ಬೆಂಗಳೂರಿನಲ್ಲಿ ಕೊರೊನಾದಿಂದ ಸತ್ತರೇ ದೇವರೇ ದಿಕ್ಕು..! ಜೀವ ಹಿಂಡುತ್ತೆ ಆಂಬ್ಯುಲೆನ್ಸ್‌ ಕಿರಿಕ್ಕು..!

: ಕೊರೊನಾ ಆರ್ಭಟದ ನಡುವೆ ಸೋಂಕಿತರ ಪರದಾಟವನ್ನೇ ದುರುಪಯೋಗಪಡಿಸಿಕೊಳ್ಳುತ್ತಿರುವ ಆಂಬ್ಯುಲೆನ್ಸ್‌ ಮಾಲೀಕರು ಮತ್ತು ಚಾಲಕರು ದುಬಾರಿ ದರವನ್ನು ಪೀಕುವ ಮೂಲಕ ಸಮಾಜ ಘಾತುಕರಂತೆ ವರ್ತಿಸುತ್ತಿದ್ದಾರೆ ಎಂಬ ಆರೋಪಗಳು ಕೇಳಿಬರುತ್ತಿವೆ. ದುಪ್ಪಟ್ಟು ದರ ಕೇಳಿದ ಆಂಬ್ಯುಲೆನ್ಸ್‌ ಮತ್ತು ಮಾಲೀಕರ ವಿರುದ್ಧ ಗುರುವಾರ ಪ್ರಕರಣವೊಂದು ದಾಖಲಾಗಿರುವುದೇ ಇದಕ್ಕೆ ಕಣ್ಣಳತೆಯ ಸಾಕ್ಷಿ ಎನಿಸಿದೆ. ಕೋವಿಡ್‌ ಎನ್ನುವುದು ಜನಸಾಮಾನ್ಯರಿಗೆ ಸಂಕಟದ ಕಾಲವಾದರೆ, ಆಂಬ್ಯುಲೆನ್ಸ್‌ನವರ ಪಾಲಿಗೆ ಅಕ್ರಮ ಸಂಪಾದನೆಗೆ ದಾರಿ. 'ಹೇಳಿದಷ್ಟು ದರಕ್ಕೆ ಬಂದರೆ ಬನ್ನಿ ಇಲ್ಲವಾದರೆ ಇಲ್ಲ' ಎನ್ನುವ ಉಡಾಫೆಯ ಮಾತುಗಳೇ ಈ ವೈದ್ಯಕೀಯ ತುರ್ತು ಸಂದರ್ಭದಲ್ಲಿ ಹೆಚ್ಚಾಗಿದೆ. ಸೋಂಕಿತರ ಶವಸಂಸ್ಕಾರಕ್ಕೇನಾದರೂ ಆಂಬ್ಯುಲೆನ್ಸ್‌ ತೆಗೆದುಕೊಂಡು ಹೋದರೆ ಕನಿಷ್ಠ 25ರಿಂದ 30 ಸಾವಿರ ರೂ. ಬಾಡಿಗೆ ಕೇಳಿ ಬೆಚ್ಚಿ ಬೀಳಿಸುತ್ತಾರೆ. ಆಂಬ್ಯುಲೆನ್ಸ್‌ ಮಾಲೀಕರು ಮನಸೋ ಇಚ್ಛೆ ಬಾಡಿಗೆ ಪಡೆದು ಜನಸಾಮಾನ್ಯರ ರಕ್ತ ಹೀರುತ್ತಿದ್ದಾರೆ ಎನ್ನುವ ಆರೋಪ ಸಾರ್ವಜನಿಕ ವಲಯದಲ್ಲಿ ಕೇಳಿ ಬರುತ್ತಿದೆ. '5 ಕಿ.ಮೀ ಅಂತರದಲ್ಲಿರುವ ಶ್ರೀನಗರದಿಂದ ವಿಕ್ಟೋರಿಯಾ ಆಸ್ಪತ್ರೆಗೆ ಆಕ್ಸಿಜನ್‌ ಅವಶ್ಯ ಇರುವ ಕೋವಿಡ್‌ ಸೋಂಕಿತ ರೋಗಿಯನ್ನು ಕರೆತರಲು 6 ಸಾವಿರ ರೂ. ಕೇಳುತ್ತಾರೆ. ಆಕ್ಸಿಜನ್‌ ಅವಶ್ಯವಿಲ್ಲದ ರೋಗಿಗೆ 3,500 ರೂ. ಒಂದು ವೇಳೆ ಆಸ್ಪತ್ರೆಯಲ್ಲಿ ಕಾಯುವ ಸ್ಥಿತಿ ನಿರ್ಮಾಣವಾದರೆ ಪ್ರತಿ ಒಂದು ಗಂಟೆಗೆ ಐನೂರು ರೂಪಾಯಿ ಕೇಳುತ್ತಾರೆ' ಎಂದು ಸೋಂಕಿತರ ಸಂಬಂಧಿಯೊಬ್ಬರು ಆರೋಪಿಸಿದ್ದಾರೆ. 'ಬನಶಂಕರಿಯಿಂದ ಯಶವಂತಪುರದ ಕೊಲಂಬಿಯಾ ಏಷ್ಯಾ ಆಸ್ಪತ್ರೆಗೆ 16 ಕಿ.ಮೀ. ಅಲ್ಲಿಗೆ ಕೋವಿಡ್‌ ಸೋಂಕಿತರನ್ನು ಆಸ್ಪತ್ರೆಗೆ ಕರೆದುಕೊಂಡು ಹೋಗಲು ಆಂಬ್ಯುಲೆನ್ಸ್‌ಗೆ ಕರೆ ಮಾಡಿದರೆ 8 ಸಾವಿರ ರೂ. ಕೇಳಿದರು. ಪ್ರತಿ ಒಂದು ಕಿ.ಮೀ ಗೆ ಐನೂರು ರೂಪಾಯಿ ಬಾಡಿಗೆ ಕೇಳುತ್ತಿದ್ದಾರೆ' ಎಂದು ಸೋಂಕಿತ ವ್ಯಕ್ತಿಯ ಸಹೋದರರೊಬ್ಬರು ಆರೋಪಿಸಿದ್ದಾರೆ. 15 ಕಿ.ಮೀ ಅಂತರದ ವಿಕ್ಟೋರಿಯಾ ಆಸ್ಪತ್ರೆಯಿಂದ ಸುಮನಹಳ್ಳಿ ಶವಗಾರಕ್ಕೆ ಕೋವಿಡ್‌ ಸೋಂಕಿತ ವ್ಯಕ್ತಿ ಮೃತ ದೇಹ ಕೊಂಡೊಯ್ಯಲು 10ರಿಂದ 12 ಸಾವಿರ ರೂ. ಕೇಳುತ್ತಿದ್ದಾರೆ. ಶವಾಗಾರದ ಬಳಿ ಕಾಯಬೇಕಾದರೆ ಪ್ರತಿ ತಾಸಿಗೆ ಒಂದು ಸಾವಿರ ರೂ. ಹೇಳುತ್ತಾರೆ. ಸದ್ಯದ ಸ್ಥಿತಿಯಲ್ಲಿ ಶವ ಸಂಸ್ಕಾರಕ್ಕೆ ಕನಿಷ್ಠ ಎಂಟರಿಂದ ಹತ್ತು ತಾಸು ಕಾಯಬೇಕಾಗುತ್ತದೆ. ಅಲ್ಲಿಗೆ ಆಂಬ್ಯುಲೆನ್ಸ್‌ಗೆ ನೀಡಬೇಕಾದ ಬಾಡಿಗೆಯೇ 20 ಸಾವಿರ ರೂ. ಮೇಲಾಗುತ್ತದೆ ಎಂದು ನಗರದ ವ್ಯಕ್ತಿಯೊಬ್ಬರು ಆರೋಪಿಸಿದ್ದಾರೆ. ಖರ್ಚು ಇದೆ ಸ್ವಾಮಿ..! ಆಂಬ್ಯುಲೆನ್ಸ್‌ ಮಾಲೀಕರೊಬ್ಬರು ಪ್ರತಿಕ್ರಿಯಿಸಿ 'ಡ್ರೈವರ್‌ಗೆ ಪಿಪಿಇ ಕಿಟ್‌ ನೀಡಬೇಕು. ಪ್ರತಿ ಬಾರಿಯೂ ವಾಹನ ಸ್ಯಾನಿಟೈಸ್‌ ಮಾಡಿಸಬೇಕು. ಬಳಿಕ ಮೂರು ತಾಸು ವಾಹನ ತೆಗೆಯುವ ಹಾಗಿಲ್ಲ. ಸೋಂಕಿತ ವ್ಯಕ್ತಿಯನ್ನು ಕರೆದುಕೊಂಡು ಹೋಗಲು ಡ್ರೈವರ್‌ಗಳು ಮುಂದೆ ಬರುವುದಿಲ್ಲ. ಬಂದವರು ಜಾಸ್ತಿ ಸಂಬಳ ಕೇಳುತ್ತಾರೆ. ಆಕ್ಸಿಜನ್‌ ಇರುವ ಆ್ಯಂಬುಲೆನ್ಸ್‌ಗೆ ಸ್ಟಾಫ್‌ ನರ್ಸ್‌ ಬೇಕು. ಅವರು ಕೂಡ ಹೆಚ್ಚಿನ ದರ ಕೇಳುತ್ತಾರೆ. ಹೀಗಾಗಿ, ಅನಿವಾರ್ಯವಾಗಿ ಬೆಲೆ ಹೆಚ್ಚಿಸಬೇಕಾಗುತ್ತದೆ' ಎಂದು ಹೇಳಿದ್ದಾರೆ. ದರ ನಿಗದಿಗೆ ಸೂಚನೆ: ಕಳೆದ ವರ್ಷ ಪುಣೆಯಲ್ಲಿ ಜೂನ್‌ 25ರಂದು ಕೇವಲ ಏಳು ಕಿ.ಮೀ ದೂರಕ್ಕೆ ಕೋವಿಡ್‌ ರೋಗಿಯೊಬ್ಬರಿಂದ ಆ್ಯಂಬುಲೆನ್ಸ್‌ ಸೇವಾದಾರರು 8,000 ರೂ. ದರ ವಿಧಿಸಿದ್ದಕ್ಕಾಗಿ ಜಿಲ್ಲಾಡಳಿತ ಪ್ರಕರಣ ದಾಖಲಿಸಿತ್ತು. ಕೋವಿಡ್‌-19 ರೋಗಿಗಳಿಗೆ ಸೇವೆ ಒದಗಿಸಲು ಆಂಬ್ಯುಲೆನ್ಸ್‌ ಪೂರೈಕೆದಾರರು ಅತಿ ಹೆಚ್ಚಿನ ದರ ಕೇಳುತ್ತಿರುವ ಬಗ್ಗೆ ಕಳವಳ ವ್ಯಕ್ತಪಡಿಸಿರುವ ಸುಪ್ರೀಂ ಕೋರ್ಟ್‌, ಇಂಥ ಸೇವೆಗಳಿಗೆ ಸಮಂಜಸ ದರ ನಿಗದಿ ಮಾಡುವಂತೆ ರಾಜ್ಯ ಸರಕಾರಗಳಿಗೆ ಸೂಚಿಸಿತ್ತು. ಆದರೆ, ಯಾವ ಸರಕಾರಗಳೂ ಇದನ್ನು ಗಂಭೀರವಾಗಿ ತೆಗೆದುಕೊಂಡಿಲ್ಲ.