ಉತ್ತರ ಪ್ರದೇಶದಲ್ಲಿ ಬಿಜೆಪಿಗೆ 350ಕ್ಕೂ ಹೆಚ್ಚು ಸೀಟುಗಳಲ್ಲಿ ಗೆಲುವು ನಿಶ್ಚಿತ - ಯೋಗಿ ವಿಶ್ವಾಸ

ಲಖನೌ: ಮುಂದಿನ ವರ್ಷದ ಆರಂಭದಲ್ಲಿ ವಿಧಾನಸಭೆ ಚುನಾವಣೆ ಎದುರಿಸಲಿರುವ ಉತ್ತರ ಪ್ರದೇಶದಲ್ಲಿ ಆಡಳಿತಾರೂಢ ಬಿಜೆಪಿಯು 350ಕ್ಕೂ ಅಧಿಕ ಕ್ಷೇತ್ರಗಳಲ್ಲಿ ಜಯ ಗಳಿಸಿ ಮತ್ತೊಂದು ಅವಧಿಗೂ ಅಧಿಕಾರ ಉಳಿಸಿಕೊಳ್ಳಲಿದೆ ಎಂದು ಮುಖ್ಯಮಂತ್ರಿ ವಿಶ್ವಾಸ ವ್ಯಕ್ತಪಡಿಸಿದ್ದಾರೆ. "ರಾಜ್ಯ ಸರಕಾರದ ಅಭಿವೃದ್ಧಿ ಯೋಜನೆಗಳೇ ಶ್ರೀರಕ್ಷೆಯಾಗಿ ಜನರ ಮತ ಸೆಳೆಯಲಿವೆ. ನಮಗೆ ಯಾವುದೇ ಸವಾಲು, ಅಡ್ಡಿ- ಆತಂಕಗಳಿಲ್ಲ," ಎಂದು ಖಾಸಗಿ ಮಾಧ್ಯಮವೊಂದಕ್ಕೆ ನೀಡಿದ ಸಂದರ್ಶನದಲ್ಲಿ ಯೋಗಿ ಹೇಳಿದ್ದಾರೆ. * ಸತತ ಎರಡನೇ ಅವಧಿಗೆ ಅಧಿಕಾರ ಹಿಡಿಯುವ ವಿಶ್ವಾಸವಿದೆಯೇ? ಉತ್ತರ ಪ್ರದೇಶದಲ್ಲಿ ಇದುವರೆಗೆ ಹಾಗಾಗಿಲ್ಲವಲ್ಲ? 2017ರ ಪ್ರಣಾಳಿಕೆಯಲ್ಲಿ ನೀಡಿದ್ದ ಎಲ್ಲ ಭರವಸೆಗಳನ್ನೂ ನಾವು ಈಗಾಗಲೇ ಈಡೇರಿಸಿದ್ದೇವೆ. 'ಬಿಮಾರು' (ರೋಗಗ್ರಸ್ಥ- ಅಭಿವೃದ್ಧಿ ವಂಚಿತ) ರಾಜ್ಯವಾಗಿದ್ದ ಉತ್ತರ ಪ್ರದೇಶವು ಕಳೆದ ನಾಲ್ಕೂವರೆ ವರ್ಷಗಳಲ್ಲಿ ಜನಪರ ಅಭಿವೃದ್ಧಿಗೆ ಸಾಕ್ಷಿಯಾಗಿದೆ. ಅಂದಾಜು 2 ಕೋಟಿ ರೈತರ 36 ಸಾವಿರ ಕೋಟಿ ರೂ. ಕೃಷಿ ಸಾಲ ಮನ್ನಾ ಮಾಡಲಾಗಿದೆ. ರಾಜ್ಯದ 24 ಕೋಟಿ ಜನರು ನಮ್ಮ ಸರಕಾರದ ಅಭಿವೃದ್ಧಿ ಯೋಜನೆಗಳ ಲಾಭ ಪಡೆದಿದ್ದಾರೆ. ಹೀಗಾಗಿ ಪುನಃ ಅಧಿಕಾರ ಹಿಡಿಯುವುದು ನಿಶ್ಚಿತ. ರಾಜ್ಯ ವಿಧಾನಸಭೆಯ 403ರ ಕ್ಷೇತ್ರಗಳ ಪೈಕಿ 350ಕ್ಕೂ ಹೆಚ್ಚು ಕ್ಷೇತ್ರಗಳಲ್ಲಿ ಬಿಜೆಪಿ ಅಭ್ಯರ್ಥಿಗಳು ಗೆಲುವು ಸಾಧಿಸಲಿದ್ದಾರೆ. * ಬಿಜೆಪಿಗೆ ಪ್ರಬಲ ಪ್ರತಿಸ್ಪರ್ಧಿ ಯಾರು? ನಮಗೆ ಯಾರೂ ಪ್ರತಿಸ್ಪರ್ಧಿಗಳೇ ಇಲ್ಲ! ಎಸ್‌ಪಿ, ಬಿಎಸ್‌ಪಿ, ಕಾಂಗ್ರೆಸ್‌ ಸೇರಿದಂತೆ ಯಾವ ಪಕ್ಷವೂ ನಮಗೆ ಸವಾಲೊಡ್ಡಲು ಸಾಧ್ಯವಿಲ್ಲ. * ನಿಮ್ಮ ಗೆಲುವಿನ ಆತ್ಮವಿಶ್ವಾಸಕ್ಕೆ , ದಾಖಲೆ ಮತಗಳಿಕೆಯ ವಿಶ್ವಾಸಕ್ಕೆ ಬುನಾದಿ ಏನು? ಸುಧಾರಣೆ, ಸಮರ್ಥ ಆಡಳಿತ ಹಾಗೂ ಪರಿವರ್ತನೆ ಎಂಬ ಮಂತ್ರವನ್ನು ನಮ್ಮ ಸರಕಾರ ಹೊಂದಿದೆ. ಸುಮಾರು 11 ಲಕ್ಷ ಕೋಟಿ ರೂ. ಹೂಡಿಕೆಯು ರಾಜ್ಯಕ್ಕೆ ಹರಿದುಬಂದಿದೆ. ಸಣ್ಣ ಮತ್ತು ಮಧ್ಯಮ ಕೈಗಾರಿಕೆಗಳ ಸ್ಥಾಪನೆ ಹೆಚ್ಚಾಗಿ 30 ಲಕ್ಷ ಯುವಕರಿಗೆ ಉದ್ಯೋಗ ಖಾತರಿ ಸಿಗಲಿದೆ. ಇಂಥ ಅಭಿವೃದ್ಧಿಯೇ ದಾಖಲೆ ಪ್ರಮಾಣದ ಮತ ಮತ್ತು ಸೀಟುಗಳನ್ನು ತಂದುಕೊಡಲಿದೆ. * ಅಖಿಲೇಶ್‌ ಯಾದವ್‌ ನಿಮ್ಮ ವಿರುದ್ಧ ತೀಕ್ಷ್ಣ ವಾಗ್ದಾಳಿ ನಡೆಸುತ್ತಿದ್ದಾರೆ... ನಮ್ಮ ಸರಕಾರವು ಎಸ್‌ಪಿ ಆಡಳಿತದ ಅವಧಿಯಲ್ಲಿ ರಕ್ಷಣೆ ಪಡೆದಿದ್ದ ಭ್ರಷ್ಟರು, ಅಪರಾಧಿಗಳು ಹಾಗೂ ಗೂಂಡಾಗಳ ಮೇಲೆ ಬುಲ್ಡೋಜರ್‌ ಹರಿಸಿ, ಅವರನ್ನು ಹತ್ತಿಕ್ಕಿದೆ. ಮಾಫಿಯಾ ದಮನವನ್ನು ಸಹಿಸಲು ಅಖಿಲೇಶ್‌ಗೆ ಆಗುತ್ತಿಲ್ಲ. ಸಮಾಜವಾದಿ ಪಕ್ಷವು ಕೇವಲ ಅಪರಾಧಿಗಳ ರಕ್ಷಣೆಯಲ್ಲೇ ಆಡಳಿತಾವಧಿಯ ಕಾಲಹರಣ ಮಾಡಿತ್ತು. * ಈ ಚುನಾವಣೆಗೆ ಹಿಂದೂ - ಮುಸ್ಲಿಂ ಆಯಾಮ ಇದೆಯೇ? ಪ್ರತಿಪಕ್ಷಗಳು ಮತಗಳ ವಿಕೇಂದ್ರೀಕರಣಕ್ಕೆ ಧರ್ಮ ಆಧರಿತ ಕುತಂತ್ರ ಮಾಡುತ್ತಿವೆ. ನಾವು ಸುಸ್ಥಿರ ಕಾನೂನು, ಮಹಿಳಾ ಸುರಕ್ಷತೆ, ಅಭಿವೃದ್ಧಿ ಯೋಜನೆಗಳ ಬಗ್ಗೆ ಮಾತ್ರ ಜನರ ಎದುರು ಮಾತನಾಡುತ್ತಿದ್ದೇವೆ. ಯುವಕರಿಗೆ ಉದ್ಯೋಗಾವಕಾಶ ಹೆಚ್ಚಿಸುವುದು ನಮ್ಮ ಮುಂದಿನ ಆದ್ಯತೆ. * ಪ್ರಿಯಾಂಕಾ ವಾದ್ರಾ ಉತ್ತರ ಪ್ರದೇಶದಲ್ಲಿ ಸಕ್ರಿಯರಾಗಿದ್ದಾರೆ. ಬಿಜೆಪಿ - ಕಾಂಗ್ರೆಸ್‌ ನಡುವೆ ಒಪ್ಪಂದವಾಗಿದೆ ಎಂದು ಅಖಿಲೇಶ್‌ ಆರೋಪಿಸಿದ್ದಾರೆ? ಕೋವಿಡ್‌-19 ಸಂಕಷ್ಟದಲ್ಲಿ ಪ್ರಿಯಾಂಕಾಗೆ ಉತ್ತರ ಪ್ರದೇಶದ ಜನರು ಜ್ಞಾಪಕಕ್ಕೆ ಬರಲಿಲ್ಲ. ಸದ್ಯ ಅವರು ಎಲೆಕ್ಷನ್‌ ಪ್ರವಾಸದಲ್ಲಿದ್ದಾರೆ. ಕಳೆದ ನಾಲ್ಕೂವರೆ ವರ್ಷಗಳಿಂದ ಕಾಂಗ್ರೆಸ್‌ ಜತೆಗೆ ಒಪ್ಪಂದ ಮಾಡಿಕೊಂಡು ಇದ್ದವರು ಯಾರು ಎಂಬುದು ಎಲ್ಲರಿಗೂ ಗೊತ್ತಿದೆ. ಹಾಗಾಗಿ ಪ್ರತಿಪಕ್ಷಗಳು ಜಿನ್ನಾ ಹೆಸರು ಹೇಳಿಕೊಂಡು ಧರ್ಮದ ಹೆಸರಲ್ಲಿ ಮತವಿಭಜನೆಗೆ ಯತ್ನಿಸುವ ಕೀಳುಮಟ್ಟಕ್ಕೆ ಇಳಿಯುತ್ತಿವೆ. * ಲಖೀಮ್‌ಪುರ ಘಟನೆ ಆರೋಪಿಗಳಿಗೆ ರಕ್ಷಣೆ ನೀಡಲಾಗುತ್ತಿದೆಯೇ? ಪೂರ್ವಾಂಚಲದಲ್ಲಿ ರಾಜ್‌ಭರ್‌ ನಿಮಗೆ ಪೆಟ್ಟು ಕೊಡಲಿದ್ದಾರೆಯೇ? ಸುಪ್ರೀಂ ಕೋರ್ಟ್‌ ನೇಮಿಸಿರುವ ನಿವೃತ್ತ ಹೈಕೋರ್ಟ್‌ ನ್ಯಾಯಮೂರ್ತಿ ನೇತೃತ್ವದಲ್ಲಿ ಎಸ್‌ಐಟಿಯಿಂದ ಲಖೀಮ್‌ಪುರ ಘಟನೆಯ ತನಿಖೆ ನಡೆಯುತ್ತಿದೆ. ಹಾಗಾಗಿ ರಾಜ್ಯ ಸರಕಾರದ ಹಸ್ತಕ್ಷೇಪವಿಲ್ಲ. ಸಂತ್ರಸ್ತರಿಗೆ ನಾವೇ ಸೂಕ್ತ ಪರಿಹಾರ ನೀಡಿದ್ದೇವೆ. ಇನ್ನು, ಪೂರ್ವಾಂಚಲದಲ್ಲಿ ಓಂ ಪ್ರಕಾಶ್‌ ರಾಜ್‌ಭರ್‌ ಎಸ್‌ಪಿ ಜತೆಗೆ ಕೈಜೋಡಿಸಿರುವುದು ಯಾವುದೇ ಪರಿಣಾಮ ಬೀರಲ್ಲ. ಅದು ನಮ್ಮ ಭದ್ರಕೋಟೆಯಾಗಿದೆ. ಏಮ್ಸ್‌ ಸ್ಥಾಪಿಸಿ ಪೂರ್ವಾಂಚಲಕ್ಕೆ ಆರೋಗ್ಯ ಸೇವೆಯ ರಕ್ಷೆ ನೀಡಿದ್ದೇವೆ.