ಹೆಂಡ್ತಿ ಜೊತೆ ಸಲುಗೆಯಿಂದ ಇದ್ದ ಗೆಳೆಯನನ್ನೇ ಕೊಂದ..! ತಿರುಪತಿಗೆ ಹೋಗಿ ಮುಡಿ ಕೊಟ್ಟ..!

: ಇತ್ತೀಚೆಗೆ ಟೆಂಪೋ ಟ್ರಾವೆಲರ್‌ ಚಾಲಕನನ್ನು ಬರ್ಬರವಾಗಿ ಕೊಲೆಗೈದಿದ್ದ ಪ್ರಕರಣದ ಸಂಬಂಧ ಐವರು ಆರೋಪಿಗಳನ್ನು ಬೆಂಗಳೂರಿನ ಬ್ಯಾಟರಾಯನಪುರ ಠಾಣೆ ಪೊಲೀಸರು ಬಂಧಿಸಿದ್ದಾರೆ. ಹನುಮಂತ ನಗರ ನಿವಾಸಿ ಭಾಸ್ಕರ್‌ (46), ಆತನ ಸ್ನೇಹಿತರಾದ ಶ್ರೀನಿವಾಸ್‌ ಅಲಿಯಾಸ್‌ ಮೇಕೆ (33), ಗಿರೀಶ್‌ (30), ಪರಮೇಶ್‌ (37) ಮತ್ತು ಮಂಜುನಾಥ್‌ (36) ಬಂಧಿತರು. ಆರೋಪಿಗಳು ಅಕ್ಟೋಬರ್ 22ರ ತಡ ರಾತ್ರಿ ಬ್ಯಾಟರಾಯನಪುರ ಠಾಣಾ ವ್ಯಾಪ್ತಿಯ ಮಹಾವೀರ್‌ ಜೈನ್‌ ಆಸ್ಪತ್ರೆಯ ಹಿಂಭಾಗದ ನೈಸ್‌ ರಸ್ತೆ ಬಳಿ ಟೆಂಪೋ ಟ್ರಾವೆಲರ್‌ ಚಾಲಕ, ಆರ್‌. ಆರ್‌. ನಗರದ ಚಂದ್ರಶೇಖರ್‌ ಎಂಬಾತನನ್ನು ಕೊಲೆಗೈದಿದ್ದರು ಎಂದು ಪೊಲೀಸರು ತಿಳಿಸಿದರು. ಆರೋಪಿಗಳ ಪೈಕಿ ಭಾಸ್ಕರ್‌ ತರಕಾರಿ ವ್ಯಾಪಾರಿಯಾಗಿದ್ದು, ಶ್ರೀನಿವಾಸ್‌, ಗಿರೀಶ್‌ ಕಾರು ಚಾಲಕರಾಗಿದ್ದಾರೆ. ಪರಮೇಶ್‌ ಮರಗೆಲಸ, ಮಂಜುನಾಥ್‌ ಜೆರಾಕ್ಸ್‌ ಯಂತ್ರಗಳ ರಿಪೇರಿ ಕೆಲಸ ಮಾಡಿಕೊಂಡಿದ್ದರು. ಎಲ್ಲರೂ ಬಾಲ್ಯ ಸ್ನೇಹಿತರಾಗಿದ್ದಾರೆ ಎಂದು ಹೇಳಿದರು. ಕೊಲೆಯಾದ ಚಂದ್ರಶೇಖರ್‌ ಈ ಮೊದಲು ತರಕಾರಿ ವ್ಯಾಪಾರ ಮಾಡುವಾಗ ಭಾಸ್ಕರ್‌ ಪತ್ನಿಯನ್ನು ಪರಿಚಯ ಮಾಡಿಕೊಂಡಿದ್ದ. ಬಳಿಕ ಇಬ್ಬರ ನಡುವೆ ಸಲುಗೆ ಬೆಳೆದು ಚಂದ್ರಶೇಖರ್‌ ಆಕೆಯ ಜತೆ ಅನೈತಿಕ ಸಂಬಂಧ ಹೊಂದಿದ್ದ. ಜತೆಗೆ ಭಾಸ್ಕರ್‌ ಜತೆಯೂ ಹಣಕಾಸು ವ್ಯವಹಾರ ಇಟ್ಟುಕೊಂಡಿದ್ದ. ಪತ್ನಿ ಜತೆಗಿನ ಅಕ್ರಮ ಸಂಬಂಧ ವಿಚಾರವಾಗಿ ಭಾಸ್ಕರ್‌, ಚಂದ್ರಶೇಖರ್‌ಗೆ ಸಾಕಷ್ಟು ಬಾರಿ ಎಚ್ಚರಿಕೆ ನೀಡಿದ್ದ. ಅಲ್ಲದೆ, ಹಣಕಾಸು ವಿಚಾರವಾಗಿಯೂ ಜಗಳ ನಡೆಸಿದ್ದ. ಚಂದ್ರಶೇಖರ್‌ ತರಕಾರಿ ವ್ಯಾಪಾರದಲ್ಲಿ ನಷ್ಟ ಹೊಂದಿ ಊರಿಗೆ ತೆರಳಿದ್ದ. ಕೆಲ ತಿಂಗಳ ಹಿಂದಷ್ಟೇ ಬೆಂಗಳೂರಿಗೆ ಬಂದು ಆರ್‌. ಆರ್‌. ನಗರದಲ್ಲಿ ಮನೆ ಮಾಡಿಕೊಂಡು, ಟೆಂಪೋ ಟ್ರಾವೆಲರ್‌ ಚಾಲಕನಾಗಿದ್ದ. ಈ ವೇಳೆಯೂ ಭಾಸ್ಕರ್‌ ಪತ್ನಿ ಜತೆ ಚಂದ್ರಶೇಖರ್ ಅಕ್ರಮ ಸಂಬಂಧ ಮುಂದುವರಿಸಿದ್ದ. ಅದೇ ವಿಚಾರವಾಗಿ ಭಾಸ್ಕರ್‌ ಹಾಗೂ ಆತನ ಸಹಚರರು ಚಂದ್ರಶೇಖರ್‌ ಹತ್ಯೆಗೆ ಸಂಚು ರೂಪಿಸಿದ್ದರು ಎಂಬುದು ಪೊಲೀಸರ ತನಿಖೆಯಿಂದ ಬೆಳಕಿಗೆ ಬಂದಿದೆ. ಕುಡಿದ ಮತ್ತಿನಲ್ಲಿ ..! ಮತ್ತೊಂದೆಡೆ ಅಕ್ಟೋಬರ್ 22ರಂದು ಚಂದ್ರಶೇಖರ್‌, ಭಾಸ್ಕರ್‌ಗೆ ಕರೆ ಮಾಡಿ ಹಣಕಾಸಿನ ವಿಚಾರ ಮಾತನಾಡಬೇಕೆಂದು ಬ್ಯಾಟರಾಯನಪುರದ ಜೈನ್‌ ಆಸ್ಪತ್ರೆ ಹಿಂಭಾಗದ ನೈಸ್‌ ರಸ್ತೆ ಬಳಿ ಕರೆಸಿಕೊಂಡಿದ್ದ. ಅದೇ ವೇಳೆ ಸುಮಾರು 10-15 ದಿನಗಳಿಂದ ಕೊಲೆಗೆ ಸಂಚು ರೂಪಿಸುತ್ತಿದ್ದ ಭಾಸ್ಕರ್‌, ತನ್ನ ಬಾಲ್ಯ ಸ್ನೇಹಿತರ ಜತೆ ಹೋಗಿ, ಕಂಠ ಪೂರ್ತಿ ಮದ್ಯ ಸೇವಿಸಿ ಬಳಿಕ ಮಾರಕಾಸ್ತ್ರಗಳಿಂದ ಹಲ್ಲೆ ನಡೆಸಿ, ಕಲ್ಲುಎತ್ತಿ ಹಾಕಿ ಕೊಲೆಗೈದಿದ್ದರು ಎಂದು ಪೊಲೀಸರು ಹೇಳಿದರು. ತಿರುಪತಿಗೆ ಹೋಗಿದ್ದ ಆರೋಪಿಗಳು! ಆರೋಪಿಗಳ ಪೈಕಿ ಪರಮೇಶ್‌, ಮಂಜುನಾಥ್‌ ತಮಿಳುನಾಡು, ಮೈಸೂರು ಭಾಗದಲ್ಲಿ ಸುತ್ತಾಡಿ ಅಕ್ಟೋಬರ್ 24ರಂದು ಕೆಂಗೇರಿ ಸಮೀಪ ಓಡಾಡುತ್ತಿದ್ದರು. ಈ ಮಾಹಿತಿ ಮೇರೆಗೆ ಆರೋಪಿಗಳನ್ನು ವಶಕ್ಕೆ ಪಡೆಯಲಾಗಿತ್ತು. ಇನ್ನು ಭಾಸ್ಕರ್‌, ಮೇಕೆ ಶ್ರೀನಿವಾಸ್‌, ಗಿರೀಶ್‌ ಕೃತ್ಯವೆಸಗಿದ ಬಳಿಕ ನೇರವಾಗಿ ಆಂಧ್ರ ಪ್ರದೇಶದ ತಿರುಪತಿ ದೇವಾಲಯಕ್ಕೆ ಹೋಗಿ ದೇವರ ದರ್ಶನ ಪಡೆದಿದ್ದಾರೆ. ಈ ವೇಳೆ ಶ್ರೀನಿವಾಸ್‌ ಪೊಲೀಸರಿಂದ ತಪ್ಪಿಸಿಕೊಳ್ಳಲು ದೇವರಿಗೆ ಮುಡಿ ಕೊಟ್ಟಿದ್ದಾನೆ ಎಂದು ಪೊಲೀಸ್‌ ಮೂಲಗಳು ತಿಳಿಸಿವೆ.