Bangalore Covid Lockdown: ಲಾಕ್‌ಡೌನ್ ಸಂಕಷ್ಟ - ಪೊಲೀಸರು ವರ್ಸಸ್ ಜನರ ನಡುವೆ ವಾಗ್ವಾದ, ವಾಹನಗಳ ಜಪ್ತಿ
Lockdown in Bengaluru: ಕೋವಿಡ್‌ ಜೊತೆಗೆ ಲಾಕ್‌ಡೌನ್ ನಿಂದಲೂ ಜನರು ಸಂಕಷ್ಟ ಅನುಭವಿಸುತ್ತಿದ್ದಾರೆ. ಲಾಕ್‌ಡೌನ್ ಅವಧಿಯಲ್ಲಿ ಸಮಯ ಮೀರಿ ರಸ್ತೆಗಿಳಿದ ವಾಹನ ಸವಾರರನ್ನು ಪೊಲೀಸರು ಪ್ರಶ್ನಿಸುತ್ತಿದ್ದಾರೆ. ಈ ಸಂದರ್ಭದಲ್ಲಿ ಪೊಲೀಸರು ವರ್ಸಸ್ ಜನರ ನಡುವೆ ವಾಗ್ವಾದ ನಡೆಯುತ್ತಿದೆ.
Admin
0
7
ಬೆಂಗಳೂರು: ಕೋವಿಡ್‌ ನಿಯಂತ್ರಣ ಮಾಡುವ ನಿಟ್ಟಿನಲ್ಲಿ ಜಾರಿಗೊಂಡಿರುವ ಲಾಕ್‌ಡೌನ್‌ನನ್ನು ಮತ್ತಷ್ಟು ಕಠಿಣಗೊಳಿಸಲು ನಿರ್ಧಾರ ಮಾಡಿದ ಹಿನ್ನೆಲೆಯಲ್ಲಿ ಬೆಂಗಳೂರು ನಗರದಲ್ಲಿ ಪೊಲೀಸರು ಹಾಗೂ ರಸ್ತೆಯಲ್ಲಿ ಅವಧಿ ಮೀರಿ ಸಂಚಾರ ನಡೆಸಿದ ಜನಸಾಮಾನ್ಯರ ನಡುವೆ ಅಲ್ಲಲ್ಲಿ ವಾಗ್ವಾದ ನಡೆಯುತ್ತಿದೆ. ಬೆಳಗ್ಗೆ 10 ಗಂಟೆಯ ವರೆಗೆ ಅಗತ್ಯ ಸಾಮಗ್ರಿಗಳ ಖರೀದಿಗೆ ಅವಕಾಶ ನೀಡಲಾಗಿದೆ. ಆದರೆ ಅವಧಿ ಮೀರಿ ರಸ್ತೆಗಿಳಿದ ವಾಹನ ಸವಾರರನ್ನು ಪೊಲೀಸರು ತನಿಖೆ ನಡೆಸುತ್ತಿದ್ದಾರೆ.
9.30 ಗಂಟೆಗೆ ಪೊಲೀಸರು ಮೈಕ್‌ನಲ್ಲಿ ಅಂಗಡಿ ಮುಂಗಟ್ಟುಗಳನ್ನು ಮುಚ್ಚಲು ಸೂಚನೆ ನೀಡುತ್ತಿದ್ದಾರೆ. ಇನ್ನು 10 ಗಂಟೆಯ ಬಳಿಕ ರಸ್ತೆಗಿಳಿದ ವಾಹನ ಸವಾರರನ್ನು ತನಿಖೆಗೆ ಒಳಪಡಿಸುವುದಲ್ಲದೆ ಅವರ ವಾಹನಗಳನ್ನು ಸೀಜ್ ಮಾಡಲಾಗುತ್ತಿದೆ. ಈ ವೇಳೆ ವಾಹನ ಸವಾರರು ಹಾಗೂ ಪೊಲೀಸರ ನಡುವೆ ಅಲ್ಲಲ್ಲಿ ವಾಗ್ವಾದಗಳು ನಡೆಯುತ್ತಿವೆ.
ಕೆಲವರು ಲಸಿಕೆ ಹಾಕಲು, ಔವಧಿ ತರಲು ಮನೆಯಿಂದ ಹೊರಬಂದೆವು ಎಂದು ಕಾರಣಗಳನ್ನು ನೀಡಿದರೆ ಮತ್ತೆ ಕೆಲವರು ಮದುವೆ ಇನ್ನಿತರ ಕಾರಣಗಳನ್ನು ನೀಡುತ್ತಿದ್ದಾರೆ. ಆದರೆ ಪೊಲೀಸರು ಇದಕ್ಕೆ ಮರುಪ್ರಶ್ನೆಗಳನ್ನು ಹಾಕಿದಾಗ ಜನರು ಇದಕ್ಕೆ ಪ್ರಶ್ನೆ ಮಾಡುತ್ತಿದ್ದಾರೆ. ಪೊಲೀಸರ ಕ್ರಮದ ಬಗ್ಗೆ ಆಕ್ಷೇಪ ವ್ಯಕ್ತಪಡಿಸುತ್ತಿದ್ದಾರೆ.
ಭಾನುವಾರ ಬೆಂಗಳೂರು ನಗರದಲ್ಲಿ ಕರ್ಫ್ಯೂ ಸಮಯದಲ್ಲಿ ಬೆಳಿಗ್ಗೆ 10-00 ರಿಂದ ರಾತ್ರಿ 08-00 ಗಂಟೆಯವರೆಗೆ 1308 ದ್ವಿಚಕ್ರ, 77 ತ್ರಿಚಕ್ರ & 103 ನಾಲ್ಕು ಚಕ್ರದ ವಾಹನಗಳು ಸೇರಿ ಒಟ್ಟು 1488 ವಾಹನಗಳನ್ನು ವಶಪಡಿಸಿಕೊಳ್ಳಲಾಗಿದೆ ಮತ್ತು 184 ಎನ್.ಡಿ.ಎಂ.ಎ ಪ್ರಕರಣಗಳನ್ನು ದಾಖಲಿಸಲಾಗಿದೆ. ಸೋಮವಾರ ಕೂಡಾ ಪೊಲೀಸರು ವಾಹನಗಳನ್ನು ವಶಕ್ಕೆ ಪಡೆಯುತ್ತಿದ್ದಾರೆ.
ಶೇಷಾಂದ್ರಿಪುರ, ಮೈಸೂರು ಸರ್ಕಲ್, ಕೆಆರ್‌ ಮಾರ್ಕೆಟ್ ಮುಂತಾದ ಕಡೆಗಳಲ್ಲಿ ಜನರ ಓಡಾಟ ಹೆಚ್ಚಾಗಿದೆ. ಬಹುತೇಕ ಜನರು ಅಗತ್ಯ ಕಾರಣಕ್ಕಾಗಿಯೇ ಮನೆಯಿಂದ ಹೊರಬರುತ್ತಿದ್ದಾರೆ. ಕೆಲವೊಂದು ಜನರು ಮಾರ್ಕೆಟ್‌ನಿಂದ ಖರೀದಿ ಮಾಡಿ ಮನೆಗೆ ಹೋಗುವಾಗ ತಡ ಆದ ಕಾರಣಕ್ಕಾಗಿ ಪೊಲೀಸರ ಕೈಗೆ ಸಿಕ್ಕಿಹಾಕಿಕೊಳ್ಳುವಂತಾಗಿದೆ. ಪೊಲೀಸರು ಅನಗತ್ಯವಾಗಿ ಏಕೆ ರಸ್ತೆಯಲ್ಲಿ ಓಡಾಡುತ್ತೀರಿ ಎಂದು ತಮ್ಮ ಕ್ರಮಕ್ಕೆ ಮುಂದಾದರೆ ಜನರು ಸಕಾರಣ ನೀಡಿದರೂ ಪೊಲೀಸರು ಕ್ರಮ ಕೈಗೊಳ್ಳುತ್ತಿದ್ದಾರೆ ಎಂದು ಆರೋಪ ಮಾಡುತ್ತಿದ್ದಾರೆ
