Samantha: 'ಅಕ್ಕಿನೇನಿ' ಸರ್‌ನೇಮ್‌ಗೆ ಸಮಂತಾ ಕತ್ತರಿ ಹಾಕಿದ್ದೇಕೆ? ಕೊನೆಗೂ ಈ ಬಗ್ಗೆ ಮಾತನಾಡಿದ ನಟಿ!

ಕೆಲ ದಿನಗಳ ಹಿಂದೆ ಅವರ ಟ್ವಿಟರ್ ಖಾತೆಯನ್ನು ನೋಡಿದವರಿಗೆ ಶಾಕ್ ಆಗಿತ್ತು! ಯಾಕೆಂದರೆ, ಅವರ ಟ್ವಿಟರ್ ಖಾತೆಯ ಹೆಸರು ಬದಲಾಗಿತ್ತು. ಮದುವೆಗೂ ಮುನ್ನ ಸಮಂತಾ ರುತ್‌ ಪ್ರಭು ಎಂದಿದ್ದ ಹೆಸರನ್ನು ನಂತರ ಸಮಂತಾ ಅಕ್ಕಿನೇನಿ ಎಂದು ಬದಲಾಯಿಸಿಕೊಂಡಿದ್ದರು. ಆ ಮೂಲಕ ತಾನಿನ್ನೂ ಗೌರವಾನ್ವಿತ ಅಕ್ಕಿನೇನಿ ಕುಟುಂಬದ ಸದಸ್ಯೆ ಎಂಬುದನ್ನು ಸೂಚ್ಯವಾಗಿ ಹೇಳಿದ್ದರು. ಇದೀಗ ಟ್ವಿಟರ್ ಖಾತೆಯ ಹೆಸರು ಬರಿ 'ಎಸ್‌' ಎಂದು ಇದೆ. ಇದು ಹಲವು ಅನುಮಾನಗಳನ್ನು ಹುಟ್ಟುಹಾಕಿದೆ. ಈ ಬಗ್ಗೆ ಸಮಂತಾ ಈವರೆಗೂ ಮಾತನಾಡಿರಲಿಲ್ಲ. ಇದೀಗ ಆ ಬಗ್ಗೆ ಮೌನ ಮುರಿದಿದ್ದಾರೆ. ನನಗೆ ಚರ್ಚಿಸಲು ಇಷ್ಟವಿಲ್ಲ! ಈಚೆಗೆ ನೀಡಿದ ಒಂದು ಸಂದರ್ಶನದಲ್ಲಿ ಸಮಂತಾಗೆ ಈ ಬಗ್ಗೆ ಪ್ರಶ್ನೆ ಎದುರಾಯ್ತು. ಅದಕ್ಕೆ ಪ್ರತಿಕ್ರಿಯಿಸಿದ ಸಮಂತಾ, 'ಯಾವುದೇ ವಿವಾದ ಅಥವಾ ಟ್ರೋಲ್‌ಗಳಿಗೆ ನನಗೆ ಪ್ರತಿಕ್ರಿಯಿಸಬೇಕು ಎನಿಸಿದರೆ ಮಾತ್ರ ನಾನು ಪ್ರತಿಕ್ರಿಯೆ ನೀಡುತ್ತೇನೆ. ಯಾರೋ ಪ್ರತಿಕ್ರಿಯೆ ನೀಡಿ ಎಂದಮಾತ್ರಕ್ಕೆ ನಾನು ಯಾವುದೇ ರೀತಿಯ ಪ್ರತಿಕ್ರಿಯೆ ನೀಡುವುದಿಲ್ಲ. ಇಂತಹ ವಿಚಾರಗಳನ್ನು ಚರ್ಚಿಸುವ ಬಗ್ಗೆಯೂ ನನಗೆ ಇಷ್ಟವಿಲ್ಲ. ಎಲ್ಲರಿಗೂ ಅವರವರ ಅಭಿಪ್ರಾಯಗಳನ್ನು ಹೇಗೆ ಹೇಳುವುದಕ್ಕೆ ಹಕ್ಕು ಇದೆಯೋ, ಹಾಗೇ ನನಗೂ ಹಕ್ಕು ಇದೆ' ಎಂದು ಹೇಳಿದ್ದಾರೆ. 'ನನಗೆ ದೊಡ್ಡ ಅಭಿಮಾನಿ ಬಳಗವಿದೆ, ಅವರ ಪ್ರೀತಿ ನನ್ನ ಜೊತೆಗೆ ಇದೆ. ಆದರೆ ನನ್ನ ಮತ್ತು ವೃತ್ತಿ ಆಯ್ಕೆಗಳ ನಡುವೆ ಅಭಿಮಾನಿಗಳನ್ನಾಗಲಿ ಅಥವಾ ಬೇರೆ ಯಾರನ್ನೇ ಆಗಲಿ ನಾನು ಯಾವತ್ತಿಗೂ ಸೇರಿಸುವುದಿಲ್ಲ' ಎಂದು ಸಮಂತಾ ಹೇಳಿದ್ದಾರೆ. ಅಂದಹಾಗೆ, 'S' ಎಂದು ಹೆಸರು ಇದ್ದರೆ, ಇನ್‌ಸ್ಟಾಗ್ರಾಮ್‌ನಲ್ಲಿ ಅಂತಲೇ ಈಗಲೂ ಅವರ ಐಡಿ ಇದೆ. ಇನ್ನೂ, ಫೇಸ್‌ಬುಕ್‌ನಲ್ಲಿ ಅವರ ಖಾತೆಯ ಹೆಸರು 'ಸಮಂತಾ ಅಕ್ಕಿನೇನಿ' ಎಂದಿದೆ! ಅಂದಹಾಗೆ, ಮದುವೆ ಬಳಿಕವೂ ಸಮಂತಾ ಚಿತ್ರರಂಗದಲ್ಲಿ ಸಕ್ರಿಯರಾಗಿದ್ದಾರೆ. 2017ರಲ್ಲಿ ನಾಗರ್ಜುನ ಅವರ ಪುತ್ರ, ನಟ ನಾಗಚೈತನ್ಯ ಅಕ್ಕಿನೇನಿ ಜೊತೆಗೆ ಮದುವೆಯಾದ ಸಮಂತಾ, ಈಗಲೂ ಸಿನಿಮಾರಂಗದಲ್ಲಿ ಬ್ಯುಸಿ ನಟಿ. 'ಯೇ ಮಾಯ ಚೇಸಾವೆ' ಚಿತ್ರದ ಮೂಲಕ ಸಮಂತಾ ಚಿತ್ರಜೀವನ ಶುರುವಾಯಿತು. ತಮ್ಮ ವೃತ್ತಿ ಜೀವನದಲ್ಲಿ ಅನೇಕ ಹಿಟ್ ಚಿತ್ರಗಳನ್ನು ಸಮಂತಾ ನೀಡಿದ್ದಾರೆ. ಈಚೆಗೆ 'ದಿ ಫ್ಯಾಮಿಲಿ ಮ್ಯಾನ್ 2' ಮೂಲಕ ಒಟಿಟಿ ವೇದಿಕೆಗೂ ಸಮಂತಾ ಕಾಲಿಟ್ಟರು. ಅಲ್ಲಿ ಅವರಿಗೆ ಭಾರಿ ಜನಪ್ರಿಯತೆ ಸಿಕ್ಕಿದೆ. ಸದ್ಯ 'ಶಾಕುಂತಲಂ' ಸೇರಿದಂತೆ 2-3 ಚಿತ್ರಗಳಲ್ಲಿ ಸಮಂತಾ ಕೆಲಸ ಮಾಡುತ್ತಿದ್ದಾರೆ.