ಕೊರೊನಾ ಲಸಿಕೆ 'ಹೋಂ ಡಿಲೆವರಿ' ಮಾಡ್ತಿದ್ದ ಖತರ್ನಾಕ್‌ ಲೇಡಿ ಡಾಕ್ಟರ್‌ ನ್ಯಾಯಾಂಗ ಬಂಧನಕ್ಕೆ..!
ಏ .23 ರಿಂದ ಈ ಆರೋಪಿಗಳು ದಂಧೆಯಲ್ಲಿ ತೊಡಗಿರುವುದು ಗೊತ್ತಾಗಿದೆ. ಪ್ರತಿದಿನ ಮಧ್ಯಾಹ್ನ 4 ರ ನಂತರ ಮನೆಯಲ್ಲಿ ಲಸಿಕೆ ನೀಡಲಾಗುತ್ತಿತ್ತು. ಸರತಿಯಲ್ಲಿ ನಿಂತು ಜನ ಲಸಿಕೆ ಪಡೆಯುತ್ತಿದ್ದರು.
Admin
0
8
: ಅರ್ಹರಿಗೆ ನೀಡಬೇಕಿದ್ದ ಕೋವಿಡ್ ಲಸಿಕೆಯನ್ನು ಹಣ ಪಡೆದು ಅಕ್ರಮವಾಗಿ ಖಾಸಗಿಯಾಗಿ ನೀಡುತ್ತಿದ್ದ ವೈದ್ಯೆಯನ್ನು ಬಿಬಿಎಂಪಿ ಸೇವೆಯಿಂದ ವಜಾಗೊಳಿಸಿದೆ. ಈಕೆಯ ಜೊತೆಗೆ ಮತ್ತೊಬ್ಬರನ್ನೂ ಬಂಧಿಸಿದ್ದ ಪೊಲೀಸರು, ಆರೋಪಿಗಳನ್ನು ನ್ಯಾಯಾಲಯಕ್ಕೆ ಹಾಜರುಪಡಿಸಿದ್ದು, ಕೋರ್ಟ್‌ ಇವರಿಗೆ ನ್ಯಾಯಾಂಗ ಬಂಧನಕ್ಕೆ ಒಳಪಡಿಸಿದೆ.
ಏನಿದು ಪ್ರಕರಣ..?: ಪಶ್ಚಿಮ ವಿಭಾಗದ ಅನ್ನಪೂರ್ಣೇಶ್ವರಿನಗರ ಪೊಲೀಸರು ಬಿಬಿಎಂಪಿ ಗುತ್ತಿಗೆ ಸೇರಿ ಇಬ್ಬರನ್ನು ಬಂಧಿಸಿದ್ದರು. ಮಂಜುನಾಥ ನಗರ ಪ್ರಾಥಮಿಕ ಆರೋಗ್ಯ ಕೇಂದ್ರದಲ್ಲಿ ಕೆಲಸ ಮಾಡುತ್ತಿದ್ದ ಮೆಡಿಕಲ್ ಆಫೀಸರ್ ಡಾ . ಪುಷ್ಟಿತಾ (25) ಮತ್ತು ಈಕೆಯ ಜತೆ ಕೆಲಸ ಮಾಡುತ್ತಿದ್ದ ಪ್ರೇಮಾ (34) ಬಂಧಿತ ಆರೋಪಿಗಳು.
ಪಿಎಚ್ಸಿಯಲ್ಲಿ ಅರ್ಹ ಫಲಾನುಭವಿಗಳಿಗೆ ನೀಡದೆ ಡಾ. ಪುಷಿತಾ , ತನ್ನ ಪರಿಚಯದ ಪ್ರೇಮಾ ಎಂಬುವರ ನಿವಾಸಕ್ಕೆ ತೆಗೆದುಕೊಂಡು ಹೋಗಿ ಖಾಸಗಿಯಾಗಿ 500 ರೂ.ಗೆ ಒಂದು ಡೋಸ್ ನೀಡುತ್ತಿದ್ದರು. ಲಸಿಕೆ ಪಡೆಯಲು ಇಚ್ಚಿಸುವವರನ್ನು ಪ್ರೇಮಾ ತನ್ನ ಮನೆಗೆ ಕರೆಸಿಕೊಳ್ಳುತ್ತಿದ್ದಳು.
ಏ .23 ರಿಂದ ಈ ಆರೋಪಿಗಳು ದಂಧೆಯಲ್ಲಿ ತೊಡಗಿರುವುದು ಗೊತ್ತಾಗಿದೆ. ಪ್ರತಿದಿನ ಮಧ್ಯಾಹ್ನ 4 ರ ನಂತರ ಮನೆಯಲ್ಲಿ ಲಸಿಕೆ ನೀಡಲಾಗುತ್ತಿತ್ತು. ಸರತಿಯಲ್ಲಿ ನಿಂತು ಜನ ಲಸಿಕೆ ಪಡೆಯುತ್ತಿದ್ದರು. ಪ್ರೇಮಾ ಮನೆಯಲ್ಲಿ ವ್ಯಾಕ್ಸಿನ್‌ಗಳನ್ನು ಇರಿಸುವ ಕ್ಯಾರಿಯರ್, ಲಸಿಕೆ ಇರುವ ಮತ್ತು ಖಾಲಿಯಾಗಿರುವ ಬಾಟಲಿಗಳು (ವಯಲ್) , ಸಿರಿಂಜ್‌ಗಳು ಪತ್ತೆಯಾಗಿವೆ. ಪ್ರಕರಣದ ತನಿಖೆ ಮುಂದುವರಿದಿದೆ.
ಈ ದಂಧೆಯಲ್ಲಿ ಬೇರೆ ವ್ಯಕ್ತಿಗಳು ಭಾಗಿಯಾಗಿರುವ ಕುರಿತು ಪರಿಶೀಲನೆ ನಡೆದಿದೆ ಎಂದು ಪಶ್ಚಿಮ ವಿಭಾಗ ಡಿಸಿಪಿ ಸಂಜೀವ್ ಎಂ . ಪಾಟೀಲ್ ತಿಳಿಸಿದರು . ಆರೋಪಿ ಡಾ. ಪುಷ್ಟಿತಾ ಕಳೆದ ಆರು ತಿಂಗಳಿಂದ ಮಂಜುನಾಥ ನಗರ ಪಿಎಚ್ಸಿಯಲ್ಲಿ ಗುತ್ತಿಗೆ ಆಧಾರದ ಮೇಲೆ ಕೆಲಸ ಮಾಡುತ್ತಿದ್ದರು.
ಸಿಕ್ಕಿಬಿದ್ದಿದ್ದು ಹೇಗೆ?: ಅಕ್ರಮ ಲಸಿಕೆ ನೀಡಿಕೆ ಮಾಹಿತಿ ಪಡೆದ ಪಶ್ಚಿಮ ವಿಭಾಗದ ಅನ್ನಪೂರ್ಣೇಶ್ವರಿ ನಗರ ಠಾಣೆ ಇನ್ಸ್‌ಪೆಕ್ಟರ್‌ ಲೋಹಿತ್ ಅವರು ಖುದ್ದಾಗಿ ಲಸಿಕೆ ಪಡೆಯುವವರ ಸೋಗಿನಲ್ಲಿ ಪ್ರೇಮಾ ಮನೆಗೆ ತೆರಳಿದ್ದಾರೆ. ಈ ವೇಳೆ ಕೋವಿಶೀಲ್ಡ್‌ ಲಸಿಕೆ ನೀಡುತ್ತಿರುವುದು ಖಚಿತವಾಗಿದೆ. ನಂತರ ಪೊಲೀಸರ ತಂಡ ಮನೆಯಲ್ಲಿ ಶೋಧ ನಡೆಸಿ ಆರೋಪಿಗಳನ್ನು ಬಂಧಿಸಿದೆ.
ನೋಂದಣಿ ಮಾಡುತ್ತಿರಲಿಲ್ಲ: ಲಸಿಕೆ ಪಡೆಯುವವರು ಆನ್‌ಲೈನ್‌ನಲ್ಲಿ ನೋಂದಣಿ ಮಾಡಿಕೊಳ್ಳಬೇಕು. ಲಸಿಕೆ ನೀಡುವ ಆರೋಗ್ಯ ಕೇಂದ್ರದಲ್ಲೂ ಲಸಿಕೆ ನೀಡುವ ಮೊದಲು ನೋಂದಣಿ ಮಾಡಿಕೊಳ್ಳಲಾಗುತ್ತದೆ. ಅಲ್ಲದೆ, ನೇರವಾಗಿ ಹೋಗುವವರಿಗೂ ನೋಂದಣಿ ಮಾಡಿಕೊಳ್ಳಲಾಗುತ್ತದೆ. ಲಸಿಕೆ ಪಡೆದವರ ಪೋನ್ ನಂಬರ್ ಪಡೆಯಲಾಗುತ್ತದೆ. ಆದರೆ, ಇಲ್ಲಿ ಕಾನೂನು ಬಾಹಿರವಾಗಿ ಲಸಿಕೆ ನೀಡುತ್ತಿದ್ದ ಕಾರಣ, ಈ ಎಲ್ಲ ಪ್ರಕ್ರಿಯೆಗಳನ್ನು ನಡೆಸುತ್ತಿರಲಿಲ್ಲ ಎನ್ನುವುದು ಪ್ರಾಥಮಿಕ ತನಿಖೆಯಲ್ಲಿ ಕಂಡು ಬಂದಿದೆ ಎಂದು ಅಧಿಕಾರಿ ತಿಳಿಸಿದರು.
