ಬ್ಯಾಂಕಿಂಗ್‌, ಹಣಕಾಸು ಕಂಪನಿಗಳಲ್ಲಿ ನೇಮಕಾತಿ ಪ್ರಕ್ರಿಯೆ ಚುರುಕು!

ಹೊಸದಿಲ್ಲಿ: ಪ್ರಮುಖ ಬ್ಯಾಂಕಿಂಗ್‌ ಮತ್ತು ಹಣಕಾಸು ಸೇವಾ ಕಂಪನಿಗಳು ದೇಶಾದ್ಯಂತ ಪದವಿ ಮತ್ತು ಎಂಜಿನಿಯರಿಂಗ್‌ ಕಾಲೇಜುಗಳು ಮತ್ತು ಬಿಸಿನೆಸ್‌ ಸ್ಕೂಲ್‌ಗಳಲ್ಲಿ ಕ್ಯಾಂಪಸ್‌ ಸಂದರ್ಶನಗಳ ಮೂಲಕ ಪ್ರಕ್ರಿಯೆಗೆ ಚಾಲನೆ ನೀಡಿವೆ. ಎಕ್ಸಿಸ್‌ ಬ್ಯಾಂಕ್‌ ಕಳೆದ ವರ್ಷಕ್ಕೆ ಹೋಲಿಸಿದರೆ ಈ ವರ್ಷ ನೇಮಕಾತಿಯಲ್ಲಿ ಶೇ.50 ಹೆಚ್ಚಿಸಿದೆ. ಗೋಲ್ಡ್‌ಮನ್‌ ಸ್ಯಾಕ್ಸ್‌ ಇಂಡಿಯಾ 2022ರಲ್ಲಿ ಕ್ಯಾಂಪಸ್‌ ನೇಮಕವನ್ನು ಶೇ.27 ಏರಿಸಲಿದೆ. 1,900 ಮಂದಿಗೆ ಉದ್ಯೋಗ ನೀಡಲಿದೆ. ಜೆಪಿ ಮೋರ್ಗಾನ್‌ ಶೇ.23 ವೃದ್ಧಿಸಲಿದೆ. ಸಿಟಿ, ಮಾಸ್ಟರ್‌ಕಾರ್ಡ್‌, ಡ್ಯೂಯಿಷ್‌ ಬ್ಯಾಂಕ್‌ ಕೂಡ ಡಿಜಿಟಲ್‌ ಕೌಶಲ ಇರುವವರನ್ನು ನೇಮಕ ಮಾಡಿಕೊಳ್ಳಲಿದೆ. ಮಾಸ್ಟರ್‌ ಕಾರ್ಡ್‌ ಮುಂದಿನ ವರ್ಷ 500 ಮಂದಿಗೆ ಉದ್ಯೋಗ ನೀಡಲಿದೆ. ಸಾಫ್ಟ್‌ವೇರ್‌ ಅಭಿವೃದ್ಧಿ, ಡೇಟಾ ಎಂಜಿನಿಯೆಇಂಗ್‌, ಅನಾಲಿಟಿಕ್ಸ್‌, ಕೃತಕ ಬುದ್ಧಿಮತ್ತೆ ಮತ್ತಿತರ ವಲಯದ ಹುದ್ದೆಗಳಿಗೆ ನೇಮಕ ಮಾಡಲಿದೆ. 2022ರಲ್ಲಿ ನೇಮಕಾತಿಯ ಪ್ರಮಾಣವು ಪದವಿ ಕಾಲೇಜುಗಳಲ್ಲಿ ಶೇ.43, ಎಂಜಿನಿಯರಿಂಗ್‌ ಕಾಲೇಜುಗಳಲ್ಲಿ ಶೇ.24, ಬಿಸಿನೆಸ್‌ ಸ್ಕೂಲ್‌ಗಳಲ್ಲಿ ಶೇ.6 ವೃದ್ಧಿಸಲಿದೆ ಎಂದು ಗೋಲ್ಡ್‌ಮನ್‌ ಸ್ಯಾಕ್ಸ್‌ ಸರ್ವೀಸ್‌ನ ಅಧಿಕಾರಿಗಳು ತಿಳಿಸಿದ್ದಾರೆ. ಯಾವ ಹುದ್ದೆಗಳಿಗೆ ಬೇಡಿಕೆ? ಬ್ಯಾಂಕ್‌ಗಳು ಈ ವರ್ಷ ಡಿಜಿಟಲ್‌ ತಂತ್ರಜ್ಞಾನಿಗಳಿಗೆ ಆದ್ಯತೆ ನೀಡುತ್ತಿವೆ. ಹಣಕಾಸು ನಿರ್ವಹಣೆ, ಟ್ರೆಶರಿ, ರಿಸ್ಕ್‌, ಅನಾಲಿಟಿಕ್ಸ್‌, ಸಂಶೋಧನೆ, ಇನ್ವೆಸ್ಟ್‌ಮೆಂಟ್‌ ಬ್ಯಾಂಕಿಂಗ್‌, ಕಾರ್ಪೊರೇಟ್‌ ಬ್ಯಾಂಕಿಂಗ್‌ನಲ್ಲೂ ಉದ್ಯೋಗಾವಕಾಶಗಳು ಇವೆ. ಶೇ.9.3 ಜಿಡಿಪಿ ನಿರೀಕ್ಷೆ: ಮೂಡೀಸ್‌ ಇನ್ವೆಸ್ಟರ್ಸ್ ಸರ್ವಿಸ್‌ನ ಇತ್ತೀಚಿನ ವರದಿಯ ಪ್ರಕಾರ 2021-22ರಲ್ಲಿ ದೇಶದ ಜಿಡಿಪಿಯು ಶೇ.9.3 ಹಾಗೂ 2022-23ರಲ್ಲಿಶೇ.7.9ಕ್ಕೆ ಸುಧಾರಿಸಲಿದೆ. ಕೋವಿಡ್‌ ಲಸಿಕೆಯಲ್ಲಿ ಉಂಟಾಗಿರುವ ವ್ಯಾಪಕ ಪ್ರಗತಿಯಿಂದ ಭಾರತದ ಆರ್ಥಿಕ ಪ್ರಗತಿಗೆ ಸಹಕಾರಿಯಾಗಲಿದೆ ಎಂದು ಮೂಡೀಸ್‌ನ ವಿಶ್ಲೇಷಕಿ ಶ್ವೇತಾ ಪಟೋಡಿಯಾ ತಿಳಿಸಿದ್ದಾರೆ. ಭಾರತ ಶೇ.30 ಜನರು ಈಗ ಕೋವಿಡ್‌-19 ವಿರುದ್ಧ ರಕ್ಷಣೆಗೆ ಎರಡೂ ಲಸಿಕೆಗಳನ್ನು ಪಡೆದಿದ್ದಾರೆ. ಶೇ.55 ಮಂದಿ ಕನಿಷ್ಠ ಒಂದು ಲಸಿಕೆ ಪಡೆದಿದ್ದಾರೆ. ಇದು ಗ್ರಾಹಕರ ವಿಶ್ವಾಸವನ್ನು ವೃದ್ಧಿಸಿದೆ. ಹಾಗೂ ಆರ್ಥಿಕ ಚಟುವಟಿಕೆಗಳನ್ನು ಹೆಚ್ಚಿಸಿದೆ ಎಂದಿದ್ದಾರೆ.