ಕ್ರೆಡಿಟ್‌, ಡೆಬಿಟ್‌ ಕಾರ್ಡ್‌ ಆಟೋ-ಡೆಬಿಟ್‌ ನಿಯಮಾವಳಿ ಅ. 1ರಿಂದ ಬದಲು
ಡೆಬಿಟ್‌ ಕಾರ್ಡ್‌ ಅಥವಾ ಕ್ರೆಡಿಟ್‌ ಕಾರ್ಡ್‌ ಇಲ್ಲವೇ ಮೊಬೈಲ್‌ ವ್ಯಾಲೆಟ್‌ನ ನಿಯಮಿತವಾಗಿ ಆವರ್ತನೆಯಾಗುವ ಆಟೋ - ಡೆಬಿಟ್‌ ಪೇಮೆಂಟ್‌ ವ್ಯವಸ್ಥೆಯ ನಿಯಮಗಳು ಮುಂದಿನ ಅಕ್ಟೋಬರ್‌ 1 ರಿಂದ ಬದಲಾಗಲಿವೆ.
Admin
0
5
ಹೊಸದಿಲ್ಲಿ: ನೀವು ಅಥವಾ ಇಲ್ಲವೇ ಮೊಬೈಲ್‌ ವ್ಯಾಲೆಟ್‌ ಬಳಸಿ ನಿಯಮಿತವಾಗಿ ಆವರ್ತನೆಯಾಗುವ ಆಟೋ - ಡೆಬಿಟ್‌ ಪೇಮೆಂಟ್‌ ವ್ಯವಸ್ಥೆ ಮಾಡಿಕೊಂಡಿದ್ದೀರಾ? ಹಾಗಾದರೆ ಮುಂದಿನ ಅಕ್ಟೋಬರ್‌ 1 ರಿಂದ ಇದಕ್ಕೆ ಸಂಬಂಧಿಸಿದ ಹೊಸ ನಿಯಮಾವಳಿ ಜಾರಿಯಾಗಲಿದೆ.
ಈ ಹೊಸ ನಿಯಮದ ಪ್ರಕಾರ, ಡೆಬಿಟ್‌ ಕಾರ್ಡ್‌, ಕ್ರೆಡಿಟ್‌ ಕಾರ್ಡ್‌ ಇಲ್ಲವೇ ಮೊಬೈಲ್‌ ವ್ಯಾಲೆಟ್‌ ಬಳಸಿ ಆಟೋ - ಡೆಬಿಟ್‌ ಪೇಮೆಂಟ್‌ ವ್ಯವಸ್ಥೆ ಮಾಡುವುದಿದ್ದರೆ, ಬ್ಯಾಂಕ್‌ಗಳು 24 ಗಂಟೆ ಮೊದಲು ಗ್ರಾಹಕರಿಗೆ ಸೂಚನೆ ನೀಡಬೇಕಾಗುತ್ತದೆ. ಹಾಗೂ ಗ್ರಾಹಕರು ದೃಢೀಕರಣ ನೀಡಿದ ಬಳಿಕವಷ್ಟೇ ಹಣ ಕಡಿತವಾಗುತ್ತದೆ. ಹಾಗೂ 5,000 ರೂ.ಗಿಂತ ಮೇಲ್ಪಟ್ಟ ಮೊತ್ತದ ಕಡಿತಕ್ಕೆ ಇದು ಅನ್ವಯಿಸುತ್ತದೆ.
ನೂತನ ಹೆಚ್ಚುವರಿ ದೃಢೀಕರಣ ಪ್ರಕ್ರಿಯೆಯಲ್ಲಿ ಬ್ಯಾಂಕ್‌ಗಳು ಗ್ರಾಹಕರಿಗೆ ಎಸ್‌ಎಂಎಸ್‌ ಅಥವಾ ಇ - ಮೇಲ್‌ ಮೂಲಕ ನೋಟಿಫಿಕೇಶನ್‌ ಅನ್ನು ಕಳುಹಿಸಬಹುದು. ಈ ಸೂಚನೆಯಲ್ಲಿ ಕಾರ್ಡ್‌ದಾರರಿಗೆ ವ್ಯಾಪಾರಿಯ ಹೆಸರು, ವರ್ಗಾವಣೆಯಾಗಬೇಕಿರುವ ಹಣದ ಮೊತ್ತ, ದಿನಾಂಕ, ಸಮಯ, ವರ್ಗಾವಣೆಯ ರೆಫರೆನ್ಸ್‌ ಸಂಖ್ಯೆ, ಕಡಿತಕ್ಕೆ ಕಾರಣ ಇತ್ಯಾದಿ ವಿವರಗಳು ಇರಲಿವೆ.
ಯಾವುದಕ್ಕೆ ಅನ್ವಯಿಸಲ್ಲ?
ಹೀಗಿದ್ದರೂ, ಮ್ಯೂಚುವಲ್‌ ಫಂಡ್‌ನ ಎಸ್‌ಐಪಿ, ವಿಮೆ ಪ್ರೀಮಿಯಂ, ಬ್ಯಾಂಕ್‌ ಖಾತೆಯಿಂದಲೇ ಸ್ಟ್ಯಾಂಡಿಂಗ್‌ ಇನ್‌ಸ್ಟ್ರಕ್ಷನ್‌ ಮೂಲಕ ಕಡಿತವಾಗುವ ಮೊತ್ತಗಳಿಗೆ ಇದು ಅನ್ವಯವಾಗುವುದಿಲ್ಲ. 5,000 ರೂ.ಗಿಂತ ಕೆಳಗಿನ ಮೊತ್ತದ ಆಟೋ - ಡೆಬಿಟ್‌ಗೂ ಈ ನಿಮಯ ಅನ್ವಯವಾಗುವುದಿಲ್ಲ.
ಯಾವ ಪೇಮೆಂಟ್‌ಗಳಿಗೆ ಪರಿಣಾಮ?
ನೂತನ ನಿಯಮಗಳು ಡೆಬಿಟ್‌ ಕಾರ್ಡ್‌ / ಕ್ರೆಡಿಟ್‌ ಕಾರ್ಡ್‌ ಅಥವಾ ಮೊಬೈಲ್‌ ವ್ಯಾಲೆಟ್‌ಗಳನ್ನು ಒಟಿಟಿ ತಂತ್ರಜ್ಞಾನ ವಲಯದ ನೆಟ್‌ಫ್ಲಿಕ್ಸ್‌, ಅಮೆಜಾನ್‌ ಪ್ರೈಮ್‌, ಮ್ಯೂಸಿಕ್‌ ಆ್ಯಪ್‌ಗಳಾದ ಸ್ಪೋಟಿಫೈ, ಆ್ಯಪಲ್‌ ಮ್ಯೂಸಿಕ್‌, ಮೊಬೈಲ್‌ ಬಿಲ್‌ ಪಾವತಿ, ವಿಮೆ ಪ್ರೀಮಿಯಂ ಪಾವತಿ, ಯುಟಿಲಿಟಿ ಬಿಲ್‌ ಪಾವತಿಗಳಿಗೆ ಅನ್ವಯಿಸುತ್ತದೆ. ಪುನರಾವರ್ತನೆಯಾಗುವ ಪಾವತಿಗೆ ಮಾತ್ರ ಅನ್ವಯವಾಗುತ್ತದೆ. ಒಂದು ಸಲ ಮಾತ್ರ ಪೇಮೆಂಟ್‌ ಮಾಡುವುದಿದ್ದರೆ ಅನ್ವಯವಾಗುವುದಿಲ್ಲ. ಉದಾಹರಣೆಗೆ ನೆಟ್‌ಫ್ಲಿಕ್ಸ್‌ನಲ್ಲಿ ಪ್ರತಿ ತಿಂಗಳು 8ನೇ ದಿನಾಂಕ ಶುಲ್ಕ ಪಾವತಿಗೆ ಸಂಬಂಧಿಸಿ ಡೆಬಿಟ್‌ ಕಾರ್ಡ್‌, ಕ್ರೆಡಿಟ್‌ ಕಾರ್ಡ್‌ ವಿವರವನ್ನು ಬಯಿಸಿದರೆ, ಆಗ ಹೊಸ ನಿಯಮಗಳು ಅನ್ವಯವಾಗುತ್ತದೆ.
ಈ ಹೆಚ್ಚುವರಿ ದೃಢೀಕರಣದ ನಿಯಮಾವಳಿಗಳು 2021ರ ಏಪ್ರಿಲ್‌ನಿಂದಲೇ ಜಾರಿಯಾಗಬೇಕಿತ್ತು. ಆದರೆ ಎಚ್‌ಡಿಎಫ್‌ಸಿ ಬ್ಯಾಂಕ್‌, ಐಸಿಐಸಿಐ ಬ್ಯಾಂಕ್‌, ಸ್ಟೇಟ್‌ ಬ್ಯಾಂಕ್‌ ಆಫ್‌ ಇಂಡಿಯಾ ಮೊದಲಾದ ಬ್ಯಾಂಕ್‌ಗಳು ಸಿದ್ಧತೆ ನಡೆಸಿರಲಿಲ್ಲವಾದ್ದರಿಂದ ಗಡುವನ್ನು 2021ರ ಅಕ್ಟೋಬರ್‌ 1ಕ್ಕೆ ಮುಂದೂಡಲಾಗಿತ್ತು.
