ಪೆಗಾಸಸ್‌ ಪ್ರಕರಣ: ಸುಪ್ರೀಂ ಸಮಿತಿಗೆ ಕೇಂದ್ರ ಸರ್ಕಾರ ಸಂಪೂರ್ಣ ಸಹಕಾರ ನೀಡಲಿದೆ; ಕೇಂದ್ರ ಸಚಿವ

ಹೊಸದಿಲ್ಲಿ: ಪೆಗಾಸಸ್‌ ಗೂಢಚರ್ಯ ಪ್ರಕರಣದ ತನಿಖೆಗೆ ಸುಪ್ರೀಂ ಕೋರ್ಟ್‌ ನೇಮಿಸಿರುವ ತಜ್ಞರ ಸಮಿತಿಗೆ ಅಗತ್ಯ ಸಹಕಾರ ನೀಡುವುದಾಗಿ ಕೇಂದ್ರ ಸರಕಾರ ತಿಳಿಸಿದೆ. ತನಿಖೆ ನಡೆಸಲು ಉತ್ತಮ ಮೂಲ ಸೌಕರ್ಯ, ಪ್ರಯೋಗಾಲಯ ಸವಲತ್ತು ಮತ್ತು ಮಾಹಿತಿ ಅನುಕೂಲ ಬೇಕಾಗುತ್ತದೆ. ಅದನ್ನು ತಜ್ಞರ ಸಮಿತಿಗೆ ನಾವು ಒದಗಿಸುತ್ತೇವೆ ಎಂದು ತಂತ್ರಜ್ಞಾನ ಸಚಿವ ಅವರು 'ಟೈಮ್ಸ್‌ ನೌ ಸಮಾವೇಶ'ದಲ್ಲಿ ಭರವಸೆ ನೀಡಿದ್ದಾರೆ. ‘ಸಾಮಾಜಿಕ ಮಾಧ್ಯಮ ತಾಣಗಳು ಜನರಿಗೆ ಹೇರಳವಾದ ಅಭಿವ್ಯಕ್ತಿ ಅವಕಾಶಗಳನ್ನು ಒದಗಿಸಿವೆ. ಸರಕಾರವೂ ಮುಕ್ತ ಅಭಿವ್ಯಕ್ತಿಗೆ ಅವಕಾಶ ಕಲ್ಪಿಸಿದೆ. ಆದರೆ, ಇರುವ ಮುಕ್ತತೆ ದುರ್ಬಳಕೆಯಾಗದಂತೆ ತಡೆಯುವ ಜವಾಬ್ದಾರಿ ಜನರ ಮೇಲಿದೆ. ಕೆಲವರು ತಂತ್ರಜ್ಞಾನದ ಈ ಅನುಕೂಲವನ್ನು ದುರ್ಬಳಕೆ ಮಾಡಿಕೊಳ್ಳುತ್ತಿದ್ದಾರೆ. ಇದರಿಂದ ನಮ್ಮ ಯೋಚನೆಯ ಪಥದ ಮೇಲೆ ಒತ್ತಡ ಸೃಷ್ಟಿಯಾಗುತ್ತಿದೆ. ಇದನ್ನು ತಹಬಂದಿಗೆ ತರಲು ಕಾಯಿದೆಗಳು ಅನಿವಾರ್ಯ ಎಂದು ಅಶ್ವಿನಿ ವೈಷ್ಣವ್‌ ಹೇಳಿದರು. ಕಾಯಿದೆಗಳು ಏಕಾಏಕಿ ರೂಪುಗೊಳ್ಳುವುದಿಲ್ಲ. ನಮ್ಮ ಸಂಸ್ಕೃತಿಯ ತಳಹದಿ, ನಮ್ಮ ಅಗತ್ಯ ಮತ್ತು ನೈಜತೆಯನ್ನು ಕೇಂದ್ರೀಕರಿಸಿ ಸಿದ್ಧಗೊಳ್ಳುತ್ತವೆ ಎಂದು ಸಮರ್ಥಿಸಿದರು. ಸಾಮಾಜಿಕ ಮಾಧ್ಯಮಗಳ ವಿಷಯಕ್ಕೆ ಬಂದಾಗ 'ನಂಬಿಕೆ' ಎನ್ನುವ ಬಂಡವಾಳ ಅಸ್ಥಿರಗೊಳ್ಳುತ್ತಿರುವುದು ಕಳವಳಕಾರಿ. ಈ ದಿಸೆಯಲ್ಲಿ ಸರಕಾರ ರೂಪಿಸುವ ನಿರ್ಬಂಧಗಳು ಪ್ರಗತಿಯ ತಡೆಗೋಡೆಗಳೆಂದು ಭಾವಿಸುವ ಅಗತ್ಯ ಇಲ್ಲ. ಸಾಮಾಜಿಕ ಮಾಧ್ಯಮಗಳನ್ನು ಸಮರ್ಥ ರೀತಿಯಲ್ಲಿ ಬಳಸಲು ಬೇಕಾದ ಸ್ವಯಂ ಶಿಸ್ತಿನ ಚೌಕಟ್ಟು ಎಂದು ವ್ಯಾಖ್ಯಾನಿಸಿದರು. ಆಧುನಿಕ ತಂತ್ರಜ್ಞಾನ ಒದಗಿಸಿರುವ ಸವಲತ್ತಿನ ಸದ್ಬಳಕೆ ಮಾಡುವಾಗ ಮೊದಲು ನಮ್ಮಲ್ಲಿ ಸ್ವಯಂ ನಿಯಂತ್ರಣ ಇರಬೇಕಾದದ್ದು ಮುಖ್ಯ. ಸ್ವಯಂ ನಿಯಂತ್ರಣವೇ ಮೊದಲ ಹೆಜ್ಜೆ. ಎರಡನೆಯದು ಬಳಕೆದಾರರೇ ಸ್ಫೂರ್ತಿಯಿಂದ ನಿಯಂತ್ರಿಸುವುದು. ಕೊನೆಯದು ಸರಕಾರ ಇರಿಸುವ ಮೂರನೇ ಹೆಜ್ಜೆ. ಈ ಸೂಕ್ಷ್ಮ ಜಾಲವನ್ನು ಗಮನದಲ್ಲಿ ಇಟ್ಟುಕೊಂಡೇ ಕಾಯಿದೆ ರೂಪಿಸಲಾಗುತ್ತದೆ. ಅದೇನೇ ಇದ್ದರೂ ಗ್ರಾಹಕರ ಹಿತವೇ ಪ್ರಧಾನ ಎಂದು ಸಚಿವರು ಭರವಸೆ ನೀಡಿದರು. ಪೆಗಾಸಸ್‌ ಸ್ಪೈವೇರ್‌ ಬಳಕೆ ವಿಷಯದಲ್ಲಿ ಸ್ವಯಂ ಸರಕಾರವೇ ಅಂತಹ ಪ್ರಮಾದ ಮಾಡಿದೆಯೇ ಎನ್ನುವ ಸಂಶಯದ ಪ್ರಶ್ನೆಗಳಿಗೆ ಸಚಿವರು ‘ಖಂಡಿತ ಇಲ್ಲ’ ಎನ್ನುವ ನಿಖರ ಉತ್ತರ ನೀಡಿದರು. ‘ಈ ವಿಚಾರದಲ್ಲಿ ಸರಕಾರ ತುಂಬಾ ಪ್ರಾಮಾಣಿಕವಾಗಿದೆ. ಲವಲೇಶವೂ ಕಳಂಕ ಇಲ್ಲದೇ ಈ ಪ್ರಕರಣದಿಂದ ಸರಕಾರ ಹೊರ ಬರುತ್ತದೆ ಎಂದು ಉತ್ತರಿಸಿದರು.