ಬೆಂಗಳೂರಿನಲ್ಲಿ ಅಬ್ಬರಿಸಿದ ಮಳೆ, ಹೊಳೆಯಂತಾದ ರಸ್ತೆಗಳು; ಇನ್ನೂ ಎರಡು ದಿನ ಮಳೆ
ನಗರದಲ್ಲಿ ಗುರುವಾರ ಸಂಜೆಯಿಂದ ರಾತ್ರಿವರೆಗೆ ಸುಮಾರು 3 ಗಂಟೆಗಳ ಕಾಲ ಗುಡುಗು ಸಹಿತ ಧಾರಾಕಾರ ಮಳೆ ಸುರಿಯಿತು. ಇದರಿಂದ ರಸ್ತೆಗಳೆಲ್ಲವೂ ಹೊಳೆಯ ರೂಪ ತಾಳಿದ್ದವು. ಕೆಲ ರಸ್ತೆಗಳಲ್ಲಿ ಅಡಿಗಟ್ಟಲೇ ನೀರು ನಿಂತಿದ್ದರಿಂದ ವಾಹನ ಸವಾರರು ಪರದಾಟ ನಡೆಸಿದರು.
Admin
0
9
ಬೆಂಗಳೂರು: ನಗರದಲ್ಲಿ ಗುರುವಾರ ಸಂಜೆಯಿಂದ ರಾತ್ರಿವರೆಗೆ ಗುಡುಗು ಸಹಿತ ಸುರಿದ ಧಾರಾಕಾರ ಮಳೆಯಿಂದಾಗಿ ರಸ್ತೆಗಳೆಲ್ಲವೂ ಹೊಳೆಯ ರೂಪ ತಾಳಿದ್ದವು. ಕೆಲ ರಸ್ತೆಗಳಲ್ಲಿ ಅಡಿಗಟ್ಟಲೇ ನೀರು ನಿಂತಿದ್ದರಿಂದ ವಾಹನ ಸವಾರರು ಪರದಾಡುವಂತಾಯಿತು.
ಸುಮಾರು ಮೂರು ತಾಸುಗಳ ಕಾಲ ಎಡೆಬಿಡದೆ ಆರ್ಭಟಿಸಿದ ಮಳೆಯಿಂದಾಗಿ ರಸ್ತೆಗಳು, ಅಂಡರ್‌ಪಾಸ್‌ಗಳಲ್ಲಿ ಮೂರ್ನಾಲ್ಕು ಅಡಿಯಷ್ಟು ನೀರು ನಿಂತಿತ್ತು. ಕೋವಿಡ್‌ ಲಾಕ್‌ಡೌನ್‌ ನಡುವೆಯೂ ಕಾರ್ಯನಿರ್ವಹಿಸುತ್ತಿರುವ ಸರಕಾರದ ನಾನಾ ಇಲಾಖೆಯ ನೌಕರರು, ಪಾಲಿಕೆ ಸಿಬ್ಬಂದಿ, ಇತರೆ ಖಾಸಗಿ ಸಂಸ್ಥೆಗಳ ಉದ್ಯೋಗಿಗಳು ತೀವ್ರ ತೊಂದರೆ ಅನುಭವಿಸಿದರು.
ಮೆಜೆಸ್ಟಿಕ್‌, ಶಾಂತಿನಗರ, ಜಯನಗರ, ಬನಶಂಕರಿ, ಸಂಜಯನಗರ, ರಾಜರಾಜೇಶ್ವರಿನಗರ, ಮಲ್ಲೇಶ್ವರ, ಚಾಮರಾಜಪೇಟೆ, ಕೆ.ಆರ್‌.ಮಾರುಕಟ್ಟೆ, ಜಯನಗರ, ಬಸವನಗುಡಿ, ಎಂ.ಜಿ.ರಸ್ತೆ, ಶಿವಾಜಿನಗರ, ನಾಗರಬಾವಿ, ಬೊಮ್ಮನಹಳ್ಳಿ, ಬಿಟಿಎಂ ಲೇಔಟ್‌, ಕೋರಮಂಗಲ ಸೇರಿದಂತೆ ಹಲವು ಪ್ರದೇಶಗಳಲ್ಲಿ ವರುಣನ ಆರ್ಭಟ ಜೋರಾಗಿತ್ತು.
ಪರಿಣಾಮ, ರಸ್ತೆಗಳೆಲ್ಲವೂ ನದಿಗಳಾಗಿ ಮಾರ್ಪಟ್ಟಿದ್ದವು. ಕೆ.ಆರ್‌.ವೃತ್ತ, ಕಾವೇರಿ ಜಂಕ್ಷನ್‌, ಆನಂದರಾವ್‌ ವೃತ್ತ, ಓಕಳೀಪುರಂ, ಶೇಷಾದ್ರಿಪುರಂ ಬಳಿಯ ರೈಲ್ವೆ ಕೆಳಸೇತುವೆ, ಕೆ.ಆರ್‌.ರಸ್ತೆಯ ಠ್ಯಾಗೂರ್‌ ಅಂಡರ್‌ಪಾಸ್‌ನಲ್ಲಿ ಅಡಿಗಟ್ಟಲೇ ನಿಂತಿದ್ದರಿಂದ ವಾಹನ ಸವಾರರು ತೀವ್ರ ತೊಂದರೆಗೀಡಾದರು.
ಎಲ್ಲಿಎಷ್ಟು ಮಳೆ ?
ರಾಜಧಾನಿಯಲ್ಲಿ ಗುರುವಾರ ರಾತ್ರಿ 9.30 ಸುಮಾರಿಗೆ ಸಿಕ್ಕ ಮಾಹಿತಿಯಂತೆ ವಿವಿ ಪುರಂ 25 ಮಿ.ಮೀ, ಬಸವನಗುಡಿ 3.5 ಮಿ.ಮೀ, ಕಲ್ಲುಬಾಳು 12.5 ಮಿ.ಮೀ, ಮಾರೇನಹಳ್ಳಿ, 7.5 ಮಿ.ಮೀ, ಸಾತನೂರು 34 ಮಿ.ಮೀ. ಜಕ್ಕೂರು 20.5 ಮಿ.ಮೀ, ಕಾಟನ್‌ಪೇಟೆ 7 ಮಿ.ಮೀ, ಮನೋರಾಯನಪಾಳ್ಯ 22 ಮಿ.ಮೀ, ಗುಟ್ಟಳ್ಳಿ 5.5 ಮಿ.ಮೀ, ಚಾಮರಾಜಪೇಟೆ 12 ಮಿ.ಮೀ. ಲಕ್ಕಸಂದ್ರ 27 ಮಿ.ಮೀ, ಬೇಗೂರು 6.5 ಮಿ.ಮೀ, ಕೋರಮಂಗಲ 5.5 ಮಿ.ಮೀ, ಅಂಜನಾಪುರ 10.5 ಮಿ.ಮೀ, ದೊಡ್ಡಗುಬ್ಬಿ 7 ಮಿ.ಮಿ, ಕಣ್ಣೂರು 22ಮಿ.ಮೀ, ಬಾಣಸವಾಡಿ 16 ಮಿ.ಮಿ, ವನ್ನಾರ್‌ಪೇಟೆ 8.3 ಮಿ.ಮಿ, ಹಂಪಿನಗರ 24.5 ಮಿ.ಮಿ ಮಳೆಯಾಗಿದೆ.
ಇನ್ನೆರಡು ದಿನ ಮಳೆ ಸಾಧ್ಯತೆ
''ವಿವಿ ಪುರಂ, ಹಂಪಿನಗರ, ಜಕ್ಕೂರು, ಮನೋರಾಯನಪಾಳ್ಯ, ಬಾಣಸವಾಡಿ ಮತ್ತು ಲಕ್ಕಸಂದ್ರದಲ್ಲಿ ಮಳೆಯ ಪ್ರಮಾಣ ಹೆಚ್ಚಿತ್ತು. ನಗರದಲ್ಲಿ ಮುಂದಿನ ಎರಡು ದಿನ ಮಳೆಯಾಗುವ ಮುನ್ಸೂಚನೆ ಇದ್ದು, ಜೂನ್‌ 6 ರಿಂದ ಮಳೆಯ ತೀವ್ರತೆ ಕಡಿಮೆಯಾಗಲಿದೆ,'' ಎಂದು ಹವಾಮಾನ ಇಲಾಖೆಯ ಪ್ರಾದೇಶಿಕ ನಿರ್ದೇಶಕ ಸಿ.ಎಸ್‌ ಪಾಟೀಲ್‌ ಮಾಹಿತಿ ನೀಡಿದ್ದಾರೆ.
