ನೆರೆ ಮನೆ ವಕೀಲನನ್ನು ಕೊಲ್ಲಲು ವಿಜ್ಞಾನಿ ಸಂಚು!: ದಿಲ್ಲಿ ಕೋರ್ಟ್ ಸ್ಫೋಟದ ರಹಸ್ಯ ಬಯಲು

ಹೊಸದಿಲ್ಲಿ: ಈ ತಿಂಗಳ ಆರಂಭದಲ್ಲಿ ದಿಲ್ಲಿಯ ರೋಹಿಣಿ ಕೋರ್ಟ್‌ ಕೊಠಡಿಯಲ್ಲಿ ನಡೆದ ಸ್ಫೋಟದಲ್ಲಿ ರಕ್ಷಣಾ ಸಂಶೋಧನೆ ಅಭಿವೃದ್ಧಿ ಸಂಸ್ಥೆ (DRDO) ವಿಜ್ಞಾನಿಯೊಬ್ಬರ ಕೈವಾಡ ಇದೆ ಎಂದು ಪೊಲೀಸರು ತಿಳಿಸಿದ್ದಾರೆ. ಹಳೆಯ ವೈಷಮ್ಯದಿಂದ ನೆರೆಮನೆಯ ವಕೀಲನನ್ನು ಗುರಿಯಾಗಿಸಿ ಆ ಸ್ಫೋಟಕವನ್ನು ಅಳವಡಿಸಿದ್ದರು ಎಂದು ಆರೋಪಿಸಿದ್ದಾರೆ. ಡಿಸೆಂಬರ್ 10ರಂದು ರೋಹಿಣಿ ಕೋರ್ಟ್‌ ಆವರಣದ ಕೊಠಡಿಯೊಂದರಲ್ಲಿ ಸಂಭವಿಸಿತ್ತು. ಈ ಘಟನೆಯ ತನಿಖೆ ಪ್ರಗತಿ ಕುರಿತು ಪೊಲೀಸ್ ಆಯುಕ್ತ ರಾಕೇಶ್ ಆಸ್ಥಾನಾ ಶನಿವಾರ ಮಾಹಿತಿ ನೀಡಿದರು. ವಿಶೇಷ ಘಟಕದ ತಂಡವು ಆ ದಿನ ಆವರಣಕ್ಕೆ ಬಂದ ಸುಮಾರು 1,000 ವಾಹನಗಳನ್ನು ತಪಾಸಣೆಗೆ ಒಳಪಡಿಸಿದೆ. ಜತೆಗೆ 100ಕ್ಕೂ ಅಧಿಕ ಸಿಸಿಟಿವಿ ಕ್ಯಾಮೆರಾಗಳ ದೃಶ್ಯಾವಳಿಗಳನ್ನು ಪರಿಶೀಲಿಸಿದೆ. ಆ ದಿನ ಕೋರ್ಟ್‌ನಲ್ಲಿ ನಡೆದ ವಿಚಾರಣೆಗೆ, ಕೋರ್ಟ್‌ಗೆ ಬಂದ ಪ್ರತಿ ವ್ಯಕ್ತಿಗಳ ವಿವರಗಳನ್ನು ಕಲೆಹಾಕಿದೆ ಎಂದು ತಿಳಿಸಿದರು. ಡಿಆರ್‌ಡಿಒದಲ್ಲಿ ಹಿರಿಯ ವಿಜ್ಞಾನಿಯಾಗಿರುವ 49 ವರ್ಷದ ಭರತ್ ಭೂಷಣ್ ಕಟಾರಿಯಾ ಅವರನ್ನು ಬಂಧಿಸಲಾಗಿದೆ. ಅವರ ಮನೆಯಿಂದ ಬಾಂಬ್ ತಯಾರಿಸುವ ವಸ್ತುಗಳನ್ನು ವಶಪಡಿಸಿಕೊಳ್ಳಲಾಗಿದೆ. ಸಾಧನವನ್ನು ತಯಾರಿಸಲು ಅಮೋನಿಯಂ ನೈಟ್ರೇಟ್ ಅನ್ನು ಬಳಸಲಾಗಿತ್ತು. ಈ ವಸ್ತು ಸುಲಭವಾಗಿ ಹೊರಗಿನ ಮಾರುಕಟ್ಟೆಯಲ್ಲಿ ಲಭ್ಯವಾಗುತ್ತದೆ. ಆದರೆ ಕೋರ್ಟ್‌ನಲ್ಲಿ ಡಿನೋಟೇನರ್ ಮಾತ್ರ ಸ್ಫೋಟಗೊಂಡಿದ್ದು, ಸುಧಾರಿತ ಸ್ಫೋಟಕ ಸ್ಫೋಟಗೊಂಡಿರಲಿಲ್ಲ. ಅದು ಸ್ಫೋಟಗೊಂಡಿದ್ದರೆ ಅದರ ತೀವ್ರತೆ ಭಾರಿ ಪ್ರಮಾಣದಲ್ಲಿ ಇರುತ್ತಿತ್ತು ಎಂದು ಪೊಲೀಸರು ಹೇಳಿದರು. ಸ್ಫೋಟಕವನ್ನು ಇರಿಸಲಾಗಿದ್ದ ಲ್ಯಾಪ್‌ಟಾಪ್ ಬ್ಯಾಗ್‌, ದಿಲ್ಲಿಯಲ್ಲಿ ಗೋಡೋನ್ ಹೊಂದಿರುವ ಮುಂಬಯಿ ಮೂಲದ ಸಂಸ್ಥೆಯೊಂದರ ಲೋಗೋ ಹೊಂದಿತ್ತು. ಈ ಸಂಸ್ಥೆ ತನಿಖೆಗೆ ಸಹಾಯ ಮಾಡಿತು ಎಂದು ತಿಳಿಸಿದರು. ಭರತ್ ಭೂಷಣ್ ಕಟಾರಿಯಾ ಅವರು ವಕೀಲನ ವೇಷದಲ್ಲಿ ಕೋರ್ಟ್‌ ಒಳಗೆ ಬಂದಿದ್ದರು. ಸ್ಫೋಟದ ಬಳಿಕ ಅಲ್ಲಿಂದ ಪರಾರಿಯಾಗಿದ್ದರು. ಕಟಾರಿಯಾ ಮತ್ತು ವಕೀಲ ಅಮಿತ್ ವಸಿಷ್ಠ ಇಬ್ಬರೂ ನೆರೆಹೊರೆಯವರಾಗಿದ್ದು, ಹಳೆಯ ವಿವಾದವೊಂದು ಹಲವು ವರ್ಷಗಳಿಂದ ಅವರ ನಡುವೆ ಇತ್ತು. ನೀರಿನ ಪೂರೈಕೆ ಸೇರಿದಂತೆ ಅನೇಕ ವಿಚಾರಗಳಿಗೆ ಸಂಬಂಧಿಸಿದಂತೆ ಪರಸ್ಪರ ಹಲವು ದೂರುಗಳನ್ನು ದಾಖಲಿಸಿದ್ದರು. ಆ ದಿನ ಕೋರ್ಟ್‌ಗೆ ಹಾಜರಾಗುತ್ತಿದ್ದ ವಸಿಷ್ಠ ಅವರನ್ನು ಸಾಯಿಸಲು ಕಟಾರಿಯಾ ಸ್ಫೋಟಕವನ್ನು ನ್ಯಾಯಾಲಯದಲ್ಲಿ ಇರಿಸಿದ್ದರು ಎಂದು ಪೊಲೀಸರು ತಿಳಿಸಿದರು. ಅಷ್ಟೆಲ್ಲಾ ಭದ್ರತೆ, ತಪಾಸಣೆಗಳು ಇದ್ದರೂ ಆರೋಪಿಯು ನ್ಯಾಯಾಲಯದ ಒಳಗೆ ಸ್ಫೋಟಕವನ್ನು ಕೊಂಡೊಯ್ಯುವುದು ಹೇಗೆ ಸಾಧ್ಯವಾಯಿತು ಎಂಬ ಬಗ್ಗೆ ತನಿಖೆ ನಡೆಯುತ್ತಿದೆ. ಆರೋಪಿ ಬಾಂಬ್ ಸ್ಫೋಟಿಸಲು ಬಳಸಿದ ರಿಮೋಟ್ ಹಾಗೂ ಇತರೆ ವಸ್ತುಗಳನ್ನು ಇ-ಕಾಮರ್ಸ್ ವೆಬ್‌ಸೈಟ್ ಒಂದರಿಂದ ತರಿಸಿದ್ದರು. ಅವರು ಸ್ಫೋಟಕವನ್ನು ಹೇಗೆ ತರಿಸಿಕೊಂಡರು ಎಂಬ ಬಗ್ಗೆ ತನಿಖೆ ನಡೆಸಲಾಗುತ್ತಿದೆ.