ಟೆಸ್ಲಾದ ಆಮದು ಸುಂಕ ಕಡಿತ ಬೇಡಿಕೆ ಬಗ್ಗೆ ಕೇಂದ್ರದಿಂದ ಪರಿಶೀಲನೆ, ಹಲವು ಕಂಪನಿಗಳ ವಿರೋಧ

ಹೊಸದಿಲ್ಲಿ: ಅಮೆರಿಕದ ಎಲೆಕ್ಟ್ರಿಕ್‌ ಕಾರುಗಳ ಉತ್ಪಾದಕ ಕಂಪನಿ ಮಾಡಿರುವ ಕಡಿತದ ಬೇಡಿಕೆಯನ್ನು ಕೇಂದ್ರ ಸರಕಾರ ಪರಿಶೀಲಿಸುತ್ತಿದ್ದು, ಶೀಘ್ರದಲ್ಲಿ ನಿರ್ಧಾರ ಕೈಗೊಳ್ಳಲಿದೆ ಎಂದು ನೀತಿ ಆಯೋಗದ ಸಿಇಒ ಅಮಿತಾಭ್‌ ಕಾಂತ್‌ ತಿಳಿಸಿದ್ದಾರೆ. ಸುಂಕ ಕಡಿತಕ್ಕಾಗಿ ಟೆಸ್ಲಾ ಮಾಡಿರುವ ವಿನಂತಿಯನ್ನು ಸರ್ಕಾರವು ಅಧ್ಯಯನ ಮಾಡುತ್ತಿದೆ. ಎಲ್ಲಾ ಸಂಬಂಧಿತ ಸಚಿವಾಲಯಗಳು ಪ್ರಸ್ತಾವನೆಯನ್ನು ಪರಿಶೀಲಿಸುತ್ತಿವೆ ಎಂದು ಅಮಿತಾಭ್‌ ಕಾಂತ್‌ ವಿವರಿಸಿದ್ದಾರೆ. ಈ ಬಗ್ಗೆ ಹಣಕಾಸು ಸಚಿವಾಲಯವು ಅಂತಿಮ ನಿರ್ಧಾರ ತೆಗೆದುಕೊಳ್ಳಲಿದೆ. ಸರಕಾರವು ಟೆಸ್ಲಾಗೆ ಭಾರತದಲ್ಲಿ ವಾಹನ ಉತ್ಪಾದನೆಗೆ ಅವಕಾಶ ಮಾಡಿಕೊಡುವ ಇಂಗಿತವನ್ನು ಹೊಂದಿದೆ ಎಂದು ಮೂಲಗಳು ತಿಳಿಸಿವೆ. ಕಸ್ಟಮ್ಸ್ ಸುಂಕಗಳಲ್ಲಿ ಕಡಿತವನ್ನು ಪಡೆಯುವ ಬದಲು ಕಿಟ್‌ಗಳ ಮೇಲಿನ ಕಡಿಮೆ ಸುಂಕದ ಸೌಲಭ್ಯವನ್ನು ಪಡೆದುಕೊಂಡು ಭಾರತದಲ್ಲಿ ಕಾರುಗಳ ಜೋಡಣೆ ಮಾಡುವಂತೆ ಭಾರೀ ಕೈಗಾರಿಕೆಗಳ ಸಚಿವಾಲಯ ಟೆಸ್ಲಾ ಕಂಪನಿಗೆ ಸಲಹೆ ನೀಡಿದೆ. ಆದಾಗ್ಯೂ, ಅಧಿಕಾರಿಗಳ ಪ್ರಕಾರ, ತನ್ನ ಕಾರುಗಳನ್ನು ಸದ್ಯ ಬಿಡಿ ಭಾಗಗಳನ್ನು ತಂದು ಜೋಡಿಸುವ ಸ್ಥಿತಿಯಲ್ಲಿ ಇಲ್ಲ ಎಂದು ಟೆಸ್ಲಾ ಹೇಳಿದೆ. ಮತ್ತು ಈ ಸಂಬಂಧ ಚರ್ಚೆಗಳು ನಡೆಯುತ್ತಿವೆ. ತಾತ್ಕಾಲಿಕ ಅವಧಿಗೆ ಆಮದು ಸುಂಕವನ್ನು ಕಡಿತಗೊಳಿಸುವ ಸಂಬಂಧ ಚರ್ಚಿಸಲು ಸರ್ಕಾರವು ಮುಕ್ತವಾಗಿದೆ. ಸುಮಾರು ಮೂರು ವರ್ಷಗಳ ಅವಧಿಗೆ ಸುಂಕ ಕಡಿತದ ಬಗ್ಗೆ ಸರಕಾರ ಚಿಂತನೆ ನಡೆಸಿದ್ದು, ಇದಕ್ಕಾಗಿ ಕಂಪನಿಯು ಮೊದಲು ದೃಢವಾದ ವ್ಯವಹಾರ ಯೋಜನೆಗಳನ್ನು ಸಲ್ಲಿಸಬೇಕಾಗಿದೆ ಎಂದು ಮೂಲವೊಂದು ತಿಳಿಸಿದೆ. ಟೆಸ್ಲಾ ಕಂಪನಿಯು ಎಲೆಕ್ಟ್ರಿಕ್‌ ಕಾರುಗಳ ಆಮದಿಗೆ ಶೇ. 40ರ ಸುಂಕವನ್ನು ನಿಗದಿಪಡಿಸಬೇಕು ಎಂದು ನಿರೀಕ್ಷಿಸಿದೆ. ಆದರೆ ಭಾರತ ಸರಕಾರವು ಸದ್ಯ 40,000 ಡಾಲರ್‌ಗಿಂತ ಹೆಚ್ಚಿನ ಬೆಲೆಯ ಕಾರಿನ ಆಮದಿಗೆ (ಅಂದಾಜು 30 ಲಕ್ಷ ರೂ.) ಶೇ. 100 ಹಾಗೂ ಅಗ್ಗದ ಕಾರುಗಳಿಗೆ ಶೇ. 60ರಂತೆ ಆಮದು ಸುಂಕ ವಿಧಿಸುತ್ತಿದೆ. ಆಮದು ಸುಂಕವನ್ನು ಗಣನೀಯ ಪ್ರಮಾಣದಲ್ಲಿ ಕಡಿತಗೊಳಿಸಿದರೆ ಕಾರುಗಳ ಆಮದು ಹೆಚ್ಚಳವಾಗಲಿದ್ದು, ಕಂಪನಿಗಳು ಇಲ್ಲಿಯೇ ಉತ್ಪಾದನೆಗೆ ಹಿಂದೇಟು ಹಾಕುವ ಸಾಧ್ಯತೆ ಇರುತ್ತದೆ. ಇದರಿಂದ ಉದ್ಯೋಗ ಸೃಷ್ಟಿಗೆ ಹಿನ್ನಡೆಯಾಗಬಹುದು ಎಂಬ ಆತಂಕವೂ ಸರಕಾರಕ್ಕೆ ಇದೆ. ಏಕೆಂದರೆ ಆಟೋಮೊಬೈಲ್‌ ವಲಯ ಹೆಚ್ಚಿನ ಸಂಖ್ಯೆಯಲ್ಲಿ ಉದ್ಯೋಗಾವಕಾಶಗಳನ್ನು ಸೃಷ್ಟಿಸುತ್ತಿದೆ. ಜತೆಗೆ ಟೆಸ್ಲಾದ ಪ್ರಸ್ತಾವನೆಗೆ ಸ್ಥಳೀಯ ಕಾರು ಉತ್ಪಾದಕರಿಂದಲೂ ತೀವ್ರ ವಿರೋಧ ವ್ಯಕ್ತವಾಗಿದೆ. ಟಾಟಾ ಮೋಟಾರ್ಸ್‌, ಟಿವಿಎಸ್‌ ಮೋಟಾರ್‌ ಕೊ. ಮತ್ತು ಓಲಾ ಎಲೆಕ್ಟ್ರಿಕ್‌ ಟೆಸ್ಲಾ ಬೇಡಿಕೆಗೆ ವಿರೋಧ ವ್ಯಕ್ತಪಡಿಸಿದೆ. ಆಮದು ಸುಂಕ ಇಳಿಕೆ ಮಾಡುವುದರಿಂದ ಸ್ಥಳೀಯ ಉತ್ಪಾದನೆಗೆ ಮಾಡಿರುವ ಹೂಡಿಕೆಗೆ ಹಾನಿ ಉಂಟಾಗಲಿದೆ ಎಂದು ಕಂಪನಿಗಳು ಕಳವಳ ವ್ಯಕ್ತಪಡಿಸಿವೆ. ಆದರೆ ಇನ್ನೊಂದೆಡೆ ಹುಂಡೈ ಮೋಟಾರ್‌ ಇಂಡಿಯಾ, ಬಿಎಂಡಬ್ಲ್ಯೂ ಇಂಡಿಯಾ, ಆಡಿ ಇಂಡಿಯಾಗಳು ಆಮದು ಸುಂಕದ ಇಳಿಕೆ ಪರವಾಗಿವೆ. ಹೀಗಾಗಿ ಅಂತಿಮ ತೀರ್ಮಾನ ಏನಾಗಿರಬಹುದು ಎಂಬುದು ಕುತೂಹಲ ಮೂಡಿಸಿದೆ.