ಬಿಗ್‌ಬಾಸ್ಕೆಟ್ ಅನ್ನು ತನ್ನ 'ಕಾರ್ಟ್'ಗೆ ಸೇರಿಸಿಕೊಂಡ ಟಾಟಾ ಡಿಜಿಟಲ್

ಬೆಂಗಳೂರು: ಆನ್‌ಲೈನ್‌ ಮೂಲಕ ಮಾರಾಟ ಮಾಡುವ ಬಿಗ್‌ಬಾಸ್ಕೆಟ್‌ನ ಬಹುಪಾಲು ಷೇರು ಖರೀದಿಗೆ ಮುಂದಾಗಿದ್ದ ಟಾಟಾ ಡಿಜಿಟಲ್‌ನ ಪ್ರಸ್ತಾವನೆಗೆ ಭಾರತೀಯ ಸ್ಪರ್ಧಾತ್ಮಕ ಆಯೋಗ (ಸಿಸಿಐ) ಒಪ್ಪಿಗೆ ನೀಡಿದೆ. ಈ ಮೂಲಕ ಅಲಿಬಾಬ ಬೆಂಬಲಿತ ಬಿಗ್‌ಬಾಸ್ಕೆಟ್‌ನ್ನು ಖರೀದಿಸುವುದು ಅಂತಿಮಗೊಂಡಿದೆ. ಈ ಖರೀದಿಯೊಂದು ಬೆಳೆಯುತ್ತಿರುವ ಆನ್‌ಲೈನ್‌ ದಿನಸಿ ಮಾರುಕಟ್ಟೆಯಲ್ಲಿ ಕಾಲೂರಲು ಟಾಟಾ ಗ್ರೂಪ್‌ ಕೂಡ ಸಿದ್ದವಾದಂತಾಗಿದೆ. ಟಾಟಾ ಸನ್ಸ್‌ನ ಸಂಪೂರ್ಣ ಸ್ವಾಮ್ಯದ ಅಂಗ ಸಂಸ್ಥೆಯಾಗಿದ್ದು, ಬಿಗ್‌ಬಾಸ್ಕೆಟ್‌ನ ಮೂಲ ಸಂಸ್ಥೆ ಸೂಪರ್‌ ಮಾರ್ಕೆಟ್‌ ಗ್ರೋಸರಿ ಸಪ್ಲೈಸ್‌ನ ಶೇ.64.3ರಷ್ಟು ಷೇರು ಖರೀದಿಗೆ (ಒಟ್ಟು ಸುಮಾರು 8,885 ಕೋಟಿ ರೂ.ಗೆ) ಸಿಸಿಐಗೆ ಪ್ರಸ್ತಾವನೆ ಸಲ್ಲಿಸಿತ್ತು. ಇದಕ್ಕೀಗ ಒಪ್ಪಿಗೆ ಸಿಕ್ಕಿದ್ದು ಖರೀದಿ ಪ್ರಕ್ರಿಯೆ ಸುಗಮವಾಗಿದೆ. ಈ ಕಂಪನಿ ಮಾತ್ರವಲ್ಲದೆ ಹೋಲ್‌ಸೇಲ್‌ ವ್ಯವಹಾರವನ್ನೂ ನಡೆಸುತ್ತಿದೆ. ಇದೀಗ ಟಾಟಾ ಡಿಜಿಟಲ್‌ ಇವೆರಡನ್ನೂ ತನ್ನ ತೆಕ್ಕೆಗೆ ಹಾಕಿಕೊಂಡಿದೆ. ಈ ಹಿಂದೆ ಫೆಬ್ರವರಿಯಲ್ಲಿಯೇ ಟಾಟಾ ಗ್ರೂಪ್‌ ಬಿಗ್‌ಬಾಸ್ಕೆಟ್‌ನ್ನು ಖರೀದಿಸಲಿದೆ ಎಂದು ಬರೆದಿದ್ದೆವು. ಟಾಟಾ ಡಿಜಿಟಲ್‌ ಬಿಗ್‌ಬಾಸ್ಕೆಟ್‌ನಲ್ಲಿರುವ ಅಲಿಬಾಬಾದ ಶೇ. 27.58ರಷ್ಟು ಷೇರುಗಳನ್ನು, ಆಕ್ಟಿಸ್‌ ಎಲ್‌ಎಲ್‌ಪಿಯ ಶೇ. 18.05 ಷೇರುಗಳನ್ನು ಖರೀದಿಸಲಿದೆ. ಇದರ ಜೊತೆಗ ಇತರ ಸಣ್ಣ ಹೂಡಿಕೆದಾರರು ಕಂಪನಿ ತೊರೆಯಲಿದ್ದು, ಟಾಟಾಗೆ ಜಾಗ ಬಿಟ್ಟುಕೊಡಲಿದ್ದಾರೆ. ಇದೇ ವೇಳೆ 2022-23ರ ಸುಮಾರಿಗೆ ಬಿಗ್‌ಬಾಸ್ಕೆಟ್‌ನ್ನು ಷೇರು ಮಾರುಕಟ್ಟೆಗೆ ಪರಿಚಯಿಸುವ ಸಾಧ್ಯತೆಯೂ ಇದೆ. ಈ ಖರೀದಿಯೊಂದಿಗೆ ಟಾಟಾ ಗ್ರೂಪ್‌ ರಿಲಯನ್ಸ್‌ನ ಜಿಯೋ ಮಾರ್ಟ್‌, ಅಮೆಜಾನ್‌, ವಾಲ್‌ಮಾರ್ಟ್‌ನ ಫ್ಲಿಪ್‌ಕಾರ್ಟ್‌ ಮತ್ತು ಸಾಫ್ಟ್‌ಬ್ಯಾಂಕ್‌ ಬೆಂಬಲಿತ ಗ್ರೋಫರ್ಸ್‌ ಜತೆ ಬಹಿರಂಗ ಸ್ಪರ್ಧೆಗಿಳಿದಿದೆ. ಆದರೆ ಸದ್ಯಕ್ಕೆ ದಿನಸಿ ಮಾರುಕಟ್ಟೆಯಲ್ಲಿ ಬಿಗ್‌ಬಾಸ್ಕೆಟ್‌ ಅಗ್ರಸ್ಥಾನದಲ್ಲಿದೆ. ಫ್ಲಿಪ್‌ಕಾರ್ಟ್‌ ಮತ್ತು ಅಮೆಜಾನ್‌ ಹೆಚ್ಚಿನ ಮಾರುಕಟ್ಟೆ ವ್ಯಾಪ್ತಿ ಹೊಂದಿದ್ದರೂ ದಿನಸಿ ಮಾರುಕಟ್ಟೆಯಲ್ಲಿ ಹೇಳಿಕೊಳ್ಳುವಂತ ಸದ್ದು ಮಾಡಲು ಎರಡೂ ಕಂಪನಿಗಳಿಗೆ ಸಾಧ್ಯವಾಗಿಲ್ಲ. ಲಾಕ್‌ಡೌನ್‌, ಕರ್ಫ್ಯೂ ಮೊದಲಾದ ಕೊರೊನಾ ನಿರ್ಬಂಧಿತ ಕ್ರಮಗಳು ಬಿಗ್‌ಬಾಸ್ಕೆಟ್‌ನಂತ ಆನ್‌ಲೈನ್‌ ಮಾರಾಟ ತಾಣಗಳಿಗೆ ವರದಾನವಾಗಿ ಪರಿಣಮಿಸಿದ್ದು, ಏಪ್ರಿಲ್‌ನಲ್ಲಿ ನಮ್ಮ ಮಾರಾಟ ಶೇ. 23-25ರಷ್ಟು ಹೆಚ್ಚಾಗಿದೆ ಎಂದು ಸ್ವತಃ ಬಿಗ್‌ಬಾಸ್ಕೆಟ್‌ ಹೇಳಿದೆ.