ಗಂಡಸರು 10 ಮದುವೆ ಆಗಬಹುದು, ಹೆಣ್ಣು ಆಗಬಾರದಾ? : 'ಹುಡುಗರು' ಸಿನಿಮಾ ನಟಿ ಪ್ರಶ್ನೆ

ಪುನೀತ್ ರಾಜ್‌ಕುಮಾರ್ ನಟನೆಯ 'ಹುಡುಗರು' ಸಿನಿಮಾದಲ್ಲಿ ನಟಿಸಿದ್ದ ನಟಿ ಅವರ ಮೊದಲ ಮದುವೆ ಮುರಿದು ಬಿದ್ದಿದೆ. ಈಗ ಅವರು ಎರಡನೇ ಮದುವೆಯಾಗಿದ್ದಾರೆ. ಕೆಲವರು ಶೆಫಾಲಿ ಎರಡನೇ ಮದುವೆ ಕೂಡ ಮುರಿದು ಬೀಳುವುದು ಎಂದು ಮಾತನಾಡಿಕೊಂಡಿದ್ದರಂತೆ. 2004ರಲ್ಲಿ ಶೆಫಾಲಿ ಅವರು ಹರ್ಮೀತ್ ಸಿಂಗ್ ಅವರನ್ನು ಮದುವೆಯಾದರು. 2009ರಲ್ಲಿ ಈ ಜೋಡಿ ವಿಚ್ಛೇದನ ಪಡೆದುಕೊಂಡಿತು. 2014ರಲ್ಲಿ ಶೆಫಾಲಿ ಅವರು ಪರಾಗ್ ತ್ಯಾಗಿ ಅವರನ್ನು ಮದುವೆಯಾದರು. ವೈವಾಹಿಕ ಜೀವನದ ಕುರಿತು ಮಾಧ್ಯಮಗಳ ಜೊತೆ ಶೆಫಾಲಿ ಮಾತನಾಡಿದ್ದಾರೆ. "ಮದುವೆ ಮುರಿದು ಬಿದ್ದಾಗ ಜೀವನ ಮುಗಿಯಿತು ಎಂದು ಅಂದುಕೊಳ್ಳುವುದುಂಟು, ನಿಜಕ್ಕೂ ಅದು ಕಷ್ಟವೇ. ನಾನು ಚಿಕ್ಕ ವಯಸ್ಸಿನಲ್ಲಿ ಮದುವೆಯಾದೆ, ವಿಚ್ಛೇದನವೂ ಆಯ್ತು. ನನಗೆ ಅದೆಲ್ಲ ಕಷ್ಟವಾಗಿದ್ದರೂ ಕೂಡ ನನ್ನ ಪಾಲಕರು, ಸ್ನೇಹಿತರು ನನ್ನ ಪರ ನಿಂತರು. ಹೀಗಾಗಿ ಅದರಿಂದ ಹೊರಗೆ ಬಂದೆ. ಪ್ರೀತಿಯನ್ನು ನಂಬದಿರುವ ಸಮಯ ಕೂಡ ಬರುವುದು. ಮತ್ತೆ ನಾನು ಪ್ರೀತಿ ಮಾಡುವೆ, ಮದುವೆಯಾಗ್ತೀನಿ ಎಂದು ಅಂದುಕೊಂಡಿರಲಿಲ್ಲ" ಎಂದು ಶೆಫಾಲಿ ಹೇಳಿದ್ದಾರೆ. "ಗಂಡಸರು 10 ಮದುವೆ ಆಗಬಹುದು, ಹೆಣ್ಣು ಯಾಕೆ ಆಗಬಾರದು? ಹೆಣ್ಣು ಬೋಲ್ಡ್ ಇದ್ದಾಳೆ, ಅವಳದ್ದೇ ತಪ್ಪು ಅಂತ ಹೇಗೆ ಹೇಳ್ತೀರಿ? ತೆರೆ ಮೇಲೆ ನಾವು ನಟಿಸುವುದಕ್ಕೂ ತೆರೆ ಹಿಂದೆ ಇರೋದಕ್ಕೂ ವ್ಯತ್ಯಾಸವಿದೆ. ಖಳನಾಯಕಿ ಪಾತ್ರ ಮಾಡಿದ್ರಿ ಅಂತ ನೀವು ನಿಜ ಜೀವನದಲ್ಲಿ ಹಾಗೆಯೇ ಇರಬೇಕು ಅಂತೇನಿಲ್ಲ. ನೀವೊಬ್ಬರು ಕಲಾವಿದರು" ಎಂದು ಶೆಫಾಲಿ ಅವರು ಎರಡನೇ ಬಾರಿಗೆ ಮದುವೆಯಾಗಿದ್ದಕ್ಕೆ ನೆಗೆಟಿವ್ ಆಗಿ ಮಾತನಾಡಿದವರನ್ನು ತರಾಟೆ ತೆಗೆದುಕೊಂಡಿದ್ದಾರೆ. 'ಬೂಗಿ ವೂಗಿ', 'ನಚ್ ಬಲಿಯೇ', 'ಬಿಗ್ ಬಾಸ್ 13' ರಿಯಾಲಿಟಿ ಶೋಗಳಲ್ಲಿ ಶೆಫಾಲಿ ಭಾಗವಹಿಸಿದ್ದರು.