ಗೋಲ್ಡನ್ ಸ್ಟಾರ್ ಗಣೇಶ್ ಸಿನಿಮಾಗೆ ತಂತ್ರಜ್ಞರ ‘ಸಖತ್’ ಸ್ಪರ್ಶ
ಗಣೇಶ್ ಮತ್ತು ಸುನಿ ಕಾಂಬಿನೇಷನ್‌ನ ‘ಸಖತ್’ ಸಿನಿಮಾ ಇದೇ 26ಕ್ಕೆ ಬಿಡುಗಡೆಯಾಗುತ್ತಿದ್ದು, ಈ ಸಿನಿಮಾದ ತಂತ್ರಜ್ಞರ ಬಗ್ಗೆ ನಿರ್ದೇಶಕ ಸುನಿ ಮಾತನಾಡಿದ್ದಾರೆ.
Admin
0
7
ಹರೀಶ್‌ ಬಸವರಾಜ್‌
ಗಣೇಶ್ ಮತ್ತು ಕಾಂಬಿನೇಷನ್‌ನ ‘ಸಖತ್’ ಸಿನಿಮಾ ಇದೇ 26ಕ್ಕೆ ಬಿಡುಗಡೆಯಾಗುತ್ತಿದ್ದು, ಈ ಸಿನಿಮಾದ ತಂತ್ರಜ್ಞರ ಬಗ್ಗೆ ನಿರ್ದೇಶಕ ಸುನಿ ಮಾತನಾಡಿದ್ದಾರೆ.
ಗೋಲ್ಡನ್ ಸ್ಟಾರ್ ಗಣೇಶ್ ನಾಯಕರಾಗಿರುವ ‘ಸಖತ್’ ಸಿನಿಮಾದ ಟ್ರೇಲರ್‌ ಬಿಡುಗಡೆಯಾದಾಗ, ಮೇಕಿಂಗ್‌ ಮತ್ತು ತಂತ್ರಜ್ಞರ ಕೆಲಸ ವಿಶೇಷವಾಗಿ ಗಮನ ಸೆಳೆಯಿತು. ಸುನಿ ನಿರ್ದೇಶನದ ಈ ಸಿನಿಮಾಗೆ ಸಂತೋಷ್‌ ರೈ ಪಾತಾಜೆ ಸಿನಿಮಾಟೋಗ್ರಫಿ ಮಾಡಿದ್ದಾರೆ. ಜ್ಯೂಡಾ ಸ್ಯಾಂಡಿ ಸಂಗೀತ ಸಂಯೋಜನೆ ಮಾಡಿದ್ದಾರೆ. ಶಾಂತಕುಮಾರ್‌ ಸಂಕಲನಕಾರರಾಗಿ ಕೆಲಸ ಮಾಡಿದ್ದಾರೆ.
ಹ್ಯಾಟ್ರಿಕ್‌ ಕಾಂಬಿನೇಷನ್‌
ಸಿನಿಮಾಟೋಗ್ರಾಫರ್‌ ಸಂತೋಷ್‌ ರೈ ಪಾತಾಜೆ ಮತ್ತು ಸಂಗೀತ ನಿರ್ದೇಶಕ ಜ್ಯೂಡಾ ಸ್ಯಾಂಡಿ ಅವರ ಜತೆ ನಿರ್ದೇಶಕ ಸುನಿಯವರದ್ದು ಇದು ಹ್ಯಾಟ್ರಿಕ್‌ ಕಾಂಬಿನೇಷನ್‌. ‘ಸಂತೋಷ್‌ ಅವರು ಮತ್ತು ನಾನು ‘ಚಮಕ್‌’, ‘ಬಜಾರ್‌’ ಸಿನಿಮಾಗಳಲ್ಲಿಒಟ್ಟಿಗೆ ಕೆಲಸ ಮಾಡಿದ್ದೆವು. ಈಗ ಮೂರನೇ ಬಾರಿಗೆ ಒಟ್ಟಾಗಿದ್ದೇವೆ. ಅವರ ಸಿನಿಮಾಟೋಗ್ರಫಿ ಅದ್ಭುತವಾಗಿರುತ್ತದೆ ಎನ್ನಬಹುದು. ನನಗೆ ಈ ಸಿನಿಮಾದಲ್ಲಿ ಅದ್ಭುತವಾದ ಶಾಟ್‌ಗಳು ಬೇಕಿದ್ದವು. ಆದರೆ, ಅದು ಕಥೆಯನ್ನು ಓವರ್‌ಲ್ಯಾಪ್‌ ಮಾಡುವಂತಿರಬಾರದು ಎಂಬಾಸೆಯಿತ್ತು. ಸಂತೋಷ್‌ ಸಹ ಅದೇ ರೀತಿ ಕೆಲಸ ಮಾಡಿದ್ದಾರೆ. ಸಿನಿಮಾದಲ್ಲಿ ರಿಯಾಲಿಟಿ ಶೋ, ಕೋರ್ಟ್‌ ರೂಮ್‌ ಮತ್ತು ಸ್ಕೂಲ್‌ನಲ್ಲಿ ಚಿತ್ರೀಕರಣ ಮಾಡಲಾಗಿದೆ. ರಿಯಾಲಿಟಿ ಶೋಗೆ ಸ್ವಲ್ಪ ಹೆಚ್ಚಾಗಿ ಲೈಟ್ಸ್‌ ಬಳಸಿ, ನಿಜವಾದ ರಿಯಾಲಿಟಿ ಶೋ ರೀತಿಯಲ್ಲಿಯೇ ಚಿತ್ರೀಕರಿಸಿದ್ದೇವೆ. ಕೋರ್ಟ್‌ ರೂಮ್‌ಗಾಗಿ ಸಂತೋಷ್‌ ವಿಶೇಷವಾದ ಲೈಟ್‌ ಬಳಸಿದ್ದಾರೆ. ಶಾಲಾ ಎಪಿಸೋಡ್‌ಗಳಿಗೆ ರಿಯಲಿಸ್ಟಿಕ್‌ ಆಗಿ ಚಿತ್ರೀಕರಣ ಮಾಡಲಾಗಿದೆ. ಪ್ರತಿ ದೃಶ್ಯವನ್ನು ನೋಡುಗನ ಮನಸ್ಸಿನಾಳಕ್ಕೆ ಇಳಿಸಲು ನಮ್ಮ ಸಂತೋಷ್‌ ರೈ ಅವರು ಶ್ರಮ ಪಟ್ಟಿದ್ದಾರೆ’ ಎಂದು ಹೇಳಿದ್ದಾರೆ ನಿರ್ದೇಶಕ ಸುನಿ.
‘ಜ್ಯೂಡಾ ಸ್ಯಾಂಡಿಗೆ ನನ್ನ ಯೋಚನೆಗಳು ಆದಷ್ಟು ತಿಳಿದಿರುತ್ತವೆ. ಹಾಗಾಗಿ ನಾನೂ ಅವರೂ ಮೂರು ಸಿನಿಮಾಗಳಲ್ಲಿಒಟ್ಟಿಗೆ ಕೆಲಸ ಮಾಡಲು ಸಾಧ್ಯವಾಗಿದೆ. ಸಖತ್ ಸಿನಿಮಾ ಮುಗಿದ ಮೇಲೆ ಕಂಪ್ಲೀಟ್‌ ಆಗಿ ಸಿನಿಮಾ ನೋಡಿ ನಂತರ ಸಂಗೀತ ಸಂಯೋಜನೆ ಮಾಡಿಕೊಡು ಎಂದು ಹೇಳಿದ್ದೆ. ಅದರಂತೆ ಒಳ್ಳೆ ಹಾಡುಗಳನ್ನು ಸಂಯೋಜಿಸಿ ಕೊಟ್ಟಿದ್ದಾರೆ. ಇನ್ನೂ ಒಂದಷ್ಟು ಸಿನಿಮಾಗಳಿಗೆ ಈ ಇಬ್ಬರ ಜತೆ ಕೆಲಸ ಮಾಡುತ್ತೇನೆ’ ಎಂದಿದ್ದಾರೆ ಸುನಿ.
ಹೊಸ ಸಂಕಲನಕಾರ
ನಿರ್ದೇಶಕ ಸುನಿ ಈ ಸಿನಿಮಾ ಮೂಲಕ ಶಾಂತಕುಮಾರ್‌ ಎಂಬ ಹೊಸ ಸಂಕಲನಕಾರರನ್ನು ಪರಿಚಯಿಸುತ್ತಿದ್ದಾರೆ. ‘ಶಾಂತಕುಮಾರ್‌ ನನ್ನ ‘ಬಜಾರ್‌’ ಸಿನಿಮಾಗೆ ಸ್ಪಾಟ್‌ ಎಡಿಟರ್‌ ಆಗಿ ಬಂದು ಸೇರಿಕೊಂಡರು. ಈ ಸಿನಿಮಾದ ಮೂಲಕ ಅವರು ಸಂಕಲನಕಾರರಾಗಿ ಬಡ್ತಿ ಪಡೆದಿದ್ದಾರೆ. ಪ್ರತಿಯೊಂದು ದೃಶ್ಯವನ್ನು ಬಹಳ ಶಾರ್ಪ್ ಆಗಿ ಎಡಿಟ್‌ ಮಾಡಿದ್ದಾರೆ. ಮುಂದಿನ ದಿನಗಳಲ್ಲಿ ಉತ್ತಮ ಎಡಿಟರ್‌ ಆಗಿ ಚಿತ್ರರಂಗದಲ್ಲಿ ನೆಲೆ ನಿಲ್ಲುತ್ತಾರೆ’ ಎಂದು ಹೇಳಿದರು ಸುನಿ.
ಸಖತ್‌ನಲ್ಲಿ ಗಣೇಶ್‌ಗೆ ಜೋಡಿಯಾಗಿ ನಿಶ್ವಿಕಾ ನಾಯ್ಡು, ಸುರಭಿ ನಟಿಸಿದ್ದಾರೆ. ಧರ್ಮಣ್ಣ ಕಡೂರು, ಸಾಧು ಕೋಕಿಲಾ ಸೇರಿದಂತೆ ದೊಡ್ಡ ತಾರಾಗಣವೇ ಸಿನಿಮಾದಲ್ಲಿದೆ.
