ನಿಮ್ಗೆ ಗೊತ್ತಾ.. ಬಹುಭಾಷಾ ನಗರಿ ಬೆಂಗಳೂರಿನಲ್ಲಿ 107 ಭಾಷೆ ಮಾತನಾಡುವ ಜನರು ಇದ್ದಾರೆ!

ಬೆಂಗಳೂರು: ಅಂತಾರಾಷ್ಟ್ರೀಯ ನಗರ ಎಂಬ ಖ್ಯಾತಿ ಪಡೆದಿರುವ ಮಹಾನಗರದಲ್ಲಿ 107ಕ್ಕೂ ಅಧಿಕ ಭಾಷೆ ಮಾತನಾಡುವ ಜನರಿದ್ದಾರೆಂಬುದು ಇತ್ತೀಚಿನ ಅಧ್ಯಯನದಲ್ಲಿ ದೃಢಪಟ್ಟಿರುವುದು ಸರಿಯಷ್ಟೇ. ಆದರೆ ಇತಿಹಾಸದ ಪುಟಗಳನ್ನು ಕೆದಕಿದಾಗ ತಿಳಿದು ಬಂದದ್ದೆಂದರೆ, 18ನೇ ಶತಮಾನದಲ್ಲಿಯೇ ಬೆಂಗಳೂರು ಬಹು ಭಾಷಿಗರ ನಗರಿಯಾಗಿತ್ತಂತೆ..! ಹೌದು, ನಾನಾ ಭಾಷೆಗಳನ್ನು ಮಾತನಾಡುವ ಜನರು ಇಲ್ಲಿ ಶತಮಾನಗಳಿಂದ ಶಾಂತಿ ಮತ್ತು ಸೌಹಾರ್ದತೆಯಿಂದ ಬಾಳಿ ಬದುಕಿದ ಉದಾಹರಣೆ ಇದೆ. 2011ರ ಜನಗಣತಿಯ ಪ್ರಕಾರ, ದೇಶದಲ್ಲಿಯೇ ಅತ್ಯಧಿಕ ಅಂದರೆ 107ಕ್ಕೂ ಅಧಿಕ ಭಾಷೆಗಳನ್ನು ಮಾತನಾಡುವ ಜನರು ಬೆಂಗಳೂರು ನಗರದಲ್ಲಿದ್ದಾರೆ. ಇತಿಹಾಸ ತಜ್ಞರ ಪ್ರಕಾರ, ಬ್ರಿಟಿಷ್‌ ಆಳ್ವಿಕೆ ವೇಳೆ ನಾಲ್ಕನೇ ಆಂಗ್ಲೋ- ಮೈಸೂರು ಕದನದಲ್ಲಿ ಟಿಪ್ಪು ಸುಲ್ತಾನ್‌ ಪರಾಭವಗೊಂಡ ನಂತರ ಐರೋಪ್ಯರು ಬಹಳ ದೊಡ್ಡ ಸಂಖ್ಯೆಯಲ್ಲಿ ಬೆಂಗಳೂರಿನಲ್ಲಿ ನೆಲೆ ಕಂಡುಕೊಳ್ಳಲು ನಗರಕ್ಕೆ ದಂಡು ದಂಡಾಗಿ ಆಗಮಿಸಿದರು. ಆ ವೇಳೆಗಾಗಲೇ ನಗರ ಕನ್ನಡಿಗರಿಗೆ ಮಾತ್ರವಲ್ಲ ಬಹುಸಂಖ್ಯೆಯ ತೆಲುಗು, ತಮಿಳು, ಉರ್ದು ಮತ್ತು ಮರಾಠಿ ಭಾಷಿಗರಿಗೆ ಆಶ್ರಯ ನೀಡಿತ್ತು. ‘ಬೆಂಗಳೂರಿನಲ್ಲಿ ತಮಿಳು, ತೆಲುಗು ಮತ್ತು ಮರಾಠಿ ಭಾಷಿಗರು ಹೆಚ್ಚಿನ ಸಂಖ್ಯೆಯಲ್ಲಿ ನೆಲೆಸಿದ್ದು, ನಗರ ಸುಂದರವಾದ ಬಹುಭಾಷಾ ಸಮಾಜವನ್ನು ತನ್ನ ಒಡಲಲ್ಲಿಟುಕೊಂಡು ಪೋಷಿಸುತ್ತಿದೆ. 18ನೇ ಶತಮಾನದಲ್ಲಿ ಇದು ಭಿನ್ನ ನಗರಿಯಾಗಿತ್ತು, ಆಗಿನಿಂದಲೇ ಅದು ಎಲ್ಲ ಭಾಷಿಗರನ್ನು ಆತ್ಮೀಯವಾಗಿ ಸ್ವಾಗತಿಸುತ್ತಿದೆ’ ಎನ್ನುತ್ತಾರೆ ಅಜೀಂ ಪ್ರೇಮ್‌ ಜಿ ವಿಶ್ವವಿದ್ಯಾಲಯದ ಸಂಶೋಧಕರಾದ ಹರಿಣಿ ನಾಗೇಂದ್ರ. ಕ್ರೈಸ್ಟ್‌ ವಿವಿ ಯ ಸಮಾಜಶಾಸ್ತ್ರ ವಿಭಾಗದ ರಾಜೀವ್‌ ಕುಮಾರಂ ಕಂಡತ್‌ ಹೇಳುವಂತೆ, ‘ಬೆಂಗಳೂರಿನಲ್ಲಿ ಎಲ್ಲ ಬಗೆಯ, ಎಲ್ಲ ಭಾಷೆಯ ಜನರು ಬೆರೆತು ಜೀವನ ನಡೆಸುತ್ತಿದ್ದಾರೆ. ಆದರೆ ಶೈಕ್ಷಣಿಕ ತಜ್ಞರು ‘ನಗರದಲ್ಲಿ ಎಲ್ಲ ಭಾಷೆಯ ಜನರಿರುವುದು ಒಳ್ಳೆಯದು, ಆದರೆ ಸ್ಥಳೀಯ ಭಾಷೆ ಕನ್ನಡಕ್ಕೆ ಹೆಚ್ಚಿನ ಮನ್ನಣೆ ನೀಡಬೇಕಿದೆ. ನಗರದಲ್ಲಿನ ಎಲ್ಲರೂ ಕನ್ನಡವನ್ನು ಕಲಿಯುವ ಮೂಲಕ ಭಾಷೆಗೆ ಅಗ್ರ ಆದ್ಯತೆಯನ್ನು ನೀಡಬೇಕಿದೆ’ ಎನ್ನುತ್ತಾರೆ. ಈಶಾನ್ಯ ರಾಜ್ಯಗಳ ಬಹುತೇಕ ಜನರು ಉತ್ತರ ಭಾರತದ ಬದಲಿಗೆ ದಕ್ಷಿಣ ಭಾರತವನ್ನು ಬಯಸುತ್ತಾರೆ. ಏಕೆಂದರೆ ಇಲ್ಲಿನ ಜನರು ಎಲ್ಲರನ್ನೂ ಪ್ರೀತಿಯಿಂದ ಬರಮಾಡಿಕೊಳ್ಳುತ್ತಾರೆ. ಇಲ್ಲಿ ಶ್ರೇಷ್ಠ ಶೈಕ್ಷಣಿಕ ಸಂಸ್ಥೆಗಳಿರುವುದರಿಂದ ಹೆಚ್ಚಿನ ಉದ್ಯೋಗಾವಕಾಶಗಳು ದೊರಕುತ್ತವೆ. ವಿಶೇಷವಾಗಿ ಆತಿಥ್ಯ ವಲಯದಲ್ಲಿ ಹೆಚ್ಚಿನ ಜನರು ಕೆಲಸ ಮಾಡಲು ಬಯಸುತ್ತಾರೆ ಎಂದು ಹೇಳುತ್ತಾರೆ ಈಶಾನ್ಯ ವಿದ್ಯಾರ್ಥಿಗಳೊಂದಿಗೆ ನಿಕಟವಾಗಿ ಕಾರ್ಯ ನಿರ್ವಹಿಸುತ್ತಿರುವ ಸನ್‌ ಬರ್ಡ್‌ ಟ್ರಸ್ಟ್‌ ನ ಸಂಸ್ಥಾಪಕ ಮತ್ತು ಸಿಒಇ ಕರ್ನಲ್‌ ಕ್ರಿಸ್ಟೋಫರ್‌ ರೇಗೋ ಅವರು. ರಾಜಸ್ಥಾನಕ್ಕೆ ಹೋಲಿಸಿದರೆ ಇಲ್ಲಿನ ಹವಾಮಾನ ಚೆನ್ನಾಗಿದೆ. ಜೊತೆಗೆ ಶಾಲಾ- ಕಾಲೇಜು, ಉದ್ಯೋಗಾವಕಾಶಗಳು ಹೆಚ್ಚಿವೆ. ಅದೇ ರೀತಿ ಮೂಲ ಸೌಕರ್ಯವೂ ಚೆನ್ನಾಗಿದೆ. ಬೆಂಗಳೂರು ಕಾಸ್ಮೋಪಾಲಿಟನ್‌ ಸಿಟಿ ಆಗಿರುವುದರಿಂದ ಇಲ್ಲಿ ನೆಲೆಸುವುದೆಂದರೆ ಮಿನಿ ಭಾರತದಲ್ಲಿದ್ದಂತೆ. ಎಲ್ಲ ಭಾಷೆಯ ಎಲ್ಲ ವರ್ಗದ ಜನರೊಂದಿಗೆ ಬೆರೆತು ಬಾಳ್ವೆ ನಡೆಸಲು ಅವಕಾಶವಿದೆ ಅನ್ನೋದು ಜೋಧ್‌ ಪುರ್‌ ಅಸೋಸಿಯೇಷನ್‌ನ ಪ್ರಧಾನ ಕಾರ್ಯದರ್ಶಿ ಸಜ್ಜನ್‌ ರಾಜ್‌ ಮೆಹ್ತಾ ಅಭಿಪ್ರಾಯ. ಕೇರಳ ಸಮಾಜಂನ ಪ್ರಧಾನ ಕಾರ್ಯದರ್ಶಿ ರೆಜಿ ಕುಮಾರ್‌ ಹೇಳುವಂತೆ, ‘ಸಾರ್ವಜನಿಕ ವಲಯದ ಕಂಪನಿಗಳು ಬೆಂಗಳೂರಿನಲ್ಲಿ ಹೆಚ್ಚಿನ ಸಂಖ್ಯೆಯಲ್ಲಿರುವುದರಿಂದ 25 ವರ್ಷಗಳ ಹಿಂದೆ ಹೆಚ್ಚಿನ ಜನರು ಇಲ್ಲಿಗೆ ವಲಸೆ ಬಂದರು. ಈಗ ಎಲ್ಲರೂ ಬೆಂಗಳೂರನ್ನು ಇಷ್ಟಪಡುತ್ತಾರೆ. ಅದಕ್ಕೆ ಕಾರಣ ಇಲ್ಲಿನ ತಣ್ಣನೆಯ ವಾತಾವರಣ. ಜೊತೆಗೆ ಬೆಂಗಳೂರಿನ ಜನರು ಅನ್ಯ ಭಾಷಿಗರನ್ನೂ ಸಹ ತಮ್ಮವರೇ ಎಂದು ಭಾವಿಸಿ ಸ್ವಾಗತಿಸುತ್ತಾರೆ ಎಂದು ಅಭಿಪ್ರಾಯಪಡುತ್ತಾರೆ. ಇನ್ನು ಬಂಗಾಲಿ ಇನ್‌ ಬೆಂಗಳೂರು ಟೀಂನ ಸದಸ್ಯರಾದ ಪೌಲೋಮಿ ಚೌಧರಿ ಅವರು, ‘ಬಂಗಾಳದಲ್ಲಿ ಉತ್ತಮ ಎಂಜಿನಿಯರಿಂಗ್‌ ಕಾಲೇಜುಗಳಿದ್ದರೂ ಸಹ ಅಲ್ಲಿ ವಿದ್ಯಾರ್ಥಿಗಳಿಗೆ ಉದ್ಯೋಗಾವಕಾಶಗಳು ದೊರಕುತ್ತಿಲ್ಲ, ಆದರೆ ಬೆಂಗಳೂರಿನಲ್ಲಿ ಅವರವರ ಕೌಶಲಕ್ಕೆ ತಕ್ಕಂತೆ ಉದ್ಯೋಗಗಳು ಸಿಗುತ್ತವೆ. ಬೆಂಗಳೂರು ಕಾಸ್ಮೋಪಾಲಿಟನ್‌ ನಗರ ಆಗಿರುವುದರಿಂದ ಎಲ್ಲ ಬಂಗಾಲೀಯರು ಇಲ್ಲಿ ತಮ್ಮ ಪರಂಪರೆ ಮತ್ತು ಸಂಪ್ರದಾಯದಂತೆ ಉತ್ತಮ ಜೀವನ ನಡೆಸುವ ವಾತಾವರಣವಿದೆ’ ಎನ್ನುತ್ತಾರೆ. ಬೆಂಗಳೂರು ಸಿಟಿಯಲ್ಲಿ ಯಾವ್ಯಾವ ಭಾಷೆ ಮಾತಾಡೋರು ಎಷ್ಟು ?

ಕನ್ನಡ	ತಮಿಳು	ತೆಲುಗು	ಉರ್ದು	ಹಿಂದಿ	ಮಲಯಾಳಂ	ಮರಾಠಿ	ಕೊಂಕಣಿ	ಬಂಗಾಲಿ
44.5%	15.2%	14%	12%	5.5%	2.9%	1.9%	0.7%	0.6%

ತುಳು	ಒರಿಯಾ	ಗುಜರಾತಿ	ಕೂರ್ಗ್‌	ಇಂಗ್ಲಿಷ್‌	ಪಂಜಾಬಿ	ನೇಪಾಳಿ	ಸಿಂಧಿ	ಅಸ್ಸಾಮಿ
0.5%	0.5%	0.5%	0.2%	0.2%	0.2%	0.1%	0.1%	0.1%

(ಆಧಾರ: 2011ರ ಜನಗಣತಿ) 100ಕ್ಕೂ ಅಧಿಕ ಭಾಷೆ ಮಾತನಾಡುವ ನಗರಗಳು

ನಗರ	ಬೆಂಗಳೂರು	ದಿಮಾಪುರ್‌	ಸೋನಿತ್‌ ಪುರ್‌
ರಾಜ್ಯ	ಕರ್ನಾಟಕ	ನಾಗಾಲ್ಯಾಂಡ್‌	ಅಸ್ಸಾಂ

90ಕ್ಕೂ ಅಧಿಕ ಭಾಷೆ ಮಾತನಾಡುವ ನಗರಗಳು

ನಗರ	ಜಲ್‌ ಪೈಗುರಿ	ನೈಋತ್ಯ ದೆಹಲಿ	ಪೂರ್ವ ಕಾಶಿ ಹಿಲ್ಸ್‌	ಕರ್ಬಿ ಅಗ್ಲಾಂಗ್‌	ಪುಣೆ	ಡಾರ್ಜಲಿಂಗ್‌
ರಾಜ್ಯ	ಪಶ್ಚಿಮ ಬಂಗಾಳ	ದೆಹಲಿ	ಮೇಘಾಲಯ	ಅಸ್ಸಾಂ	ಮಹಾರಾಷ್ಟ್ರ	ಪಶ್ಚಿಮ ಬಂಗಾಳ

ವಲಸೆಯಿಂದ ಅನ್ಯ ಭಾಷಿಗರ ಸಂಖ್ಯೆ ಹೆಚ್ಚಳ ತಜ್ಞರ ಪ್ರಕಾರ, ಹೆಚ್ಚಿನ ಜನರು ದೇಶದ ನಾನಾ ಮೂಲೆಗಳಿಂದ ಬೆಂಗಳೂರಿಗೆ ವಲಸೆ ಬರುವುದರಿಂದ ಸಹಜವಾಗಿಯೇ ಬೇರೆ ಬೇರೆ ಮಾತನಾಡುವವರ ಸಂಖ್ಯೆ ನಗರದಲ್ಲಿ ಅಧಿಕವಾಗಿದೆ. ಪೊಚುರಿ, ಕೊಂದ್‌, ಸಂಗತಂ ಮತ್ತು ವಾಂಚೋ ಭಾಷೆಗಳನ್ನು ಮಾತನಾಡುವ ಜನರು ಬೆಂಗಳೂರಿನಲ್ಲಿ ಇದ್ದಾರೆ, ಆದರೆ ಅವರ ಸಂಖ್ಯೆ ಬಹಳ ಕಡಿಮೆ.