ನೇರ ತೆರಿಗೆ ಸಂಗ್ರಹ ಶೇ.68 ಹೆಚ್ಚಳ! ₹6.92 ಲಕ್ಷ ಕೋಟಿಗೆ ಏರಿಕೆ!

ಹೊಸದಿಲ್ಲಿ: ಕಳೆದ ಏಪ್ರಿಲ್‌-ನವೆಂಬರ್‌ 23ರ ತನಕದ ಅವಧಿಯಲ್ಲಿ ಸಂಗ್ರಹ ಶೇ.68 ವೃದ್ಧಿಸಿದ್ದು, 6.92 ಲಕ್ಷ ಕೋಟಿ ರೂ.ಗೆ ಏರಿಕೆಯಾಗಿದೆ ಎಂದು ಹಣಕಾಸು ಖಾತೆ ಸಹಾಯಕ ಸಚಿವ ಪಂಕಜ್‌ ಚೌಧುರಿ ಸೋಮವಾರ ತಿಳಿಸಿದ್ದಾರೆ. ''2021-22ರ ಸಾಲಿನಲ್ಲಿನವೆಂಬರ್‌ 23ರ ವೇಳೆಗೆ 6,92,933 ಕೋಟಿ ರೂ. ನೇರ ತೆರಿಗೆ ಸಂಗ್ರಹವಾಗಿದೆ. 2020-21ರ ಇದೇ ಅವಧಿಗೆ ಹೋಲಿಸಿದರೆ ಶೇ.68 ಹೆಚ್ಚಳವಾಗಿದೆ'' ಎಂದು ಲೋಕಸಭೆಗೆ ಲಿಖಿತ ಉತ್ತರ ನೀಡಿದ್ದಾರೆ. 2020-21ರಲ್ಲಿಒಟ್ಟು 11.36 ಲಕ್ಷ ಕೋಟಿ ರೂ. ಜಿಎಸ್‌ಟಿ ಸಂಗ್ರಹವಾಗಿದೆ. ಪ್ರಸಕ್ತ ಸಾಲಿನಲ್ಲಿಅಕ್ಟೋಬರ್‌ ತನಕ 8.10 ಲಕ್ಷ ಕೋಟಿ ರೂ. ಸಂಗ್ರಹವಾಗಿದೆ ಎಂದರು. ಆದಾಯ ತೆರಿಗೆ, ವೆಲ್ತ್‌ ಟ್ಯಾಕ್ಸ್‌, ಕಾರ್ಪೊರೆಟ್‌ ತೆರಿಗೆಗಳು ನೇರ ತೆರಿಗೆಗಳಾಗಿವೆ. ಈ ಬಾರಿ ನಿರೀಕ್ಷೆಗೂ ಮೀರಿದ ವರಮಾನ ದೇಶದಲ್ಲಿ ಕಳೆದ ಅಕ್ಟೋಬರ್‌ ವರೆಗೆ ಸಂಗ್ರಹವಾಗಿರುವ ನೇರ ತೆರಿಗೆಗಳ ನಿವ್ವಳ ಮೊತ್ತ 6 ಲಕ್ಷ ಕೋಟಿ ರೂಪಾಯಿ ದಾಟಿದೆ. ಅಲ್ಲದೆ, ಪ್ರಸ್ತುತ ಆರ್ಥಿಕ ವರ್ಷದಲ್ಲಿ ಸರಾಸರಿ ಮಾಸಿಕ 'ಸರಕು ಮತ್ತು ಸೇವೆಗಳ ತೆರಿಗೆ' (ಜಿಎಸ್‌ಟಿ) ಸುಮಾರು 1.15 ಲಕ್ಷ ಕೋಟಿ ರೂಪಾಯಿಯಷ್ಟಾಗುವ ಅಂದಾಜಿದೆ. ಹೀಗಾಗಿ 2021-22ರಲ್ಲಿ ಕೇಂದ್ರ ಸರಕಾರದ ಪ್ರಮಾಣವು ಬಜೆಟ್‌ ಅಂದಾಜುಗಳನ್ನು ಮೀರಿಸಲಿದೆ ಎಂದು ಕೇಂದ್ರ ಕಂದಾಯ ಕಾರ್ಯದರ್ಶಿ ತರುಣ್ ಬಜಾಜ್ ಇತ್ತೀಚೆಗೆ ಹೇಳಿದ್ದರು. ಪೆಟ್ರೋಲ್‌ ಮತ್ತು ಡೀಸೆಲ್‌ ಮೇಲಿನ ಅಬಕಾರಿ ಸುಂಕ ಇಳಿಕೆ ಹಾಗೂ ಅಡುಗೆ ಎಣ್ಣೆ ಮೇಲಿನ ಸೀಮಾ ಸುಂಕ ಕಡಿಮೆ ಮಾಡಿದ್ದರ ಪರಿಣಾಮವಾಗಿ ಕೇಂದ್ರ ಸರಕಾರದ ಬೊಕ್ಕಸಕ್ಕೆ ಈ ವರ್ಷ ಸುಮಾರು 80,000 ಕೋಟಿ ರೂಪಾಯಿಯಷ್ಟ ನಷ್ಟ ಸಂಭವಿಸಲಿದೆ ಎಂದು ಅವರು ಪಿಟಿಐಗೆ ನೀಡಿರುವ ಸಂದರ್ಶನದಲ್ಲಿ ತಿಳಿಸಿದ್ದರು.