ಎಂಟು ತಿಂಗಳ ಹಿಂದೆ ಕೋವಿಡ್‌ನಿಂದ ಮೃತಪಟ್ಟ ವ್ಯಕ್ತಿಗೆ 'ಸಂಪೂರ್ಣ ಲಸಿಕೆ' ಪಡೆದ ಸಂದೇಶ
ಕೊರೊನಾ ವೈರಸ್ ಸೋಂಕಿನಿಂದ ಏಪ್ರಿಲ್ ತಿಂಗಳಲ್ಲಿ ಮೃತಪಟ್ಟಿದ್ದ ವ್ಯಕ್ತಿಯೊಬ್ಬರ ಮೊಬೈಲ್ ಸಂಖ್ಯೆಗೆ ಡಿ. 9ರಂದು ಎರಡೂ ಡೋಸ್ ಲಸಿಕೆ ಪಡೆದ ಸಂದೇಶ ಬಂದಿದೆ. ಇದನ್ನು ಕಂಡು ಕುಟುಂಬದವರು ಲಸಿಕೆ ದಾಖಲೆಗಳ ಬಗ್ಗೆ ಅನುಮಾನ ವ್ಯಕ್ತಪಡಿಸಿದ್ದಾರೆ.
Admin
0
7
ಬೆಂಗಳೂರು: ಸೋಂಕಿಗೆ ಸಂಬಂಧಿಸಿದಂತೆ ಅನೇಕ ಎಡವಟ್ಟುಗಳು ವರದಿಯಾಗುತ್ತಲೇ ಇವೆ. ಅದರಲ್ಲಿಯೂ ಕೋವಿಡ್ ವಿಚಾರದಲ್ಲಿ ಜನರು ಪದೇ ಪದೇ ಗೊಂದಲಕ್ಕೆ ಒಳಗಾಗುತ್ತಿದ್ದಾರೆ. ಲಸಿಕೆ ಪಡೆದವರ ಮೊಬೈಲ್ ಸಂಖ್ಯೆಗೆ ಮತ್ತೆ ಮತ್ತೆ ಒಟಿಪಿಗಳು ಬರುವುದು, ಲಸಿಕೆ ಪಡೆದುಕೊಂಡಿದ್ದೀರಿ ಎಂಬ ಹೊಸ ಸಂದೇಶ ಬರುವುದು ಮುಂದುವರಿದಿದೆ.
ಕೋವಿಡ್‌ನಿಂದ ಮೃತಪಟ್ಟು ಹಲವು ತಿಂಗಳ ಬಳಿಕ ಆ ವ್ಯಕ್ತಿಯ ಮೊಬೈಲ್‌ಗೆ ಎರಡೂ ಡೋಸ್ ಲಸಿಕೆ ಪೂರೈಸಿರುವ ಮೆಸೇಜ್ ಬಂದಿರುವ ಘಟನೆ ಬೆಂಗಳೂರಿನಲ್ಲಿ ವರದಿಯಾಗಿದೆ. ಈ ಸಂದೇಶ ಕಂಡು ಆ ವ್ಯಕ್ತಿಯ ಪತ್ನಿ ಆಘಾತಕ್ಕೊಳಗಾಗಿದ್ದಾರೆ. ಮೃತಪಟ್ಟ ವ್ಯಕ್ತಿಯ ಮೊಬೈಲ್ ಸಂಖ್ಯೆಗೆ ತಾಂತ್ರಿಕ ತಪ್ಪಿನಿಂದ ಸಂದೇಶ ಬಂದಿರಬಹುದು ಎಂದು ಭಾವಿಸಬಹುದು. ಆದರೆ ಅದರಲ್ಲಿ ಅವರದ್ದೇ ಹೆಸರು ಇರುವುದು ಕುಟುಂಬದವರ ಅನುಮಾನಕ್ಕೆ ಕಾರಣವಾಗಿದೆ.
77 ವರ್ಷದ ಶ್ರೀಕಂಠಯ್ಯ ಸೀತಾರಾಮನ್ ಅವರು ಮಾರ್ಚ್ 10ರಂದು ಮೊದಲ ಡೋಸ್ ಲಸಿಕೆ ಪಡೆದಿದ್ದರು. ಅವರ ಎರಡನೇ ಡೋಸ್ ಮೇ ತಿಂಗಳಲ್ಲಿ ಬಾಕಿ ಇತ್ತು. ಆಗ ಕೋವಿಶೀಲ್ಡ್ ಲಸಿಕೆಯ ಎರಡು ಡೋಸ್ ನಡುವಿನ ಅಂತರ 4-6 ವಾರಗಳವರೆಗೆ ಇತ್ತು. ಆದರೆ, ಅದರ ನಡುವೆ ಅವರು ಸೋಂಕಿಗೆ ಒಳಗಾಗಿ, ಏಪ್ರಿಲ್ 8ರಂದು ಮೃತಪಟ್ಟಿದ್ದರು.
ಅವರು ಬಳಸುತ್ತಿದ್ದ ಮೊಬೈಲ್ ಸಂಖ್ಯೆಗೆ ಡಿಸೆಂಬರ್ 9ರಂದು ಕೋವಿನ್ ಸಂದೇಶ ಬಂದಿದೆ. ಅದರಲ್ಲಿ ಅವರು ಎರಡನೇ ಡೋಸ್ ಅನ್ನು ಯಶಸ್ವಿಯಾಗಿ ಪಡೆದುಕೊಂಡಿರುವುದಾಗಿ ತಿಳಿಸಲಾಗಿದೆ. 'ಇದು ಬಹುಶಃ ನನ್ನ ತಂದೆಯ ಹೆಸರಿನಲ್ಲಿ ಸುಳ್ಳು ದಾಖಲೆಯಾಗಿರುವ ಸಾಧ್ಯತೆ ಇದೆ. ಇದು ನಿಜಕ್ಕೂ ಪ್ರಶ್ನಾರ್ಹ' ಎಂದು ಶ್ರೀಕಂಠಯ್ಯ ಅವರ ಮಗ ವಿಶ್ವನಾಥ್ ಎಸ್ ಅನುಮಾನ ವ್ಯಕ್ತಪಡಿಸಿದ್ದಾರೆ.
'ಇದು ಲಸಿಕಾಕರಣದ ಕುರಿತಾದ ಕವರೇಜ್ ಹೆಚ್ಚಿಸಲು ಸರ್ಕಾರದ ಕೆಲಸವಲ್ಲದೆ ಬೇರೇನೂ ಅಲ್ಲ. ಕೋವಿಡ್‌ನಿಂದ ಮೃತಪಟ್ಟ ವ್ಯಕ್ತಿಗೆ, ಆತ ಕಾಯಿಲೆಗೆ ಸಂಪೂರ್ಣ ಲಸಿಕೆ ಪಡೆದುಕೊಂಡಿದ್ದಾನೆ ಎಂದು ಸರ್ಕಾರ ಸಂದೇಶ ರವಾನಿಸಿದೆ! ಇದು ಡೇಟಾ ಎಂಟ್ರಿಯಲ್ಲಿ ಆದ ಪ್ರಮಾದ ಎಂದು ಭಾವಿಸಿದರೂ, ಅದು ಅವರ ಹೆಸರು ಮತ್ತು ನೋಂದಾಯಿತ ಮೊಬೈಲ್ ಸಂಖ್ಯೆಗೆ ಹೊಂದಾಣಿಕೆಯಾಗಲು ಹೇಗೆ ಸಾಧ್ಯ?' ಎಂದು ಕುಟುಂಬದ ಸದಸ್ಯರು ಪ್ರಶ್ನಿಸಿದ್ದಾರೆ.
ಶ್ರೀಕಂಠಯ್ಯ ಅವರ 75 ವರ್ಷದ ಪತ್ನಿ ಮಾರ್ಚ್ 1ರಂದು ಮೊದಲ ಡೋಸ್ ಪಡೆದುಕೊಂಡಿದ್ದರು. ಅವರು ಎರಡನೇ ಡೋಸ್ ಆಗಸ್ಟ್‌ನಲ್ಲಿ ಪಡೆದಿದ್ದರು. ದಂಪತಿ ತಮ್ಮ ಕೋವಿನ್ ನೋಂದಣಿಗೆ ಒಂದೇ ಫೋನ್ ಸಂಖ್ಯೆ ಬಳಸಿದ್ದರು. ಅಪಾರ್ಟ್‌ಮೆಂಟ್ ಒಂದರಲ್ಲಿ ಅವರು ಎರಡನೇ ಡೋಸ್ ಪಡೆದಿದ್ದರು. ಆಗ ತಾಂತ್ರಿಕ ಕಾರಣ ಉಂಟಾಗಿದೆ ಎಂದು ಅವರಿಗೆ ಕೋವಿಡ್ ಲಸಿಕೆ ಕಳುಹಿಸಿರಲಿಲ್ಲ.
ಕೋವಿನ್ ಆಪ್‌ನಿಂದ ಅವರಿಗೂ ಡಿ. 8ರಂದು ಸಂದೇಶ ಬಂದಿದ್ದು, ಅದೇ ದಿನ ಎರಡನೇ ಡೋಸ್ ಪಡೆದುಕೊಂಡಿದ್ದೀರಿ ಎಂದು ಅದರಲ್ಲಿ ತಿಳಿಸಲಾಗಿತ್ತು. 'ಆಗಸ್ಟ್‌ನಲ್ಲಿ ಎರಡನೇ ಡೋಸ್ ಪಡೆದ ಬಳಿಕ ಲಸಿಕೆ ಪ್ರಮಾಣ ಪತ್ರ ಸಿಗದೆ ಇದ್ದಾಗ ನಾವು ಹೆಚ್ಚು ತಲೆ ಕೆಡಿಸಿಕೊಂಡಿರಲಿಲ್ಲ. ಆದರೆ ಡಿ. 8ರಂದು ಎರಡನೇ ಡೋಸ್ ಪಡೆದುಕೊಂಡಿರುವುದಾಗಿ ಮೆಸೇಜ್ ಬಂದಿದೆ. ನಿಜಕ್ಕೂ ಇದರಲ್ಲಿ ಏನೂ ಮೋಸ ನಡೆಯುತ್ತಿದೆ' ಎಂದು ಕುಟುಂಬದ ಸದಸ್ಯರು ಹೇಳಿದ್ದಾರೆ.
ತುಮಕೂರಿನಲ್ಲಿ ಇತ್ತೀಚೆಗೆ ಮೃತ ವ್ಯಕ್ತಿಗೆ ಸಂಪೂರ್ಣ ಲಸಿಕೆ ನೀಡಿದ ಸಂದೇಶ ಬಂದಿತ್ತು. ಇದರ ಬಗ್ಗೆ ಪರಿಶೀಲಿಸಿದಾಗ ಅದು ಡೇಟಾ ಎಂಟ್ರಿಯಲ್ಲಿನ ದೋಷ ಎನ್ನುವುದು ಗೊತ್ತಾಗಿತ್ತು. ಫೋನ್ ಸಂಖ್ಯೆ ದಾಖಲಿಸುವಾಗ ಪ್ರಮಾದ ಆಗಿತ್ತು. ನರ್ಸ್‌ಗಳು ನೀಡಿದ ಡೋಸ್‌ಗಳ ಸಂಖ್ಯೆ ಮತ್ತು ಲಸಿಕೆ ಪಡೆದ ಜನರ ಸಂಖ್ಯೆಯನ್ನು ಹೋಲಿಕೆ ಮಾಡಿದ್ದೆವು. ಆಗ ಡೇಟಾ ಎಂಟ್ರಿಯಲ್ಲಿ ಲೋಪ ಇರುವುದು ಕಂಡುಬಂದಿತ್ತು. ಈ ಪ್ರಕರಣವನ್ನು ಪರಿಶೀಲಿಸಲಾಗುವುದು ಎಂದು ರಾಷ್ಟ್ರೀಯ ಆರೋಗ್ಯ ಮಿಷನ್ ನಿರ್ದೇಶಕಿ ಡಾ. ಅರುಂಧತಿ ಚಂದ್ರಶೇಖರ್ ತಿಳಿಸಿದ್ದಾರೆ.
