ತೆಲಂಗಾಣದಲ್ಲಿ ಏಕಾಏಕಿ ಪ್ರವಾಹ, ನವ ವಧು ಸೇರಿ 7 ಮಂದಿ ಸಾವು

ಹೈದರಾಬಾದ್‌: ಮಹಾರಾಷ್ಟ್ರ ಮತ್ತು ಕರ್ನಾಟಕದ ಬಳಿಕ ಇದೀಗ ತೆಲಂಗಾಣದಲ್ಲಿ ಮುಂಗಾರು ಮಳೆ ಅಬ್ಬರಿಸಿದ್ದು, 7 ಜನರನ್ನು ಬಲಿ ಪಡೆದಿದೆ. ತೆಲಂಗಾಣದ ಹಲವು ಜಿಲ್ಲೆಗಳಲ್ಲಿ ಏಕಾಏಕಿ ಸುರಿದ ಭಾರಿ ಮಳೆಯಿಂದ ಉಂಟಾದ ಪ್ರವಾಹದಲ್ಲಿ ಹೊಸದಾಗಿ ಮದುವೆಯಾಗಿದ್ದ ವಧು, ಓರ್ವ ಟೆಕ್ಕಿ ಸೇರಿ 7 ಜನರು ಕೊಚ್ಚಿಕೊಂಡು ಹೋಗಿದ್ದಾರೆ. ವಿಕಾರಬಾದ್‌ನಲ್ಲಿ ಮದುವೆ ಆರತಕ್ಷತೆ ಮುಗಿಸಿ ಪ್ರವಾಲಿಕಾ ಮತ್ತು ನವಾಜ್‌ ರೆಡ್ಡಿ ಕುಟುಂಬಸ್ಥರೊಂದಿಗೆ ಕಾರಿನಲ್ಲಿ ಆಗಮನಿಸುತ್ತಿದ್ದರು. ಈ ವೇಳೆ ಪ್ರವಾಹದಿಂದ ವಧು, ಆಕೆಯ ನಾದಿನಿ, ಆಕೆಯ ಮಗ 8 ವರ್ಷದ ತ್ರಿನಾಥ್‌ ರೆಡ್ಡಿ ನೀರಿನಲ್ಲಿ ಕೊಚ್ಚಿಕೊಂಡು ಹೋಗಿದ್ದಾರೆ. ಕಾರನ್ನು ನದಿ ನೀರಿನಿಂದ ಮೇಲೆತ್ತಲಾಗಿದ್ದು, ಬಾಲಕನ ಶವ ಇನ್ನೂ ಸಿಕ್ಕಿಲ್ಲ. ಭಾರಿ ಮಳೆಯ ನಂತರ ಸಾಫ್ಟ್‌ವೇರ್‌ ಇಂಜಿನಿಯರ್‌ ಒಬ್ಬರ ದೇಹ ವಾರಂಗಲ್‌ನ ಚರಂಡಿಯೊಂದರಲ್ಲಿ ಭಾನುವಾರ ರಾತ್ರಿ ತೇಲುತ್ತಿತ್ತು. ಅವರನ್ನು ಶಿವನಗರದ ವರೋಮ್‌ ಕ್ರಾಂತಿ ಕುಮಾರ್‌ ಎಂದು ಪತ್ತೆ ಹಚ್ಚಲಾಗಿದೆ. ಅವರ ಲ್ಯಾಪ್‌ಟಾಪ್‌ ಕೂಡ ಸಿಕ್ಕಿದೆ. 70 ವರ್ಷದ ಇನ್ನೋರ್ವ ವ್ಯಕ್ತಿ ಕಾರು ಸಮೇತ ಶಂಕರ್‌ಪಲ್ಲಿಯಲ್ಲಿ ಪ್ರವಾಹದಲ್ಲಿ ಕೊಚ್ಚಿ ಹೋಗಿದ್ದಾರೆ. 30 ವರ್ಷದ ಕಾರ್ಮಿಕರೊಬ್ಬರು ಅದಿಲಾಬಾದ್‌ನಲ್ಲಿ ನೀರು ಪಾಲಾಗಿದ್ದಾರೆ. ಬೈಕ್‌ನಲ್ಲಿ ಹಿಂಬದಿ ಕೂತು ಪ್ರಯಾಣ ಮಾಡುತ್ತಿದ್ದ ಹುಡುಗಿಯರಿಬ್ಬರು ಯಾಡಾದ್ರಿ ಭೊಂಗಿರ್‌ ಜಿಲ್ಲೆಯಲ್ಲಿ ನೀರಿನಲ್ಲಿ ಕೊಚ್ಚಿಕೊಂಡು ಹೋಗಿದ್ದಾರೆ. ಹೀಗೆ ಒಟ್ಟು 7 ಜನರು ನೀರುಪಾಲಾಗಿದ್ದಾರೆ. ರಾಜಣ್ಣ-ಸಿರ್ಸಿಲ್ಲಾ ಜಿಲ್ಲೆಯಲ್ಲಿ ರಾಜ್ಯ ರಸ್ತೆ ಸಾರಿಗೆ ಸಂಸ್ಥೆ ಬಸ್ಸೊಂದು ಪ್ರವಾಹದಲ್ಲಿ ಸಿಲುಕಿಕೊಂಡು, 12 ಜನರು ತೊಂದರೆಗೆ ಸಿಲುಕಿದ್ದರು. ಇವರನ್ನು ರಕ್ಷಣೆ ಮಾಡಲಾಗಿದ್ದು, ಸಂಭಾವ್ಯ ಅಪಾಯ ತಪ್ಪಿಸಲಾಗಿದೆ. ವಿಕಾರಾಬಾದ್‌, ರಂಗಾರೆಡ್ಡಿ ಮತ್ತು ಸಿದ್ದಿಪೆಟ್‌ ಜಿಲ್ಲೆಗಳಲ್ಲಿ ಭಾರಿ ಮಳೆ ದಾಖಲಾಗಿದೆ. ಹೈದರಾಬಾದ್‌, ಅದಿಲಾಬಾದ್‌, ನಿಜಾಮಾಬಾದ್‌, ಕರೀಂನಗರ್‌, ವಾರಂಗಲ್‌, ಕಮ್ಮಮ್‌ ಜಿಲ್ಲೆಗಳಲ್ಲಿ ಭಾರಿ ಗುಡುಗು ಸಹಿತ ಮಳೆಯಾಗುವ ಸಾಧ್ಯತೆ ಇದೆ ಎಂದು ಹವಾಮಾನ ಇಲಾಖೆ ಮುನ್ನೆಚ್ಚರಿಕೆ ನೀಡಿದೆ. ಭಾರಿ ಮಳೆ ಹಾಗೂ ಪ್ರವಾಹದ ಹಿನ್ನೆಲೆಯಲ್ಲಿ ರಾಜ್ಯ ಪೊಲೀಸ್‌ ಮಹಾನಿರ್ದೇಶಕ ಹಾಗೂ ಉನ್ನತ ಅಧಿಕಾರಿಗಳು, ಜಿಲ್ಲಾಧಿಕಾರಿಗಳೊಂದಿಗೆ ಸಭೆ ನಡೆಸಿದ ಮುಖ್ಯ ಕಾರ್ಯದರ್ಶಿ ಹೈ-ಅಲರ್ಟ್‌ನಲ್ಲಿ ಇರುವಂತೆ ಅಧಿಕಾರಿಗಳಿಗೆ ಸೂಚಿಸಿದ್ದಾರೆ. ನೀರಾವರಿ ಯೋಜನೆಗಳಾದ ಕೃಷ್ಣಾ ಮತ್ತು ಗೋದಾವರಿ ನದಿಗಳ ಜಲಾನಯನ ಪ್ರದೇಶದಲ್ಲಿಯೂ ನಿರಂತರವಾಗಿ ಮಳೆಯಾಗುತ್ತಿದ್ದು, ಪರಿಸ್ಥಿತಿಯನ್ನು ಅವಲೋಕಿಸಲಾಗುತ್ತಿದೆ.