92 ವರ್ಷದ ಅಜ್ಜಿ ಕೊರೊನಾ ಗೆದ್ದ ಪರಿಗೆ ವಿಸ್ಮಿತಗೊಂಡ ಆಸ್ಪತ್ರೆ ಸಿಬ್ಬಂದಿ!

ಬೆಂಗಳೂರು: ನಗರದ 92ರ ಹರೆಯದ ಮಹಿಳೆಯೊಬ್ಬರು ಕೋವಿಡ್ ಸೋಂಕಿನಿಂದ ಚೇತರಿಸಿಕೊಂಡಿದ್ದು, ಅವರಿಗೆ ಚಿಕಿತ್ಸೆ ಕೊಡಿಸಿದ ಕುಟುಂಬ ಸದಸ್ಯರು ಮತ್ತು ಚಿಕಿತ್ಸೆ ನೀಡಿದ ಆಸ್ಪತ್ರೆಯ ಸಿಬ್ಬಂದಿಗೆ ಅಚ್ಚರಿಯ ಜತೆಗೆ ಸಂತೋಷ ವ್ಯಕ್ತಪಡಿಸಿದ್ದಾರೆ. ಜಯನಗರ ಜನರಲ್ ಆಸ್ಪತ್ರೆಯ ವೈದ್ಯಕೀಯ ತಂಡವು ಜಾನಕಿ ಬಾಯಿ ಅವರು ಸೋಂಕಿನಿಂದ ಚೇತರಿಸಿಕೊಂಡ ಪರಿಯನ್ನು ಬಾಯಿತುಂಬ ಹೊಗಳಿದ್ದಾರೆ. ತಾನು ಕೋವಿಡ್‌ ಸೋಂಕಿಗೆ ಒಳಗಾಗಿದ್ದೇನೆ ಎಂದು ತಿಳಿದ ನಂತರವೂ ಜಾನಕಿ ಬಾಯಿ ಅವರ ಉತ್ಸಾಹ ಕುಂದಲಿಲ್ಲ. ಚಿಕಿತ್ಸೆಗೆ ಉತ್ತಮವಾಗಿ ಸ್ಪಂದಿಸಿದರು ಎಂದು ಕೊರೊನಾ ಗೆದ್ದ ಅಜ್ಜಿಯನ್ನು ಕೊಂಡಾಡಿದ್ದಾರೆ. ಬೆಂಗಳೂರಿನ ಮರಾಠಹಳ್ಳಿ ನಿವಾಸಿ ಜಾನಕಿ ಅವರು ಮೇ 17 ರಂದು ನಡೆಸಿದ ಕೋವಿಡ್‌ ಪರೀಕ್ಷೆಯ ವರದಿಯಲ್ಲಿ ಪಾಸಿಟಿವ್ ಎಂದಾಗಿತ್ತು. ಇದಾದ ಒಂದು ದಿನದ ಬಳಿಕ ಉಸಿರಾಟದ ತೊದರೆ ಕಾಣಿಸಿಕೊಂಡ ಕಾರಣ ಜಯನಗರ ಆಸ್ಪತ್ರೆಗೆ ದಾಖಲಾಗಿದ್ದರು. ಈ ವೇಳೆಗಾಗಲೇ ಅವರ ರಕ್ತದಲ್ಲಿನ ಆಕ್ಸಿಜನ್‌ ಪ್ರಮಾಣ ಶೇ.89ಕ್ಕೆ ಕುಸಿದಿತ್ತು. ಜಯನಗರ ಜನರಲ್ ಆಸ್ಪತ್ರೆಯ ಕೋವಿಡ್ ನೋಡಲ್ ಅಧಿಕಾರಿ ಡಾ.ಸುಧಾ ಬಿ.ಎಂ. ಅವರು ಹೇಳುವಂತೆ ಜಾನಕಿ ಅವರು ಆಸ್ಪತ್ರೆಗೆ ದಾಖಲಾದಾಗ ಅವರ ಇನ್ಫೆಕ್ಷನ್ ಸ್ಕೋರ್ 15/25 ನಷ್ಟಿತ್ತು. ಅವರ ಉಸಿರಾಟವನ್ನು ಸರಾಗಗೊಳಿಸುವ ಸಲುವಾಗಿ, ಸುಮಾರು 10 ದಿನಗಳವರೆಗೆ ಪ್ರತಿದಿನ 10 ಲೀಟರ್ ಆಮ್ಲಜನಕ ಹಾಕಲಾಯಿತು. ಇದರ ಜತೆಗೆ ಆಂಟಿ-ವೈರಲ್ ಡ್ರಗ್ ರೆಮ್‌ಡೆಸಿವಿರ್ ನೀಡಲಾಯಿತು. ಆಕೆಯನ್ನು ಮೇ 29 ರಂದು ಬಿಡುಗಡೆ ಮಾಡಲಾಯಿತು. ಕೋವಿಡ್‌ ಪಾಸಿಟಿವ್‌ ಎಂದೊಡನೆ ಯುವಕರೇ ಧೈರ್ಯಗುಂದುತ್ತಾರೆ. ಇಂಥವರಿಗೆಲ್ಲ ಜಾನಕಿ ಬಾಯಿ ಅವರು ಮಾದರಿಯಾಗುತ್ತಾರೆ. ಸೋಂಕಿನಿಂದ ತೊದರೆಯಾದಾಗಲೂ ಅವರು ಸಂಯಮದಿಂದಲೇ ಇದ್ದರೂ. ಎಂದಿಗೂ ಕುಗ್ಗಲಿಲ್ಲ. ಉತ್ಸಾಹಭರಿತರಾಗಿದ್ದು, ಇದೂ ಕೂಡ ಅವರು ಸೋಂಕಿನಿಂದ ಗುಣವಾಗಲು ಸಹಾಯವಾಗಿದೆ ಎನ್ನುತ್ತಾರೆ ವೈದ್ಯರು. ಮೂಲತಃ ಚಿತ್ರದುರ್ಗದವರಾದ ಜಾನಕಿ ಅವರು ಈಗ ತನ್ನ ಮಗನ ಕುಟುಂಬದೊಂದಿಗೆ ಮರಾಠಹಳ್ಳಿಯಲ್ಲಿ ವಾಸಿಸುತ್ತಿದ್ದಾರೆ. ತಮ್ಮ ಅತ್ತೆಗೆ (ಜಾನಕಿ ಬಾಯಿ) ನಂಜನಗುಡಿನಲ್ಲಿ ಸೋಂಕು ತಗುಲಿರಬಹುದು. ಇತ್ತೀಚೆಗಷ್ಟೇ ನಂಜನಗೂಡಿನಲ್ಲಿದ್ದ ಸಂಬಂಧಿಕರ ಮನೆಗೆ ಹೋಗಿದ್ದರು. ಅಲ್ಲಿಂದ ಹಿಂದಿರುಗಿದ ನಂತರ, ಜ್ವರದಿಂದ ಬಳಲುತ್ತಿದ್ದರು. ಕೂಡಲೇ ಕೋವಿಡ್ -19 ಪರೀಕ್ಷೆ ಮಾಡಿಸಲಾಯಿತು ಎನ್ನುತ್ತಾರೆ ಜಾನಕಿ ಬಾಯಿಯ ಸೂಸೆ ಬಿ. ಜಯಂತಿ. ಜಯಂತಿ ಅವರು ಜಯನಗರ ಜನರಲ್ ಆಸ್ಪತ್ರೆಯಲ್ಲಿ ಸ್ಟಾಫ್ ನರ್ಸ್ ಆಗಿ ಕೆಲಸ ಮಾಡುತ್ತಿರುವ ಕಾರಣ ತಮ್ಮ ಅತ್ತೆಯನ್ನು ಅದೇ ಆಸ್ಪತ್ರೆಗೆ ದಾಖಲಿಸಲು ನಿರ್ಧರಿಸಿದೆವು.ನಾನು ಅಲ್ಲಿಯೇ ಕೆಲಸ ಮಾಡುತ್ತಿದ್ದರಿದಂದ ಅತ್ತೆಯನ್ನು ನೋಡಿಕೊಳ್ಳುವುದು ಸುಲಭವಾಯಿತು ಎನ್ನುತ್ತಾರೆ ಜಯಂತಿ. ನಮ್ಮ ಅತ್ತೆ ಯಾವಾಗಲೂ ಗಟ್ಟಿಗಿತ್ತಿ ಅವರು ಅನೇಕ ಕಠಿಣ ಸಂದರ್ಭಗಳನ್ನು ಎದುರಿಸಿದ್ದಾರೆ. ಎಂತಹದೇ ಕಷ್ಟ ಬಂದರೂ ಧೈರ್ಯದಿಂದ ಎದುರಿಸುತ್ತಿದ್ದರು. ಅಷ್ಟು ಸಕಾರಾತ್ಮಕ ವ್ಯಕ್ತಿಯ ವಿರುದ್ಧ ಕೋವಿಡ್ ಗೆಲ್ಲಲು ಸಾಧ್ಯವಿಲ್ಲ ಎಂದು ನಮಗೆ ತಿಳಿದಿತ್ತು ಎಂದು ತಮ್ಮ ಅತ್ತೆಯ ಕುರಿತು ಮೆಚ್ಚುಗೆಯ ಮಾತನಾಡುತ್ತಾರೆ ಬಿ.ಜಯಂತಿ. ಜಾನಕಿ ಬಾಯಿ ಅವರು ಆರೋಗ್ಯ ಪ್ರಜ್ಞೆ ಹೊಂದಿದ್ದಾರೆ. "ಅವರಿಗೆ ಮಧುಮೇಹ ಇದ್ದರೂ, ತಮ್ಮ 92 ನೇ ವಯಸ್ಸಿನಲ್ಲಿಯೂ ಅವರದೇ ಔಷಧ ತೆಗೆದುಕೊಳ್ಳುತ್ತಾರೆ. ಸಮಯಕ್ಕೆ ಸರಿಯಾಗಿ ಊಟ ಮಾಡ್ತಾರೆ. ಹೆಚ್ಚು ನೀರು ಕುಡಿಯುತ್ತಾರೆ. ಅವರು ಉತ್ಸಾಹದಿಂದಿರಲು ಇದೇ ಕಾರಣ. ಕೋವಿಡ್ ವಾರ್ಡ್‌ನಲ್ಲಿ ಇದ್ದವರೆಲ್ಲರೂ ಇವರನ್ನು ನೋಡಿಯೇ ಸಮಾಧಾನ ಪಟ್ಟುಕೊಳ್ಳುತ್ತಿದ್ದರು ಎನ್ನುತ್ತಾರೆ ಜಯಂತಿ.