ಡ್ರೈವಿಂಗ್‌ ಲೈಸೆನ್ಸ್‌ ಪಡೆದ ಮೂರಡಿ ವ್ಯಕ್ತಿ! ಈ ಸಾಧನೆ ಮೆರೆದ ಭಾರತದ ಮೊದಲ ಕುಬ್ಜ ಇವರು!

ಹೊಸದಿಲ್ಲಿ: ಕೇವಲ 3 ಅಡಿ ಎತ್ತರವಿರುವ ಹೈದರಾಬಾದ್ ಮೂಲದ 'ಗಟ್ಟಿಪಲ್ಲಿ ಶಿವಲಾಲ್' ಎಂಬುವರು ಚಾಲನಾ ಪರವಾನಗಿ () ಪಡೆಯುವ ಮೂಲಕ ಅಚ್ಚರಿ ಮೂಡಿಸಿದ್ದಾರೆ. ಈ ಮೂಲಕ ಪಡೆದ ದೇಶದ ಮೊದಲ ಕುಬ್ಜ ಎಂಬ ಹೆಗ್ಗಳಿಕೆಗೆ ಪಾತ್ರರಾಗಿದ್ದು, 'ತೆಲುಗು ಬುಕ್‌ ಆಫ್‌ ರೆಕಾರ್ಡ್' ಮತ್ತು 'ಲಿಮ್ಕಾ ಬುಕ್‌ ಆಫ್‌ ರೆಕಾರ್ಡ್‌' ಎರಡರಲ್ಲಿಯೂ ದಾಖಲೆ ಬರೆದಿದ್ದಾರೆ. 42 ವರ್ಷದ ಗಟ್ಟಿಪಲ್ಲಿ ಶಿವಪಾಲ್ ಕುಬ್ಜರಾಗಿದ್ದರೂ, ತಮ್ಮ ದೈಹಿಕ ದುರ್ಬಲತೆಯನ್ನು ಮೆಟ್ಟಿನಿಂತು ಸಾಧನೆ ಮೆರೆದಿದ್ದಾರೆ. ತನ್ನ ಜಿಲ್ಲೆ ಕರೀಂನಗರದಲ್ಲಿ ಪದವಿ ಪೂರ್ಣಗೊಳಿಸಿದ ಮೊದಲ ಕುಬ್ಜರೂ ಇವರಾಗಿದ್ದಾರೆ. ಶಿವಪಾಲ್ 2004 ರಲ್ಲಿ ಪದವಿ ಮುಗಿಸಿದರು. "ನನ್ನ ಎತ್ತರದ ಕಾರಣದಿಂದ ಜನರು ನನ್ನನ್ನು ಚುಡಾಯಿಸುತ್ತಿದ್ದರು. ಇಂದು ನಾನು ಲಿಮ್ಕಾ ಬುಕ್ ಆಫ್ ರೆಕಾರ್ಡ್ಸ್ (Limca book of record) ಸೇರಿದಂತೆ ಇತರ ಅನೇಕ ಪ್ರಶಸ್ತಿಗಳಿಗೆ ನಾಮನಿರ್ದೇಶನಗೊಂಡಿದ್ದೇನೆ. ಈಗ ಹಲವಾರು ಕುಬ್ಜ ವ್ಯಕ್ತಿಗಳು ಡ್ರೈವಿಂಗ್ ತರಬೇತಿಗಾಗಿ ನನ್ನನ್ನು ಸಂಪರ್ಕಿಸುತ್ತಿದ್ದಾರೆ" ಎಂದು ಶಿವಪಾಲ್ ಹೆಮ್ಮೆಯಿಂದ ಹೇಳಿಕೊಂಡಿದ್ದಾರೆ. ಅಂಗವಿಕಲರಿಗಾಗಿ ಡ್ರೈವಿಂಗ್ ಸ್ಕೂಲ್‌ ತೆರೆಯುವೆ ಮಹತ್ವಾಕಾಂಕ್ಷೆ ಹೊಂದಿರುವ ಶಿವಪಾಲ್‌ ಅವರು ಮುಂದಿನ ವರ್ಷ ದೈಹಿಕ ವಿಶೇಷಚೇತನರಿಗಾಗಿಯೇ 'ಡ್ರೈವಿಂಗ್ ಸ್ಕೂಲ್‌' (driving school for physically handicapped) ಪ್ರಾರಂಭಿಸಲು ನಿರ್ಧರಿಸಿದ್ದಾರೆ. ಶಿವಪಾಲ್ ಪ್ರಸ್ತುತ ಖಾಸಗಿ ಸಂಸ್ಥೆಯೊಂದರಲ್ಲಿ ಕೆಲಸ ಮಾಡುತ್ತಿದ್ದಾರೆ. "ನಾನು ಆರಂಭದಲ್ಲಿ ಚಲನಚಿತ್ರಗಳಲ್ಲಿ ಕಾಣಿಸಿಕೊಂಡಿದ್ದೇನೆ. ಆದರೆ ಉದ್ಯಮದಲ್ಲಿ ಹೆಚ್ಚು ಕಾಲ ಉಳಿಯಲು ಸಾಧ್ಯವಾಗಲಿಲ್ಲ. ಅಂಗವಿಕಲನಾಗಿದ್ದ ನನಗೆ ಕೆಲಸ ಕೊಡಿಸಲು ಜನ ಸಿದ್ಧರಿರಲಿಲ್ಲ. ಸ್ನೇಹಿತನ ಮೂಲಕ ಖಾಸಗಿ ಕಂಪನಿಯಲ್ಲಿ ಕೆಲಸ ಗಿಟ್ಟಿಸಿಕೊಂಡು ಈಗ ಕಳೆದ 20 ವರ್ಷಗಳಿಂದ ಇಲ್ಲಿಯೇ ಕೆಲಸ ಮಾಡುತ್ತಿದ್ದೇನೆ" ಎಂದರು. "ಪ್ರಯಾಣಕ್ಕೆ, ನಾನು ಕ್ಯಾಬ್‌ಗಳನ್ನು ಬುಕ್ ಮಾಡಿದಾಗ, ಅವರು ರೈಡ್ ಅನ್ನು ರದ್ದುಗೊಳಿಸುತ್ತಿದ್ದರು. ನಾನು ನನ್ನ ಹೆಂಡತಿಯೊಂದಿಗೆ ಹೊರಗೆ ಹೋಗುವಾಗ, ಜನರು ಕೆಟ್ಟ ಕಾಮೆಂಟ್‌ ಮಾಡುತ್ತಿದ್ದರು. ಆಗ ನಾನು ಸ್ವಂತ ಕಾರು ಕೊಂಡು, ಅದನ್ನು ನಾನೇ ಚಲಾಯಿಸಲು ನಿರ್ಧರಿಸಿದೆ" ಎಂದು ಹೇಳಿದರು. ಡ್ರೈವಿಂಗ್‌ ಕಲಿತಿದ್ದು ಹೇಗೆ? ಡ್ರೈವಿಂಗ್ ಕಲಿಯಲು ಉತ್ಸುಕನಾಗಿದ್ದ ಶಿವಪಾಲ್ ಇಂಟರ್‌ನೆಟ್‌ನಲ್ಲಿ ಹುಡುಕಿದ್ದಾರೆ. ಈ ವೇಳೆ ಯುಎಸ್‌ನಲ್ಲಿ ವ್ಯಕ್ತಿಯೊಬ್ಬರು ಅಪ್‌ಲೋಡ್ ಮಾಡಿದ ವಿಡಿಯೋವನ್ನು ನೋಡಿದ್ದಾರೆ. ಆಸನ ಮತ್ತು ಇತರ ಸಲಕರಣೆಗಳನ್ನು ತನ್ನ ಎತ್ತರಕ್ಕೆ ಸರಿದೂಗಿಸಲು ಕಾರಿನಲ್ಲಿ ಬೇಕಾದ ಮಾರ್ಪಾಡುಗಳನ್ನು ಆ ವಿಡಿಯೋ ಮೂಲಕ ತಿಳಿದುಕೊಂಡಿದ್ದಾರೆ. ಕಾರನ್ನು ಮಾರ್ಪಡಿಸಿದ ನಂತರ, ಶಿವಪಾಲ್ ಸ್ನೇಹಿತನಿಂದ ಕಾರ್ ಡ್ರೈವಿಂಗ್ ಕಲಿತರು. ಆದರೆ, ಅವರ ಹೋರಾಟ ಇಲ್ಲಿಗೆ ಮುಗಿಯಲಿಲ್ಲ. ಸಾರಿಗೆ ಇಲಾಖೆಯ ಕೆಲವು ಮಾರ್ಗಸೂಚಿಗಳು ಲೈಸೆನ್ಸ್‌ ಪಡೆಯುವಲ್ಲಿ ಮತ್ತೊಂದು ಸವಾಲಾಗಿ ಪರಿಣಮಿಸಿದವು. ಆದರೆ, ಅಧಿಕಾರಿಗಳಿಗೆ ಮನವಿ ಸಲ್ಲಿಸಿ ಮೂರು ತಿಂಗಳ ಕಾಲ ಕಲಿಕಾ ಪರವಾನಿಗೆ ಪಡೆದು, ಪಕ್ಕದಲ್ಲಿಯೇ ಕುಳಿತ ಅಧಿಕಾರಿಯೊಂದಿಗೆ ಸೂಕ್ತ ಚಾಲನಾ ಪರೀಕ್ಷೆ ನಡೆಸಿ ಚಾಲಕ ಪರವಾನಗಿ ಪಡೆದಿದ್ದೇನೆ ಎಂದು ಶಿವಪಾಲ್ ತಿಳಿಸಿದರು. "ಪ್ರತಿಯೊಬ್ಬರೂ ಅವರಲ್ಲಿ ಕೆಲವು ದೋಷಗಳನ್ನು ಹೊಂದಿದ್ದಾರೆ. ಆದರೆ ನಿಮ್ಮ ಪ್ರತಿಭೆಯನ್ನು ಕಂಡುಹಿಡಿಯುವುದು ಮತ್ತು ಅವುಗಳನ್ನು ಸಾಧಿಸುವುದು ಮುಖ್ಯ" ಎಂದು ಅವರು ಹೇಳಿದರು.