ರೈತರ ನೆರವಿಗೆ ಕಿಸಾನ್‌ ಕ್ರೆಡಿಟ್‌ ಯೋಜನೆ; ಎರಡು ಲಕ್ಷದವರೆಗೆ ಸಿಗಲಿದೆ ಸಾಲ ಸೌಲಭ್ಯ!

ಆದರ್ಶ ಕೋಡಿ ದೊಡ್ಡಬಳ್ಳಾಪುರ: ಜಿಲ್ಲೆಯಲ್ಲಿ ಪಶುಸಂಗೋಪನೆ ಇಲಾಖೆ ಹಾಗು ಮೀನುಗಾರಿಕೆ ಇಲಾಖೆಯ ಸಹಯೋಗದೊಂದಿಗೆ ಜಿಲ್ಲಾ ಮಾರ್ಗದರ್ಶಿ ಬ್ಯಾಂಕ್‌ ವ್ಯಾಪ್ತಿಗೆ ಒಳಪಡುವ ಎಲ್ಲಾ ಬ್ಯಾಂಕ್‌ಗಳು ಕಿಸಾನ್‌ ಕ್ರೆಡಿಟ್‌ ಕಾರ್ಡ್‌ ಯೋಜನೆಯಡಿ ಅರ್ಹ ರೈತರಿಗೆ ಆರ್ಥಿಕ ನೆರವು ಒದಗಿಸಲು ಅಭಿಯಾನವ ಹಮ್ಮಿಕೊಂಡಿದೆ. ಕೇಂದ್ರ ಸರಕಾರದ ಹಣಕಾಸು ಸಚಿವಾಲಯ, ಹಣಕಾಸು ಸೇವೆಗಳ ಇಲಾಖೆಯು ಹೈನುಗಾರಿಕೆ, ಕುರಿ-ಮೇಕೆ, ಹಂದಿ, ಕೋಳಿ ಸಾಕಾಣಿಕೆ ಹಾಗೂ ಮೀನುಗಾರಿಕೆ ಉಪ ಕಸುಬುಗಳನ್ನು ಕೈಗೊಳ್ಳಲು ಅವಶ್ಯಕತೆಯಿರುವ ಬಂಡವಾಳವನ್ನು ಕಿಸಾನ್‌ ಕ್ರೆಡಿಟ್‌ ಕಾರ್ಡ್‌ ಯೋಜನೆಯಡಿ ಅರ್ಹರಿಗೆ ಸಾಲ ಸೌಲಭ್ಯ ಕಲ್ಪಿಸಲು ಅಭಿಯಾನವನ್ನು ನ. 8ರಿಂದ ಮೂರು ತಿಂಗಳವರೆಗೆ ಆಯೋಜಿಸಲು ಎಲ್ಲಾ ಬ್ಯಾಂಕ್‌ಗಳಿಗೆ ನಿರ್ದೇಶಿಸಿದ್ದು, ಮೀನುಗಾರಿಕೆ ಇಲಾಖೆಗೆ 170 ಅರ್ಜಿಗಳು ಬಂದಿವೆ. ರೈತರು ಬಂಡವಾಳದ ನೆರವಿಗಾಗಿ ಈ ಯೋಜನೆಯನ್ನು ಬಳಸಿಕೊಳ್ಳಬಹುದಾಗಿದೆ. 2ಲಕ್ಷದವರೆಗೂ ಸಾಲ ಸೌಲಭ್ಯಕಿಸಾನ್‌ ಕ್ರೆಡಿಟ್‌ ಕಾರ್ಡ್‌ ಯೋಜನೆಯಡಿ 2 ಲಕ್ಷಗಳವರೆಗಿನ ಸಾಲದ ಮೊತ್ತಕ್ಕೆ ಶೇ. 2ರಷ್ಟು ಬಡ್ಡಿ ಸಹಾಯ ಧನ ಲಭ್ಯವಿರುತ್ತದೆ. ಅಲ್ಲದೇ ಸಕಾಲದಲ್ಲಿ ಈ ಸಾಲ ಮರುಪಾವತಿ ಮಾಡಿದವರಿಗೆ ವಾರ್ಷಿಕ ಶೇ. 3ರಷ್ಟು ಹೆಚ್ಚುವರಿ ಬಡ್ಡಿ ಸಹಾಯ ಧನದ ಸೌಲಭ್ಯವನ್ನು ಸಹ ಪಡೆಯಬಹುದಾಗಿದೆ. ಆಸಕ್ತ ರೈತರು ತಮ್ಮ ಹೈನುಗಾರಿಕೆ, ಮೀನುಗಾರಿಕೆ ಅನುಗುಣವಾಗಿ ಅವಶ್ಯಕತೆ ಬರುವ ಸಾಲ ಸೌಲಭ್ಯವನ್ನು ಪಡೆದುಕೊಳ್ಳಲು ಅವಕಾಶವಿರಲಿದೆ. ಹೈನುಗಾರಿಕೆ ಯೋಜನೆ ಬಲ ಸಾಲ ಯೋಜನೆಯಲ್ಲಿ ಮಿಶ್ರತಳಿ ಹಸು ಘಟಕದ ಬಂಡವಾಳಕ್ಕೆ 28 ಸಾವಿರ, ಸುಧಾರಿತ ತಳಿಗಳ ಎಮ್ಮೆ ಘಟಕಕ್ಕೆ 32 ಸಾವಿರ ನೀಡಲಾಗುತ್ತದೆ. ಕುರಿ ಮರಿಗಳ ಕೊಬ್ಬಿಸುವಿಕೆ ಘಟಕಕ್ಕೆ 10ಕುರಿಗಳ ಘಟಕಕ್ಕೆ 13 ಸಾವಿರ, 20 ಕುರಿ ಮರಿಗಳ ಘಟಕಕ್ಕೆ 26 ಸಾವಿರ ನೀಡಲಾಗುತ್ತದೆ. ಕೋಳಿ ಸಾಕಾಣಿಕೆಗೆ ಮಾಂಸ ಕೋಳಿ ಘಟಕದ 60 ದಿನಗಳವರೆಗೆ ಪ್ರತಿಕೋಳಿಗೆ 80ರೂ, ಮೊಟ್ಟೆ ಕೋಳಿ ಘಟಕ 20ವಾರದೊಳಗೆ ಪ್ರತಿ ಕೋಳಿಗೆ 180ರೂಪಾಯಿ ಸಿಗಲಿದೆ. ಹೈನುಗಾರಿಕೆ, ಮೀನುಗಾರಿಕೆಗೆ ಒಲವುಕೊರೊನಾ ನಂತರದಲ್ಲಿ ಬಹುತೇಕ ಕಡೆಗಳಲ್ಲಿ ಹೈನುಗಾರಿಕೆ ಹಾಗೂ ಮೀನುಗಾರಿಕೆ ಬಗ್ಗೆ ಒಲವು ಹೆಚ್ಚಿದೆ. ಈ ಬಾರಿ ಉತ್ತಮ ಮಳೆಯಾಗಿರುವುದರಿಂದ ಕೆರೆಗಳು ತುಂಬಿದೆ. ಹಾಗೂ ಹೈನುಗಾರಿಕೆ ಕಡೆಗೆ ವಿದ್ಯಾವಂತರು ಕೂಡ ಮುಖ ಮಾಡುತ್ತಿದ್ದಾರೆ. ಅವರಿಗೆ ಸಾಲ ಸೌಲಭ್ಯ ದೊರೆತರೆ ಅನುಕೂಲವಾಗಲಿದೆ. ಅರ್ಜಿ ಸಲ್ಲಿಕೆ ಹೇಗೆ? ಹೈನುಗಾರಿಕೆ, ಕುರಿ-ಮೇಕೆ ಹಂದಿ, ಕೋಳಿ ಸಾಕಾಣಿಕೆ ಹಾಗೂ ಮೀನುಗಾರಿಕೆ ಉಪ ಕಸುಬುಗಳಲ್ಲಿ ತೊಡಗಿಸಿಕೊಂಡಿರುವ ಜಿಲ್ಲೆಯಲ್ಲಿನ ರೈತರು ಅರ್ಜಿ ಸಲ್ಲಿಸಲು ಹಾಗೂ ಮಾಹಿತಿಗಾಗಿ ಆಯಾ ತಾಲೂಕಿನ ಸಹಾಯಕ ನಿರ್ದೇಶಕರು, ಪಶು ಸಮಗೋಪನೆ ಮತ್ತು ಮೀನುಗಾರಿಕೆ ಇಲಾಖೆಗಳಿಗೆ ಭೇಡಿ ನೀಡಿ, ಅಗತ್ಯವಾಗಿರುವ ದಾಖಲಾತಿಗಳನ್ನು ಸಲ್ಲಿಸಿ, ದುಡಿಮೆ ಬಂಡವಾಳಕ್ಕೆ ಆರ್ಥಿಕ ನೆರವು ಪಡೆಯಬಹುದಾಗಿದೆ. ಅಗತ್ಯ ದಾಖಲೆಗಳು

• ಬ್ಯಾಂಕ್ ಕೆಸಿಸಿ ಖಾತೆ ವಿವರ
• ಗುರುತಿನ ಚೀಟಿ
• ವಾಸ ಧೃಡೀಕರಣ ಪತ್ರ
• ಅರ್ಜಿದಾರರ ಭಾವಚಿತ್ರ
• ಮೀನುಗಾರಿಕೆ, ಪಶುಪಾಲನಾ ಚಟುವಟಿಕೆ ವಿವರ