ಬೆಲೆ ಕಳೆದುಕೊಂಡ ಬಾಳೆ! ರೈತರಿಗೆ ಬೆಲೆ ಕುಸಿತದ ಭೀತಿ; ಮಾರುಕಟ್ಟೆಯಲ್ಲಿ ಯಥಾಸ್ಥಿತಿ

ಬೇವೂರ: ಅಕಾಲಿಕ ಮಳೆಯಿಂದ ಒಂದೆಡೆ ಬೆಳೆಗಳು ಹಾಳಾಗಿದ್ದರೆ. ಇನ್ನೊಂದೆಡೆ ಬಾಳೆ ಬೆಳೆದ ರೈತರು ಬೆಲೆ ಕುಸಿತದಿಂದ ಕಂಗಾಲಾಗಿದ್ದಾರೆ. ಸಮೀಪದ ಹಳ್ಳೂರ, ಸುತಗುಂಡಾರ, ನಾಯನೇಗಲಿ, ಬೋಡನಾಯಕದಿನ್ನಿ, ಬೇವೂರ, ಚವಡಾಪೂರ ಭಾಗದಲ್ಲಿ ರೈತರು ಬಾಳೆ ಬೆಳೆಯುತ್ತಿದ್ದಾರೆ. ರೈತರು ಕಬ್ಬು ಬದಲಿಗೆ ಪರ್ಯಾಯ ಬೆಳೆಯಾಗಿ ಬಾಳೆಯತ್ತ ಹೆಜ್ಜೆ ಹಾಕಿದ್ದಾರೆ. ಅಕಾಲಿಕ ಮಳೆ ಪರಿಣಾಮ ಬಾಳೆ ಬೆಳೆ ದರ ಪಾತಾಳಕ್ಕೆ ಇಳಿದಿದೆ. ದಸರಾ ಹಾಗೂ ದೀಪಾವಳಿ ಮತ್ತು ಗಣೇಶ ಹಬ್ಬದ ಸಂದರ್ಭದಲ್ಲಿ ಬಾಳೆ ಗೊನೆಗಳಿಗೆ ಭಾರಿ ಡಿಮ್ಯಾಂಡ್‌ ಇತ್ತು. ಆಗ ಉತ್ತಮ ಬೆಲೆಗೆ ಮಾರಾಟವಾಗಿ ಬಾಳೆ ಬೆಳೆದ ರೈತರ ಮೊಗದಲ್ಲಿ ಸಂತಸ ತಂದಿತ್ತು. ಆದರೆ ಕಳೆದ ವಾರದಿಂದ ಮಾರುಕಟ್ಟೆಯಲ್ಲಿ ತೀವ್ರ ಕುಸಿದಿದೆ. ಸುಗಂದಿ ಬಾಳೆ ಕೆಜಿಗೆ 20 ರೂ, ಹಸಿರು ಬಾಳೆ ಕೆಜಿಗೆ 15 ರೂ., ಯಾಲಕ್ಕಿ ಬಾಳೆ 10 ರಿಂದ 15 ರೂ., ಉಳಿದ ಸಣ್ಣಪುಟ್ಟ ಬಾಳೆ, ಗೊನೆಗಳನ್ನು ಕೇಳುವವರೇ ಇಲ್ಲದಾಗಿದೆ. ಈಗಾಗಲೇ ಸಾವಿರಾರು ಎಕರೆ ಪ್ರದೇಶದಲ್ಲಿ ಬೆಳೆದು ನಿಂತಿರುವ ಬಾಳೆ ಬೆಳೆ ಕಟಾವಿಗೆ ಬಂದಿದೆ. ಈ ಹೊತ್ತಿನಲ್ಲೇ ಬೆಲೆ ಕುಸಿದಿದೆ. ಆದರೆ ಚಿಲ್ಲರೆ ಮಾರುಕಟ್ಟೆಯಲ್ಲಿ ಮಾತ್ರ ಹಸಿರು ಬಾಳೆಯನ್ನು ಡಜನ್‌ಗೆ 30 ರೂ ದಿಂದ 40 ರೂವರೆಗೆ ಮಾರಾಟ ಮಾಡಲಾಗುತ್ತಿದೆ. ಸುಗಂಧಿ ಮತ್ತು ಸಕ್ಕರೆ ಬಾಳೆ ಕೂಡ ಚಿಲ್ಲರೆ ಮಾರುಕಟ್ಟೆಯಲ್ಲಿ ಬೆಳೆ ಇಳಿದಿಲ್ಲ. ರೈತರಿಗೆ ಮಾತ್ರ ಉತ್ತಮ ದರ ದೊರೆಯದಾಗಿದೆ. ಬಾಳೆ ಬೆಳೆದ ರೈತ ಸದ್ಯದ ಸ್ಥಿತಿಯಲ್ಲಿ ಇಂಗು ತಿಂದ ಮಂಗನಂತಾಗಿದ್ದು, ಕೂಡಲೇ ಸರ್ಕಾರ ರೈತರ ಸಮಸ್ಯೆಯತ್ತ ಗಮನ ಹರಿಸಿ ರೈತರ ನೆರವಿಗೆ ಧಾವಿಸಬೇಕೆಂದು ಬಾಳೆ ಬೆಳೆದ ರೈತರು ಒತ್ತಾಯಿಸಿದ್ದಾರೆ. ಬಾಳೆ ಬೆಎಯ ದರ ದಿಢೀರ್‌ ಕುಸಿದಿದೆ. ಕಳೆದ ವಾರ ಸುಗಂಧಿ ಬಾಳೆ ಕೆಜಿಗೆ 48 ರೂ.ಗಳಂತೆ ಮಾರಾಟ ಮಾಡಲಾಗಿತ್ತು. ಈಗ 10 ರೂ. ಆಗಿದೆ. ಬೆಳೆಗಾರರು ಕೈಸುಟ್ಟುಕೊಳ್ಳುವಂತೆ ಆಗಿದೆ ಎನ್ನುತ್ತಾರೆ ಹೊಸೂರ್‌ನ ರೈತ ಜೆಟ್ಟೆಪ್ಪ ಮಾದಾಪೂರ. ಇನ್ನು ರೈತರಾಗಿರುವ ಮುತ್ತು ಗೌಡರ ಅವರು ‘ಒಂದು ಎಕರೆ ಬಾಳೆ ಬೆಳೆಯಲು 1 ಲಕ್ಷಕ್ಕಿಂತ ಹೆಚ್ಚು ಖರ್ಚು ಬರುತ್ತದೆ. ಈ ರೀತಿ ಬೆಲೆ ಕುಸಿದರೆ ಮಾಡಿದ ಸಾಲ ತೀರಿಸಲು ಆಗುವುದಿಲ್ಲ. ಸರಕಾರ ರೈತರ ಬಗ್ಗೆ ಗಮನ ಹರಿಸಬೇಕು’ ಎಂದು ಮನವಿ ಮಾಡಿದ್ದಾರೆ.