ಮತ್ತೆ ಭಾರತ-ಚೀನಾ 'ಗಡಿಬಿಡಿ': ಲಡಾಕ್‌ನಲ್ಲಿ ಸೇನಾ ನಿಯೋಜನೆ ದೊಡ್ಡ ಪ್ರಮಾಣದಲ್ಲಿ ಹೆಚ್ಚಿಸಿದ ಡ್ರ್ಯಾಗನ್‌

ಹೊಸದಿಲ್ಲಿ: ಪೂರ್ವ ಲಡಾಕ್‌ನಲ್ಲಿ ಚೀನಾ ಸೇನಾ ಜಮಾವಣೆಯನ್ನು ಭಾರಿ ಪ್ರಮಾಣದಲ್ಲಿ ಹೆಚ್ಚಿಸುವ ಮೂಲಕ ಭಾರತದೊಂದಿಗೆ ಮತ್ತೊಮ್ಮೆ ಕ್ಯಾತೆ ತೆಗೆಯಲು ವೇದಿಕೆ ಸಿದ್ಧಪಡಿಸುತ್ತಿದೆ. ಅದರಲ್ಲೂ ಮುಂಚೂಣಿ ನೆಲೆಗಳಲ್ಲಿ ನೆರೆ ದೇಶದ ಸೈನಿಕರ ಸಂಖ್ಯೆ ಗಣನೀಯವಾಗಿ ಹೆಚ್ಚಿರುವುದು ಉಭಯ ದೇಶಗಳ ನಡುವೆ ಮತ್ತೊಂದು ಗಡಿ ಸಂಘರ್ಷದ ಆತಂಕಕ್ಕೆ ದಾರಿ ಮಾಡಿದೆ. ಗಡಿಯಲ್ಲಿ ಭದ್ರತೆ ಪರಿಶೀಲನೆಗೆ ಲಡಾಕ್‌ಗೆ ಭೇಟಿ ನೀಡಿದ ಭೂಸೇನಾ ಮುಖ್ಯಸ್ಥ ಜನರಲ್‌ ಎಂ.ಎಂ. ನರಾವಣೆ ಅವರೇ ಸ್ವತಃ ಚೀನಾದ ಸೇನಾ ಜಮಾವಣೆ ಹೆಚ್ಚಳ ಬೆಳವಣಿಗೆ ಬಗ್ಗೆ ಕಳವಳ ವ್ಯಕ್ತಪಡಿಸಿದ್ದಾರೆ. ಕಳೆದ ವರ್ಷ ಜೂನ್‌ನಲ್ಲಿ ಪೂರ್ವ ಲಡಾಕ್‌ನ ಗಲ್ವಾನ್‌ ಕಣಿವೆಯಲ್ಲಿ ನಡೆದ ಸಂಘರ್ಷದ ಬಳಿಕ ಉಭಯ ದೇಶಗಳು ಸೇನೆ ಹಿಂತೆಗೆತಕ್ಕೆ ಹಲವು ಸುತ್ತಿನ ಸಭೆಗಳಲ್ಲಿ ಸಮ್ಮತಿ ಸೂಚಿಸಿದ್ದರೂ ಚೀನಾ ಮತ್ತೆ ಮಾತು ತಪ್ಪುವ ಮೂಲಕ ಹಳೆ ಚಾಳಿ ಮುಂದುವರಿಸಿದೆ. ''ಪೂರ್ವ ಲಡಾಕ್‌ ಮತ್ತು ಉತ್ತರ ಭಾಗದಲ್ಲಿ ಬಹುತೇಕ ಪೂರ್ವ ಕಮಾಂಡ್‌ವರೆಗೆ ಚೀನಾದ ಸೈನಿಕ ನಿಯೋಜನೆ ಗಣನೀಯವಾಗಿ ಹೆಚ್ಚಿದೆ. ಅದರಲ್ಲೂ ಮುಂಚೂಣಿ ನೆಲೆಗಳಲ್ಲಿ ಸೇನೆಯ ಹೆಚ್ಚಳವು ಗಂಭೀರ ವಿಚಾರ,'' ಎಂದು ಅವರು ಹೇಳಿದ್ದಾರೆ. ಭಾರತದ ವಿರುದ್ಧ ಷಡ್ಯಂತ್ರ ರೂಪಿಸಲು ಪಾಕ್‌ ಜತೆ ಚೀನಾ ಕೈಜೋಡಿಸಿದ್ದು, ಚೀನಾದ ಸೇನೆಯಲ್ಲಿ ಪಾಕಿಸ್ತಾನದ ಲೆಫ್ಟಿನೆಂಟ್‌ ಕರ್ನಲ್‌ಗಳನ್ನು ನೇಮಿಸಿಕೊಳ್ಳಲಾಗಿದೆ ಎಂದು ಗುಪ್ತಚರ ಮೂಲಗಳು ತಿಳಿಸಿವೆ. ಅದರಲ್ಲೂ ಭಾರತ - ಚೀನಾ ಗಡಿ ಕಾವಲಿಗೆ ನಿಯೋಜನೆಗೊಂಡಿರುವ 'ವೆಸ್ಟರ್ನ್‌ ಥಿಯೇಟರ್‌ ಕಮಾಂಡ್‌'ಗೆ ಈ ಅಧಿಕಾರಿಗಳನ್ನು ನೇಮಿಸಿರುವುದು ಭಾರತದ ಕಳವಳಕ್ಕೆ ಕಾರಣವಾಗಿದೆ. ಮುಂಚೂಣಿ ನೆಲೆಗಳಿಗೆ ಭೇಟಿ ಚೀನಾ ಜತೆ ಗಡಿ ಸಂಘರ್ಷ ಹಾಗೂ ಪಾಕ್‌ - ಚೀನಾ ನಡುವಿನ ಜಂಟಿ ಷಡ್ಯಂತ್ರಗಳ ಆತಂಕದ ಹಿನ್ನೆಲೆಯಲ್ಲಿ ಭೂಸೇನಾ ಮುಖ್ಯಸ್ಥ ನರಾವಣೆ ಅವರು ಎರಡು ದಿನಗಳ ಲಡಾಕ್‌ ಭೇಟಿ ಕೈಗೊಂಡು, ಗಡಿಯಲ್ಲಿ ಭದ್ರತೆ ಪರಿಶೀಲನೆ ನಡೆಸಿದರು. ಇದರ ಭಾಗವಾಗಿ ಶುಕ್ರವಾರ ಮತ್ತು ಶನಿವಾರ ಪೂರ್ವ ಲಡಾಕ್‌ನ ಮುಂಚೂಣಿ ನೆಲೆಗಳಿಗೆ ಅವರು ಭೇಟಿ ನೀಡಿ, ಸೇನಾ ಪಡೆಗಳ ಸನ್ನದ್ಧತೆ ಪರಿಶೀಲಿಸಿದರು. ಮುಖ್ಯವಾಗಿ ಆಯಕಟ್ಟಿನ ಸ್ಥಳವಾಗಿರುವ 'ರೆಜಾಂಗ್‌ ಲಾ' ಪ್ರದೇಶದಲ್ಲಿ ಪರಿಶೀಲನೆ ಕೈಗೊಂಡರು. ಬಳಿಕ ಲಡಾಕ್‌ ಭಾಗದಲ್ಲಿ ಚೀನಾ-ಭಾರತ ಗಡಿಯ (ಎಲ್‌ಎಸಿ) ಕಾವಲಿನ ಹೊಣೆ ಹೊತ್ತಿರುವ '14 ಕಾರ್ಫ್ಸ್‌' ಪಡೆಯ ಮುಖ್ಯ ಕಚೇರಿಯಲ್ಲಿ ಸಭೆ ನಡೆಸಿದರು. ಈ ಪ್ರದೇಶದಲ್ಲಿನ ಸಮಗ್ರ ಪರಿಸ್ಥಿತಿಯ ಬಗ್ಗೆ ಅಧಿಕಾರಿಗಳು ನರಾವಣೆಗೆ ಮಾಹಿತಿ ನೀಡಿದರು. ಲಡಾಕ್‌ ಲೆಫ್ಟಿನೆಂಟ್‌ ಗವರ್ನರ್‌ ರಾಧಾ ಕೃಷ್ಣ ಮಾಥೂರ್‌ ಅವರನ್ನೂ ಭೇಟಿ ಮಾಡಿ, ಲಡಾಕ್‌ ಭಾಗದಲ್ಲಿನ ಭದ್ರತೆ ಕುರಿತು ಚರ್ಚಿಸಿದರು. ಆತಂಕ ಹೆಚ್ಚಿಸಿದ ಆಕ್ರಮಣಕಾರಿ ನಡೆ ಲಡಾಕ್‌ ಪ್ರಾಂತ್ಯದ ಹಲವು ಅತ್ಯಂತ ಕಡಿದಾದ ಮತ್ತು ಎತ್ತರದ ಪ್ರದೇಶದಲ್ಲಿ, ಚೀನಾ ತನ್ನ ಬದಿಯ ವಾಸ್ತವಿಕ ಗಡಿ ರೇಖೆಯುದ್ದಕ್ಕೂ ಸೇನೆ ಜಮಾವಣೆ ಹೆಚ್ಚಿಸುವ ಜತೆಗೆ ಹಲವು ಬಿಡಾರಗಳನ್ನು ಸ್ಥಾಪಿಸಿದೆ. ತಶಿಗೊಂಗ್‌, ಮಾಂಜಾ, ಹಾಟ್‌ ಸ್ಟ್ರಿಂಗ್‌ ಮತ್ತು ಚುರುಪ್‌ ಪ್ರದೇಶಗಳಲ್ಲಿ ಚೀನಾದ ಈ ಆಕ್ರಮಣಕಾರಿ ನಡೆಯುವ ಗಡಿಯಲ್ಲಿ ಮತ್ತೆ ಆತಂಕ ಹೆಚ್ಚಿಸಿದೆ. ದಿಟ್ಟ ಉತ್ತರದಿಂದ ಕಂಗಾಲು ಗಲ್ವಾನ್‌ ಕಣಿವೆಯಲ್ಲಿ ಚೀನಾದ ದುರಾಕ್ರಮಣಕ್ಕೆ ಭಾರತ ದಿಟ್ಟ ಉತ್ತರ ನೀಡಿದ ಬಳಿಕ ಅದರ ಬಿಸಿ ನೆರೆ ದೇಶದ ಸೇನೆಯ (ಪಿಎಲ್‌ಎ) ಮೇಲೆ ತಟ್ಟಿತ್ತು. ಈ ಘಟನೆ ಬಳಿಕ ಚೀನಾ ಸರಕಾರದ ಒತ್ತಡದ ಹಿನ್ನೆಲೆಯಲ್ಲಿ ಗಡಿಯಲ್ಲಿ ಮೂಲಸೌಕರ್ಯ ಹೆಚ್ಚಳಕ್ಕೆ ಪಿಎಲ್‌ಎ ಮುಂದಾಗಿದೆ. ಈ ಹಿಂದೆ ಎಂದೂ ಸೇನೆ ನಿಯೋಜನೆ ಮಾಡದ ಕಡೆಗಳಲ್ಲೂ ಈಗ ಸೇನೆ ನಿಯೋಜಿಸಿದೆ ಎಂದು ಮೂಲಗಳು ತಿಳಿಸಿವೆ. ಸದ್ಯದಲ್ಲೇ ಮತ್ತೆ ಮಾತುಕತೆ ವಾಸ್ತವಿಕ ಗಡಿ ರೇಖೆಯಿಂದ ಉಭಯ ದೇಶಗಳ ಸೇನೆ ಹಿಂತೆಗೆತದ ಬಗ್ಗೆ ಚರ್ಚಿಸಲು ಈ ತಿಂಗಳ ಮಧ್ಯಾವಧಿಯಲ್ಲಿ ಭಾರತ-ಚೀನಾ ಸೇನಾಧಿಕಾರಿಗಳ ನಡುವೆ 13ನೇ ಸುತ್ತಿನ ಮಾತುಕತೆ ನಡೆಯಲಿದೆ. ಈ ಸಂದರ್ಭ ಸೇನೆ ಜಮಾವಣೆ ಬಗ್ಗೆ ಭಾರತ ಆಕ್ಷೇಪಿಸಲಿದೆ ಎಂದು ನರಾವಣೆ ತಿಳಿಸಿದ್ದಾರೆ. ವಿಶ್ವದಲ್ಲೇ ಅತಿದೊಡ್ಡ ಖಾದಿ ತಿರಂಗ ಗಾಂಧೀಜಿ ಅವರ 152ನೇ ಜನ್ಮದಿನದ ಅಂಗವಾಗಿ ಅ.2ರಂದು ಮಹಾತ್ಮ ಲಡಾಕ್‌ನಲ್ಲಿ ವಿಶ್ವದಲ್ಲೇ ಖಾದಿಯಿಂದ ತಯಾರಿಸಿದ ಅತಿ ದೊಡ್ಡ ತಿರಂಗವನ್ನು ಹಾರಿಸಲಾಯಿತು. ಈ ವಿಶೇಷ ಕ್ಷಣಕ್ಕೆ ನರಾವಣೆ ಸಾಕ್ಷಿಯಾದರು. 225 ಅಡಿ ಉದ್ದ, 150 ಅಡಿ ಅಗಲ ಮತ್ತು 1,000 ಕೆ.ಜಿ. ತೂಕದ ಈ ತಿರಂಗ ವಿಶ್ವದಲ್ಲೇ ಅತಿದೊಡ್ಡದೆಂದು ಹೇಳಲಾಗಿದೆ.