ಬಿಪಿನ್ ರಾವತ್ ಅವರಿದ್ದ ಹೆಲಿಕಾಪ್ಟರ್ ದುರಂತ: ಎಲ್ಲ ಸೈನಿಕರ ಶವದ ಗುರುತು ಪತ್ತೆ

: ತಮಿಳುನಾಡಿನ ಕೂನೂರು ಅರಣ್ಯ ಪ್ರದೇಶದಲ್ಲಿ ಭಾರತೀಯ ವಾಯುಪಡೆಯ ಎಂಐ-17 ವಿ5 ಹೆಲಿಕಾಪ್ಟರ್‌ ಪತನದಿಂದಾಗಿ ಮೃತಪಟ್ಟ ಎಲ್ಲ ಯೋಧರ ಶವ ಗುರುತು ಪತ್ತೆ ಹಚ್ಚಲಾಗಿದೆ. ಇದಕ್ಕೂ ಮೊದಲು ಸಶಸ್ತ್ರ ಪಡೆಗಳ ಮುಖ್ಯಸ್ಥರಾಗಿದ್ದ ಜನರಲ್‌ ಬಿಪಿನ್‌ ರಾವತ್‌, ಅವರ ಪತ್ನಿ ಮಧುಲಿಕಾ ಹಾಗೂ ಬ್ರಿಗೇಡಿಯರ್‌ ಎಲ್‌. ಎಸ್‌. ಲಿಡ್ಡೆರ್‌ ಅವರ ಶವ ಗುರುತಿಸಲಾಗಿತ್ತು. ಈಗ ಉಳಿದ ಎಲ್ಲ 10 ಸೈನಿಕರ ಶವ ಗುರುತಿಸಲಾಗಿದೆ. ದುರಂತದಲ್ಲಿ ಯೋಧರ ದೇಹ ಸುಟ್ಟು ಕರಕಲಾಗಿದ್ದ ಕಾರಣ ಕುಟುಂಬಸ್ಥರ ಪಡೆದು ಗುರುತು ಪತ್ತೆ ಹಚ್ಚಲಾಗಿದೆ. ಯೋಧರ ಶವಗಳನ್ನು ಅವರ ಕುಟುಂಬಕ್ಕೆ ಹಸ್ತಾಂತರ ಮಾಡಲಾಗಿದೆ. ಸಕಲ ಸೇನಾ ಗೌರವಗಳೊಂದಿಗೆ ಭಾನುವಾರ ಅವರ ಅಂತ್ಯಸಂಸ್ಕಾರ ನೆರವೇರಿಸಲಾಗಿದೆ. ಸ್ಕ್ವಾಡ್ರನ್‌ ಲೀಡರ್‌ ಕುಲದೀಪ್‌ ದಿಂಗ್‌, ಜೂನಿಯರ್‌ ವಾರಂಟ್‌ ಆಫಿಸರ್‌ಗಳಾದ ರಾಣಾ ಪ್ರತಾಪ್‌ ದಾಸ್‌, ಅರಕ್ಕಳ್‌ ಪ್ರದೀಪ್‌, ಲಾನ್ಸ್‌ ನಾಯಕ್‌ಗಳಾದ ಬಿ. ಸಾಯಿ ತೇಜ, ವಿವೇಕ್‌ ಕುಮಾರ್‌, ಲೆಫ್ಟಿನೆಂಟ್‌ ಕರ್ನಲ್‌ ಹರ್ಜಿಂದರ್‌ ಸಿಂಗ್‌, ಹವಾಲ್ದಾರ್‌ ಸತ್ಪಾಲ್‌ ರೈ ಹಾಗೂ ನಾಯಕ್‌ಗಳಾದ ಗುರುಸೇವಕ್‌ ಸಿಂಗ್‌ ಹಾಗೂ ಜಿತೇಂದ್ರ ಕುಮಾರ್‌ ಅವರ ಶವ ಗುರುತಿಸಲಾಗಿದೆ. ಕೂನೂರು ಅರಣ್ಯದಲ್ಲಿ ಡಿಸೆಂಬರ್‌ 8ರಂದು ವಾಯುಪಡೆ ಹೆಲಿಕಾಪ್ಟರ್‌ ಪತನಗೊಂಡು ಬಿಪಿನ್‌ ರಾವತ್‌ ಸೇರಿ 13 ಜನ ಮೃತಪಟ್ಟಿದ್ದರು. ಅದೃಷ್ಟವಶಾತ್‌ ಬದುಕುಳಿದ ಗ್ರೂಪ್‌ ಕ್ಯಾಪ್ಟನ್‌ ವರುಣ್‌ ಸಿಂಗ್‌ ಅವರಿಗೆ ಬೆಂಗಳೂರಿನ ಸೇನಾ ಆಸ್ಪತ್ರೆಯಲ್ಲಿ ಚಿಕಿತ್ಸೆ ನೀಡಲಾಗುತ್ತಿದೆ. ಸಾವಿನ ಮುನ್ನಾ ದಿನ ಸೈನಿಕರ ಬಗ್ಗೆ ಹೆಮ್ಮೆ ವ್ಯಕ್ತಪಡಿಸಿದ ಬಿಪಿನ್‌ ರಾವತ್‌ ಬಿಪಿನ್‌ ರಾವತ್‌ ಅವರು ಹೆಲಿಕಾಪ್ಟರ್‌ ದುರಂತದಲ್ಲಿ ಮೃತಪಡುವ ಒಂದು ದಿನ ಮುಂಚೆ ಅಂದರೆ, ಡಿಸೆಂಬರ್ 7ರಂದು ಸೈನಿಕರ ಬಗ್ಗೆ ಮಾತನಾಡಿದ್ದ 1.09 ನಿಮಿಷದ ವಿಡಿಯೊವನ್ನು ಸೇನೆಯು ಭಾನುವಾರ ಬಿಡುಗಡೆಗೊಳಿಸಿದೆ. 'ನಮ್ಮ ಸೈನಿಕರ ಬಗ್ಗೆ ನಮಗೆ ಹೆಮ್ಮೆಯಿದೆ. ಎಲ್ಲರೂ ಸೇರಿ 1971ರ ಯುದ್ಧದ ವಿಜಯೋತ್ಸವ ಆಚರಿಸೋಣ' ಎಂದು ಅವರು ಕೊನೆಯದಾಗಿ ಹೇಳಿದ್ದರು. ಪಾಕಿಸ್ತಾನ ವಿರುದ್ಧ 1971ರಲ್ಲಿ ನಡೆದ ಯುದ್ಧದ ವಿಜಯಕ್ಕೆ 50 ವರ್ಷ ತುಂಬಿದ ಹಿನ್ನೆಲೆಯಲ್ಲಿ ಹುತಾತ್ಮ ಯೋಧರಿಗೆ ಗೌರವ ಸಲ್ಲಿಸಿದ ಬಳಿಕ ಮಾತನಾಡಿದ್ದ ಅವರು, 'ಯುದ್ಧದ ವಿಜಯ ಸ್ಮರಣಾರ್ಥ ಡಿಸೆಂಬರ್ 12 ಹಾಗೂ 14ರಂದು 'ವಿಜಯ ಪರ್ವ' ಆಯೋಜಿಸುತ್ತಿರುವುದು ಸಂತಸದ ವಿಷಯ. ಯುದ್ಧದ ವೇಳೆ ಮಡಿದ ಯೋಧರಿಗೆ ನಾನು ನಮನ ಸಲ್ಲಿಸುತ್ತೇನೆ. ಹಾಗೆಯೇ, ಯುದ್ಧದಲ್ಲಿ ನಮ್ಮ ಯೋಧರು ತೋರಿದ ಶೌರ್ಯದ ಬಗ್ಗೆ ಗರ್ವವಿದೆ' ಎಂದು ಹೇಳಿದ್ದರು. ಯೋಧನ ಪತ್ನಿ ಮದುವಣಿಗಿತ್ತಿಯ ಉಡುಗೆ ತೊಟ್ಟು ಅಂತ್ಯಕ್ರಿಯೆಯಲ್ಲಿ ಭಾಗಿ ಶಿಮ್ಲಾ: ತಮಿಳುನಾಡಿನಲ್ಲಿ ಸಂಭವಿಸಿದ ಸೇನಾ ಹೆಲಿಕಾಪ್ಟರ್‌ ದುರಂತದಲ್ಲಿ ಮೃತಪಟ್ಟ ಲ್ಯಾನ್ಸ್‌ ನಾಯಕ ವಿವೇಕ ಕುಮಾರ್‌ ಅಂತ್ಯಕ್ರಿಯೆ ಹಿಮಾಚಲ ಪ್ರದೇಶದ ಕಂಗ್ರಾ ಜಿಲ್ಲೆಯ ಲಂಬಗಾಂವ್‌ ಪಟ್ಟಣದಲ್ಲಿ ಸರಕಾರಿ ಹಾಗೂ ಸೇನಾ ಗೌರವಗಳೊಂದಿಗೆ ನಡೆಯಿತು. ಮದುವಣಿಗಿತ್ತಿ ಉಡುಗೆಯಲ್ಲಿದ್ದ ವಿವೇಕ ಕುಮಾರ್‌ ಅವರ ಪತ್ನಿ ಪ್ರಿಯಾಂಕಾ ಮೂರು ಬಾರಿ 'ಮೇರಾ ಫೌಜಿ ಅಮರ್‌ ರಹೇ' (ನನ್ನ ಯೋಧನೇ, ಚಿರಾಯುವಾಗಿರು) ಎಂದು ಹೇಳಿದ್ದು ಅಲ್ಲಿದ್ದವರ ಕಣ್ಣಿಂಚಿನಲ್ಲಿ ನೀರು ಜಿನುಗುವಂತೆ ಮಾಡಿತು. ಇದಕ್ಕೂ ಮೊದಲು, ಹಿಮಾಚಲ ಪ್ರದೇಶದ ಮುಖ್ಯಮಂತ್ರಿ ಜೈ ರಾಮ್‌ ಠಾಕೂರ್‌ ಅವರು ವಿವೇಕ್‌ಕುಮಾರ್‌ ಅವರ ಪಾರ್ಥಿವ ಶರೀರವನ್ನು ಗಗ್ಗಲ್‌ ಏರ್‌ಪೋರ್ಟ್‌ನಲ್ಲಿ ಬರ ಮಾಡಿಕೊಂಡು, ಶವಪೆಟ್ಟಿಗೆ ಮೇಲೆ ಪುಷ್ಪಾರ್ಚನೆ ಮಾಡಿ ನಮನ ಸಲ್ಲಿಸಿದರು. ಗಗ್ಗಲ್‌ ವಿಮಾನ ನಿಲ್ದಾಣದಿಂದ ಲಂಬಗಾಂವ್‌ದ ಕುಂಜೇಶ್ವರ ಮಹಾದೇವ ಸ್ಮಶಾನದವರೆಗೂ ವಿವೇಕ ಪಾರ್ಥಿವ ಶರೀರರವನ್ನು ಮೆರವಣಿಗೆಯಲ್ಲಿ ತರಲಾಯಿತು. ನಂತರ ಸಕಲ ಸರಕಾರಿ ಹಾಗೂ ಸೇನಾ ಗೌರವದೊಂದಿಗೆ ಅಂತ್ಯಕ್ರಿಯೆ ನಡೆಸಲಾಯಿತು. ಗಂಡನ ಬಗ್ಗೆ ಹೆಮ್ಮೆ: 'ನನ್ನ ಗಂಡನ ಬಗ್ಗೆ ಹೆಮ್ಮೆ ಇದೆ. ನಮ್ಮ ಆರು ತಿಂಗಳ ಮಗುವಿನ ಬಗ್ಗೆ ಸಾಕಷ್ಟು ಕನಸು ಕಂಡಿದ್ದರು. ಅವರ ಆ ಎಲ್ಲ ಕನಸುಗಳನ್ನು ನಾನು ನನಸು ಮಾಡುತ್ತೇನೆ' ಎಂದು ವಿವೇಕ ಕುಮಾರ್‌ ಪತ್ನಿ ಪ್ರಿಯಾಂಕಾ ಅವರು ದುಃಖದಲ್ಲಿ ಹೇಳಿದರು. ಕುಟುಂಬದ ಸದಸ್ಯರಿಗೆ ಉದ್ಯೋಗ ಕೊಡಿಸುವಂತೆ ಇದೇ ವೇಳೆ, ವಿವೇಕ ಕುಟಂಬ ಸದಸ್ಯರು ಮುಖ್ಯಮಂತ್ರಿಯವರಿಗೆ ಮನವಿ ಮಾಡಿಕೊಂಡರು.