'ಪ್ರಧಾನಿ ಮೋದಿ ಹೇಡಿಯಂತೆ ವರ್ತಿಸಿದ್ದಾರೆ': ಕೋವಿಡ್ ನಿರ್ವಹಣೆ ವಿಚಾರದಲ್ಲಿ ಕೇಂದ್ರವನ್ನು ಜಾಲಾಡಿದ ಪ್ರಿಯಾಂಕಾ
ಕೋವಿಡ್ ನಿರ್ವಹಣೆ ಕುರಿತು ಕೇಂದ್ರ ಸರಕಾರ ತೆಗೆದುಕೊಂಡ ಕ್ರಮಗಳ ಬಗ್ಗೆ ಟೀಕಾಪ್ರಹಾರ ನಡೆಸಿರುವ ಕಾಂಗ್ರೆಸ್ ನಾಯಕಿ ಪ್ರಿಯಾಂಕಾ ಗಾಂಧಿ, ಪ್ರಧಾನಿ ನರೇಂದ್ರ ಮೋದಿ ಹೇಡಿಯಂತೆ ವರ್ತಿಸಿದ್ದಾರೆ ಎಂದು ವ್ಯಂಗ್ಯವಾಡಿದ್ದಾರೆ.
Admin
0
6
ಹೊಸದಿಲ್ಲಿ: ಪ್ರಧಾನಿ ಅವರಿಗೆ ಭಾರತೀಯರು ಮೊದಲ ಆದ್ಯತೆ ಅಲ್ಲ. ಅವರಿಗೆ ಅವರ ರಾಜಕೀಯವೇ ಮುಖ್ಯ. ಸತ್ಯವು ಅವರಿಗೆ ಕಳವಳ ಮೂಡಿಸುವುದಿಲ್ಲ, ಆದರೆ ಪ್ರಚಾರ ಅವರನ್ನು ಕಂಗೆಡಿಸುತ್ತದೆ ಎಂದು ಕಾಂಗ್ರೆಸ್ ನಾಯಕಿ ಶನಿವಾರ ವಾಗ್ದಾಳಿ ನಡೆಸಿದ್ದಾರೆ.
'ಯಾರು ಹೊಣೆಗಾರರು?' ಎಂಬ ಆಂದೋಲನ ನಡೆಸಿರುವ ಪ್ರಿಯಾಂಕಾ, ನಿರ್ವಹಣೆಗೆ ಸಂಬಂಧಿಸಿದಂತೆ ಪ್ರಧಾನಿ ನರೇಂದ್ರ ಮೋದಿ ಸರಕಾರ ತೆಗೆದುಕೊಂಡ ಕ್ರಮಗಳನ್ನು ಪ್ರಶ್ನಿಸಿದ್ದಾರೆ. ನಾಯಕತ್ವದ ಬಿಕ್ಕಟ್ಟಿನ ಬಗ್ಗೆ ಉಲ್ಲೇಖಿಸಿರುವ ಅವರು, ಸಾಂಕ್ರಾಮಿಕದ ಸಂದರ್ಭದಲ್ಲಿ ಪ್ರಧಾನಿಯವರ ಆಡಳಿತದಲ್ಲಿನ ಅದಕ್ಷತೆಯನ್ನು ಇಡೀ ಜಗತ್ತು ಕಣ್ಣಾರೆ ಕಂಡಿದೆ ಎಂದು ಟೀಕಿಸಿದ್ದಾರೆ.
"ಪ್ರಧಾನಿ ಸುಮ್ಮನೆ ಬೆದರಿ ಕುಳಿತು ಕೆಟ್ಟ ಸ್ಥಿತಿ ತೊಲಗಲಿ ಎಂದು ಕಾದಿದ್ದರು. ಪ್ರಧಾನಿ ಒಬ್ಬ ಹೇಡಿಯಂತೆ ವರ್ತಿಸಿದ್ದಾರೆ. ಅವರು ನಮ್ಮ ದೇಶವನ್ನು ಅಧಃಪತನಗೊಳಿಸಿದ್ದಾರೆ" ಎಂದು ಅವರು ಸಾಮಾಜಿಕ ಜಾಲತಾಣದಲ್ಲಿ ಕಿಡಿಕಾರಿದ್ದಾರೆ.
"ಅವರಿಗೆ ಭಾರತೀಯರು ಮೊದಲು ಕಾಣಿಸುವುದಿಲ್ಲ. ಆದರೆ ರಾಜಕೀಯ ಕಾಣಿಸುತ್ತದೆ. ಸತ್ಯದ ಬಗ್ಗೆ ಅವರಿಗೆ ಕಳವಳವಿಲ್ಲ. ಆದರೆ ಪ್ರಚಾರಗಳು ಕಳವಳ ಮೂಡಿಸುತ್ತವೆ. ಯಾರು ಹೊಣೆಗಾರರು ಎಂದು ಪ್ರಧಾನಿ ಅವರನ್ನು ಕೇಳುವ ಸಮಯ ಬಂದಿದೆ" ಎಂದು ಪ್ರಿಯಾಂಕಾ ಹೇಳಿದ್ದಾರೆ.
"ಬಿಕ್ಕಟ್ಟಿನಲ್ಲಿ ಉತ್ತಮ ಆಡಳಿತ ನಡೆಸುವುದೆಂದರೆ ಸತ್ಯವನ್ನು ಎದುರಿಸುವುದು, ಹೊಣೆಗಾರಿಕೆಗಳನ್ನು ಹೊರುವುದು ಮತ್ತು ಕ್ರಮ ತೆಗೆದುಕೊಳ್ಳುವುದಾಗಿದೆ. ದುರದೃಷ್ಟವಶಾತ್ ಮೋದಿ ಸರ್ಕಾರ ಇದಾವುದನ್ನೂ ಮಾಡಿಲ್ಲ. ಬದಲಾಗಿ ಸಾಂಕ್ರಾಮಿಕದ ಆರಂಭದಲ್ಲಿಯೇ ಸತ್ಯವನ್ನು ಅಡಗಿಸಲು ಮತ್ತು ಜವಾಬ್ದಾರಿಯಿಂದ ನುಣುಚಿಕೊಳ್ಳಲು ಎಲ್ಲ ಪ್ರಯತ್ನಗಳನ್ನೂ ಮಾಡಿದೆ" ಎಂದು ಆರೋಪಿಸಿದ್ದಾರೆ.
ಕೋವಿಡ್ 19 ಹರಡದಂತೆ ತಡೆಯಲು ಪ್ರಧಾನಿ ನರೇಂದ್ರ ಮೋದಿ ಅವರು ತೆಗೆದುಕೊಳ್ಳಬೇಕಾಗಿದ್ದ ಕ್ರಮಗಳ ಸುದೀರ್ಘ ಪಟ್ಟಿಯನ್ನು ಕೂಡ ಪ್ರಿಯಾಂಕಾ ಹಂಚಿಕೊಂಡಿದ್ದಾರೆ.
