'ನಮ್ಮ ನಟರು ಬೇರೆ ಭಾಷೆಯಲ್ಲಿ ಬೆಳೆಯುತ್ತಿರುವುದು ನಮ್ಮ ಹೆಮ್ಮೆ' ಎಂದ 'ಮೋಹಕ ತಾರೆ' ರಮ್ಯಾ

ನಟಿ ರಮ್ಯಾಗೆ ಸ್ಯಾಂಡಲ್‌ವುಡ್‌ನಲ್ಲಿ ಈಗಲೂ ಭಾರಿ ಬೇಡಿಕೆ ಇದೆ. ಅವರು ಸಿನಿಮಾರಂಗದಿಂದ ಅಂತರ ಕಾಯ್ದುಕೊಂಡಿದ್ದರೂ, ಅವರನ್ನು ಆರಾಧಿಸುವ ಅಭಿಮಾನಿಗಳ ಸಂಖ್ಯೆಯೇನೂ ಕಮ್ಮಿ ಆಗಿಲ್ಲ. ಸದ್ಯ ಹೇಳಿರುವ ಒಂದು ಮಾತು ಅಭಿಮಾನಿಗಳಿಗೆ ಖುಷಿ ನೀಡಿದೆ. 'ನಮ್ಮ ನಟರು ಬೇರೆ ಭಾಷೆಯಲ್ಲಿ ಬೆಳೆಯುತ್ತಿರುವುದು ನಮ್ಮ ಹೆಮ್ಮೆ' ಎಂದು ರಮ್ಯಾ, ತಮ್ಮ ಇನ್‌ಸ್ಟಾಗ್ರಾಮ್‌ನಲ್ಲಿ ಪೋಸ್ಟ್ ಹಾಕಿಕೊಂಡಿದ್ದಾರೆ. ಅಷ್ಟಕ್ಕೂ ಅವರು ಹೀಗೆ ಹೇಳುವುದಕ್ಕೆ ಕಾರಣ, ನಟ ಸತೀಶ್ ನೀನಾಸಂ. ಸತೀಶ್ ಸಿನಿಮಾದ ಪೋಸ್ಟರ್ ರಿಲೀಸ್ ಮಾಡಿದ ರಮ್ಯಾನಟ ಸತೀಶ್ ನೀನಾಸಂ ಕಾಲಿವುಡ್‌ಗೆ ಕಾಲಿಟ್ಟಿದ್ದಾರೆ. ತಮಿಳಿನ ಖ್ಯಾತ ನಟ ಶಶಿಕುಮಾರ್ ಅಭಿನಯದ 'ಪಗೈವನುಕು ಅರುಳ್ವೈ' ಸಿನಿಮಾದಲ್ಲಿ ಸತೀಶ್‌, ಆಡುದೊಡ್ಡಿ ರವಿ ಎಂಬ ಪಾತ್ರ ಮಾಡಿದ್ದಾರೆ. ಇಂದು (ಸೆ.8) ಆ ಪಾತ್ರದ ಫಸ್ಟ್ ಲುಕ್ ರಿಲೀಸ್ ಆಗಿದೆ. ಅದನ್ನು ರಿಲೀಸ್ ಮಾಡಿರುವುದು ಮೋಹಕ ತಾರೆ ರಮ್ಯಾ. ಅದನ್ನು ರಿಲೀಸ್ ಮಾಡುವುದಕ್ಕೂ ಮುನ್ನ, 'ತುಂಬ ಉತ್ಸಾಹದಿಂದ ಲಾಂಚ್ ಮಾಡುತ್ತಿದ್ದೇನೆ. ಕನ್ನಡದ ನಮ್ಮ ಹೆಮ್ಮೆಯ ನಟ ಸತೀಶ್ ನೀನಾಸಂ ಅವರ 'ಪಗೈವನುಕು ಅರುಳ್ವೈ' ಚಿತ್ರದ ಪಾತ್ರದ ಪೋಸ್ಟರ್ ಇಂದು ಸಂಜೆ 5ಕ್ಕೆ. ಮೊದಲ ಬಾರಿಗೆ ಸತೀಶ್ ನೀನಾಸಂ ಅವರು ತಮಿಳಿನಲ್ಲಿ ನಟಿಸುತ್ತಿದ್ದಾರೆ. ನಮ್ಮ ನಟರು ಬೇರೆ ಭಾಷೆಯಲ್ಲಿ ಬೆಳೆಯುತ್ತಿರುವುದು ನಮ್ಮ ಹೆಮ್ಮೆ' ಎಂದು ರಮ್ಯಾ ಹೇಳಿದ್ದಾರೆ. ಪೋಸ್ಟರ್ ಲಾಂಚ್ ಮಾಡಿದ ಸಮುದ್ರಖಣಿರಮ್ಯಾ ಮಾತ್ರವಲ್ಲದೆ, ಇದೇ ಪೋಸ್ಟರ್ ಅನ್ನು ತಮಿಳಿನ ಖ್ಯಾತ ನಟ/ನಿರ್ದೇಶಕ ಸಮುದ್ರಖಣಿ ಕೂಡ ರಿಲೀಸ್ ಮಾಡಿದ್ದಾರೆ. ಸತೀಶ್ ಪಾತ್ರದ ಪೋಸ್ಟರ್ ಜೊತೆಗೆ ನಟಿ ವಾಣಿ ಭೋಜನ್ ಅವರ ಪಾತ್ರ ಪೋಸ್ಟರ್ ಕೂಡ ರಿಲೀಸ್ ಆಗಿದೆ. ಅಂದಹಾಗೆ, ಈ ಸಿನಿಮಾವು ಷೇಕ್‌ಸ್ಪಿಯರ್‌ ಅವರ 'ಮ್ಯಾಕ್‌ಬೆತ್‌' ನಾಟಕದಿಂದ ಸ್ಫೂರ್ತಿ ಪಡೆದ ಕಥೆಯಾಗಿದೆ. ಈಗಾಗಲೇ ಚಿತ್ರೀಕರಣ ಸಂಪೂರ್ಣಗೊಂಡಿದೆ. ಅನೀಸ್ ಇದರ ನಿರ್ದೇಶನ ಮಾಡಿದ್ದಾರೆ. ಚಿತ್ರದಲ್ಲಿ ಆಡುದೊಡ್ಡಿ ರವಿ ಎಂಬ ಕೈದಿಯಾಗಿ ಸತೀಶ್ ಕಾಣಿಸಿಕೊಂಡಿದ್ದಾರೆ. ನಿಜ ಜೀವನದಲ್ಲೂ ಜೈಲಿಗೆ ಹೋಗಿಬಂದ ಕೈದಿಗಳ ಜತೆ ಅವರು ನಟಿಸಿರುವುದು ವಿಶೇಷ. ಅದರ ಬಗ್ಗೆ ಅವರು ಹೇಳಿಕೊಳ್ಳುವುದು ಹೀಗೆ, 'ಈ ಚಿತ್ರದಲ್ಲಿ ನನಗೆ ಎರಡು ಶೇಡ್‌ನ ಪಾತ್ರ ಸಿಕ್ಕಿದೆ. ಜೈಲಿನಲ್ಲಿ ಸುಮಾರು 50 ಕಲಾವಿದರು ಇರುವ ದೃಶ್ಯಗಳ ಚಿತ್ರೀಕರಣ ನಡೆದಿತ್ತು. ನಿಜ ಜೀವನದಲ್ಲೂ ಕೊಲೆ, ಸುಲಿಗೆ ಮಾಡಿ ಜೈಲಿಗೆ ಹೋಗಿ ಶಿಕ್ಷೆ ಅನುಭವಿಸಿ ಬಂದ 17 ಮಂದಿ ಈ ದೃಶ್ಯದಲ್ಲಿ ನನ್ನ ಜೊತೆ ನಟಿಸಿದ್ದಾರೆ' ಎನ್ನುತ್ತಾರವರು. ಇನ್ನು, ಸ್ಯಾಂಡಲ್‌ವುಡ್‌ನಲ್ಲಿ ಸಖತ್ ಬ್ಯುಸಿ ಆಗಿರುವ ಸತೀಶ್ ಅವರು, ಕೈತುಂಬ ಸಿನಿಮಾಗಳನ್ನು ಇಟ್ಟುಕೊಂಡಿದ್ದಾರೆ. ಪೆಟ್ರೋಮ್ಯಾಕ್ಸ್ ರಿಲೀಸ್‌ಗೆ ರೆಡಿ ಇದ್ದರೆ, ರಚಿತಾ ರಾಮ್ ಜೊತೆಗೆ 'ಮ್ಯಾಟ್ನೀ' ಸಿನಿಮಾ ಮಾಡ್ತಾ ಇದ್ದಾರೆ. 'ದಸರಾ' ಸಿನಿಮಾದ ಕೊನೇ ಹಂತದ ಶೂಟಿಂಗ್ ಚಾಲ್ತಿಯಲ್ಲಿದೆ.