ಬೆಂಗಳೂರಿನಲ್ಲಿ 35 ದಿನಗಳಲ್ಲಿ 8 ಮರ್ಡರ್..! ಗುಂಡೇಟಿಗೂ ಹೆದರದ ಆರೋಪಿಗಳು..!
ಪೊಲೀಸರು ಆರೋಪಿಗಳ ಕಾಲಿಗೆ ಗುಂಡು ಹೊಡೆದು ಬಂಧಿಸುತ್ತಿದ್ದರೂ, ಇದಕ್ಕೆ ಜಗ್ಗದೆ ಅಪರಾಧ ಪ್ರಕರಣಗಳ ಸಂಖ್ಯೆ ದಿನೇ ದಿನೇ ಹೆಚ್ಚುತ್ತಲೇ ಇವೆ. ಇದರ ಮಧ್ಯೆ ಬುಧವಾರ ನಗರದ ಎರಡು ಕಡೆಗಳಲ್ಲಿ ರೌಡಿ ಶೀಟರ್‌ ಸೇರಿ ಇಬ್ಬರನ್ನು ಜನ ಸಂದಣಿ ನಡುವೆಯೇ ಬರ್ಬರವಾಗಿ ಹತ್ಯೆ ಮಾಡಲಾಗಿದೆ.
Admin
0
6
ರವಿಕುಮಾರ್‌ ಬೆಟ್ಟದಪುರ : ನಗರದಲ್ಲಿ ಸರಣಿ ಕೊಲೆಗಳು ಮುಂದುವರೆದಿದ್ದು, ಕಳೆದ 35 ದಿನಗಳಲ್ಲಿ ಎಂಟು ಕೊಲೆಗಳು ನಡೆದಿವೆ. ಈ ಬೆಳವಣಿಗೆ ರಾಜಧಾನಿಯಲ್ಲಿ ಭೀತಿಯ ವಾತಾವರಣ ಸೃಷ್ಟಿಸಿದೆ.
ಕೊರೊನಾ 2ನೇ ಲಾಕ್‌ಡೌನ್‌ ತೆರವಾದ ಬಳಿಕ ಕೃತ್ಯಗಳು ನಗರದಲ್ಲಿ ಹೆಚ್ಚಿವೆ. ಕಳ್ಳತನ, ಸುಲಿಗೆ, ದರೋಡೆ ಮಧ್ಯೆ ನಿರಂತರವಾಗಿ ಬರ್ಬರ ಹತ್ಯೆಗಳು ನಡೆಯುತ್ತಿವೆ. ಪೊಲೀಸರು ಆರೋಪಿಗಳ ಕಾಲಿಗೆ ಗುಂಡು ಹೊಡೆದು ಬಂಧಿಸುತ್ತಿದ್ದರೂ, ಇದಕ್ಕೆ ಜಗ್ಗದೆ ಅಪರಾಧ ಪ್ರಕರಣಗಳ ಸಂಖ್ಯೆ ದಿನೇ ದಿನೇ ಹೆಚ್ಚುತ್ತಲೇ ಇವೆ. ಇದರ ಮಧ್ಯೆ ಬುಧವಾರ ನಗರದ ಎರಡು ಕಡೆಗಳಲ್ಲಿ ರೌಡಿ ಶೀಟರ್‌ ಸೇರಿ ಇಬ್ಬರನ್ನು ಜನ ಸಂದಣಿ ನಡುವೆಯೇ ಬರ್ಬರವಾಗಿ ಮಾಡಿರುವುದು ಜನರ ಭೀತಿ ಇನ್ನಷ್ಟು ಹೆಚ್ಚಿಸಿದೆ.
ನಗರದಲ್ಲಿ ಬುಧವಾರ ಬಾಣಸವಾಡಿ ಪೊಲೀಸ್‌ ಠಾಣೆ ಸಮೀಪವೇ ರೌಡಿ ಶೀಟರ್‌ ಹರೀಶ್‌ನನ್ನು ಬರ್ಬರವಾಗಿ ಹತ್ಯೆ ಮಾಡಲಾಗಿದೆ. ಮತ್ತೊಂದು ಪ್ರಕರಣದಲ್ಲಿ ಜಯನಗರ ಪೊಲೀಸ್‌ ಠಾಣೆ ವ್ಯಾಪ್ತಿಯಲ್ಲಿ ಆಟೋ ಚಾಲಕನನ್ನು ಮಾಡಲಾಗಿದೆ.
ಏರಿಯಾ ಬದಲಿಸಿದರೂ ಬಿಡಲಿಲ್ಲ: ಬಸವೇಶ್ವರನಗರ ನಿವಾಸಿಯಾಗಿರುವ ರೌಡಿ ಶೀಟರ್‌ ಹರೀಶ್‌ (35) ಕೊಲೆ ಸಂಬಂಧ ಮೂವರು ಆರೋಪಿಗಳನ್ನು ಪೊಲೀಸರು ವಶಕ್ಕೆ ಪಡೆದಿದ್ದಾರೆ. ಕೆ.ಜಿ.ಹಳ್ಳಿ, ಜಾಲಹಳ್ಳಿ, ಬಾಣಸವಾಡಿ ಠಾಣೆಯ ರೌಡಿಶೀಟರ್‌ ಆಗಿರುವ ಹರೀಶ್‌, ಈ ಹಿಂದೆ ಹಲವಾರು ಅಪರಾಧ ಪ್ರಕರಣಗಳಲ್ಲಿ ಭಾಗಿಯಾಗಿದ್ದ. 2018ರ ಬಳಿಕ ಆರೋಪಿ ವಿರುದ್ಧ ಯಾವುದೇ ಪ್ರಕರಣಗಳು ದಾಖಲಾಗಿರಲಿಲ್ಲ. 2020ರಿಂದ ಬಸವೇಶ್ವರ ನಗರದಲ್ಲಿ ವಾಸವಾಗಿದ್ದು, ಜೀವನ ನಿರ್ವಹಣೆಗಾಗಿ ಸಣ್ಣ-ಪುಟ್ಟ ಕೆಲಸ ಮಾಡಿಕೊಂಡಿದ್ದ.
ಈ ಮಧ್ಯೆ 2021ರ ಏಪ್ರಿಲ್‌ನಲ್ಲಿ ಈತನ ವಿರುದ್ಧ ದರೋಡೆ ಯತ್ನ ಆರೋಪ ಕೇಳಿ ಬಂದಿತ್ತು. ಹೀಗಾಗಿ ಜುಲೈ 28ರಂದು ಬಾಸಣವಾಡಿ ಠಾಣೆಗೆ ಕರೆಸಿ ಪ್ರಕರಣ ದಾಖಲಿಸಿ, ಯಾವುದೇ ಅಪರಾಧ ಪ್ರಕರಣಗಳಲ್ಲಿ ಭಾಗಿಯಾಗದಂತೆ ಎಚ್ಚರಿಕೆ ನೀಡಿ ಮುಚ್ಚಳಿಕೆ ಬರೆಸಿಕೊಂಡು ಕಳುಹಿಸಲಾಗಿತ್ತು. ಬೈಕ್‌ನಲ್ಲಿ ಹೋಗುತ್ತಿದ್ದ ಹರೀಶ್‌ನನ್ನು ಠಾಣೆಯಿಂದಲೇ ಕಾರಿನಲ್ಲಿ ಹಿಂಬಾಲಿಸಿದ ನಾಲ್ಕೈದು ಮಂದಿ ದುಷ್ಕರ್ಮಿಗಳು ಠಾಣೆಯ ಕೂಗಳತೆ ದೂರದಲ್ಲಿಯೇ ಅಡ್ಡಗಟ್ಟಿ ಮಾರಕಾಸ್ತ್ರಗಳಿಂದ ಬರ್ಬರವಾಗಿ ಕೊಚ್ಚಿ, ತಲೆ ಮೇಲೆ ಕಲ್ಲು ಎತ್ತಿ ಹಾಕಿ ಹತ್ಯೆಗೈದು ಪರಾರಿಯಾಗಿದ್ದಾರೆ ಎಂದು ಪೊಲೀಸರು ಹೇಳಿದರು.
ನಾಲ್ಕು ವರ್ಷಗಳ ಹಿಂದೆ ಹರೀಶ್‌ನಿಂದ ಗಂಭೀರವಾಗಿ ಹಲ್ಲೆಗೊಳಗಾಗಿದ್ದ ಗುಂಪಿನಲ್ಲಿದ್ದ ಒಬ್ಬನ ನೇತೃತ್ವದಲ್ಲಿ ಈ ಕೃತ್ಯ ನಡೆದಿದೆ ಎಂಬುದು ಗೊತ್ತಾಗಿದೆ. ಈ ಸಂಬಂಧ ಸ್ಥಳಕ್ಕೆ ಧಾವಿಸಿದ ಡಿಸಿಪಿ ಶರಣಪ್ಪ ಪರಿಶೀಲಿಸಿ, ಆರೋಪಿಗಳ ಪತ್ತೆಗೆ ಎರಡು ವಿಶೇಷ ತಂಡ ರಚಿಸಿದ್ದಾರೆ. ಕ್ಷಿಪ್ರ ಕಾರ್ಯಾಚರಣೆ ನಡೆಸಿದ ಪೊಲೀಸರು ಅನುಮಾನದ ಮೇರೆಗೆ ಮೂವರನ್ನು ವಶಕ್ಕೆ ಪಡೆದುಕೊಂಡಿದ್ದಾರೆ ಎಂದು ಹಿರಿಯ ಅಧಿಕಾರಿಗಳು ಮಾಹಿತಿ ನೀಡಿದರು.
ಆಟೋ ಚಾಲಕನ ಕೊಲೆ: ಕ್ಷುಲ್ಲಕ ವಿಚಾರಕ್ಕೆ ಪರಿಚಯಸ್ಥರೇ ಮದ್ಯದ ಅಮಲಿನಲ್ಲಿ ಆಟೋ ಚಾಲಕನನ್ನು ಭೀಕರವಾಗಿ ಕೊಲೆಗೈದಿರುವ ಘಟನೆ ಜಯನಗರ ಪೊಲೀಸ್‌ ಠಾಣಾ ವ್ಯಾಪ್ತಿಯಲ್ಲಿ ನಡೆದಿದೆ. ಯಡಿಯೂರು ನಿವಾಸಿ ಆಕಾಶ್‌ ದೀಪು (32) ಕೊಲೆಯಾದ ಆಟೋ ಚಾಲಕ. ಜಯನಗರ 4ನೇ ಬ್ಲಾಕ್‌ನಲ್ಲಿರುವ ಕಾಂಪ್ಲೆಕ್ಸ್‌ ಸಮೀಪ ರಾತ್ರಿ ವೇಳೆ ಆಕಾಶ್‌ ದೀಪು ಹಾಗೂ ಪರಿಚಯಸ್ಥರು ಕಂಠಪೂರ್ತಿ ಮದ್ಯ ಸೇವಿಸಿದ್ದಾರೆ.
ಈ ವೇಳೆ ಯಾವುದೋ ಕ್ಷುಲ್ಲಕ ವಿಚಾರಕ್ಕೆ ಪರಸ್ಪರ ಗಲಾಟೆ ಮಾಡಿಕೊಂಡಿದ್ದಾರೆ. ಇದರಿಂದ ಆರೋಪಿಗಳು ಆಕ್ರೋಶಗೊಂಡಿದ್ದಾರೆ. ಮದ್ಯದ ಅಮಲಿನಲ್ಲಿದ್ದವರು ಆಕಾಶ್‌ ದೀಪು ತಲೆ ಮೇಲೆ ಕಲ್ಲುಎತ್ತಿ ಹಾಕಿ ಕೊಲೆಗೈದು ಪರಾರಿಯಾಗಿದ್ದಾರೆ. ಬುಧವಾರ ಬೆಳಗ್ಗೆ ಸಾರ್ವಜನಿಕರೊಬ್ಬರು ನೀಡಿದ ಮಾಹಿತಿ ಮೇರೆಗೆ ಸ್ಥಳಕ್ಕೆ ಭೇಟಿ ನೀಡಿ ಪರಿಶೀಲಿಸಲಾಗಿದೆ. ಆರೋಪಿಗಳ ಪತ್ತೆಗೆ ವಿಶೇಷ ತಂಡ ರಚಿಸಲಾಗಿದೆ ಎಂದು ಪೊಲೀಸರು ಹೇಳಿದರು.
ಬ್ಯಾಂಕ್‌ಗೆ ನುಗ್ಗಿ ಕೊಚ್ಚಿ ಕೊಂದಿದ್ದರು: ಜುಲೈ 19ರಂದು ರೌಡಿ ಶೀಟರ್‌ ಜೋಸೆಫ್‌ ಅಲಿಯಾಸ್‌ ಬಬ್ಲಿಯನ್ನು ಕೋರಮಂಗಲದ 8ನೇ ಹಂತದಲ್ಲಿರುವ ಯೂನಿಯನ್‌ ಬ್ಯಾಂಕ್‌ನೊಳಗೆ ಅಟ್ಟಾಡಿಸಿಕೊಂಡು ಆತನ ಪತ್ನಿ, ಮಗು ಹಾಗೂ ಬ್ಯಾಂಕ್‌ ಸಿಬ್ಬಂದಿ, ಗ್ರಾಹಕರ ಎದುರಿಗೆ ಬರ್ಬರವಾಗಿ ಕೊಚ್ಚಿ ಕೊಲೆ ಮಾಡಲಾಗಿತ್ತು. ಈ ಕೊಲೆ ಇಡೀ ನಗರವನ್ನೇ ಬೆಚ್ಚಿ ಬೀಳಿಸಿತು. ಜುಲೈನಲ್ಲೇ ಮತ್ತೊಬ್ಬ ಆಟೋ ಚಾಲಕ ಮತ್ತು ಫೈನ್ಯಾನ್ಸಿಯರ್‌ ವಿಜಯ್‌ ಕುಮಾರ್ ಹತ್ಯೆ ಮಾಡಲಾಗಿದ್ದು 35 ದಿನಗಳಲ್ಲಿ 8 ಕೊಲೆಯಾಗಿವೆ.
