷ್ಟು ಟ್ರೆಂಡಿಂಗ್ ಆಗಿತ್ತು. ಆದರೆ, ಇದರ ಮೇಲೆ ಟ್ರಾಫಿಕ್ ಪೊಲೀಸರ ಕಣ್ಣು ಬಿದ್ದಿದೆ. ಯಾಕೆಂದರೆ, ಬೈಕ್‌ನಲ್ಲಿ ಹೋಗುತ್ತಿರುವ ರಾಮ್‌ ಚರಣ್, ಹೆಲ್ಮೆಟ್ ಧರಿಸಿರಲಿಲ್ಲ. ಅದನ್ನೇ ಹೈಲೈಟ್ ಮಾಡಿರುವ ಟ್ರಾಫಿಕ್ ಪೊಲೀಸರು, ಅವರಿಬ್ಬರಿಗೂ ಹೆಲ್ಮೆಟ್ ತೊಡಿಸಿದ್ದಾರೆ. ಫೋಟೋಶಾಪ್‌ನಲ್ಲಿ ಹೆಲ್ಮೆಟ್ ಹಾಕಿಸಿದ ಪೊಲೀಸರು ಸೈಬರ್‌ಬಾದ್‌ನ ಸಂಚಾರಿ ವಿಭಾಗದ ಅಧಿಕೃತ ಟ್ವಿಟರ್ ಪೇಜ್‌ನಲ್ಲಿ ಈ ಪೋಸ್ಟರ್ ಅನ್ನು ಶೇರ್ ಮಾಡಲಾಗಿದೆ. ಫೋಟೋಶಾಪ್ ಮೂಲಕ ರಾಮ್‌ ಚರಣ್, ಜೂ. ಎನ್‌ಟಿಆರ್‌ಗೆ ಹೆಲ್ಮೆಟ್ ತೊಡಿಸಿದ್ದಾರೆ. ಬೈಕ್‌ಗೆ ಮಿರರ್‌ ಕೂಡ ಇರಲಿಲ್ಲ. ಅದನ್ನು ಫೋಟೋಶಾಪ್ ಮೂಲಕ ಸೇರಿಸಿ, ಪೋಸ್ಟರ್ ಅನ್ನು ಹಂಚಿಕೊಳ್ಳಲಾಗಿದೆ. ಜೊತೆಗೆ 'ಈಗ ಇದು ಪರಿಪೂರ್ಣವಾಯ್ತು.. ಎಲ್ಲರೂ ಹೆಲ್ಮೆಟ್ ಧರಿಸಿ, ಸುರಕ್ಷಿತವಾಗಿರಿ..' ಎಂದು ಟ್ವೀಟ್ ಮಾಡಲಾಗಿದೆ. ಇದು ಕೂಡ ಸಖತ್ ವೈರಲ್ ಆಗಿದೆ. ಸುಮಾರು 16 ಸಾವಿರ ಜನ ಇದನ್ನು ಲೈಕ್ ಮಾಡಿ, 3 ಸಾವಿರಕ್ಕೂ ಅಧಿಕ ಮಂದಿ ರೀ-ಟ್ವೀಟ್ ಮಾಡಿದ್ದಾರೆ. ಚಿತ್ರತಂಡ ಹೇಳಿದ್ದೇನು? ಯಾವಾಗ ತಮ್ಮ ಸಿನಿಮಾದ ಪೋಸ್ಟರ್‌ ಅನ್ನು ಎಡಿಟ್ ಮಾಡಿ, ಟ್ರಾಫಿಕ್ ಪೊಲೀಸರು ಅವರ ಟ್ವಿಟರ್‌ ಪೇಜ್‌ನಲ್ಲಿ ಹಂಚಿಕೊಂಡರೋ, ಅದಕ್ಕೆ 'ಆರ್‌ಆರ್‌ಆರ್‌' ಬಳಗ ಕೂಡ ತಮಾಷೆಯಾಗಿ ಪ್ರತಿಕ್ರಿಯೆ ನೀಡಿದೆ. ಪೊಲೀಸರು ಹೇಳಿದ್ದ 'ಈಗ ಇದು ಪರಿಪೂರ್ಣವಾಯ್ತು..' ಹೇಳಿಕೆಗೆ ಕೌಂಟರ್ ನೀಡಿರುವ ಚಿತ್ರತಂಡ, 'ಈಗಲೂ ಇದು ಪರ್ಫೆಕ್ಟ್‌ ಆಗಿಲ್ಲ.. ಯಾಕೆಂದರೆ, ಬೈಕ್‌ಗೆ ನಂಬರ್ ಪ್ಲೇಟೇ ಇಲ್ಲ..' ಎಂದು ತಮಾಷೆ ಮಾಡಿದೆ. ಒಟ್ಟಿನಲ್ಲಿ ಸಿನಿಮಾ ಪೋಸ್ಟರ್‌ವೊಂದನ್ನು ಜಾಗೃತಿ ಮೂಡಿಸುವ ಅಭಿಯಾನಕ್ಕೆ ಬಳಕೆ ಮಾಡಿಕೊಂಡ ಸೈಬರ್‌ಬಾದ್‌ನ ಸಂಚಾರಿ ವಿಭಾಗದ ಪೊಲೀಸರ ಜಾಣ್ಮೆಗೆ ಎಲ್ಲರಿಂದಲೂ ಮೆಚ್ಚುಗೆ ಕೇಳಿಬರುತ್ತಿದೆ. ಹಾಡುಗಳ ಚಿತ್ರೀಕರಣ ಬಾಕಿ 'ಆರ್‌ಆರ್‌ಆರ್‌' ಸಿನಿಮಾದ ಬಹುತೇಕ ಶೂಟಿಂಗ್ ಮುಗಿದಿದ್ದು, ಎರಡು ಹಾಡುಗಳ ಶೂಟಿಂಗ್ ಮಾತ್ರ ಬಾಕಿ ಇದೆ. ಈಗಾಗಲೇ ರಾಮ್‌ ಚರಣ್ ಮತ್ತು ಜೂ. ಎನ್‌ಟಿಆರ್ 2 ಭಾಷೆಗಳಿಗೆ ಡಬ್ಬಿಂಗ್ ಕೆಲಸವನ್ನು ಮುಗಿಸಿದ್ದಾರೆ. ಇನ್ನುಳಿದ ಭಾಷೆಗಳ ಡಬ್ಬಿಂಗ್ ಕೆಲಸಗಳು ಬಾಕಿ ಇದ್ದು, ಕನ್ನಡದಲ್ಲೂ 'ಆರ್‌ಆರ್‌ಆರ್‌' ತೆರೆಗೆ ಬರಲಿದೆ. ಎನ್‌ಟಿಆರ್‌, ರಾಮ್‌ ಚರಣ್ ಜೊತೆಗೆ ಆಲಿಯಾ ಭಟ್, ಅಜಯ್‌ ದೇವ್‌ಗನ್, ಸಮುದ್ರಖಣಿ ಮುಂತಾದವರು ನಟಿಸಿದ್ದಾರೆ. ಎಸ್‌ಎಸ್‌ ರಾಜಮೌಳಿ ನಿರ್ದೇಶನದ ಈ ಸಿನಿಮಾಗೆ ಎಂಎಂ ಕೀರವಾಣಿ ಸಂಗೀತ ನೀಡುತ್ತಿದ್ದಾರೆ.