ನಿತೇಶ್‌ ಎಸ್ಟೇಟ್ಸ್‌ ವಿರುದ್ಧ 712 ಕೋಟಿ ವಂಚನೆ ಆರೋಪ, ಯೆಸ್‌ ಬ್ಯಾಂಕ್‌ನಿಂದ ದೂರು ದಾಖಲು
ನಾನಾ ಯೋಜನೆಗಳ ಹೆಸರಿನಲ್ಲಿ ಯೆಸ್‌ ಬ್ಯಾಂಕ್‌ನಿಂದ 712 ಕೋಟಿ ರೂಪಾಯಿ ಸಾಲ ಪಡೆದು ವಂಚಿಸಿದ ಆರೋಪದಡಿ ಬೆಂಗಳೂರಿನ ಖ್ಯಾತ ಬಿಲ್ಡರ್‌ ನಿತೇಶ್‌ ಎಸ್ಟೇಟ್‌ ವಿರುದ್ಧ ಕಬ್ಬನ್‌ ಪಾರ್ಕ್ ಪೊಲೀಸ್‌ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.
Admin
0
8
ಬೆಂಗಳೂರು: ನಾನಾ ಯೋಜನೆಗಳ ಹೆಸರಿನಲ್ಲಿ ಯೆಸ್‌ ಬ್ಯಾಂಕ್‌ನಿಂದ 712 ಕೋಟಿ ರೂ. ಸಾಲ ಪಡೆದು ವಂಚಿಸಿದ ಆರೋಪದಡಿ ನಿತೇಶ್‌ ಎಸ್ಟೇಟ್‌ ಕಂಪನಿ ವಿರುದ್ಧ ಕಬ್ಬನ್‌ ಪಾರ್ಕ್ ಪೊಲೀಸ್‌ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.
ಯೆಸ್‌ ಬ್ಯಾಂಕ್‌ನ ಮುಂಬಯಿ ಶಾಖೆ ಅಧಿಕಾರಿ ಆಶೀಶ್‌ ವಿನೋದ ಜೋಶಿ ಎಂಬುವವರು ನೀಡಿದ ದೂರಿನ ಮೇರೆಗೆ ನಿತೇಶ್‌ ಸಮೂಹ ಕಂಪನಿ ವಿರುದ್ಧ ಕಬ್ಬನ್‌ಪಾರ್ಕ್ ಪೊಲೀಸರು ಪ್ರಕರಣ ದಾಖಲಿಸಿಕೊಂಡಿದ್ದಾರೆ.
ನಿತೇಶ್‌ ಎಸ್ಟೇಟ್‌, ನಿತೇಶ್‌ ಹೌಸಿಂಗ್‌ ಡೆವಲಪ್‌ಮೆಂಟ್‌, ನಿತೀಶ್‌ ಅರ್ಬನ್‌ ಡೆವಲಪ್‌ಮೆಂಟ್‌ ಪ್ರೈ.ಲಿ., ನಿತೇಶ್‌ ಶೆಟ್ಟಿ ಪ್ರಮೋಟರ್‌, ಲಾಲ್‌ಗುಡಿ ಸಪ್ತರಿಷಿ ವೈದ್ಯನಾಥನ್‌, ಕುಮಾರ್‌ ನೆಲ್ಲೂರ್‌ ಗೋಪಾಲ್‌ ಕೃಷ್ಣ, ಸುಬ್ರಮಣಿಯನ್‌ ಅನಂತನಾರಾಯಣ್‌, ಪ್ರದೀಪ್‌ ನಾರಾಯಣ್‌, ಮಹೇಶ್‌ ಭೂಪತಿ, ಚಂದ್ರಶೇಖರ್‌ ಪ್ರಶಾಂತ್‌ ಕುಮಾರ್‌ ಮತ್ತಿತರರ ವಿರುದ್ಧ ದೂರು ದಾಖಲಾಗಿದೆ. ಈ ಕಂಪನಿಯ ಎಲ್ಲ ಶಾಖೆಗಳು ಮುಂಬೈ ಹಾಗೂ ಬೆಂಗಳೂರಿನ ಕಸ್ತೂರ ಬಾ ರಸ್ತೆಯಲ್ಲಿರುವ ಯೆಸ್‌ ಬ್ಯಾಂಕ್‌ನಲ್ಲಿ ಹಣಕಾಸು ವ್ಯವಹಾರ ನಡೆಸಿತ್ತು ಎನ್ನಲಾಗಿದೆ.
ತಮ್ಮ ಕಂಪನಿ ಯೋಜನೆಗಳಾದ ಹೈಡ್‌ ಪಾರ್ಕ್, ಕೊಲಂಬಸ್‌ ಸ್ಕ್ವೇರ್‌, ಪೀಷರ್‌ ದ್ವೀಪ, ನ್ಯೂ ಥಣಿಸಂದ್ರ ಸೇರಿದಂತೆ ವಿವಿಧ ಪ್ರಾಜೆಕ್ಟ್ ಹೆಸರಿನಲ್ಲಿ ಅಭಿವೃದ್ಧಿ ನಿರ್ಮಾಣ ಮಾಡುವುದಾಗಿ ಹೇಳಿ ಬ್ಯಾಂಕ್‌ನಿಂದ ಹಂತ ಹಂತವಾಗಿ ಸುಮಾರು 712 ಕೋಟಿ ರೂ ಸಾಲ ಪಡೆಯಲಾಗಿತ್ತು. ಕೊರೊನಾ ನೆಪ ಹೇಳಿ ಹಣ ಹಿಂತಿರುಗಿಸದೆ ಒಪ್ಪಂದದ ನಿಯಮ ಉಲ್ಲಂಘನೆ ಮಾಡಿದ್ದಾರೆ ಎಂದು ದೂರಲಾಗಿದೆ.
ನಿತೇಶ್‌ ಎಸ್ಟೇಟ್‌ ಮತ್ತು ಹೌಸಿಂಗ್‌ ಡೆವಲೆಪ್‌ಮೆಂಟ್‌ ಪ್ರೈವೈಟ್‌ ಲಿ., ನಿತೇಶ್‌ ಅರ್ಬನ್‌ ಡೆವಲೆಪ್‌ಮೆಂಟ್‌ ಸಂಸ್ಥೆಯವರು ಯಾವ ಉದ್ದೇಶಕ್ಕೆ ಸಾಲ ಪಡೆದಿದ್ದರೋ ಆ ಉದ್ದೇಶಕ್ಕೆ ಹಣ ಬಳಸಿಲ್ಲ ಎಂದು ಆರೋಪಿಸಿ ದೂರು ಸಲ್ಲಿಸಲಾಗಿದೆ. ಯೆಸ್‌ ಬ್ಯಾಂಕ್‌ನಲ್ಲಿ ಸಾಲ ಪಡೆದು, ಬೇರೊಂದು ಸಾಲ ಪಾವತಿಸಲು ಹಣ ಬಳಸಿಕೊಳ್ಳಲಾಗಿದೆ. ಆರೋಪಿಗಳಿಗೆ ನೋಟಿಸ್‌ ನೀಡಿ ದಾಖಲೆಗಳನ್ನು ಪಡೆಯಲಾಗಿದೆ. ತನಿಖೆ ಪ್ರಗತಿಯಲ್ಲಿದೆ ಎಂದು ಕೇಂದ್ರ ವಿಭಾಗದ ಡಿಸಿಪಿ ಅನುಚೇತ್‌ ಹೇಳಿದ್ದಾರೆ.
