ಆಧಾರ್ ಕಾರ್ಡ್‌ ಮೂಲಕ ಮದ್ಯ ಮಾರಾಟ: ನಾನು ಹಾಗೆ ಹೇಳಿಯೇ ಇಲ್ಲ ಎಂದ ರತನ್ ಟಾಟಾ

ಹೊಸದಿಲ್ಲಿ: 'ದೇಶದಲ್ಲಿ ಮದ್ಯ ಮಾರಾಟವನ್ನು ಸಂಖ್ಯೆಗಳ ಮೂಲಕವೇ ಮಾಡಬೇಕು'- ಹೀಗೆ ಖ್ಯಾತ ಉದ್ಯಮಿ ಹೇಳಿದ್ದಾರೆ ಎನ್ನಲಾದ ಸ್ಕ್ರೀನ್‌ಶಾಟ್ ಒಂದು ಸಾಮಾಜಿಕ ಜಾಲತಾಣದಲ್ಲಿ ಹರಿದಾಡುತ್ತಿದೆ. ಇದರ ಬಗ್ಗೆ ಮಿಶ್ರ ಪ್ರತಿಕ್ರಿಯೆಗಳು ವ್ಯಕ್ತವಾಗುತ್ತಿವೆ. ಆದರೆ ಈ ರೀತಿ ತಾವು ಹೇಳಿಕೆಯೇ ಇಲ್ಲ ಎಂದು ರತನ್ ಟಾಟಾ ಸ್ವತಃ ಸ್ಪಷ್ಟಪಡಿಸಿದ್ದಾರೆ. 'ಲಿಕ್ಕರ್ ಮಾರಾಟವನ್ನು ಆಧಾರ್ ಕಾರ್ಡ್ ಮೂಲಕ ನಡೆಸಬೇಕು. ಖರೀದಿದಾರರಿಗೆ ಸರ್ಕಾರದ ಆಹಾರ ಸಬ್ಸಿಡಿಗಳನ್ನು ನಿಲ್ಲಿಸಬೇಕು' ಎಂದು ರತನ್ ಟಾಟಾ ಹೇಳಿದ್ದಾರೆ ಎಂಬ ತುಣುಕು ವೈರಲ್ ಆಗಿದೆ. ಇದನ್ನು ಇನ್‌ಸ್ಟಾಗ್ರಾಂನಲ್ಲಿ ರತನ್ ಟಾಟಾ ಹಂಚಿಕೊಂಡಿದ್ದಾರೆ. 'ಆಲ್ಕೋಹಾಲ್ ಖರೀದಿ ಮಾಡುವಷ್ಟು ಸಾಮರ್ಥ್ಯ ಹೊಂದಿರುವವರಿಗೆ ಆಹಾರ ಖರೀದಿಸುವ ಸಾಮರ್ಥ್ಯ ಕೂಡ ಖಂಡಿತಾ ಇರುತ್ತದೆ. ನಾವು ಅವರಿಗೆ ಉಚಿತ ಆಹಾರ ನೀಡುವಾಗ ಅವರು ಆಲ್ಕೋಹಾಲ್ ಖರೀದಿಸುತ್ತಾರೆ' ಎಂದು ಅದರಲ್ಲಿ ಹೇಳಲಾಗಿದೆ. ತಾವು ಈ ರೀತಿ ಹೇಳಿಕೆ ನೀಡಿಲ್ಲ. ಇದು ಶುದ್ಧ ಸುಳ್ಳು ಎಂದು ರತನ್ ಟಾಟಾ ಸ್ಪಷ್ಟಪಡಿಸಿದ್ದಾರೆ. 'ಇದನ್ನು ನಾನು ಹೇಳಿರುವುದಲ್ಲ. ಧನ್ಯವಾದ' ಎಂದು 83 ವರ್ಷದ ರತನ್ ಟಾಟಾ ತಿಳಿಸಿದ್ದಾರೆ. ರತನ್ ಟಾಟಾ ಸೇರಿದಂತೆ ಉದ್ಯಮಿಗಳು ಹಾಗೂ ಇತರೆ ಗಣ್ಯರ ಹೆಸರುಗಳಲ್ಲಿ ಇಂತಹ ಸುಳ್ಳು ಸುದ್ದಿಗಳು ಹರಿದಾಡುವುದು ಇದು ಮೊದಲ ಸಲವೇನಲ್ಲ. ದೇಶದ ಆರ್ಥಿಕತೆಯ ಭಾರಿ ಕುಸಿತವು ಕೊರೊನಾ ವೈರಸ್ ಸಾಂಕ್ರಾಮಿಕದಿಂದ ಆಗಿದೆ ಎಂದು ರತನ್ ಟಾಟಾ ಹೆಸರಿನಲ್ಲಿ ಹೇಳಿಕೆಯೊಂದು ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿತ್ತು. 'ನನಗೆ ಯಾವುದೇ ಹೇಳಿಕೆ ನೀಡುವ ಉದ್ದೇಶವಿದ್ದರೆ, ಅದನ್ನು ನನ್ನ ಅಧಿಕೃತ ಮಾಧ್ಯಮಗಳ ಮೂಲಕವೇ ಹೇಳಿಕೆ ನೀಡುತ್ತೇನೆ' ಎಂದು ಅವರು ಆಗ ಹೇಳಿದ್ದರು. ಆದರೂ ಅವರ ಹೆಸರಿನಲ್ಲಿ ಮತ್ತಷ್ಟು ಸುಳ್ಳು ಸುದ್ದಿಗಳು ಹರಿದಾಡುವುದು ಮುಂದುವರಿದಿವೆ. 'ಸ್ಟಾಕ್ ಮಾರ್ಕೆಟ್ ಟ್ರೇಡಿಂಗ್ ವಿಷಯವನ್ನು ಪ್ರಾಥಮಿಕ ಶಾಲಾ ಶಿಕ್ಷಣದಲ್ಲಿ ಕಡ್ಡಾಯಗೊಳಿಸಬೇಕು. ನಮ್ಮ ಶಾಲೆಗಳು ಮತ್ತು ಕಾಲೇಜುಗಳು ಏಕೆ ನಮಗೆ ಸ್ಟಾಕ್ ಮಾರ್ಕೆಟ್ ಕಲಿಸುವುದಿಲ್ಲ? ಎಂದು ಜೀವನ ಬದಲಿಸುವ ಸಲಹೆಯನ್ನು ಭಾರತದ ಕೋಟ್ಯಧಿಪತಿ ನೀಡಿದ್ದಾರೆ' ಎಂಬ ಹೇಳಿಕೆಯೊಂದು ಹರಿದಾಡುತ್ತಿತ್ತು. ತಾವು ಈ ರೀತಿ ಹೇಳಿಕೆ ನೀಡಿಲ್ಲ ಎಂದು ಆನಂದ್ ಮಹೀಂದ್ರಾ ಸ್ಪಷ್ಟನೆ ನೀಡಿದ್ದಾರೆ.