ಪ್ರಭಾಸ್‌ 'ರಾಧೆ ಶ್ಯಾಮ್‌'ಗೆ ರಿಲೀಸ್‌ ಡೇಟ್‌ ಫಿಕ್ಸ್; ಸಂಕ್ರಾಂತಿ ಹಬ್ಬಕ್ಕೆ ಬಾಕ್ಸ್ ಆಫೀಸ್‌ ವಾರ್‌!

'ಪ್ಯಾನ್ ಇಂಡಿಯಾ ಸ್ಟಾರ್‌' ಪ್ರಭಾಸ್‌ ಅವರ ಸಿನಿಮಾಗಳಿಗಾಗಿ ಅಭಿಮಾನಿಗಳು ಕಾದುಕುಳಿತಿದ್ದಾರೆ. ಅದರಲ್ಲೂ 'ರಾಧೆ ಶ್ಯಾಮ್‌' ಸಿನಿಮಾ ನೋಡಲು ಕಾತರರಾಗಿದ್ದಾರೆ. ಯಾಕೆಂದರೆ, ಈ ಸಿನಿಮಾದ ಕೆಲಸಗಳು ಆರಂಭವಾಗಿ ಎರಡು ವರ್ಷದ ಮೇಲಾಯ್ತು. ಹೀಗಿದ್ದರೂ ಕೊರೊನಾ ಮತ್ತಿತರ ಕಾರಣಗಳಿಂದಾಗಿ ಇನ್ನೂ ತೆರೆಕಂಡಿಲ್ಲ. ಎಲ್ಲ ಅಂದುಕೊಂಡಂತೆ ಆಗಿದ್ದರೆ 'ರಾಧೆ ಶ್ಯಾಮ್' ಇಂದು (ಜು.30) ರಿಲೀಸ್ ಆಗಬೇಕಿತ್ತು, ಅದು ಸಾಧ್ಯವಾಗಲಿಲ್ಲ. ಆದರೆ, ಇವತ್ತೇ ಒಂದು ಗುಡ್ ನ್ಯೂಸ್‌ ಅನ್ನು ಚಿತ್ರತಂಡ ನೀಡಿದೆ. ಸಂಕ್ರಾಂತಿ ಹಬ್ಬಕ್ಕೆ ರಾಧೆ ಶ್ಯಾಮ್‌'ರಾಧೆ ಶ್ಯಾಮ್' ಚಿತ್ರದ ಹೊಸ ರಿಲೀಸ್ ಡೇಟ್ ಬಹಿರಂಗವಾಗಿದೆ. 2022ರ ಜನವರಿ 14ರಂದು ಈ ಸಿನಿಮಾ ತೆಲುಗು, ಕನ್ನಡ ಸೇರಿದಂತೆ ಐದು ಭಾಷೆಗಳಲ್ಲಿ ತೆರೆಗೆ ಬರಲಿದೆ. ಅಲ್ಲಿಗೆ ಇನ್ನೂ ಐದು ತಿಂಗಳು ಕಾಯಬೇಕಾದ ಅನಿವಾರ್ಯತೆ ಅಭಿಮಾನಿಗಳಿಗೆ ಎದುರಾಗಿದೆ. 'ರಾಧೆ ಶ್ಯಾಮ್'ನಲ್ಲಿ ಪ್ರಭಾಸ್‌ಗೆ ನಾಯಕಿಯಾಗಿ ಪೂಜಾ ಹೆಗ್ಡೆ ಕಾಣಿಸಿಕೊಂಡಿದ್ದಾರೆ. ರಾಧಕೃಷ್ಣ ಕುಮಾರ್ ಇದರ ನಿರ್ದೇಶಕರು. ರೆಟ್ರೋ ಕಾಲದ ಲವ್ ಸ್ಟೋರಿಯನ್ನು ರಾಧೆ ಶ್ಯಾಮ್‌ ಹೊಂದಿದೆಯಂತೆ. 2022ರಲ್ಲಿ ಪ್ರಭಾಸ್‌ರ ಮೂರು ಸಿನಿಮಾ? ಅವರ 'ರಾಧೆ ಶ್ಯಾಮ್‌' ಸಂಕ್ರಾಂತಿಗೆ ತೆರೆಗೆ ಬರಲಿದೆ. ಪ್ರಶಾಂತ್ ನೀಲ್ ಜೊತೆಗಿನ 'ಸಲಾರ್‌' ಕೆಲಸಗಳು ಬಿರುಸಿನಿಂದ ಸಾಗಿದ್ದು, ಆ ಸಿನಿಮಾವನ್ನು ಏಪ್ರಿಲ್‌ 14ರಂದು ರಿಲೀಸ್ ಮಾಡಲು ನಿರ್ಧಾರ ಮಾಡಲಾಗಿದೆ. ಜೊತೆಗೆ ಹಿಂದಿಯಲ್ಲಿ ಸಿದ್ಧವಾಗುತ್ತಿರುವ ಬಹುನಿರೀಕ್ಷಿತ 'ಆದಿಪುರುಷ್' ಚಿತ್ರಕ್ಕೂ ಕೆಲಸಗಳು ಆರಂಭಗೊಂಡಿವೆ. ಅದನ್ನು 2022ರ ಆಗಸ್ಟ್ 11ರಂದು ರಿಲೀಸ್ ಮಾಡಲು ನಿರ್ಧರಿಸಲಾಗಿದೆ. ಹೀಗೆ 2022ರ ಆರಂಭದ ಎಂಟು ತಿಂಗಳಲ್ಲಿ ಪ್ರಭಾಸ್ ಅವರ 3 ಸಿನಿಮಾ ಬರುವುದು ಖಚಿತವಾಗಿದೆ. ಸಂಕ್ರಾಂತಿ ರೇಸ್‌ಗೆ ಬಂದ ರಾಧೆ ಶ್ಯಾಮ್‌ಈಗಾಗಲೇ ಸಂಕ್ರಾಂತಿ ಹಬ್ಬಕ್ಕೆ ದೊಡ್ಡ ಸಿನಿಮಾಗಳೇ ಕಾಯುತ್ತಿವೆ. 'ಅಯ್ಯಪ್ಪನುಂ ಕೋಶಿಯುಂ' ರಿಮೇಕ್‌ನಲ್ಲಿ ಪವನ್‌ ಕಲ್ಯಾಣ್ ಮತ್ತು ರಾಣಾ ದಗ್ಗುಬಾಟಿ ನಟಿಸುತ್ತಿದ್ದು, ಆ ಸಿನಿಮಾವು ಸಂಕ್ರಾಂತಿಗೆ ರಿಲೀಸ್ ಆಗುವುದಕ್ಕೆ ತಯಾರಿ ಮಾಡಿಕೊಳ್ಳುತ್ತಿದೆ. ಜೊತೆಗೆ ಮಹೇಶ್ ಬಾಬು ನಟನೆಯ 'ಸರ್ಕಾರು ವಾರಿ ಪಾಟ' ಕೂಡ ಸಂಕ್ರಾಂತಿಗೆ ಬರುವುದಕ್ಕೆ ಸಿದ್ಧತೆ ಮಾಡಿಕೊಂಡಿದೆ. ಇವೆರಡೂ ಬಿಗ್ ಬಜೆಟ್ ಸಿನಿಮಾಗಳ ನಡುವೆ 'ರಾಧೆ ಶ್ಯಾಮ್‌' ಎಂಟ್ರಿ ಕೊಟ್ಟಿರುವುದರಿಂದ ಬಾಕ್ಸ್‌ ಆಫೀಸ್‌ ವಾರ್ ಆಗುವುದಂತೂ ಖಚಿತ.