43,000 ಕೋಟಿ ರೂ. ವೆಚ್ಚದಲ್ಲಿ 6 ಸ್ವದೇಶಿ ಸಬ್‌ಮರೀನ್ ನಿರ್ಮಾಣಕ್ಕೆ ಭಾರತ ನಿರ್ಧಾರ

ಹೊಸದಿಲ್ಲಿ: ಸಮುದ್ರ ಪ್ರದೇಶದಲ್ಲಿ ಚೀನಾ ತನ್ನ ಬಾಹುಳ್ಯ ವಿಸ್ತರಿಸುತ್ತಿರುವ ಹಿನ್ನೆಲೆಯಲ್ಲಿ ಅದಕ್ಕೆ ಸಡ್ಡು ಹೊಡೆಯಲು ಮುಂದಾಗಿರುವ ರಕ್ಷಣಾ ಸಚಿವಾಲಯ, ನೌಕಾಪಡೆಗೆ ಇನ್ನಷ್ಟು ಜಲಾಂತರ್ಗಾಮಿ (ಸಬ್‌ ಮರಿನ್‌) ಹಡಗುಗಳನ್ನು ನಿಯೋಜಿಸಲು ಯೋಜನೆ ರೂಪಿಸಿಕೊಂಡಿದೆ. ಅಂತೆಯೇ ಮೊದಲ ಹಂತದಲ್ಲಿ ಆರು ದೇಶಿ ನಿರ್ಮಿತ ಸಾಂಪ್ರದಾಯಿಕ ಸಬ್‌ ಮರಿನ್‌ಗಳು ಸಿದ್ಧಗೊಳ್ಳಲಿದ್ದು 43 ಸಾವಿರ ಕೋಟಿ ರೂಪಾಯಿಯ ಈ ಯೋಜನೆಗೆ ಇಲಾಖೆ ಒಪ್ಪಿಗೆ ನೀಡಿದೆ. ಹಡಗುಗಳ ನಿರ್ಮಾಣ ಯೋಜನೆಯು ವಿದೇಶಿ ಸಹಭಾಗಿತ್ವದಲ್ಲಿ ನಡೆಯಲಿದ್ದು, ಸ್ಥಳೀಯ ಮಿಲಿಟರಿ ನೌಕೆಗಳ ತಯಾರಿ ಕಂಪನಿಗಳಲ್ಲಿ ವಿದೇಶಿ ಕಂಪನಿಗಳು ಹೂಡಿಕೆ ಮಾಡಲಿವೆ. ರಕ್ಷಣಾ ಸಾಮಗ್ರಿಗಳನ್ನು ವಿದೇಶಗಳಿಂದ ಆಮದು ಮಾಡಿಕೊಳ್ಳುವ ಪ್ರಕ್ರಿಯೆಗೆ ತೆರೆ ಎಳೆಯುವುದೇ ಈ ಯೋಜನೆ ಮಹತ್ವಾಕಾಂಕ್ಷೆ. ನಾನಾ ಮಿಲಿಟರಿ ಆಯುಧಗಳು ಹಾಗೂ ಸಾಮಗ್ರಿಗಳ ತಯಾರಿಗೆ ಸುಮಾರು 6,800 ಕೋಟಿ ರೂ. ಬಂಡವಾಳ ಸಂಗ್ರಹಕ್ಕೆ ರಕ್ಷಣಾ ಸಚಿವಾಲಯ ಒಪ್ಪಿದೆ ಎಂದು ರಕ್ಷಣಾ ಸಚಿವ ರಾಜನಾಥ್‌ ಸಿಂಗ್‌ ಅವರ ಕಚೇರಿಯ ಪ್ರಕಟಣೆ ಹೇಳಿದೆ. ಏನಿದು ಜಲಾಂತರ್ಗಾಮಿ ಯೋಜನೆ?: ರಕ್ಷಣಾ ಸಚಿವಾಲಯದ ಬಂಡವಾಳ ಕ್ರೋಢೀಕರಣ ಸಮಿತಿ (ಡಿಎಸಿ) ಜಲಾಂತರ್ಗಾಮಿ ನಿರ್ಮಾಣ ಯೋಜನೆ ಸಿದ್ಧಪಡಿಸಿದೆ. 'ಪಿ-75 ಇಂಡಿಯಾ' ಹೆಸರಿನ ಯೋಜನೆಯಲ್ಲಿ ಸ್ಥಳೀಯ ತಂತ್ರಜ್ಞಾನ ಅಡಕಗೊಂಡಿರುವ ಸ್ವತಂತ್ರ ಪ್ರೊಪ್ಯುಲೇಷನ್‌ ವ್ಯವಸ್ಥೆ ಇರುವ 6 ಜಲಾಂತರ್ಗಾಮಿ ನೌಕೆಗಳು ನಿರ್ಮಾಣಗೊಳ್ಳಲಿವೆ. ಇದರ ಮೂಲಕ ಭಾರತದಲ್ಲಿಯೇ ಸಬ್‌ ಮರಿನ್‌ಗಳ ನಿರ್ಮಾಣ ಕಾರ್ಯಕ್ಕೆ ಚಾಲನೆ ಸಿಗಲಿದೆ. 12 ವರ್ಷಗಳ ಅವಧಿಯೊಳಗೆ ಯೋಜನೆ ಮುಕ್ತಾಯಗೊಳ್ಳಲಿದ್ದು, ಅಂತಿಮ ವೆಚ್ಚ ಆ ಅವಧಿಯಲ್ಲಿನ ಶಸ್ತ್ರಾಸ್ತ್ರ ದರಕ್ಕೆ ಅನ್ವಯವಾಗಲಿದೆ. ಎಲ್‌ಆ್ಯಂಡ್‌ಟಿ ಮತ್ತು ಮಸಗೋವನ್‌ ಡಾಕ್ಸ್‌ ಲಿಮಿಟೆಡ್‌ (ಎಂಡಿಎಲ್‌) ಈ ಯೋಜನೆಗೆ ಈಗಾಗಲೇ ಪ್ರಸ್ತಾವನೆ ಸಲ್ಲಿಸಿದೆ. ಅಂತೆಯೇ, ರೋಸೋಬೊರೊನ್‌ ಎಕ್ಸ್‌ಪೋರ್ಟ್‌ (ರಷ್ಯಾ), ಡೇವೂ (ದಕ್ಷಿಣ ಕೊರಿಯಾ), ಥೈಸೆನ್‌ಕ್ರುಪ್‌ ಮರಿನ್‌ ಸಿಸ್ಟಮ್‌ (ಜರ್ಮನಿ), ನವಂತಿಯಾ (ಸ್ಪೇನ್‌) ಮತ್ತು ನೇವಲ್‌ ಗ್ರೂಪ್‌ (ಫ್ರಾನ್ಸ್‌) ಸಚಿವಾಲಯದ ಅಂತಿಮ ಪಟ್ಟಿಯಲ್ಲಿರುವ ಕಂಪನಿಗಳಾಗಿವೆ. ಸಬ್‌ಮರಿನ್‌ ವಿಶೇಷತೆಗಳು, ತುರ್ತು ಅಗತ್ಯಗಳನ್ನು ರಕ್ಷಣಾ ಸಚಿವಾಲಯದ ಇನ್ನೊಂದು ತಂಡ ರೂಪಿಸಲಿದೆ. ರಕ್ಷಣಾ ಬಲ ಹೆಚ್ಚಿಸುವ ಯೋಜನೆ ಭಾರತದ ನೌಕಾಪಡೆಯು 24 ಹೊಸ ಸಬ್‌ಮರಿನ್‌ಗಳನ್ನು ತನ್ನ ತೆಕ್ಕೆಗೆ ತೆಗೆದುಕೊಳ್ಳುವ ಇಂಗಿತ ವ್ಯಕ್ತಪಡಿಸಿದೆ. ಇದರಲ್ಲಿ ಆರು ಜಲಾಂತರ್ಗಾಮಿ ನೌಕೆಗಳು ಅಣ್ವಸ್ತ್ರ ಪ್ರಯೋಗಕ್ಕೆ ಸಮರ್ಥವಾಗಿರಲಿವೆ. ಪ್ರಸ್ತುತ ಭಾರತದ ಬಳಿ 15 ಜಲಾಂತರ್ಗಾಮಿ ನೌಕೆಗಳಿದ್ದು ಎರಡು ಹಡಗುಗಳು ಅಣ್ವಸ್ತ್ರಗಳನ್ನು ಹೊಂದಿವೆ. ಹಿಂದೂ ಮಹಾಸಾಗರದಲ್ಲಿ ಚೀನಾ ತನ್ನ ನೌಕಾಪಡೆ ಸಾಮರ್ಥ್ಯ ವೃದ್ಧಿಸಿಕೊಳ್ಳುತ್ತಲೇ ಹೋಗುತ್ತಿದೆ. ಅದಕ್ಕೆ ಸ್ಪರ್ಧೆ ಒಡ್ಡುವ ಮೂಲಕ ದೇಶದ ರಕ್ಷಣೆಯ ಭರವಸೆ ಸೃಷ್ಟಿಸಲು ರಕ್ಷಣಾ ಸಚಿವಾಲಯಕ್ಕೆ ತನ್ನ ಶಕ್ತಿ ಹೆಚ್ಚಿಸುವ ಅನಿವಾರ್ಯತೆ ಇದೆ. ಹೀಗಾಗಿ ಅಣ್ವಸ್ತ್ರ ಸಮೇತದ ಜಲಾಂತರ್ಗಾಮಿ ಹಡಗುಗಳ ನಿರ್ಮಾಣಕ್ಕೆ ಮುಂದಾಗಿದೆ. ಇದರ ಜತೆಗೆ 57 ಫೈಟರ್‌ ಜೆಟ್‌ಗಳು, 111 ನೇವಲ್‌ ಯುಟಿಲಿಟಿ ಹೆಲಿಕಾಪ್ಟರ್‌ಗಳು, 123 ಮಲ್ಟಿ ರೋಲ್‌ ಹೆಲಿಕಾಪ್ಟರ್‌ಗಳನ್ನು ಪಾಲುದಾರಿಕೆ ಯೋಜನೆಯಡಿ ರೂಪಿಸಲು ನಿರ್ಧರಿಸಲಾಗಿದೆ. ಜಾಗತಿಕ ನೌಕಾನೆಲೆ ಸಮೀಕ್ಷೆ ಪ್ರಕಾರ ಚೀನಾದ ಬಳಿ ಸದ್ಯ 50 ಸಬ್‌ ಮರಿನ್‌ ಹಾಗೂ 350 ಹಡಗುಗಳಿವೆ. ಮುಂದಿನ 8 ರಿಂದ 10 ವರ್ಷಗಳ ಒಳಗೆ ಹಡುಗಳ ಸಂಖ್ಯೆಯನ್ನು 500ಕ್ಕೆ ಏರಿಸುವ ಯೋಜನೆ ರೂಪಿಸಿಕೊಂಡಿದೆ. ಯಾವುದಕ್ಕೆಲ್ಲ ಪಾಲುದಾರಿಕೆ ರಕ್ಷಣಾ ಸಚಿವಾಲಯದ ಸದ್ಯದ ಯೋಜನೆ ಪ್ರಕಾರ ಯುದ್ಧ ವಿಮಾನಗಳು, ಹೆಲಿಕಾಪ್ಟರ್‌ಗಳು, ಸಬ್‌ಮರಿನ್‌ಗಳು, ಶಸ್ತ್ರಸಜ್ಜಿತ ಯುದ್ಧ ವಾಹನಗಳು, ಯುದ್ಧ ಟ್ಯಾಂಕ್‌ಗಳು ವಿದೇಶಿ ಹೂಡಿಕೆ ಯೋಜನೆಯಡಿ ಸಿದ್ಧಗೊಳ್ಳಲಿವೆ. ಮುಂದಿನ ಹಂತದಲ್ಲಿ ಇನ್ನಷ್ಟು ವಿಭಾಗಗಳು ಇದರಡಿ ಸೇರ್ಪಡೆಯಾಗಲಿವೆ. 101 ಶಸ್ತ್ರಾಸ್ತ್ರಗಳು ಹಾಗೂ ಮಿಲಿಟರಿ ಅಗತ್ಯಗಳನ್ನು 2024ರ ಬಳಿಕ ಆಮದು ಮಾಡಿಕೊಳ್ಳುವುದಿಲ್ಲ ಎಂದು ಕಳೆದ ಆಗಸ್ಟ್‌ನಲ್ಲಿ ರಕ್ಷಣಾ ಸಚಿವಾಲಯ ಹೇಳಿಕೆ ನೀಡಿತ್ತು. ಅದೇ ರೀತಿ ಮುಂದಿನ ಐದು ವರ್ಷಗಳಲ್ಲಿ ಸುಮಾರು 1.75 ಲಕ್ಷ ಕೋಟಿ ರೂ. ಬಂಡವಾಳವನ್ನು ಮಿಲಿಟರಿ ಯೋಜನೆಗೆ ಕ್ರೋಢೀಕರಿಸುವ ಉದ್ದೇಶ ಹೊಂದಲಾಗಿದೆ.