'ಹಿಂದಿ ಗೊತ್ತಿಲ್ವಾ' ಎಂದ ಝೊಮ್ಯಾಟೋ ಸಿಬ್ಬಂದಿ ಸೇವೆಯಿಂದ ವಜಾ.. ಕೆಲವೇ ಹೊತ್ತಲ್ಲಿ ಮರು ನೇಮಕ..!

: ಆನ್‌ಲೈನ್‌ ಆಹಾರ ವಲಯದ ಕಂಪನಿಯ ಕಸ್ಟಮರ್‌ ಕೇರ್‌ ವಿಭಾಗದ ಉದ್ಯೋಗಿಯೊಬ್ಬರು ಗ್ರಾಹಕರ ಜತೆ ಸಂಭಾಷಣೆ ವೇಳೆ, ' ರಾಷ್ಟ್ರೀಯ ಭಾಷೆಯಾಗಿದ್ದು ಎಲ್ಲರೂ ಸ್ವಲ್ಪವಾದರೂ ತಿಳಿದಿರಲೇಬೇಕು' ಎಂದು ಹೇಳಿದ್ದಲ್ಲದೆ ಹಣ ಮರುಪಾವತಿ ಮಾಡಲು ನಿರಾಕರಿಸಿದ ಘಟನೆ ತೀವ್ರ ವಿವಾದ ಸೃಷ್ಟಿಸಿದೆ. ಈ ವಿವಾದ ಸಾಮಾಜಿಕ ಜಾಲ ತಾಣಗಳಲ್ಲಿ ವೈರಲ್‌ ಆದ ಬೆನ್ನಲ್ಲೇ ಉದ್ಯೋಗಿಯನ್ನು ವಜಾಗೊಳಿಸಿದ ಝೊಮ್ಯಾಟೋ, ನಂತರ ಗ್ರಾಹಕನ ಕ್ಷಮೆ ಯಾಚಿಸಿತು. ಅದಾದ ಕೆಲವೇ ಗಂಟೆಗಳಲ್ಲಿ ಉದ್ಯೋಗಿಯ ಪ್ರಮಾದದಿಂದ ತಪ್ಪಾಗಿದೆ ಎಂದು ಸ್ಪಷ್ಟೀಕರಣ ನೀಡಿ, ವಜಾಗೊಳಿಸಿದ್ದ ಉದ್ಯೋಗಿಯನ್ನು ಮತ್ತೆ ನೇಮಕ ಮಾಡಿಕೊಂಡಿತು. ಆಗಿದ್ದೇನು?: ತಮಿಳುನಾಡಿನ ವಿಕಾಸ್‌ ಎನ್ನುವವರು ಝೊಮ್ಯಾಟೋದಿಂದ ಆಹಾರ ಆರ್ಡರ್‌ ಮಾಡಿದ್ದರು. ಆದರೆ ಅದು ತಲುಪಲಿಲ್ಲವಾದ್ದರಿಂದ ಕಸ್ಟಮರ್‌ ಕೇರ್‌ ವಿಭಾಗಕ್ಕೆ ಕರೆ ಮಾಡಿದ್ದರು. ಹಾಗೂ ದುಡ್ಡು ವಾಪಸ್‌ ಕೊಡಿ ಎಂದಿದ್ದರು. ಕಸ್ಟಮರ್‌ ಕೇರ್‌ ಏಜೆಂಟ್‌ ಹಿಂದಿಯಲ್ಲಿ ಮಾತನಾಡಲು ಹೇಳಿದರು. 'ಹಿಂದಿ ಬರುವುದಿಲ್ಲ, ತಮಿಳು ಗೊತ್ತಿದ್ದವರನ್ನು ಕರೆಯಿಸಿ' ಎಂದಾಗ, ಕಸ್ಟಮರ್‌ ಕೇರ್‌ ಏಜೆಂಟ್‌, 'ಎಲ್ಲರೂ ಸ್ವಲ್ಪವಾದರೂ ಹಿಂದಿ ಕಲಿಯಬೇಕು. ಅದು ರಾಷ್ಟ್ರ ಭಾಷೆ' ಎಂದು ಪಾಠ ಮಾಡಿದ್ದ ಎಂದು ವಿಕಾಸ್‌ ಟ್ವೀಟ್‌ ಮಾಡಿದ್ದಾರೆ. ಈ ಸುದ್ದಿ ವೈರಲ್‌ ಆಗುತ್ತಿದ್ದಂತೆ ಅನೇಕ ಮಂದಿ ಝೊಮ್ಯಾಟೋ ವಿರುದ್ಧ ಆಕ್ರೋಶ ವ್ಯಕ್ತಪಡಿಸಿದರು. ಒಂದೆಡೆ ತನ್ನ ಉದ್ಯೋಗಿಯಿಂದ ತಪ್ಪಾಗಿದೆ ಎಂದು ಕ್ಷಮೆಯನ್ನೂ ಕೇಳಿ ಆತನನ್ನು ನೌಕರಿಯಿಂದ ವಜಾ ಮಾಡಿದ್ದೇವೆ ಎಂದು ಹೇಳಿಕೊಂಡಿದ್ದ ಸಂಸ್ಥೆ, ಕೆಲವೇ ಗಂಟೆಗಳಲ್ಲಿ ಆತನನ್ನು ಮರು ನೇಮಕ ಮಾಡಿಕೊಂಡ ನಡೆಗೆ ನೆಟ್ಟಿಗರು ಆಕ್ರೋಶ ವ್ಯಕ್ತಪಡಿಸುತ್ತಿದ್ದಾರೆ. ಕೆಲವು ನೆಟ್ಟಿಗರು ಒಂದು ಹೆಜ್ಜೆ ಮುಂದೆ ಹೋಗಿದ್ದಾರೆ. ಭಾಷೆ ಕುರಿತಾದ ಆರೋಪಗಳು ಬಂದ ಕೂಡಲೇ ಉದ್ಯೋಗಿಗಳನ್ನು ವಜಾ ಮಾಡುವುದೇಕೆ? ತೆರೆ ಮರೆಯಲ್ಲಿ ಮತ್ತೆ ಮರು ನೇಮಕ ಮಾಡಿಕೊಳ್ಳುವ ಸರ್ಕಸ್ ಕೂಡಾ ಏಕೆ? ನಿಮ್ಮ ಸಿಬ್ಬಂದಿಗೆ ಭಾಷೆಯ ಕುರಿತು ಮಾಹಿತಿ ನೀಡಿ, ಎಲ್ಲಕ್ಕಿಂತಾ ಹೆಚ್ಚಾಗಿ ಹಿಂದಿ ರಾಷ್ಟ್ರೀಯ ಭಾಷೆ ಅಲ್ಲ ಎಂದು ಜ್ಞಾನ ತುಂಬಿ ಎಂದು ತಾಕೀತು ಮಾಡಿದ್ದಾರೆ.